4 | Baebele E na Le Kgakololo e e Mosola

Se e Se Kayang

Le fa gone Baebele e se buka ya kalafi, e na le dikgakololo tse di mosola le tse di ka thusang motho yo o lwantshanang le bolwetse bongwe jwa tlhaloganyo. Ela tlhoko dikai dingwe.

Kafa Seno se ka Thusang ka Gone

“Batho ba ba sa lwaleng ga ba tlhoke ngaka, mme ba ba lwalang ba a e tlhoka.”​—MATHAIO 9:12.

Baebele e tlhalosa gore re ka nna ra tshwanelwa ke go batla thuso ya dingaka. Batho ba le bantsi ba ba nang le malwetse mangwe a tlhaloganyo ba ne ba thusiwa ke go nna le kitso e e boammaaruri ka bothata jwa bone le ke go batla kalafi ya bothata joo.

“Go ikatisa mmele go tswela mosola.”​—1 TIMOTHEO 4:8.

Go dira dilo tse di ka dirang gore o ikutlwe sentle mo mmeleng go ka tokafatsa tsela e tlhaloganyo ya gago e berekang ka yone. Dilo tseo di akaretsa go ikatisa mmele ka metlha, go ja dijo tse di nang le dikotla le go robala mo go lekaneng.

“Pelo e e itumetseng ke kalafi e e molemo, mme moya o o hutsafetseng o fetsa motho maatla.”​—DIANE 17:22.

Go bala ditemana tsa Baebele tse di kgothatsang le go ipeela mekgele e o ka kgonang go e fitlhelela, go ka go thusa gore o itumele. Fa o tlhoma mogopolo mo dilong tse di siameng mo botshelong e bile o dumela gore maemo a tla nna botoka mo nakong e e tlang, seo se tla go thusa gore o itshokele dikgwetlho tse di bakiwang ke bolwetse bongwe jwa tlhaloganyo.

“Motho yo o ikokobeditseng o botlhale.”​—DIANE 11:2.

Gongwe o lemoga gore o ka se kgone go dira sengwe le sengwe o le nosi fela, ka jalo iketleeletse go amogela thuso ya ba bangwe. Ba lelapa le ditsala ba ka tswa ba batla go go thusa mme gone ba sa itse gore ba dire eng. Ba bolelele gore ke eng se o ka ratang gore ba go thuse ka sone. O se ka wa lebelela gore ba go direle dilo tse ba ka se kgoneng go di dira, e bile ka metlha o lebogele thuso ya bone.

Kafa Baebele e Thusang Batho Ba ba Nang le Malwetse Ano ka Gone

“Ke ne ka lemoga gore go na le sengwe se se sa siamang ka nna, ka jalo ke ne ka ya go bona ngaka. E ne ya lemoga gore ke tshwerwe ke eng. Seno se ne sa nthusa gore ke tlhaloganye bolwetse jo bo ntshwereng le gore ke kgone go itse dikalafi tse di farologaneng tsa jone, gore ke kgone go tlhokomela botsogo jwa me.”​—Nicole,a yo o nang le “bipolar.”

“Ke lemogile gore go bala Baebele ka metlha le mosadi wa me, go nthusa gore ke simolole letsatsi lengwe le lengwe ka dikakanyo tse di siameng le tse di kgothatsang. Mme gantsi ka malatsi a ke tla bong ke sa ikutlwe sentle ka one, temana nngwe e tla bo e nkgothatsa.”​—Peter, yo o nang le dipreshene.

“Go ne go le thata go bolelela ba bangwe ka bolwetse jwa me ka gonne ke ne ke tlhabiwa ke ditlhong. Mme tsala nngwe e ke atamalaneng thata le yone e ne ya ntheetsa ka kelotlhoko e bo e leka go tlhaloganya kafa ke ikutlwang ka gone. O ne a nthusa gore ke ikutlwe botoka le gore ke se ka ka ikutlwa ke le nosi.”​—Ji-yoo, yo o nang le bothata jwa go ja.

“Baebele e nthusitse gore ke nne tekatekano gore ke ikhutse mo go lekaneng. Botlhale jwa yone bo nthusitse go lepalepana le bothata jwa maikutlo a ke nnang ke lwantshana le one.”​—Timothy, yo o nang le bothata jwa “obsessive-compulsive disorder” (OCD).