A go Nna Motho yo o Siameng go ka Dira Gore o Nne le Bokamoso jo bo Molemo?

Ke kgale batho ba le bantsi ba akanya gore go itshwara sentle go ka dira gore ba nne le bokamoso jo bo itumedisang. Ka sekai, batho ba ba nnang kwa Asia ba tlotla mafoko a ga rafilosofi mongwe yo o bidiwang Confucius (551-479 B.C.E.), o kile a re: “Se o sa batleng batho ba bangwe ba go direla sone, o se ka wa ba dira sone.”a

SE BATHO BANGWE BA SE DUMELANG

Tota le gompieno batho ba le bantsi ba sa ntse ba dumela gore fa o itshwara sentle o tla nna le bokamoso jo bo siameng. Ba leka go dirisana le batho ba bangwe sentle, ka tlotlo, ba le maitseo gape ba leka le go itshwara sentle. Mosadi mongwe wa kwa Vietnam yo o bidiwang Linh a re: “Ke ne ke dumela gore fa ke ikanyega ke tla segofadiwa.”

Bangwe bone ditumelo tsa bone di ba rotloetsa gore ba dire se se siameng. Monna mongwe yo o bidiwang Hsu-Yun wa kwa Taiwan, a re: “Ke ne ke dumela gore fa re tlhokafala re tlile go atlholelwa dilo tse re di dirileng fa re sa ntse re tshela. Fa e le gore re ne re dira dilo tse di siameng re tlile go segofadiwa, mme fa e le gore re ne re dira dilo tse di sa siamang re tlile go bogisiwa.”

A DILO TSEO DI THUSA BATHO BA BA DI DUMELANG?

Mosadi yoo a le kwa gae, a hutsafetse e bile a tlamparetse ngwana wa gagwe.

Nnete ke gore fa re direla batho ba bangwe dilo tse di molemo re a itumela. Ka maswabi, bangwe ba lemogile gore fa o direla batho ba bangwe molemo seo ga se reye gore le wena ba tla go direla dilo tseo. Mosadi mongwe yo o bidiwang Shiu Ping wa kwa Hong Kong a re: “Ke lemogile gore ga se ka metlha batho ba ba direlang ba bangwe dilo tse di molemo ba segofadiwang. Ke lekile ka natla go tlhokomela ba lelapa la me le go ba direla dilo tse dintle. Le fa go ntse jalo, monna wa me o ne a mphuaganya a ntlogela le morwaake.”

Batho ba le bantsi ba lemogile gore ga se ka metlha bodumedi bo ba rutang go dira se se siameng. Mosadi mongwe wa kwa Japane yo o bidiwang Etsuko o ile a re: “Ke ne ka tsenela mokgatlho mongwe wa bodumedi mme ka nna mookamedi wa basha. Ke ne ke maketse tota fa ke bona maloko mangwe a kereke a sa itshware sentle, a dirisa madi a kereke botlhaswa mme a lwela go nna le maemo mo kerekeng.”

“Ke ne ke leka go direla ba lelapa la me dilo tse dintle. Le fa go ntse jalo, monna wa me o ne a mphuaganya a ntlogela le morwaake.”—SHIU PING, HONG KONG

Bangwe ba ba neng ba dira dilo tse di siameng mme ba akanya gore ba tla segofadiwa ka ntlha ya dilo tseo, ba kgobega marapo fa ba bona seo se sa direge. Mosadi mongwe wa kwa Vietnam yo o bidiwang Van le ene o ikutlwa ka tsela e e tshwanang. A re: “Letsatsi le letsatsi ke ne ke ntshetsa badimo ditlhabelo, ke akanya gore ke tla nna le masego mo nakong e e tlang. Le fa ke na le dingwaga di le dintsi ke itshwere sentle e bile ke ntshetsa badimo ditlhabelo monna wa me o ne a lwala fela thata. Mo godimo ga moo morwadiake le ene o ne a tlhokafala a sa ntse a le monnye fa a ne a ile go ithuta kwa nageng e nngwe.”

GO NNA MOTHO YO O SIAMENG GA GO A LEKANA

Go nna motho yo o siameng go botlhokwa mme ga se gone fela go ka dirang gore o nne le bokamoso jo bo itumedisang. Goreng? Utlwa gore Baebele e a reng.

GA SE GORE BATHO BOTLHE BA TLA TLHOPHA GO DIRA DILO TSE DI SIAMENG

“Moleofi a le mongwe fela a ka senya molemo o mogolo.”—MORERI 9:18.

Le fa gone o ka leka go dira se se siameng, botshelo jwa gago bo ka nna mo kotsing ka ntlha ya ditshwetso tse batho ba bangwe ba di dirang. Ka sekai, fa go na le bolwetse jwa leroborobo jo bo tlhasetseng, o ka nna wa ikobela badiredipuso ka go se atamalane thata le batho ba bangwe. Mme go direga eng fa ba bangwe ba sa reetse? Boitshwaro jwa bone bo ka tsenya botshelo jwa batho ba ba lekang go dira se se siameng mo kotsing.

GO KA NNA THATA GORE BATHO BA ITSE SE SE SIAMENG KGOTSA SE SE SA SIAMANG

“Go na le tsela e e lebegang e siame mo mothong, mme kwa bofelong e isa kwa losong.”—DIANE 14:12.

Go na le batho ba le bantsi ba ba neng ba dira dilo dingwe, ba sa itse gore dilo tseo ga di a siama. Go dira tshwetso e e sa siamang o sa itse, ga go ka ke ga dira gore o se ka wa utlwa manokonoko a yone.

GA RE ITSE SE SE KA RE DIRAGALELANG

Ga ‘lo . . . itse gore botshelo jwa lona bo tla nna jang kamoso.’—JAKOBE 4:14.

Tota le fa motho a siame, a ka tlhokafala nako nngwe le nngwe. Fa e sa le bolwetse jwa COVID-19 bo tlhasela, batho ba le bantsi ba ba tlhokafetseng ba ne ba leka go thusa ba bangwe. Akanya ka mosadi mongwe wa kwa China yo o bidiwang Liting yo o tlhokafaletsweng ke rraagwe mo kotsing ya koloi. A re: “Ke ne ke sa tlhaloganye gore goreng motho yo o ikokobeditseng jaaka Rre a ne a ka tlhokafala. Rre e ne e le senatla e bile gape a ikokobeditse. Mo bathong ba ba neng ba le mo koloing eo go tlhokafetse ene fela.”

Fa e le gore go nna motho yo o siameng ga go reye gore re tla nna le bokamoso jo bo itumedisang ke eng se se ka re thusang? Gore re arabe potso eo re tlhoka tshedimosetso e re ka e ikanyang. Re ka e bona kae?

a Go bona tshedimosetso e e oketsegileng ka se Conficious a neng a se ruta, bona kgaolo 7, dirapa 31-35, mo bukeng ya Matsapa a a Tserweng ke Motho go Batla Modimo, e e gatisitsweng ke Basupi ba ga Jehofa. E teng mo websaeteng ya www.jw.org.