Maloko a Masha a Setlhopha se se Laolang

KA OCTOBER 5, 2024, go ne ga dirwa kitsiso e e kgethegileng mo pokanong ya ngwaga le ngwaga ya gore Mokaulengwe Jody Jedele le Mokaulengwe Jacob Rumph, ba tlhomilwe go nna maloko a Setlhopha se se Laolang sa Basupi ba ga Jehofa. Bakaulengwe bano ba na le lobaka lo loleele ba direla Jehofa ka boikanyegi.

Mokaulengwe Jedele o tsholetswe kwa Missouri, U.S.A. e bile batsadi ba gagwe e ne e le Basupi ba ga Jehofa. O ne a nna kwa lefelong le go neng go na le Basupi ba ga Jehofa ba le mmalwa fela kwa go lone. Ka jalo, o ile a kopana le bakaulengwe le bokgaitsadi ba ba tswang kwa mafelong a a farologaneng fa ba ne ba tla go thusa go rera dikgang tse di molemo kwa ba neng ba nna gone. Tsela e ba neng ba ratana ka yone le e ba neng ba utlwana ka yone e ile ya mo ama fela thata. Ka jalo, o ile a kolobediwa a sa ntse a le mosha ka October 15, 1983. O ne a itumelela bodiredi fela thata, mme fa a sena go fetsa sekolo, o ile a nna mmulatsela wa ka metlha ka September 1989.

Fa Mokaulengwe Jedele a sa ntse a le mosha, batsadi ba gagwe ba ne ba tle ba etele Bethele ba na le ene le monnawe wa mosetsana. Seno se ile sa dira gore ene le monnawe ba ipeele mokgele o moragonyana ba ileng ba o fitlhelela wa go direla kwa Bethele. Mokaulengwe Jedele o ile a simolola go direla kwa Bethele e e kwa Wallkill ka September 1990. O ile a simolola pele ka go direla mo Lefapheng la go Phepafatsa mme moragonyana o ile a direla mo Lefapheng la Tsa Kalafi.

Ka nako eo, diphuthego tse di gaufi tsa Se-Spanish di ne di gola, mme go ne go tlhokega bakaulengwe. Ka jalo Mokaulengwe Jedele o ile a fudugela kwa go nngwe ya tsone a bo a simolola go ithuta Se-Spanish. Moragonyana, o ile a kopana le kgaitsadi mongwe wa mmulatsela yo o neng a le potologong e le nngwe le ene yo o bidiwang Damaris. Fa nako e ntse e ya, ba ile ba nyalana, ba bo ba direla mmogo kwa Bethele.

Ka 2005, ba ile ba tswa kwa Bethele gore ba ye go tlhokomela batsadi ba bone. Ka nako eo, ba ne ba direla e le babulatsela ba ka metlha. Mokaulengwe Jedele o ne a thusa go ruta mo Sekolong sa Tirelo ya Bobulatsela, e bile o ne a direla mo Komiting ya Puisano le Dikokelo ya mo lefelong la bone. Gape o ne a direla mo Komiting ya Kago ya Kgaolo.

Ka 2013, Mokaulengwe le Kgaitsadi Jedele ba ile ba kopiwa gore ba boele kwa Bethele go ya go thusa ka porojeke ya go aga e e neng e le kwa Warwick. Fa e sa le ka nako eno, ba ile ba direle kwa Patterson le kwa Wallkill. Mokaulengwe Jedele o ne a direle mo Lefapheng la go Aga le go Tlhama Dipolane le mo Lefapheng la Tirelo ya Tshedimosetso Kaga Dikokelo. Ka March 2023, o ne a tlhomiwa go nna mothusi mo Komiting ya Tirelo. Fa a bua ka dikabelo tse a ileng a di newa a re: “Fa o newa dikabelo tse disha, ka dinako dingwe o ka ikutlwa o imetswe. Mme gone, re tshwanetse go gopola go ikaega ka Jehofa ka gonne ke ene a dirang gore re kgone go dira tiro nngwe le nngwe e a re nayang yone.”

Mokaulengwe Rumph o tsholetswe kwa California, U.S.A. Fa a sa ntse a le mosha, mmê wa gagwe o ile a tsidifala, mme gone o ne a tle mo rute boammaaruri. Ngwaga le ngwaga Mokaulengwe Rumph o ne a tle a etele nkokoagwe yo e neng e le Mosupi. O ne a mo thusa go kgatlhegela go ithuta boammaaruri. Mme fa a ne a na le dingwaga di le 13, o ne a kopa go ithuta Baebele. O ile a kolobediwa ka di27 tsa September, 1992. Se se itumedisang ke gone mmê wa gagwe o ne a boa gape a direla Jehofa, mme papa wa gagwe le bo monnawe ba ile ba kolobediwa.

Fa Mokaulengwe Rumph a sa ntse a le mosha, o ile a bona gore babulatsela ke batho ba ba itumetseng. Ka jalo, fa a sena go fetsa sekolo, o ile a nna mmulatsela ka September 1995. Ka ngwaga wa 2000, o ile a fudugela kwa Ecuador kwa go neng go na le tlhokego ya baboledi gone. Fa a le koo, o ile a kopana le kgaitsadi mongwe wa mmulatsela wa kwa Canada yo o bidiwang Inga. Fa nako e ntse e tsamaya, ba ile ba nyalana ba bo ba ya go nna kwa toropong nngwe kwa Ecuador kwa go neng go na le setlhopha se se nnye sa baboledi gone. Mme gompieno phuthego e ba neng ba le kwa go yone e godile.

Fa nako e ntse e ya, Mokaulengwe le Kgaitsadi Rumph ba ile ba nna babulatsela ba ba kgethegileng, mme moragonyana ba bo ba direla mo tirelong ya potologo. Ka 2011 ba ile ba aloga mo tlelaseng ya bo132 ya Sekolo sa Gileade. Morago ga moo, ba ile ba direla kwa mafelong a a farologaneng mo lefatsheng, ba itumelela dikabelo tse di jaaka tirelo ya Bethele, go nna barongwa le tirelo ya potologo. Gape Mokaulengwe Rumph o ile a nna le tshiamelo ya go ruta mo Sekolong sa Baboledi ba Bogosi.

Mokaulengwe le Kgaitsadi Rumph ba ile ba boela kwa United States ka ntlha ya bolwetse jwa leroborobo jwa COVID-19. Ba ile ba kopiwa go ya kwa Bethele ya Wallkill, kwa Mokaulengwe Rumph a ileng a katisediwa go direla mo Lefapheng la Tirelo gone. Fa nako e ntse e tsamaya, ba ile ba boela kwa lekaleng la Ecuador, kwa Mokaulengwe Rumph a neng a direla e le leloko la Komiti ya Lekala gone. Ka 2023 ba ile ba boelwa kwa Warwick. Ka January 2024, Mokaulengwe Rumph o ile a tlhomiwa go nna mothusi mo Komiting ya Lekala. Fa a akanya ka dikabelo tsotlhe tse a ileng a nna le tsone, a re: “Se se botlhokwa ga e se lefelo le motho o direlang kwa go lone, mme ke batho ba o direlang le bone.”

Re lebogela tiro e bakaulengwe bano ba ba dirang ka natla ba e dirang, ‘mme re nna re bontsha banna ba ba tshwanang le bano gore re a ba rata.’​—Bafil. 2:29.