Ba Tshwerwe ka Ntlha ya Tumelo ya Bone—Ukraine

Mo e ka nnang dingwaga di le 30, Basupi ba ga Jehofa kwa Ukraine ba ne ba solegelwa molemo ke molao o o neng o letla gore ba ba sa batleng go tsenela bosole ka ntlha ya segakolodi sa bone, ba ka dira ditiro dingwe di sele. Go dira ditiro tseno go ba letla gore ba tswelele ba na le segakolodi se se siameng.

Le fa go ntse jalo, fa ntwa ya kwa Ukraine e ne e simolola ka February 24, 2022, molao oo o ile wa itshupa gore o bokoa, ka gonne batho ba le bantsi ba ba neng ba sa batle go tsenela bosole ka ntlha ya segakolodi sa bone, ba ile ba sekisiwa. Tiragalo eo e ile ya gataka tumelo ya bone, e bile ga e a ka ya tlotla tshwetso ya motho ya go dirisa segakolodi sa gagwe go itlhophela. Tsela e ba neng ba tshwarwa ka yone e ne e le kgatlhanong le ditshwanelo tsa batho le Molaotheo wa Ukraine, o o reng: “Fa motho a sa batle go tsenela bosole ka ntlha ya se a se dumelang, a ka dira tiro nngwe e e sa amaneng le bosole.”

Fa e sa le ntwa e simolola, go tla go fitlha ka June 17, 2025, Basupi ba ga Jehofa ba le batlhano ba kwa kgolegelong ka ntlha ya go sa batle go tsenela bosole, mme ba atlholetswe dingwaga di le tharo. Mogodimo ga moo, go na le Basupi ba bangwe gape ba bararo ba ba tshwerweng ba ba letetseng katlholo.

Go Tshwenyega ga Mekgatlho ya Ditšhabatšhaba

Fa baemedi ba ba kgethegileng ba UN ba ntse ba etse tlhoko ditiragalo tseno, ba lemogile gore go na le tlhaelo ya ditiro tse di ka dirwang fa motho a sa batle go tsenela bosole kwa Ukraine. Fa ba buisana le puso ya Ukraine ka November 8, 2023, ba ile ba re: “Re tshwenyegile ka go gatelelwa ga batho ba ba sa batleng go tsenela tiro e e patelediwang ya bosole ka ntlha ya segakolodi sa bone, go akaretsa le ba ba emelang ditshwanelo tsa batho ba ba sa batleng go tsenela bosole.”

Legolegwa ka Ntlha ya Segakolodi

Andrii Khomenko

Andrii Khomenko o ile a kolobediwa go nna Mosupi wa ga Jehofa ka 2002. Ene le mosadi wa gagwe e bong Iryna, ba godisa bana ba babedi ba basimane. Ba bala Baebele mmogo ka metlha e le lelapa, ba bo ba abelana le ba bangwe molaetsa wa kgomotso le wa tsholofelo o o tswang mo Baebeleng. Morago fela ga gore ntwa e simologe ka 2022, Andrii o ne a ithaopela go thusa batho ba ba tshabileng kwa magaeng a bone go bona kwa ba ka latsang tlhogo teng le go batlela bagodi melemo.

Andrii o ile a ikopela tiro e nngwe e e seng ya bosole, ka ntlha ya se a se dumelang fa a ne a lalediwa ka March 2024 go tsenela bosole. Kopo ya gagwe e ile ya se ka ya amogelwa, mme o ile a latofadiwa ka gore o tlola molao a bo a sekisediwa seo. Ka ntlha ya seo, ka July 26, 2024, Kgotlatshekelo ya Kgaolo ya kwa Okhtyrka e ile ya bona Andrii molato wa go sa batle go tsenela bosole, mme ya mo atlholela dingwaga di le tharo kwa kgolegelong. O ile a ikuela ka ntlha ya katlholo eo, mme boikuelo jwa gagwe bo ile jwa se ka jwa amogelwa kwa Kgotlhatshekelong ya Boikuelo ya Sumy ka December 23, 2024. Ka February 3, 2025, Andrii o ne a tsenngwa mo kgolegelong.

Tatelano ya Ditiragalo

June 17, 2025

Basupi ba le 8 ba tshwerwe.
February 24, 2022

Naga yotlhe e nna ka fa tlase ga molao wa sesole, mme masole otlhe a ya ntweng.
June 23, 2015

Kgotlatshekelokgolo ya Ukraine e buelela tshwanelo ya go itlhophela go sa tsenele bosole ka ntlha ya segakolodi, ka nako ya go dirisiwa ga molao wa sesole, mo kgetsing ya ga Vitaliy Shalaiko.
December 1991

Molao wa go dira ditiro tse e seng tsa bosole o simolola go dira.
February 28, 1991

Basupi ba ga Jehofa ba kwadisiwa semolao kwa Ukraine.