BASHA BA BOTSA JAANA
Ke Eng Se se Ka Nthusang go Ikatisa?
Goreng ke tshwanetse go ikatisa?
Kwa mafatsheng a mangwe basha ga ba rate go ikatisa, mme seo se tsenya matshelo a bone mo kotsing. Baebele ya re: “Go ikatisa go tswela mosola.” (1 Timotheo 4:8) Ela tlhoko dintlha tse di latelang:
Go ikatisa go ka dira gore o lebege sentle le gore o ikutlwe botoka. Go ikatisa go dira gore boboko jwa gago bo ntshe dikhemikale tse di bidiwang di-endorphin tse di dirang gore o itumele le gore o ritibale. Bangwe ba re go ikatisa go tshwana le melemo e e ritibatsang maikutlo.
“Fa nka simolola letsatsi la me ka go taboga ke tlhola ke le matlhagatlhaga e bile ke itumetse. Go taboga go dira gore ke itumele.”—Regina.
Go Ikatisa go ka dira gore o lebege botoka. Go ikatisa ka metlha go tla dira gore o itekanele sentle mo mmeleng, le gore o se ka wa inyatsa.
“Ke itumelela gore ke kgona go dira di pull up di le 10, ka gore mo ngwageng o o fetileng ke ne ke sa kgone go dira le fa e le nngwe! Sa botlhokwa ke gore ke tlhokomela mmele wa me.”—Olivia.
Go ikatisa go ka dira gore o tshele lobaka lo loleele. Go ikatisa go solegela pelo le mafatlha a gago molemo. Go dira di Aerobic go ka dira gore re se ka ra tsenwa ke malwetse a pelo, a a bolayang batho.
“Fa re ikatisa ka metlha re bontsha Mmopi wa rona gore re lebogela mmele o a re fileng one.”—Jessica.
Sa botlhokwa: Go ikatisa go tla go solegela molemo gone jaanong le mo nakong e e tlang. Tonya a re: “Ga o ka ke wa ba wa re , ‘ke ikwatlhaela go bo ke ile ka taboga.’ Fa ke tlogela go dira diipato, ke bo ke ikatisa ke sala ke itumetse.”
Koloi e a senyega fa e sa tlhokomelwe, ka tsela e tshwanang seo se ka re diragalela fa re sa ikatise
Ke eng se se dirang gore ke se ka ka ikatisa?
Ano ke mabaka a le mmalwa a a ka nkgoreletsang:
Ga ke rotloediwe ke sepe. “Batho ba akanya gore fa ba santse ba le basha ba ka se lwale. Ga se gantsi o akanya gore o tla nna le bothata jwa botsogo. O akanya gore batho ba ba godileng ke bone fela ba ba lwalang.”—Sophia.
Ga ke na nako. “Ke nna fela ke tshwaregile, ke tlhoka go dira nako ya go ja le go robala, mme go thata go dira nako ya go ikatisa.”—Clarissa.
Ga ke kgone go duelela gym. “Ga go motlhofo go duela gym ka gonne go a tura!”—Gina.
Se o ka akanyang ka sone:
Ke eng se tota se dirang gore o palelwe ke go ikatisa? Fa o ka kgona go fenya selo seo se se go kgoreletsang, o tla solegelwa molemo.
Ke ikatise jang?
Ela tlhoko dikakantsho tse di latelang:
Tsaya boikarabelo jwa go tlhokomela botsogo jwa gago.—Bagalatia 6:5.
Tlogela go dira diipato. (Moreri 11:4) Ka sekai, ga o tlhoke gym gore o kgone go ikatisa. Batla sengwe se o ka itumelelang go se dira o bo o se dira ka metlha.
Botsa batho ba bangwe gore bone ba ikatisa jang.—Diane 20:18.
Itirele thulaganyo. Ipeele mekgele o bo o kwala se o se fitlheletseng gore o kgone go nna o kgothetse.—Diane 21:5.
Batla mongwe yo o ka ikatisang le ene. O tla go kgothatsa a bo a go thusa go fitlhelela mokgele wa gago.—Moreri 4:9, 10.
Fa o sa fitlhelele mokgele wa gago, o se ka wa itlhoboga.—Diane 24:10.
Nna tekatekano
Baebele ya re banna le basadi ba tshwanetse go nna “tekatekano mo mekgweng.” (1 Timotheo 3:2, 11) Ka jalo, nna tekatekano fa o ikatisa. Batho ba ba ikatisang go feta selekanyo ga ba solegelwe molemo. Julia a re: “Fa lekau le na le dipotongwane tse ditona, mme a se na tlhaloganyo ga a kgatlhe.”
Gape ikele tlhoko gore o se ka wa iphitlhela o rotloediwa ke mekwalo e e tshwanang le e batho ba tlholang ba e kwala, ba bo ba e baya mo dipoteng, jaaka o o reng: “Fa o utlwa e kete o feletswe, dira tse 10 tsa bofelo.” Go reetsa kgakololo e e ntseng jalo go ka go itaya tsebe mme ga dira gore o se ka wa tlhoma mogopolo mo dilong tse di botlhokwa thata.—Bafilipi 1:10.
Mo godimo ga moo, dikgakololo tse dingwe di ka go kgoba marapo. Mosetsana mongwe yo o bidiwang Vera a re: “Basetsana ba le bantsi ba tsaya dinepe tsa batho ba ba batlang go tshwana le bone, mme fa ba kgobegile marapo ba lebelela dinepe tseo. Go botoka gore o dire botsogo jwa gago mokgele, e seng tsela e o lebegang ka yone.”