Ithute Boporofeti

1. Ke eng se se ka go thusang gore o itumelele go ithuta boporofeti?

MOKAULENGWE mongwe yo mosha yo o bidiwang Ben a re: “Ke rata boporofeti.” A le wena o ikutlwa jalo kgotsa a o tsaya gore boporofeti bo thata? Gongwe e bile o ka tswa o tsaya gore go ithuta boporofeti go a lapisa. Le fa go ntse jalo, fa o tlhaloganya gore ke eng fa Jehofa a ile a dira gore boporofeti bo kwalwe mo Baebeleng, le wena o ka simolola go bo rata.

2. Re tla tlotla ka eng mo setlhogong seno?

² Mo setlhogong seno, re tla bona gore ke eng fa re tshwanetse go ithuta boporofeti le gore ke eng se se ka re thusang go bo tlhaloganya. Gape re tla sekaseka boporofeti bongwe mo bukeng ya Daniele e bile re tla bona gore go bo tlhaloganya go ka re tswela mosola jang gone jaanong.

GORENG RE TSHWANETSE GO ITHUTA BOPOROFETI?

3. Ke eng se re tshwanetseng go se dira gore re kgone go tlhaloganya boporofeti?

³ Re tshwanetse go kopa Jehofa gore a re thuse go tlhaloganya boporofeti. Ka sekai, a re re o etetse lefelo lengwe le o sa le itseng, mme tsala ya gago yone e itse lefelo leo sentle. Tsala ya gago o a itse gore lo fa kae e bile o a itse gore tsela nngwe le nngwe e ya kae. Ga go pelaelo gore o ne o tla itumelela gore tsala ya gago o dumetse go tsamaya le wena. Re ka tshwantsha Jehofa le tsala eo. Jehofa o a itse gore ke eng se se larileng kwa pele. Ka jalo, gore re kgone go tlhaloganya boporofeti, re tshwanetse go mo kopa gore a re thuse.​—Dan. 2:28; 2 Pet. 1:19, 20.

4. Goreng Jehofa a ile a dira gore boporofeti bo kwalwe mo Baebeleng? (Jeremia 29:11) (Bona le setshwantsho.)

⁴ Motsadi mongwe le mongwe yo o lorato o batla gore bana ba gagwe ba nne le bokamoso jo bo itumedisang. Le rona Jehofa o re batlela se se tshwanang. (Bala Jeremia 29:11.) Se se itumedisang ke gore Jehofa o kgona go re bolelela gore ke eng se se tla diregang mo nakong e e tlang, mme ka metlha se a se buang se a direga. O ile a dira gore go kwalwe boporofeti mo Baebeleng gore re kgone go itse ditiragalo dingwe tsa botlhokwa pele ga di direga. (Isa. 46:10) Boporofeti ke mpho e Jehofa a re neileng yone. Mme gone, o ka tlhatswega pelo jang gore se Baebele e se buang se tla direga?

5. Basha ba ka ithuta eng mo go se Max a ileng a se dira?

⁵ Basha ba Basupi ba fetsa nako e ntsi kwa sekolong ba na le batho ba ba sa batleng go utlwa sepe ka Baebele. Ka dinako tse dingwe, dilo tse batho bao ba di buang le tse ba di dirang, di ka dira gore basha ba Basupi ba simolole go ipotsa gore a mme se ba se dumelang se boammaaruri. Mokaulengwe mongwe yo mosha yo o bidiwang Max a re: “Fa ke tsena sekolo, ke ne ka simolola go ipotsa gore a mme Basupi ke Bakeresete ba boammaaruri le gore a Baebele e kwadilwe ke Modimo.” Batsadi ba gagwe ba ile ba dira eng? A re: “Ga ba a ka ba galefa, mme gone ke a itse gore ba ne ba tshwenyegile ka nna.” Batsadi ba ga Max ba ile ba araba dipotso tsa gagwe ba dirisa Baebele. Go na le sengwe se Max le ene a ileng a se dira. A re: “Ke ile ka ithuta boporofeti, e bile ke ne ke tlotlela basha ba bangwe mo phuthegong se ke neng ke se ithutile.” Go ne ga felela jang? Max a re: “Go dira jalo, go ne ga ntlhatswa pelo gore Baebele e kwadilwe ke Modimo.”

6. O tshwanetse go dira eng fa o na le dipelaelo, mme ka ntlha ya eng?

⁶ Fa e le gore le wena o simolotse go ipotsa gore a se Baebele e se buang se boammaaruri, ga o tlhoke go ikutlwa molato. Mme gone, o tshwanetse go dira sengwe. Re ka tshwantsha dipelaelo le ruse. Fela jaaka ruse e kgona go senya sengwe ka bonya ka bonya, dipelaelo le tsone di ka koafatsa tumelo ya gago. Gore seo se se ka sa direga, o tlhoka go ipotsa jaana, ‘A ke dumela se Baebele e reng se tla direga mo nakong e e tlang?’ Fa e le gore o na le dipelaelo, o tshwanetse go ipha nako ya go ithuta boporofeti jo bo setseng bo diragaditswe. O ka dira seo jang?

KE ENG SE SE KA RE THUSANG GO TLHALOGANYA BOPOROFETI?

7. Ke eng se se thusitseng Daniele gore a tlhaloganye boporofeti? (Daniele 12:10) (Bona le setshwantsho.)

⁷ Daniele o re tlhometse sekao se sentle sa gore re ka tlhaloganya jang boporofeti. O ne a na le maitlhomo a a siameng. Daniele o ne a ithuta boporofeti ka gonne o ne a batla go itse boammaaruri. Gape o ne a le boikokobetso. O ne a itse gore Jehofa o tla mo thusa go tlhaloganya boporofeti fa fela a tswelela a atamalane le ene e bile a mo ikobela. (Dan. 2:27, 28; bala Daniele 12:10.) Daniele o ne a bontsha gore o boikokobetso ka gonne o ile a kopa Jehofa gore a mo thuse. (Dan. 2:18) Mo godimo ga moo, o ne a ithuta ka kelotlhoko. O ne a dira dipatlisiso mo Dikwalong tse di neng di le teng ka nako eo. (Jer. 25:11, 12; Dan. 9:2) O ka mo etsa jang?

8. Batho bangwe ba ithuta boporofeti ka maitlhomo afe, mme rona re tshwanetse go dira eng?

⁸ Ipotse gore ke eng fa o ithuta boporofeti. A o dira jalo ka gonne o batla go itse boammaaruri? Fa go le jalo, Jehofa o tla go thusa. (Joh. 4:23, 24; 14:16, 17) Batho bangwe ba ithuta boporofeti ka gonne ba akanya gore ba tla bona bosupi bongwe jo bo bontshang gore Baebele ga e a kwalwa ke Modimo. Ba ipolelela gore fa ba ka bona bosupi joo, ba ka itshelela jaaka ba batla. Ka jalo, re tshwanetse go ithuta boporofeti ka maitlhomo a a siameng. Mme gone, go na le sengwe gape se se ka re thusang go tlhaloganya boporofeti.

9. Ke eng se se ka re thusang go tlhaloganya boporofeti? Tlhalosa.

⁹ Nna boikokobetso. Jehofa o thusa batho ba ba boikokobetso. (Jak. 4:6) Ka jalo, re tshwanetse go mo kopa gore a re thuse go tlhaloganya boporofeti. Gape re tshwanetse go amogela dithuto tsa boammaaruri tse motlhanka yo o boikanyego le yo o botlhale a re rutang tsone. (Luke 12:42) Jehofa ga se Modimo wa tlhakatlhakano, ka jalo go a utlwala go bo a dirisa motswedi o le mongwe fela go re thusa go tlhaloganya boammaaruri jo bo mo Lefokong la gagwe.​—1 Bakor. 14:33; Baef. 4:4-6.

10. O ithuta eng mo go se Esther a ileng a se dira?

¹⁰ Ithute ka kelotlhoko. Simolola ka go dira dipatlisiso ka boporofeti bongwe jo bo go kgatlhang. Seno ke se kgaitsadi mongwe yo o bidiwang Esther a ileng a se dira. O ne a batla go ithuta boporofeti jo bo buang ka Mesia. A re: “Fa ke na le dingwaga di le 15, ke ne ka simolola go batla bosupi jo bo bontshang gore boporofeti jono bo ne bo kwadilwe pele Jesu a tla mo lefatsheng.” O ile a ithuta ka Memeno ya Lewatle le le Suleng, mme se a neng a se bala se ile sa mo tlhatswa pelo. A re: “Ke ne ka ithuta gore mengwe ya yone e ne e kwadilwe pele Jesu a tla mo lefatsheng. Ka jalo, ke ile ka lemoga gore se se neng se kwadilwe mo go yone se ne se tswa kwa Modimong. Ke ne ka tshwanelwa ke go bala dilo dingwe makgetlo a le mantsi gore ke kgone go di tlhaloganya.” Mme gone, o itumelela gore o ile a tsaya matsapa go dira jalo. Fa a sena go ithuta boporofeti jo bo farologaneng, o ne a re: “Ke ne ke tlhatswegile pelo gore Baebele e bua boammaaruri.”

11. Goreng re tshwanetse go tlhatswega pelo gore Baebele e bua boammaaruri?

¹¹ Fa re bona kafa boporofeti bongwe jwa Baebele bo diragaditsweng ka gone, re tshepa Jehofa e bile re ikobela kaelo nngwe le nngwe e a re nayang yone. Boporofeti bo re bolelela se se tla diregang mo nakong e e tlang. Ka jalo, fa re bo ithuta re tla tswelela re na le kagiso le fa re na le mathata. Mma jaanong re tlotle ka boporofeti bongwe mo bukeng ya Daniele jo bo diragadiwang gone jaanong. Re tla tlotla ka boporofeti jo bo buang ka dinao tsa tshipi e e tlhakaneng le letsopa le jo bo buang ka kgosi ya bokone le kgosi ya borwa. Fa re tlhaloganya boporofeti jono, re tla kgona go dira ditshwetso tse di siameng.

BOPOROFETI JO BO BUANG KA DINAO TSA TSHIPI E E TLHAKANENG LE LETSOPA

12. Dinao tsa ‘tshipi e e tlhakaneng le letsopa le le boleta’ di emela eng? (Daniele 2:41-43)

¹² Bala Daniele 2:41-43. Dinao tsa setshwantsho se Kgosi Nebukadenesare a ileng a se bona mo torong, e ne e le tsa ‘tshipi e e tlhakaneng le letsopa le le boleta.’ Fa re bapisa boporofeti jono le boporofeti jo bongwe jo bo mo bukeng ya Daniele le ya Tshenolo, re kgona go bona gore dinao tseo di emela Mmusomogolo wa Maesemane le Maamerika o o busang gone jaanong. Fa Daniele a ne a bua ka Mmusomogolo ono, o ne a re karolo nngwe ya one “e tla bo e nonofile mme karolo e nngwe e tla bo e le bokoa.” Karolo e nngwe ya Mmusomogolo ono e bokoa ka gonne batho ba ba busiwang ke Mmusomogolo ono ba a o koafatsa gore o se ka wa nna le maatla a a tshwanang le a tshipi.b

13. Re ithuta eng sa botlhokwa mo boporofeting jono?

¹³ Re ka ithuta go le gontsi mo tseleng e Daniele a ileng a tlhalosa dinao tsa setshwantsho se Nebukadenesare a ileng a se bona. Sa ntlha, re lemoga gore Mmusomogolo wa Maesemane le Maamerika o ile wa bontsha gore o nonofile. Ka sekai, United States le Britain ke dingwe tsa dinaga tse di ileng tsa fenya mo Ntweng ya Lefatshe ya Ntlha le ya Bobedi. Le fa go ntse jalo, Mmusomogolo ono o a koafala e bile o tla tswelela o koafala ka gonne baagi ba one ba a lwantshana e bile ba kgatlhanong le puso. Sa bobedi, Mmusomogolo ono ke one o o tla bong o sa ntse o busa fa Bogosi Jwa Modimo bo fedisa dipuso tsotlhe tsa batho. Le fa ka dinako tse dingwe dipuso dingwe di le kgatlhanong le Mmusomogolo ono, ga di kitla di tsaya maemo a one. Re itse seno ka gonne “leje” le le emelang Bogosi Jwa Modimo, le tla thubaganya dinao tsa setshwantsho tse di emelang Mmusomogolo ono.​—Dan. 2:34, 35, 44, 45.

14. Go tlhaloganya boporofeti jo bo buang ka dinao tsa tshipi e e tlhakaneng le letsopa go ka re thusa jang gore re dire ditshwetso tse di siameng?

¹⁴ A o tlhatswegile pelo gore boporofeti jwa ga Daniele jo bo buang ka dinao tsa tshipi e e tlhakaneng le letsopa bo tla diragadiwa? Seno se tla bonala mo tseleng e o tshelang ka yone. Fa o tlhatswegile pelo gore boporofeti jono bo tla diragadiwa, ga o kitla o leka go ikokoanyetsa dikhumo ka gonne o itse gore go ise go ye kae lefatshe leno le le bosula le tlile go senngwa. (Luke 12:16-21; 1 Joh. 2:15-17) Gape fa o tlhaloganya boporofeti jono, o tla itse gore go botlhokwa gore re rerele batho le gore re ba rute. (Math. 6:33; 28:18-20) Fa o sena go ithuta boporofeti jono ipotse go re, ‘A ditshwetso tse ke di dirang di bontsha gore ke tlhatswegile pelo gore go ise ye kae, Bogosi Jwa Modimo bo tlile go fedisa dipuso tsotlhe tsa batho?’

BOPOROFETI JO BO BUANG KA “KGOSI YA BOKONE” LE “KGOSI YA BORWA”

15. “Kgosi ya bokone” le “kgosi ya borwa” ke bomang gompieno? (Daniele 11:40)

¹⁵ Bala Daniele 11:40. Daniele kgaolo 11 e bua ka dikgosi kgotsa dipuso tse pedi tse di lwelang go busa. Fa re bapisa boporofeti jono le jo bongwe mo Baebeleng, re kgona go lemoga gore “kgosi ya bokone” ke Russia le dinaga tse di e emang nôkeng mme “kgosi ya borwa” ke Mmusomogolo wa Maesemane le Maamerika.c

16. “Kgosi ya bokone” e tshwara batho ba ga Jehofa jang?

¹⁶ Batlhanka bangwe ba ga Jehofa ba nna mo dinageng tse di laolwang ke “kgosi ya bokone,” mme kgosi eno e a ba bogisa. Bangwe ba bone ba ile ba itewa ba bo ba tsenngwa mo kgolegelong ka ntlha ya se ba se dumelang. Mme gone, seno ga se dire gore ba ineele, go na le moo se nonotsha tumelo ya bone. Ka ntlha ya eng? Ka gonne ba a itse gore boporofeti jo bo mo bukeng ya Daniele bo ile jwa bolelela pele gore batho ba Modimo ba tla bogisiwa.d (Dan. 11:41) Go itse seno go ka re thusa gore re tswelele re na le tsholofelo e bile re ikanyega mo go Jehofa.

17. Batho ba ga Jehofa ba ba nnang mo dinageng tse di busiwang ke “kgosi ya borwa” ba ile ba lebana le dikgwetlho dife?

¹⁷ “Kgosi ya borwa” le yone e ile ya bogisa batho ba ga Jehofa mo nakong e e fetileng. Ka sekai, ka nako ya Ntwa ya Ntlha le ya Bobedi ya Lefatshe, bakaulengwe le bokgaitsadi ba le bantsi ba ile ba isiwa kgolegelong mme bana bangwe ba Basupi ba ile ba lelekwa kwa sekolong ka gonne ba sa tseye karolo mo dikgannyeng tsa dipolotiki. Bosheng jaana, batho ba ga Jehofa ba ba nnang mo dinageng tse di laolwang ke “kgosi ya borwa” ba ile ba lebana le diteko tse di sa lemotshegeng motlhofo. Ka sekai, ka nako ya ditlhopho, Mokeresete a ka nna a raelesega go ema nôkeng mokgatlho mongwe wa dipolotiki kgotsa moeteledipele mongwe. Le fa a ka se ka a ya go bouta, a ka nna a eletsa gore batho ba le bantsi ba boutele mokgatlho mongwe wa dipolotiki. Ka jalo, re tshwanetse go ikela tlhoko gore re se ka ra tsaya letlhakore mo dikgannyeng tsa dipolotiki, tota le mo pelong.​—Joh. 15:18, 19; 18:36.

18. Re ikutlwa jang fa re bona “kgosi ya bokone” le “kgosi ya borwa” di kgorometsana? (Bona le setshwantsho.)

¹⁸ Batho ba ba sa dumeleng boporofeti jo bo mo Baebeleng, ba tsenwa ke tsebetsebe fa ba bona “kgosi ya bokone” le “kgosi ya borwa” di kgorometsana. (Dan. 11:40) Dikgosi tseno ka bobedi di na le dibomo tsa nuklea tse di ka kgonang go nyeletsa sengwe le sengwe. Mme gone, rona re a itse gore Jehofa a ka se letle seo se direga. (Isa. 45:18) Ka jalo, fa re bona dikgosi tseno di ntse di kgorometsana ga re tshoge, go na le moo tumelo ya rona e a nonofa ka gonne re a itse gore seno se bontsha gore bokhutlo bo gaufi.

TSWELELA O ITHUTA BOPOROFETI

19. Ke eng se re tshwanetseng go se itse ka boporofeti?

¹⁹ Ga re itse gore boporofeti bongwe jwa Baebele bo tlile go diragadiwa jang. Moporofeti Daniele le ene o ne a sa tlhaloganye gore dilo dingwe tse a neng a di kwala di kaya eng. (Dan. 12:8, 9) Mme gone, fa re sa itse gore boporofeti bongwe jwa Baebele bo tlile go diragadiwa jang, seo ga se reye gore ga bo kitla bo direga. Le fa gone jaanong go na le dilo dingwe tse re sa di tlhaloganyeng, re a itse gore Jehofa o tla re thusa gore re di tlhaloganye ka nako e e siameng fela jaaka a ile a dira mo nakong e e fetileng.​—Amose 3:7.

20. Ke boporofeti bofe jo bo tlogang bo diragadiwa, mme re tshwanetse go tswelela re dira eng?

²⁰ Go ise go ye kae, batho ba tla re ba fitlheletse “kagiso le polokesego!” (1 Bathes. 5:3) Go tswa foo, dipuso di tlile go tlhasela bodumedi jwa maaka di bo di bo fedisa. (Tshen. 17:16, 17) Fa bodumedi jwa maaka bo sa tlhole bo le gone, di tla tlhasela batho ba ga Jehofa. (Esek. 38:18, 19) Seno se tla felela ka ntwa ya Modimo ya Aramagedona. (Tshen. 16:14, 16) Re a itse gore dilo tseno di tlile go direga mo nakong e e sa fediseng pelo. Fa di ise di direge, a re tsweleleng re bontsha gore re leboga Jehofa ka go ithuta boporofeti le go thusa ba bangwe gore ba dire jalo.