Go Thusa Batho ka Nako ya “Dintwa le Dipego Tsa Dintwa”

E re ka re tshela mo malatsing a bofelo, re tlile go utlwalela ka “dintwa le dipego tsa dintwa.” (Mathaio 24:6) Fa bakaulengwe ba rona ba nna mo mathateng ka ntlha ya dintwa, re a ba thusa. Pego ya Bo3 e e tswang kwa Setlhopheng se se Laolang ya 2022 e ne ya tlhalosa gore bakaulengwe ba ne ba thusiwa jang kwa Eastern Europe ka nako ya ntwa kwa Ukraine. Re thusa jang bakaulengwe le bokgaitsadi fa go runya dintwa? Bakaulengwe le bokgaitsadi ba kwa Ukraine ba ba thusitsweng ba ikutlwa jang?

Go ne Go Tlhokega Eng Mme Ba ne Ba Thusiwa Jang?

Ka di 24 tsa February 2022, go ne ga tsoga ntwa kwa Ukraine. Komiti ya Barulaganyi e ne ya rulaganya gore go tla dirisiwa madi a a kae go thusa bakaulengwe le bokgaitsadi ba kwa Ukraine. Lekala la kwa Ukraine le ne la reka dilo tse bakaulengwe le bokgaitsadi ba di tlhokang mo nageng ya bone, go tswa foo le bo le tlhoma Dikomiti Tsa Namolo di le 27 le bo le rulaganya gore Dikomiti tseo di isetse bakaulengwe le bokgaitsadi dilo tseo.

Bakaulengwe ba kwa Ntlokgolo ya Basupi ba ga Jehofa ba ne ba simolola go akanya ka gore ba ka thusa jang bakaulengwe ba kwa Ukraine. Komiti ya Kgatiso le ya Barulaganyi ya Setlhopha se se Laolang di ne tsa kopa Komiti e e Okametseng Dilo tse di Rekwang gore e dire le bakaulengwe ba kwa lekaleng la Ukraine le ba kwa lekaleng la Poland go batla ditsela tsa go thusa bakaulengwe le bokgaitsadi ba kwa Ukraine. Bakaulengwe ba Lefapha le le Okametseng Dilo Tse di Rekwang, ba Lefapha la go Romela Dikgatiso, bakaulengwe ba ba berekang mo Lefapheng la Tsa Molao kwa Makaleng ao, le bakaulengwe ba ba berekang mo Lefapheng le le Okametseng Dilo Tse di Rekwang mo Lefatsheng Lotlhe ba ne ba kopana mmogo letsatsi le letsatsi go bona gore ke eng se ba ka se dirang.

Jay Swinney wa Lefapha le le Okametseng Dilo Tse di Rekwang mo Lefatsheng Lotlhe a re: “Santlha, re ne ra batlisisa pele gore ke dilo dife tse di neng di tlile go tlhokega. Re ne re batla go ba rekela dijo le dilo tse di tlhapang tse ba tlwaelaneng le tsone. Le fa go ntse jalo, go batla gore ke dilo dife tse di tlhokegang e ne e se jone fela bothata jo re neng re lebane le jone. Gape re ne re tshwanetse go batla tsela e e bonako e bile e sireletsegile ya go isa dilo tseo kwa Ukraine.”

Ka di 9 tsa March 2022, bakaulengwe ba ne ba setse ba itse dilo tse bakaulengwe ba kwa Ukraine ba neng ba di tlhoka. Dibokoso tse di neng di na le dijo tsa dithini, dijo tsa ditlhaka, raese le dinawa di ne di tlile go newa bakaulengwe mmogo le dilo tse ditlhapang tse di jaaka melora le di-toilet paper. Go ne ga fopholediwa gore dilo tse motho a le mongwe a neng a ka di dirisa dibeke di le nnê di ne di ka ja R1 100. E re ka bakaulengwe ba Komiti ya Barulaganyi ba ne ba itse gore go na le bakaulengwe le bokgaitsadi ba le bantsi ba ba neng ba tlile go tlhoka dilo tseo ba ne ba oketsa madi a a neng a tlile go dirisiwa. Dilo tseo di ne di tlile go isiwa jang kwa di tlhokegang gone ntle le go tsenya matshelo a bakaulengwe mo kotsing?

Ka di 13 tsa March, bakaulengwe ba babedi ba ba tswang kwa Poland ba ne ba leka go bona gore a ba ne ba ka tsaya dilo kwa Ofising ya Lekala ya Poland ba bo ba di isa kwa ntlong e go bewang dijo kwa go yone gaufi le Lviv kwa Ukraine. Malatsinyana pele ga ba tsamaya bakaulengwe le bokgaitsadi ba kwa Poland le ba kwa Ukraine ba ne ba thusa baithaopi bao go ipaakanyetsa loeto lwa bone. Lekala le ne la dira dipampiri tse di neng di tla tlhokega kwa bodareng fa bakaulengwe ba ne ba isa dilo tseo, le ne la tshwaya dikoloi tse bakaulengwe ba neng ba tsamaya ka tsone go bontsha gore ke tse di neng di ya go thusa golo gongwe, gape le ne la kopa bakaulengwe ba kwa Ukraine gore ba ba tlhalosetse gore ke tsela efe e e neng e tla dira gore ba fitlhe ka bonako fa ba fetsa go tlola bodara. E re ka go ne go rulagantswe dilo sentle, Jehofa o ne a segofatsa matsapa ao. Dilo tseo tse di tlhokegang di ne tsa isiwa kwa Lviv di bo di isiwa kwa Dikomiting tsa Namolo mo diureng di le 24, go tswa foo bakaulengwe ba ne ba kgona go boela sentle kwa Poland.

Le fa gone bakaulengwe ba ne ba atlegile la ntlha, ba ne ba isitse dilo tse di kwa tlase ga dikilogerama di le 1 000 fela. Go ne go na le dilo tse dingwe gape tsa bokete jwa dikilogerama di le 220 000 tse ba neng ba tshwanetse go di isa. Ba ne ba tla kgona jang go isa dijo tseo tse di neng di le dintsi e bile di le bokete ka bonako jo bo ka kgonegang?

“Batho ba Gago ba Tla Ithaopa ka go Rata”

Bakaulengwe le bokgaitsadi mo lefatsheng lotlhe ba ne ba batla go thusa morago ga go bala dipego tse di mo jw.org tsa gore bakaulengwe ba kwa Ukraine ba ne ba amilwe jang ke ditiragalo tse di neng tsa direga koo. Ba le bantsi ba ba nnang kgakala ba ne ba ntsha meneelo ya tiro ya lefatshe lotlhe ya Basupi ba ga Jehofa, ba itse gore meneelo eo e ne e tla dirisiwa sentle. Bakaulengwe ba bangwe ba ba nnang gaufi le bodara ba ne ba dirisa nako, maatla le dilo tse ba nang le tsone go thusa. Utlwa gore bangwe ba bone ba reng.

Bakaulengwe ba ba neng ba ithaopile ka go rata kwa Poland ba ne ba paka dilo tse dintsi tse bakaulengwe ba bangwe ba neng ba tlile go di tlhoka ba bo ba tsenya le dikarata tse bana ba neng ba di dirile. Bartosz Kościelniak e leng leloko la Komiti e e Okametseng Dilo Tse di Rekwang kwa lekaleng la Poland a re: “Ke tlhola ke bala lekwalo la Pesalema 110:3 le le reng ‘Batho ba ga Jehofa ba tla ithaopa ka go rata.’ Le fa go ntse jalo, ke iponetse ka matlho tsela e bakaulengwe le bokgaitsadi ba tshegetsanang ka yone. Go bona bakaulengwe le bokgaitsadi ba le bantsi ba ikemiseditse go thusa ka se se tlhokegang, go ne ga nthusa gore ke kgone go bona bokao jwa mafoko a temana eno.”

Mongwe wa Basupi ba ga Jehofa yo o nang lekhampani e e thusang ka go rwala dithoto le go dira dilo tse dingwe o ne a re adima dilori tsa gagwe a di tladitse leokwane gore re di dirise, a re: “Eno ke tshono ya gore ke bontshe Jehofa le bakaulengwe le bokgaitsadi gore ke a ba rata. Ke itumelela gore ke ile ka kgona go thusa.” Go fopholediwa gore dilitara di le 7 700 tsa leokwane di ne tsa ntshiwa moneelo le gore bakaulengwe ba ile ba dirisa nako le maatla a bone ba kgweetsa dikilometara di ka nna 48 000 gore ba ise dilo tseo kwa di neng di tlhoka go ya gone.

Ka ntlha ya tiro e ntle e bakaulengwe ba e dirileng, ka di 28 tsa March—malatsi a le 15 fela morago ga gore bakaulengwe ba lekeletse gore a go a kgonega go isa dilo kwa di tlhokegang gone, dikilogerama tsa dijo di le 100 000, tsa dilo tse di tlhapang le melemo di ne di setse di isitswe kwa Ukraine! Mme ka ntlha ya meneelo e bakaulengwe ba e ntshitsheng ka go rata le ka thuso ya batho ba ba neng ba re rekisetsa, ga re a ka ra dirisa madi otlhe a re neng re a beetse gore a thuse bakaulengwe ka dilo tsa namolo. Gompieno Basupi ba ga Jehofa ba setse ba ntshitse dikilogerama di feta 190 000 tsa dilo tsa namolo tse di neng tsa thusa bakaulengwe ba kwa Ukraine. Dilo tseno di ne tsa thusa bakaulengwe ba rona jang?

“Di re Bontshitse Gore Lo a Re Rata!”

Morago ga gore dilo tseno di fitlhe kwa Lviv, Dikomiti Tsa Namolo di ne tsa di isa kwa bathong ba ba neng ba di tlhoka. Bakaulengwe bangwe ba ba tlhokang dilo tseno tsa namolo ba ba nnang dikilometara di ka nna 1 300 go tswa kwa Lviv ba ne ba di isediwa. Le fa go bonala e kete tiro eno e diretswe ka bonako, boammaaruri ke gore e tsere lobaka.a

Markus Reinhardt, yo e leng leloko la Komiti ya Lekala la kwa Ukraine a re: “Mo mathateng ano a re leng mo go one, bakaulengwe ba iponetse lorato lwa ga Jehofa le botlhokwa jwa go reetsa ditaelo tse di tswang mo phuthegong ya gagwe tota le pele ga go nna le mathata. Ka sekai, rotlhe re kgothalediwa gore mo matlong a rona re nne le dijo le metsi tse di ka re tshwarelelang dibeke di le mmalwa. Mogolwane mongwe yo o bidiwang Anton yo o nnang kwa Kyiv o ne a bua jaana fa a gatisa kaelo eno: ‘Phuthego ya ga Jehofa ga e bolo go re baakanyetsa dinako tse di thata mme re lebogela seo thata. Go nna le dijo le metsi a a lekaneng go akaretsa le radio tota go bolokile matshelo a rona.’ Re itumelela gore bakaulengwe ba ile ba tsaya tlhagiso eno tsia ka gonne ka nako ya fa ofisi ya lekala e ba rulaganyetsa go ba tlisetsa dilo tsa namolo ba ne ba na le dilo dingwe tse ba ka di dirisang.”

Bakaulengwe ba ne ba ikutlwa jang fa dilo tseno di ne di goroga? Mykola le Zinaida ba ba nnang kwa Kharkiv ba ne ba re: “Tsela e lo re ratang ka yone e re ama thata. Re lebogela dijo le melemo. Tota re kgona go bona gore Jehofa o re tlhokometse.” Valentyna yo le ene a nnang kwa Kharkhiv a re: “Fa ntwa e simologa re ne re tshwanetse go ema lobaka lo lo leele pele re bona dijo. Go ne go se motlhofo go reka dilo dingwe tse re neng re di tlhoka mme Jehofa o ne a bona mathata a re neng re le mo go one. O ne a rulaganya gore bakaulengwe bangwe ba re tlisetse dilo dingwe tse re neng re di tlhoka kwa magaeng a rona. Mo maemong ao a a thata, a go bonalang go se na kgoro ya botso re kgona go bona tsela e Jehofa mmogo le phuthego ya gagwe ba re tlhokometseng ka yone. . . Go itumeditsa tota go amogela thuso eno e e tlileng ka nako e e tshwanetseng.”

Yevhen, Iryna le Mykyta, ba ba neng ba tshaba ba tswa kwa Mariupol, ba re: “Re lebogela tsela e lo tlhokometseng lelapa la rona ka yone. Tota thuso eno, e tlile ka nako e e tshwanetseng. Fa re bona dibokoso tseno re ne re akanya gore di na le dilo tse re tlileng go di dirisa fela mme fa re sena go di bula re ne ra bona gore lo re di neile ka go bo lo re rata!”

Tota re kgona go bona gore Jehofa o dirisitse moya wa gagwe o o boitshepo go kaela batho ba gagwe gore ba kgone go isa dilo tsa namolo ka dinako tsa “dintwa le dipego tsa dintwa.” Meneelo e lo e ntsheditseng lefatshe lotlhe, e bontsi jwa yone e ntshitsweng go dirisiwa donate.jw.org le yone e re thusitse fela thata. Re lebogela bopelotshweu jwa lona!

Go Isetsa Bakaulengwe ba Rona Dilo Tse ba di Tlhokang re sa Tsenye Matshelo a Bone mo Kotsing

1. 

   February 24, 2022: Komiti ya Barulaganyi e rulaganya madi a namolo a a tla thusang Ukraine, mme seo se naya lekala tshono ya go batla ditsela tsa go thusa

2. 

   February 24–March 8, 2022: Lekala la Ukraine le reka dilo dingwe mo nageng ya bone le bo le di naya Dikomiti Tsa Namolo gore di di neye bakaulengwe ba ba di tlhokang. Gape le ne la ikemisetsa go amogela dilo tse di tswang kwa Poland le go di isa kwa di neng di tlhokega gone

3. 

   March 9, 2022: Komiti ya Barulaganyi e letla gore dilo tsa namolo tse di tswang kwa Poland di ye kwa Ukraine

4. 

   March 10–12, 2022: Go dirwa dithulaganyo tsa go lekeletsa gore a go ka kgonega go isa dijo le dilo tse di tlhokegang go tswa kwa Poland go ya kwa Lviv kwa Ukraine

5. 

   March 13, 2022: Go lekelediwa kgang ya go isa dijo go tswa kwa Poland go ya kwa Lviv kwa Ukraine

6. 

   March 14–16, 2022: Kwa Holong ya Dikopano gaufi le Poznan kwa Poland, baithaopi ba Lefapha la go Tlhama Dipolane ba paka dilo tsa namolo tse di jaaka dijo le dilo tsa go tlhapa

7. 

   March 17, 2022: Malatsi a le mane morago ga go lekeletsa go isa dilo kwa Ukraine, Dikilogerama di le 12 700 tsa dilo tsa Namolo di ne tsa isiwa kwa Ukraine

8. 

   March 21–27, 2022: Bakaulengwe ba kwa Poland ba dirisa tsela e ba e dirisitseng lantlha ya go paka dilo tsa namolo ba bo ba di isa kwa Ukraine. Fa di tsena kwa Ukaraine di isiwa kwa mafelong a a farologaneng mo di ureng di le 24

9. 

   March 28, 2022: Malatsi a le 20 morago ga gore go ntshiwe tetla ya gore dilo di isiwe kwa Ukraine dikilogerama di le 100 000 tsa dijo, dilo tse di tlhapang le melemo di ne tsa isiwa koo

Gompieno, Basupi ba ga Jehofa ba setse ba isitse dikilogerama di feta 190 000 tsa dilo tsa namolo kwa Ukraine.