Thusa Batho ba o Ithutang le Bone go Tila Ditsala Tse di sa Siamang

Fa batho ba ba ithutang Baebele ba batla go nna ditsala tsa ga Jehofa, ba tshwanetse go itsalanya le batho ba ba siameng. (Ps 15:1, 4) Go itsalanya le batho ba ba siameng go tla ba tlhotlheletsa gore le bone ba dire dilo tse di siameng.—Dia 13:20; lff thuto 48.

Nna pelotlhomogi fa o thusa batho ba o ithutang le bone gore ba se ka ba itsalanya le batho ba ba bosula. Go ka nna thata gore ba tlogele go itsalanya le batho ba e neng e le ditsala tsa bone pele. Ka jalo, o ka bontsha gore o a ba kgathalela le mo malatsing a lo sa ithuteng ka one. O ka ba romelela molaetsa, wa ba founela kgotsa wa ba etela. Fa batho ba o ithutang Baebele le bone ba ntse ba dira diphetogo, o ka ba laletsa gore ba tle go fetsa nako le batho ba mo phuthegong. Seo se tla dira gore ba lemoge gore dilo tse di ba latlhegelang di dinnye thata fa di bapisiwa le dilo tse ba tla nnang le tsone. (Mar 10:29, 30) Le wena o tla itumela fa o bona lelapa la ga Jehofa le ntse le oketsega.

LEBANG BIDIO YA THUSA BATHO BA O ITHUTANG LE BONE GORE BA SE KA BA ITSALANYA LE BATHO BA BA SA RATENG JEHOFA, LO BO LO ARABA DIPOTSO TSE DI LATELANG:

• Fa Baebele e bua ka batho ba ba bosula, e bua ka eng?​—1Bk 15:33

• Mmasentle o ne a akanya gore go diriwa eng fa bakaulengwe ba kopane mmogo go iketla?

• Lesego o thusitse Mmasentle jang gore a se ka a tlhola a itsalanya le batho ba ba bosula?