Dintwa di re Ama Rotlhe

Dintwa di ka runya ka tshoganyetso mo mafelong a go neng go sa solofelwa gore go ka nna le dintwa mo go one. Tota le batho ba ba sa nneng mo mafelong a go lowang mo go one, ba ka amega. Mme le fa ntwa e sena go fela, ditlamorago tsa yone di ka ama batho ka lobaka lo loleele. Ela tlhoko dikai tse di latelang:

• 

  Go tlhaela ga dijo. Go ya ka World Food Programme, “ntwa ke yone e e di gogang kwa pele mo dilong tse di bakang tlala. Batho ba le bantsi ba ba se nang dijo tse di lekaneng, ba nna mo mafelong a go lowang mo go one.”

• 

  Mathata a botsogo jwa mmele le a tlhaloganyo. Fa go lebega e kete go tla nna le ntwa mo lefelong lengwe, batho ba lefelo leo ba ka simolola go nna le seterese le go tlhobaela. Batho ba ba nnang mo mafelong a go lowang mo go one, ba mo kotsing ya go gobala le go nna le mathata a tlhaloganyo. Mme se se botlhoko ke gore gantsi go thata gore ba bone kalafi.

• 

  Batho ba patelesega go tshaba. Pego ya United Nations High Commissioner for Refugees e tlhalosa gore go tla go fitlha ka September 2023, batho ba feta dimilione di le 114 ba ile ba patelesega go tshaba mo magaeng a bone. Selo se segolo se se bakileng bothata jono ke dintwa.

• 

  Mathata a ikonomi. Gantsi dintwa di baka mathata a ikonomi a a jaaka go oketsega ga ditlhwatlhwa. Batho ba ka nna ba boga ka gonne puso e dirisa madi a mantsi mo sesoleng, a gantsi e neng e a dirisa mo go tsa botsogo le mo thutong. E bile morago ga ntwa, go tlhokega madi a mantsi thata go baakanya tshenyo e e bakilweng ke ntwa eo.

• 

  Mathata a tikologo. Batho ba a boga fa dilo tsa tlholego tse ba ikaegileng ka tsone di senngwa fela ka boomo. Go kgotlelwa ga metsi, moya le mmu go ka baka mefuta e mentsi ya malwetse, e bile tota le morago ga ntwa, batho ba ka nna ba gobadiwa kgotsa ba bolawa ke dibomo tse di epetsweng tse di tlogetsweng foo.