Go Neela Bosupi Phatlalatsa

Go lemogilwe gore go neela bosupi re dirisa tafole kgotsa kolotsana ya dikgatiso go thusa batho go tla mo boammaaruring. (Joh. 6:44) Ka jalo, bagolwane ba kgothaleditswe go rulaganya bodiredi jwa phatlalatsa mo mafelong a batho ba fetang ka bontsi mo go one mo tshimong ya phuthego ya lona. E re ka dikolotsana tseno di sa nnele ruri mo lefelong le le lengwe, ga go tlhokege gore re kope tetla mo balaoding. Di ka dirisiwa ke bomang? Ke baboledi ba ba nang le temogo, seriti le bokgoni jwa go simolola metlotlo. Dilo tse di latelang ke tse baboledi ba tshwanetseng go di dira le tse ba sa tshwanelang go di dira gore ba atlege.

O Tshwanetse go:

Nna botsalano o bo o ipaakanyetse go thusa bafetikatsela ka dikgatiso tse ba ka di tlhokang. Baboledi ba bangwe bone ba nyenya go tswa pelong ba bo ba dumedisa ba le botsalano. Fa mongwe a leba mo tafoleng fa a feta, o ka nna wa re, “O ka itseela e o e ratang.”
Ema dikgato di se kae go tswa mo tafoleng. Mo mafelong a mangwe baboledi ba bone go le molemo go dira jalo. Bangwe ba lemogile gore fa ba le gaufi le ditafole bafetikatsela ba okaoka go ema, ka jalo ba emela kgakajana ba bo ba atamela fa ba bona mongwe a ema. Fa motho a atamela tafole ya dikgatiso, leka go tlotla le ene gongwe ka go mmotsa jaana, “A o kile wa ipotsa potso eno?”
Dirisa Baebele ka metlha fa o bua le batho.
Tlhalosetsa motho ope fela yo o tsayang dikgatiso tse re tshwarang dithuto ka tsone jaaka buka ya Baebele e Ruta Eng? gore thuto ya Baebele e tshwarwa jang. Mmontshe bidio ya Ke Eng fa o Tshwanetse go Ithuta Baebele? mo sedirisiweng sa ileketeroniki.
Kwala tshedimosetso ya batho ba ba kgatlhegang fa go kgonega.