“Dirang Dilo Tsotlhe Kgalaletsong ya Modimo”

E RE KA re le batlhanka ba ba ineetseng ba Modimo, re tshwanetse go bontsha kgalalelo ya ga Jehofa mo go sengwe le sengwe se re se buang le se re se dirang. Moaposetoloi Paulo o ile a re neela molaomotheo o o re kaelang mo go seno fa a ne a kwala jaana: “E ka ne lo a ja kgotsa lo a nwa kgotsa lo dira sepe fela, dirang dilo tsotlhe kgalaletsong ya Modimo.” (1 Bakor. 10:31) Seno se akaretsa gore re tshele go ya ka melaometheo e e siameng ya ga Jehofa, e e bontshang gore ke motho yo o itekanetseng. (Bakol. 3:10) Re tshwanetse go nna baetsi ba Modimo, re le batho ba ba boitshepo.—Baef. 5:1, 2.

² Moaposetoloi Petere o ne a kwala jaana a bontsha lebaka la go bo go le botlhokwa gore Bakeresete ba dire jalo: “Jaaka bana ba ba utlwang, tlogelang go bopega go ya ka dikeletso tse pele lo neng lo na le tsone mo go tlhokeng kitso ga lona, mme, tumalanong le Moitshepi yo o neng a lo bitsa, le lona ka bolona nnang boitshepo mo boitshwarong jotlhe jwa lona, ka gonne go kwadilwe ga twe: ‘Lo nne boitshepo, ka gonne nna ke boitshepo.’” (1 Pet. 1:14-16) Fela jaaka Baiseraele ba bogologolo, batho botlhe mo phuthegong ya Bokeresete ba tshwanetse go ipoloka ba le boitshepo. Seno se bolela gore ba tshwanetse go nna ba se na selabe, ba sa leswafadiwa ke boleo le ke go rata lefatshe. Ka tsela eno, ba bontsha gore ba tlhaoletswe tirelo e e boitshepo.—Ekes. 20:5.

³ Ba ipoloka ba le boitshepo ka go kgomarela melao le melaometheo ya ga Jehofa e e tlhalosiwang sentle mo Dikwalong Tse di Boitshepo. (2 Tim. 3:16) Fa re ne re rutiwa Baebele, re ne ra ithuta ka Jehofa le ditsela tsa gagwe, mme re ne ra atamalana le ene. Fa re ntse re ithuta, re ne ra tlhatswega pelo ra ba ra lemoga botlhokwa jwa go batla pele Bogosi Jwa Modimo le go dira gore go dira thato ya ga Jehofa e nne selo sa botlhokwatlhokwa mo botshelong jwa rona. (Math. 6:33; Bar. 12:2) Tota seno se ne sa tlhoka gore re apare botho jo bosha.—Baef. 4:22-24.

KAMANO E E MOLEMO LE JEHOFA LE BOITSHOLO JO BO PHEPA

⁴ Ga se ka metlha go leng motlhofo go kgomarela melao e e siameng ya ga Jehofa. Mmaba wa rona Satane Diabolo, o batla go re faposa mo boammaaruring. Ka dinako tse dingwe, tlhotlheletso e e bosula ya batho ba bangwe ba re tshelang le bone le tshekamelo ya rona ya go dira boleo, di dira gore go se ka ga nna motlhofo go ikobela melao ya ga Jehofa. Go tshelela boineelo jwa rona go tlhoka gore re lwele go sireletsa kamano ya rona le Jehofa. Dikwalo di re bolelela gore re se ka ra gakgamala fa re lebana le kganetso kgotsa diteko. Re tla boga ka ntlha ya go dira tshiamo. (2 Tim. 3:12) Re ka itumela fa re lebana le diteko, ka gonne re itse gore diteko tseo ke bosupi jwa gore re dira thato ya Modimo.—1 Pet. 3:14-16; 4:12, 14-16.

⁵ Le fa Jesu a ne a itekanetse, dipogo tsa gagwe di ne tsa mo ruta go nna kutlo. Le ka motlha ga a ise a ko a ineele fa Satane a mo raela le fa e le go eletsa dilo tsa lefatshe. (Math. 4:1-11; Joh. 6:15) Ga a ise a ko a tlelwe ke kakanyo ya go ineela fa a lekwa. Le fa gone go tshela ka boikanyegi go ile ga dira gore batho ba mo tlhoe, o ne a nna a kgomaretse melao e e siameng ya ga Jehofa. Pelenyana fela ga Jesu a swa, o ne a tlhagisa barutwa ba gagwe gore le bone lefatshe le ne le tla ba tlhoa. Go tloga ka nako eo go ya pele, balatedi ba ga Jesu ba ne ba lebana le dipogiso, le fa go ntse jalo, ba ne ba kgothadiwa ke go itse gore Morwa Modimo o ile a fenya lefatshe.—Joh. 15:19; 16:33; 17:16.

⁶ Fa re sa batle go nna karolo ya lefatshe, re tshwanetse go kgomarela melao e e siameng ya ga Jehofa, fela jaaka Mong wa rona a ile a dira. Mo godimo ga go tila go itshunya nko mo dikgannyeng tsa lefatshe tsa dipolotiki le tsa loago, re tshwanetse go tila boitsholo jwa lone jo bo maswe. Re tsaya masisi kgakololo eno e e mo go Jakobe 1:21: “Latlhang leswe lotlhe le selo seo se se totileng go feta selekanyo, bosula, mme lo amogele ka bori go jalelwa ga lefoko kwa teng le le kgonang go boloka meya ya lona.” Fa re ithuta Baebele e bile re nna gone kwa dipokanong, re tla itumelela “go jalelwa ga lefoko” la boammaaruri mo megopolong le mo dipelong tsa rona mme ga re kitla re eletsa dilo tsa lefatshe. Morutwa Jakobe o ne a re: “A ga lo itse gore botsalano le lefatshe ke bobaba le Modimo? Jalo, le fa e le mang yo o batlang go nna tsala ya lefatshe o itira mmaba wa Modimo.” (Jak. 4:4) Ka jalo, Baebele e na le kgakololo e e masisi ya gore re kgomarele melao ya ga Jehofa ya tshiamo le gore re tswelele re se karolo ya lefatshe.

⁷ Lefoko la Modimo le re tlhagisa gore re se ka ra dira boitsholo jo bo sa siamang le jo bo tlhabisang ditlhong. Le re bolelela jaana: “A kgokafalo le boitshekologo jwa mofuta mongwe le mongwe kgotsa bogagaru di se ka tsa ba tsa umakwa mo go lona, fela jaaka go tshwanela batho ba ba boitshepo.” (Baef. 5:3) Ka jalo, ga re a tshwanela go letla megopolo ya rona gore e nne e akantse ka dilo tse di maswe, tse di tlhabisang ditlhong kgotsa tse di boikepo e bile ga re a tshwanela go tlotla ka dilo tse di ntseng jalo. Fa re tila dilo tseno, re bontsha gore re batla go kgomarela melao ya ga Jehofa e e phepa le e e siameng ya boitsholo.

GO NNA PHEPA MO MMELENG

⁸ Mo godimo ga go nna le kamano e e molemo le Jehofa le go nna phepa mo boitsholong, Bakeresete ba tsaya go nna phepa mo mmeleng go le botlhokwa thata. Mo metlheng ya bogologolo, Modimo o ne a batla gore Baiseraele ba boloke bothibelelo bo le phepa. Le rona re tshwanetse go nna phepa e le gore Jehofa “a se ka a bona sepe se se seng sentle” mo go rona.—Dute. 23:14.

⁹ Mo Baebeleng, go nna phepa go amanngwa thata le boitshepo. Ka sekai, Paulo o ile a kwala jaana: “Baratwa, a re intlafatseng leswe lengwe le lengwe la nama le moya, re itekanedisa boitshepo mo go boifeng Modimo.” (2 Bakor. 7:1) Ka gone, Bakeresete ba boammaaruri ba tshwanetse go leka ka natla go ipoloka ba le phepa mo mmeleng ka go tlhapa ka metlha le go tlhatswa diaparo tsa bone. Le fa gone maemo a farologana go ya ka dinaga, gantsi re ka kgona go nna le sesepa le metsi a a lekaneng go boloka mebele ya rona e le phepa le go tlhomamisa gore bana ba rona ba nna ba le phepa.

¹⁰ Ka ntlha ya tiro ya rona ya go rera phatlalatsa, gantsi re itsege thata mo mafelong a re nnang mo go one. Go boloka magae a rona a le phepa e bile a le bothakga mo teng le kwa ntle, go neela baagelani ba rona bosupi. Mongwe le mongwe mo lelapeng a ka tsenya letsogo mo kgannyeng eno. Bakaulengwe ba tshwanetse go tlhomamisa gore magae a bone le tikologo ya one di lebega sentle, ka gonne jarata le ntlo e e phepa di ka dira gore batho ba bangwe ba tlotle malapa a bone. Fa banna ba e leng ditlhogo tsa malapa ba dira jalo e bile ba etelela pele mo dilong tsa kobamelo, ba tla bo ba bontsha gore ba okamela ba malapa a bone sentle. (1 Tim. 3:4, 12) Bokgaitsadi le bone ba na le boikarabelo jwa go tlhokomela magae a bone, segolobogolo mo ntlong. (Tito 2:4, 5) Bana ba ba thapisitsweng sentle ba dira seabe sa bone mo go ipolokeng ba le phepa le go boloka dikamore tsa bone di le phepa e bile di lebega sentle. Ka jalo, lelapa lotlhe le tshwaraganela kgetsi ya tsie ka go nna le mekgwa ya go boloka legae le le phepa, e leng mekgwa e e tla nnang botlhokwa thata mo lefatsheng le lesha le go tla bong go busa Bogosi Jwa Modimo.

¹¹ Bontsi jwa batho ba ga Jehofa gompieno ba dirisa dikoloi go ya dipokanong. Mo mafelong mangwe, go dirisa koloi go botlhokwa thata mo bodireding. Ka gone, e tshwanetse go nna e le phepa e bile e le mo boemong jo bo siameng. Magae a rona le dikoloi tsa rona di tshwanetse go bontsha gore re batho ba ga Jehofa ba ba phepa le ba ba boitshepo. Beke ya rona ya tirelo ya tshimo le Baebele le tsone di tshwanetse tsa bontsha seno.

¹² Moaparo wa rona le tsela e re ipaakanyang ka yone di tshwanetse go tsamaisana le melaometheo ya Modimo. Re ka se batle go tlhagelela fa pele ga motho wa maemo re apere botlhaswa kgotsa re sa lebege sentle. Ruri re tshwanetse go ikutlwa jalo le e leng go feta fa re le mo tirelong ya ga Jehofa re le baemedi ba gagwe mo bodireding jwa tshimo kgotsa re le mo seraleng! Tsela e re aparang ka yone le e re ipaakanyang ka yone, e ka ama tsela e batho ba bangwe ba lebang kobamelo ya ga Jehofa ka yone. Ruri go tla bo go le phoso gore re ipaakanye ka tsela e e sa siamang kgotsa e e bontshang gore ga re akanyetse ba bangwe. (Mik. 6:8; 1 Bakor. 10:31-33; 1 Tim. 2:9, 10) Ka jalo, fa re ipaakanyetsa go nna le seabe mo bodireding jwa tshimo kgotsa go ya dipokanong tsa phuthego le kwa dikopanong, re tshwanetse go gopola se Baebele e se buang ka kgang ya go nna phepa mo mmeleng le go ipaakanya ka tsela e e siameng. Re batla gore ka metlha re tlotle Jehofa le go mo galaletsa.

¹³ Re tshwanetse go dira jalo le fa re etela ntlokgolo kgotsa ofisi ya lekala ya Basupi ba ga Jehofa. Gopola gore leina Bethele le kaya “Ntlo ya Modimo.” Ka jalo, re tshwanetse go apara le go itshwara ka tsela e re neng re tla dira ka yone fa re le kwa dipokanong kwa Holong ya Bogosi.

¹⁴ Tota le fa re itlosa bodutu, re tshwanetse go ela tlhoko tsela e re aparang ka yone le e re ipaakanyang ka yone. Re ka ipotsa jaana: ‘A nka tlhabiwa ke ditlhong go neela bosupi ke se mo bodireding ka ntlha ya tsela e ke apereng ka yone?’

BOITAPOLOSO LE BOITLOSOBODUTU JO BO SIAMENG

¹⁵ Re tlhoka go ikhutsa le go itapolosa gore re nne le botsogo jo bo siameng. Nako nngwe Jesu o ne a raya barutwa ba gagwe a re ba tsamaye le ene go ya kwa lefelong le le se nang batho gore ba “ikhutse go se kae.” (Mar. 6:31) Go ikhutsa le boitapoloso kgotsa boitlosobodutu jo bo siameng, di ka dira gore motho a ikutlwe a imologile. Di ka re lapolosa gore re kgone go tswelela ka ditiro tsa letsatsi le letsatsi.

¹⁶ E re ka go na le mefuta e le mentsi ya boitapoloso gompieno, Bakeresete ba tshwanetse go bo tlhopha ka botlhale ba kaelwa ke melaometheo ya Modimo. Le fa gone boitapoloso bo siame, ga e a tshwanela go nna selo sa konokono mo botshelong. Re tlhagisiwa gore “mo metlheng ya bofelo,” batho ba tla nna “barati ba menate go na le go nna barati ba Modimo.” (2 Tim. 3:1, 4) Bontsi jwa dilo tse gompieno go tweng ke boitapoloso le boitlosobodutu, ga di a siamela batho ba ba batlang go tshela ka melao e e siameng ya ga Jehofa.

¹⁷ Bakeresete ba bogologolo ba ne ba tshwanetse go tila go nna mo gare ga batho ba ba sa siamang ba ba neng ba rata menate ba motlha wa bone. Kwa diserekising tsa Roma, babogedi ba ne ba itumedisiwa ka go lebelela batho ba bangwe ba boga. Batho ba ne ba bontshiwa thubakanyo, tshololo ya madi le boitsholo jo bo maswe jwa tlhakanelo dikobo, le fa go ntse jalo, Bakeresete ba bogologolo ba ne ba tila dilo tse di ntseng jalo. Gompieno, bontsi jwa boitlosobodutu bo tletse ka dilo tse di ntseng jalo tse di kgotsofatsang dikeletso tse di boikepo tsa batho. Re tshwanetse go nna re “tlhokometse ka kelotlhoko e kgolo” kafa re tsamayang ka gone, re tila boitlosobodutu jo bo maswe. (Baef. 5:15, 16; Pes. 11:5) Tota le fa boitlosobodutu bo se maswe, lefelo le bo direlwang mo go lone le ka tswa le sa siama gammogo le batho ba ba leng foo.—1 Pet. 4:1-4.

¹⁸ Go na le mefuta ya boitlosobodutu e e siameng e Bakeresete ba ka e itumelelang. Batho ba le bantsi ba solegetswe molemo ke kgakololo ya Dikwalo le dikakantsho tse di molemo tse di mo dikgatisong tsa rona.

¹⁹ Ka dinako tse dingwe, Mokeresete a ka laletsa malapa a le mmalwa kwa legaeng la gagwe. Kgotsa bakaulengwe le bokgaitsadi ba ka lalediwa kwa lenyalong kgotsa kwa kokoanong nngwe e e tshwanang le eo. (Joh. 2:2) Batho ba ba laleditseng ba bangwe ba tshwanetse go itse gore ke bone ba rwalang maikarabelo a se se diregang koo. Ga go pelaelo gore maemo a tshwanetse go nna a beilwe leitlho fa go dirilwe dikokoano tse dikgolo. Go leseletsa dilo kwa dikokoanong tse di ntseng jalo go ile ga dira gore bangwe ba feleletse ba itshwara ka tsela e e sa tshwaneleng Bakeresete, ba ja le go nwa bobe le e leng go dira maleo mangwe a a masisi. Ka ntlha ya seno, Bakeresete ba ba kelotlhoko ba ile ba bona go le molemo gore ba lekanyetse palo ya batho ba ba nnang gone kwa dikokoanong tseno le boleele jwa nako ya tsone. Fa go na le bojalwa, bo tshwanetse go lekanyediwa. (Bafil. 4:5) Fa Bakeresete ba dira maiteko a magolo go tlhomamisa gore dikokoano tsa bone e nna tse di molemo le tse di nonotshang tumelo ya ba bangwe, dijo le dino e ka se nne tsone dilo tsa konokono mo dikokoanong tseno.

²⁰ Ke selo se sentle go nna le moya wa go tshola baeng. (1 Pet. 4:9) Fa re laletsa Bakeresete ba bangwe kwa legaeng la rona go tla go ja le rona, go itapolosa, go iketla le go itisa le rona, ga re a tshwanela go lebala batho ba ba dikobo dikhutshwane. (Luke 14:12-14) Fa re laleditswe kwa dikokoanong tse di ntseng jalo, boitshwaro jwa rona bo tshwanetse jwa dumalana le kgakololo e e mo go Mareko 12:31. Go molemo gore ka metlha re bontshe go anaanela bopelonomi jo ba bangwe ba re bontshang jone.

²¹ Bakeresete ba itumelela dimpho tse dintsintsi tse Modimo a ba abelang tsone le go itse gore ba ka ‘ja ba bo ba nwe mme ba bone molemo ka ntlha ya tiro yotlhe ya bone ya bonatla.’ (Mor. 3:12, 13) Fa re ‘dira dilo tsotlhe kgalaletsong ya Modimo,’ ba ba rulagantseng kokoano le ba ba laleditsweng ba tla gopola kokoano eo ka boitumelo ka gonne e ile ya ba nonotsha tumelo.

DITIRO TSA SEKOLO

²² Bana ba Basupi ba ga Jehofa ba solegelwa molemo ke go nna le thuto ya motheo ya sekolo. Fa ba sa ntse ba tsena sekolo, ba kgatlhegela go ithuta go bala le go kwala sentle. Dithuto tse dingwe tse di rutiwang kwa sekolong di ka solegela basha molemo thata fa ba ntse ba ipeela mekgele e e ka godisang kamano ya bone le Jehofa. Fa ba ntse ba le kwa sekolong, ba tshwanetse go dira maiteko a magolo gore ba ‘gakologelwe Mmopi wa bone yo Mogolo’ ka go baya tirelo ya gagwe kwa pele.—Mor. 12:1.

²³ Fa o le mosha wa Mokeresete yo o tsenang sekolo, ikele tlhoko gore o se ka wa dirisana le basha ba e seng Basupi go sa tlhokege. (2 Tim. 3:1, 2) E re ka Jehofa a go sireleditse, o ka kgona go tila tlhotlheletso ya lefatshe. (Pes. 23:4; 91:1, 2) Ka jalo gore o kgone go itshireletsa, dirisa ka botlalo dilo tse Jehofa a re abetseng tsone.—Pes. 23:5.

²⁴ Basha ba bantsi ba Basupi ba ipoloka ba se karolo ya lefatshe fa ba tlhopha go se nne le seabe mo dilong tse basha ba bangwe ba di dirang morago ga sekolo jaaka go tsaya karolo mo metshamekong. Ba o tsenang sekolo le bone le barutabana ba ka nna ba se ka ba tlhaloganya tshwetso ya gago. Le fa go ntse jalo, selo sa botlhokwa thata ke go itumedisa Modimo. Seno se tla tlhoka gore o dirise segakolodi sa gago se se thapisitsweng ka Baebele le go ema o nitame gore o se ka wa nna le seabe mo dikgaisanong tsa lefatshe kgotsa mo ditirong tsa boratanaga. (Bagal. 5:19, 26) Lona basha, fa lo reetsa kgakololo ya Dikwalo e batsadi ba lona ba ba boifang Modimo ba lo nayang yone e bile lo batla ditsala tse di molemo mo phuthegong, lo ka kgona go tshela ka melao e e siameng ya ga Jehofa.

TIRO YA BOITSHEDISO LE DITSALA

²⁵ Ditlhogo tsa malapa di na le boikarabelo jwa Dikwalo jwa go tlamela ba malapa a bone ka dilo tse ba di tlhokang. (1 Tim. 5:8) Le fa go ntse jalo, e re ka e le badiredi, ba a itse gore tiro ya boitshediso ga e botlhokwa go feta boikarabelo jwa bone jwa konokono jwa go dira ditiro tsa Bogosi. (Math. 6:33; Bar. 11:13) Fa ba tshela go ya ka boineelo jwa bomodimo mme ba kgotsofalela dijo le diaparo tse ba nang le tsone, ba tla tila ditlhobaelo le dirai tsa botshelo jwa go rata dikhumo.—1 Tim. 6:6-10.

²⁶ Bakeresete botlhe ba ba ineetseng ba ba berekang ba tshwanetse go nna ba akantse ka melaometheo ya Dikwalo. Go itshedisa ka boikanyegi go kaya gore re gane go nna le seabe mo ditirong tse di thulanang le molao wa Modimo kgotsa tse di kgatlhanong le molao wa naga e re nnang mo go yone. (Bar. 13:1, 2; 1 Bakor. 6:9, 10) Gape, re tshwanetse go nna re etse tlhoko dikotsi tsa go itsalanya le batho ba ba bosula. E re ka re le masole a ga Keresete, re tila go nna le seabe mo ditirong tsa kgwebo tse di kgatlhanong le melao ya Modimo, tse di ka bayang boitlhaodi jwa rona jwa Bokeresete mo kotsing kgotsa tse di ka senyang kamano ya rona le Jehofa. (Isa. 2:4; 2 Tim. 2:4) E bile ga re batle go amana ka gope le mmaba wa Modimo wa bodumedi, e bong “Babelona o Mogolo.”—Tshen. 18:2, 4; 2 Bakor. 6:14-17.

²⁷ Go ikobela melao e e siameng ya Modimo go tla re thibela gore re se ka ra dirisa nako ya fa re kopane le badumedi ka rona kwa mafelong a kobamelo go buelela dilo tsa kgwebo le dikgang tse dingwe tsa botho. Boikaelelo jwa go kopana ga rona le Bakeresete ba bangwe kwa dipokanong tsa phuthego, kwa dikopanong tse dinnye le tse dikgolo, ke go tla go obamela Jehofa fela. Re a bo re tlile go ithuta le go ‘kgothatsana.’ (Bar. 1:11, 12; Baheb. 10:24, 25) Re tshwanetse go itse gore dikokoano tse di ntseng jalo ke tsa go ithuta ka Jehofa fela.

GO TSHELA MMOGO KA KUTLWANO RE LE BAKERESETE

²⁸ Gape melao e e siameng ya ga Jehofa e tlhoka gore batho ba gagwe ba ‘boloke bongwefela jwa moya mo sebofong se se kopanyang sa kagiso.’ (Baef. 4:1-3) Mongwe le mongwe wa rona o tshwanetse go dira dilo tse di tla solegelang ba bangwe molemo go na le go batla go iitumedisa. (1 Bathes. 5:15) Ga go pelaelo gore phuthego ya lona e na le boikutlo jo bo ntseng jalo. Le fa re ka tswa re le batho ba setso sefe, naga, loago, maemo a botshelo kgotsa thutego, rotlhe re laolwa ke melao e e tshwanang e e siameng. Tota le batho ba e seng Basupi ba ile ba lemoga selo seno se se tlhaolang batho ba ga Jehofa.—1 Pet. 2:12.

²⁹ Moaposetoloi Paulo o ile a kwala jaana fa a gatelela selo se se ka dirang gore go nne le kutlwano: “Go na le mmele o le mongwe, le moya o le mongwe, fela jaaka lo ne lwa bidiwa mo tsholofelong e le nngwe e lo neng lwa bilediwa kwa go yone; Morena a le mongwe, tumelo e le nngwe, kolobetso e le nngwe; Modimo a le mongwe le Rara wa batho botlhe, yo a okametseng botlhe le ka botlhe le mo go botlhe.” (Baef. 4:4-6) Seno se tlhoka gore re nne seoposengwe mo go tlhaloganyeng dithuto tsa motheo tsa Baebele gammogo le dithuto tsa yone tse di boteng gore re ikobele bolaodi jwa ga Jehofa. Eleruri, Jehofa o abetse batho ba gagwe puo e e itshekileng ya boammaaruri, e e ba thusang go mo direla ba le seoposengwe.—Sefa. 3:9.

³⁰ Ruri kutlwano le kagiso tse phuthego ya Bokeresete e nang le tsone gompieno, ke selo sa mmatota se se lapolosang botlhe ba ba obamelang Jehofa. Re bone tsholofetso eno ya ga Jehofa e diragadiwa: “Ke tla ba baya mo kutlwanong, jaaka letsomane mo lesakeng.” (Mik. 2:12) Re batla gore kutlwano eo e e itumedisang e nne e le teng, ka go ngaparela melao e e siameng ya ga Jehofa.

³¹ Ruri batho ba ba mo phuthegong e e phepa ya ga Jehofa ba itumetse! Go bidiwa ka leina la ga Jehofa go botlhokwa thata mo re ka intshang setlhabelo ka tsela epe fela e e tlhokegang. Fa re nna re bolokile kamano ya rona e e molemo le Jehofa, re tla leka ka natla go kgomarela melao e e siameng ya gagwe ka tlhoafalo le go thusa batho ba bangwe go tshela ka yone.—2 Bakor. 3:18.