Meneelo e e Setseng e Thusa ba ba Tlhaelelwang

Basupi ba ga Jehofa ba dira tiro e e thusang batho mo dinageng di feta 200. Mme ke dinaga di le 35 fela tse di kgonang go ntsha moneelo o o kgonang go duelela dilo tse ba di tlhokang. Meneelo e dirisiwa jang kwa dinageng tse go sa kgoneng go duelelwa dilo tsotlhe tse di tlhokegang?

Setlhopha se se Laolang se etse tlhoko gore ke eng se bakaulengwe le bokgaitsadi ba se tlhokang mo lefatsheng lotlhe gore ba kgone go nna ba nonofile mo tumelong le gore ba kgone go rera dikgang tse di molemo. Meneelo e a balwa e bo e dirisiwa sentle. Fa lekala lengwe le amogela meneelo e metsi go feta e ba e tlhokang, ba romelela makala a mangwe a a nang le tlhaelo, ka go dira jalo, ba etsa Bakeresete ba bogologolo ba ba neng ba thusana mo ba neng ba tlhaelelwa gone. (2 Bakorintha 8:14) Ba ne ba dirisetsa meneelo e e setseng go thusa Bakeresete ba bagwe ba ba neng ba se na mo go kalo.

Bakaulengwe le bo kgaitsadi ba makala a a ileng a thusiwa, ba ikutlwa jang ka seno? Ka sekai, kwa Tanzania, koo motho a le mongwe a tshelang ka R 33.38 ka letsatsi, bakaulengwe le bokgaitsadi ba phuthego ya Mafinga ba ile ba thusiwa ka meneelo eno gore ba kgone go tlhabolola Holo ya Bone ya Bogosi. Ba re: “Fa e sa le Holo ya rona ya Bogosi e tlhabololwa palo ya batho ba ba nnang teng kwa dipokanong e oketsegile! Re leboga phuthego ya ga Jehofa le bopelotshweu jo bakaulengwe le bokgaitsadi ba re bontshitseng jone ka go re thusa gore re kgone go nna le lefelo le lentle la kobamelo.”

Go ile ga nna le tlhaelo ya dijo kwa Sri Lanka ka ntlha ya Covid 19. Mme e ile ya ama bangwe ba bakaulengwe le bokgaitsadi ba rona. Kgaitsadi Imara Fernando le ngwana wa gagwe wa mosimane Enosh, ke bangwe ba bone. Ka ntlha ya meneelo e e tswang kwa dinageng tse dingwe, ba ne ba kgona go thusiwa. Ba ne ba dira karata, ba bo ba kwala ba re: “Re leboga bakaulengwe le bokgaitsadi ba ba re bontshitseng lorato mo dinakong tseno tse di thata. Re itumelela go bo re le karolo ya lelapa leno, e bile re rapela gore Jehofa a thuse bakaulengwe le bokgaitsadi mo malatsing ano a bofelo.”

Go sa kgathalesege gore bakaulengwe le bokgaitsadi ba rona ba nna kae, ba ikutlwa ba tlhotlheletsega go ntsha meneelo. Ka sekai Enosh, o ne a itirela lebokoso le lennye le a nnang a tsenya moneelo mo go lone gore a kgone go thusa malapa a mangwe a a tlhokang. Guadalupe Álvarez le ene o itumelela go aba. O nna kwa karolong ya Mexico e go berekang batho ba le mmalwa fela kwa go yone, mme ba bangwe bone ga ba na lotseno lope. Le fa go ntse jalo o itumelela go ntsha moneelo. O ne a kwala a re: “Ke leboga Jehofa go bo a le molemo e bile a mpontsha lorato lo lo ikanyegang. Ke a itse gore moneelo wa me o tla kopanngwa le wa bakaulengwe le bokgaitsadi mo lefatsheng lotlhe, o bo o thusa ba ba tlhokang.”

Makala a a romelelang dinaga tse di tlhaelelwang madi, a itumelela go dira jalo. Mokaulengwe Anthony Carvalho wa leloko la Komiti ya Lekala ya kwa Brazil a re: “Tiro ya go rera mo lefelong la rona ga e bolo go nna e thusiwa ka meneelo e e tswang kwa dinageng tse dingwe. Ka jalo re ile ra kgona go tswelela ka tiro eno ka gonne re ne re thusiwa. Gone jaanong maemo a rona a fetogile e bile re na le tshiamelo ya go thusa ba bangwe. Bakaulengwe le bokgaitsadi mo Brazil ba leba ka fa tiro ya go rera e dirwang ka gone mo lefatsheng lotlhe ba bo ba bona gore ba ka thusa jang.”

Basupi ba ga Jehofa ba thusa jang bakaulengwe le bokgaitsadi ba bone ba ba tlhokang? Ga ba romelele makala a bakaulengwe le bokgaitsadi bao madi ka tlhamalalo. Mme ba tsenya madi ao mo mabokosong a “Worldwide Work” kgotsa ba ntsha moneelo ba dirisa donate.jw.org. Meneelo eno e lebogelwa fela thata.