Mmulatsela yo o Pelokgale

KA NAKO ya Ntwa ya Lefatshe II, Mokaulengwe Elias le mosadi wa gagwe Josephine, ba ne ba botsolodiwa ke badiredipuso kwa Sukabumi, Java Bophirima kwa ntlokgolong ya masole a Bajapane a a tshabegang a Kempeitai. André o ne a botsolodiwa pele. Ba ne ba sa fetse go mo tlhaba ka dipotso. “Basupi ba ga Jehofa ke bomang? A lo kgatlhanong le puso ya Bajapane? A o setlhola?”

André o ne a re: “Re batlhanka ba Modimo Mothatayotlhe e bile ga re a dira sepe se se phoso.” Molaodi o ne a phamola tšhaka a bo a e tsholeletsa kwa godimo.

O ne a re: “Nka go bolaya gone jaanong!” André o ne a baya tlhogo mo tafoleng a bo a rapela mo pelong. Morago ga tidimalo e telele, mongwe o ne a thubega ka setshego. Molaodi o ne a re: “O pelokgale!” Morago ga foo o ne a bitsa Josephine. Fa molaodi a lemoga gore bosupi jwa gagwe bo dumalana le jwa ga André, o ne a re: “Ga lo ditlhola. Tswang fano!”

Morago ga dikgwedinyana, André o ne a latofadiwa ke “bakaulengwe ba maaka” a bo a felela a tsentswe mo kgolegelong. (2 Bakor. 11:26) O ne a fetsa dikgwedi di le mmalwa a ja dijonyana tse a neng a di sela mo moseleng o o tsamaisang metsi a a leswe. Le fa go ntse jalo, baokamedi ba kgolegelo ba ne ba sa kgone go dira gore a se ka a tlhola a ikanyega. Fa Josephine a ne a mo etetse, o ne a mo sebetsa a re: “Se tshwenyege. Go sa kgathalesege gore a ba a mpolaya kgotsa ba a nkgolola, nna ke tla tswelela ke ikanyega mo go Jehofa. Nkampo ka tswa ke le setopo go na le gore ke tswe fano ke tshela mme ke itatotse tumelo.”

Morago ga dikgwedi di le thataro André a le mo kgolegelong o ne a ipuelela kwa Kgotlatshekelokgolo ya Jakarta a bo a gololwa.

Morago ga dingwaga di le 30, puso ya Indonesia e ile ya thibela Basupi gape mme agente ya kgaolo ya kwa Manado, Sulawesi Bokone, e ne ya biletsa André kwa ofising ya gagwe. O ne a mmotsa jaana: “A o a itse gore Basupi ba ga Jehofa ba thibetswe?”

André o ne a re: “Ee.”

Agente e ne ya mmotsa jaana: “A jaanong o tla fetola bodumedi jwa gago?”

André o ne a tlhanola sehuba a bo a se betsa a re: “Lo ka nna lwa kgakgamolola pelo ya me mo mmeleng, mme ga lo ka ke lwa dira gore ke fetole bodumedi jwa me.”

Agente ya kgaolo e ne ya golola André mme ya se ka ya tlhola e mo tshwenya gape.

André o tlhokafetse ka 2000, a na le dingwaga di le 85 le dingwaga di ka nna 60 a tlhagafetse mo tirelong ya bobulatsela.