Dipotso tse di Tswang go Babadi

◼ A bangwe ba Bakeresete ba ba tloditsweng ba tla falola “sepitla se segolo” go tshela mo lefatsheng je lesha pele ba tseelwa kwa legodimong?

Bibela ga e bolele ka tlhamalalo.

Bakeresete ga ba bolo go nna ba kgatlhegela ditshiamelo tse Modimo a ka nnang a di ba naya. (Ditihō 1:6) Mme seo se ile sa nna boammaaruri segolobogolo mo motlheng ono wa rona fa esale Bogosi bo tlhomiwa. (Mathaio 24:3, 24, 34) Ereka bokhutlo jwa tsamaiso e e boikepo eno bo tlile go tla mo motlheng ono wa bone, Bakeresete ba ile ba ipotsa gore a batho ba ba tloditsweng ka moya ba tla tshela go ralala ‘ntwa ya letsatsi le legolo la Modimo’ mme ba direle mo lefatsheng pele ba amogela tuelo ya bone ya selegodimo. (Tshenolō 16:14) Bibela ga e bolele gore seno se tla diragala, lefa go le jalo dikao tse dingwe le boperofeti jo bongwe di ile tsa tsewa gore di supa gore go ka nna jalo. Go na le go gagamala thata, re ka nna ra leba go bona gore Modimo o tla dira dilo jang.

Ditiragalo dingwe tsa Bibela di na le ditshwani tsa tsone moragonyana jaana mo bathong ba Modimo. Ka sekai, re itse gore Jona o ne a le mo teng ga tlhapi e tona ka malatsi a le mararo le masigo a le mararo. Batho bangwe ba ka leba seo fela jaaka sekao sa kgololo ya bomodimo, mme Jesu o ne a re seo e ne e le sekao sa boperofeti sa lobaka lo lo lekanang le loo a neng a tla lo nna mo lebitleng pele a tsoga mo baswing. (Yona 1:17; Mathaio 12:40) Ee, boitemogelo jwa ga Jona e ne e le jwa mofuta wa seperofeti. Re tlhaloganya gore batlhanka ba Modimo ba ile ba leba boperofeti bongwe le dipego dingwe tse di kgethegileng tsa Bibela go bona fa tseno di ka tswa di supa ka moo Jehofa a santseng a tla dirisana le bone ka gone.

Jaaka sekai se se amang boperofeti jwa Bibela, The Watch Tower ya December 15, 1928, e ne ya tlotla ka Mika 5:2-15. Buka ya Mika e ne e bua ka go senngwa ga Samaria ke ‘Baasiria’ le go boa ga Bajuda kwa botshwarong kwa Babelona. (Mika 1:1, 5-7; 4:10) Mme e ne ya supela gape ditiragalo dingwe tsa moragonyana, jaaka go tsholelwa ga ga Mesia kwa Bethelehema. (Mika 5:2) Mika o ne a perofesa gore morago ga go gololwa mo “Moasirieñ,” “masalèla a ga Yakoba” a tla nna “yaka tau mo gare ga diphōlōhōlō tsa sekgwa, yaka ledumedi mo macomaneñ a dinku.” (Mika 5:6-8) The Watch Tower e ne ya akgela jaana: “Seno se ka nna sa tsewa jaaka sesupo sa gore masalela mangwe a tla nna mo lefatsheng morago ga ntwa ya Hara-Magedona mme ka gone ba tla nna le tiro e e oketsegileng go e dira mo leineng la Morena le go mo galaletsa le go mmaka.” Tlhokomela puo e e boikobo, le e sa gobeleleng eno e e dirisitsweng jaaka ketapele ya selo seno se se ka nnang sa diragala: “Seno se ka nna sa tsewa jaaka sesupo.”

Go tweng ka pego ya Bibela eo e ka nnang ya bo e tshwana le go falolela go go ntseng jalo mo lefatsheng? Sengwe sa dikai tseo di ileng tsa newa ke sa ga Noa le lelapa la gagwe. Noa o ile a lejwa jaaka yo o tshwantshetsang Jesu mo nakong eno ya bofelo. (Genesise 6:8-10; Mathaio 24:37) Jaaka Noa a ne a etelela pele mosadi wa gagwe le barwa ba bone ba bararo le dingwetsi tsa bone go ralala bokhutlo jwa tsamaiso eo ya bogologolo, Keresete o tla etelela pele masalela a setlhopha sa monyadiwa wa gagwe le bao ba nnang bana ba ga “Rara oa bosakhutleñ” Jesu. Mosadi wa ga Noa o ne a falola Morwalela mme a nna le seabe mo go shafatseng kobamelo ya boammaaruri mo lefatsheng le le phepafaditsweng. Setshwani sa seno e ka nna go falolela ga masalela a setlhopha sa monyadiwa mo lefatsheng le lesha.—Isaia 9:6, 7; 2 Bakorintha 11:2; Tshenolō 21:2, 9.a

Dipego tse dingwe tsa Bibela di ile tsa lejwa jaaka tse di akantshang gore bangwe ba batlodiwa ba ka nna ba tshela mo lefatsheng le lesha. Ka sekai, Jeremia o ne a falola go senngwa ga Jerusalema; “monna” yo o nang le kurwana ya lonaka lwa mokwadi o ne a sala mme a bona tiro ya go bolaya pele a boela morago go ya go neela pego ya gagwe.—Esekiele 9:4, 8, 11.

Batho ba ba akgelang gore go ka nna ga kgonega gore bangwe ba batlodiwa ba falolele mo lefatsheng le lesha ba dira jalo ka maikaelelo a a molemo le ka ntlha ya ditiragalo tse di diragetseng tsa Bibela ka go leka go tlhaloganya boperofeti kana dikao tseo di ka tswang di na le ditshwani tsa tsone moragonyana jaana. Fa go diragala gore go se nne ope wa batlodiwa yo o salang mo lefatsheng, go tla bo go sena lebaka la go ngongorega. Re setse re dumetse gore dikgang tsa Bibela di tlhaloganngwa botoka fa nako e ntse e tsamaya. Ka sekai, The Watchtower ya July 15, 1981, e ne ya tlotla ka Mika 5:6-9 gape mme ya tlhalosa gore “masalela a Baiseraele ba semoya a ne a sa tlhoke go leta go fitlha morago ga . . . Hara-Magedona gore ba tle ba nne jaaka ‘monyo’ o o lapolosang mo bathong.” Motlotlo ono gape o ne wa bolela gore go a kgonega gore masalela a ka nna a falola ntwa e kgolo ya Modimo mme a “tswelele go nna jaaka ‘monyo’ o o lapolosang go ‘boidiidi jo bogolo’ jwa dinku di sele.” Lefa go le jalo, re kgona go bona gore fa nako e ntse e tsamaya le fa lesedi la semoya le ntse le ntsifala, mokgwa o re tlhaloganyang boperofeti kana diterama tsa Bibela ka one o a fetoga.—Diane 4:18.

Re itse gore Bibela e amanya ‘go tla ga Morwa motho’ le go ‘phuthiwa ga baitshenkedwi ba gagwe kwa diphefong tse nnè.’ (Mathaio 24:29-31) Gape fa ‘Morena a tla’ ka maatla a Bogosi, batlodiwa ba ba robetseng mo losong ba tsosediwa kwa botshelong jwa legodimo. (1 Bathesalonia 4:15, 16) Ba ba kanetsweng bano ba tla nna karolo ya mosadi wa ga Kwana. Seo se diragala leng?

Mo bukeng ya Tshenolō, morago fela ga gore Johane a bolele ka go senngwa ga seaka sa bodumedi, Babelona o Mogolo, o tlhalosa “nyalō ea Kwana.” “Mosadi” yo o leswe le yo o senang boitsholo o a tlosiwa, mme re bona “monyadwi, mosadi oa ga Kwana” ‘a apere leloba le le boleta le le phatsimang, le lentle, leo le emelang ditiro tse di siameng tsa baitshepi.’ (Tshenolō 18:10; 19:2, 7, 8; 21:9) Go senngwa ga Babelona o Mogolo ke karolo ya sepitla se segolo. (Mathaio 24:21; Tshenolō 7:14) Ka jalo go ka nna ga bolelwa gore bangwe ba setlhopha sa monyadiwa ba tla falola sepitla se segolo jaaka sesupo sa go amogelwa le go sirelediwa ke Jehofa. (Sefania 2:3; Bapisa Mathaio 24:22.) Fa e le gore ba ka bolokwa jalo mo lefatsheng, ba ka nna mono go fitlha fa Modimo o batla go ba tseela kwa legodimong.

Lefa go ntse jalo, dilo tse di boletsweng mo go Tshenolō ga di a rulaganngwa ka tatelano thatathata. Mme ga go jaaka ekete masalela a batlodiwa a tla tlhokega gore lefatshe le lesha le tswelele, ka go bo ba setse ba katisitse dimilione tsa Bakeresete bao ba tla tshelang ka bosakhutleng mo lefatsheng. Kafa tshwanelong, Modimo a ka nna a tseela batlodiwa kwa legodimong ka bonako fela morago ga go senngwa ga Babelona o Mogolo, a baakanyetsa tiragalo ya “nyalō ea Kwana.” Ka gone batlodiwa botlhe ba ka nna le seabe le Keresete mo go ‘laoleng merafe ka tsamma ya tshipi’ mo nakong e e setseng ya sepitla se segolo. (Tshenolō 2:26, 27; 19:11-21) Fa e le gore Modimo o dira dilo jalo, botlhe ba ba 144 000 ba tla bo ba na le Jesu ‘go busa le Keresete jaaka dikgosi mo dingwageng tsotlhe tseo tse di sekete.’—Tshenolō 20:4.

Eleruri go molemo gore batho ba Modimo ba kgatlhegele ka tlhoafalo go bona kafa a tla kaelang le go duela batlhanka ba gagwe ka gone. (Bapisa 1 Petere 1:12.) Seno se supa go tshepha ga bone gore go rata ga gagwe go tlile go dirwa. Lemororo re ka se ka ra gagamala mme ebile re sa tshwanela go dira jalo ka menangwana ya dilo, re ka lebelela pele ka tlhagafalo seo se tla diragalang.

[Ntlha e e kwa tlase]