Go Tokafatsa Bokgoni Jwa Rona mo Bodireding—Tlotla le Batho Gore o Feleletse o ba Rerela

Jesu o kgonne go rerela mosadi wa Mosamarea ka gonne o simolotse fela ka go tlotla le ene. Re ka tokafatsa jang bokgoni jwa rona jwa go tlotla fela le batho?

• Bua le mongwe le mongwe yo o kopanang le ene. Le fa Jesu a ne a lapile o simolotse fela ka go kopa metsi. O ka simolola ka go dumedisa motho yo o kopanang le ene o bo o bua ka sengwe le sengwe fela se se diregang mo tikologong ya lona. Ka sekai, o ka bua le ene ka maemo a bosa. O se ka wa lebala gore maikaelelo a gago ke go simolola motlotlo fela, ka jalo tlotla ka sengwe le sengwe se a ka tswang a batla go bua ka sone. Fa e le gore ga a batle go bua, mo tlogele, o tla leka gape ka motho yo mongwe. Kopa Jehofa gore a go thuse go nna pelokgale.—Neh 2:4; Dit 4:29.

• Batla ditsela tsa go rerela batho mme fa o tlotla le motho o se ka wa itlhaganelela go mo rerela. Letla motlotlo wa lona gore o go thuse go dira jalo. Fa o ka itlhaganelela go mo rerela, seo se ka dira gore motho yoo a se ka a batla go tlotla le wena. O se ka wa kgobega marapo fa motlotlo wa lona o fela o ise o mo rerele. Fa o utlwa o palelwa ke go rera o se mo bodireding, itlwaetse go tlotla le batho fela o sa ba rerele. [Tshameka bidio 1 lo bo lo tlotla ka yone.]

• Fa lo ntse lo tlotla, bua sengwe se se ka dirang gore motho yoo a batle go itse mo go oketsegileng ka se o se dumelang. Go na le dilo dingwe tse Jesu a ileng a di bua tse di neng tsa dira gore mosadi wa Mosamarea a botse dipotso. Dipotso tse a neng a di botsa, di ne tsa dira gore Jesu a kgone go mo rerela. [Tshameka bidio 2 lo bo lo tlotla ka yone. Go tswa foo, tshameka bidio 3 lo bo lo tlotla ka yone.]