Nna Phepa mo Mogopolong le mo Mmeleng

“Lo ntshè mebele ea lona setlhabèlō se se tshedileñ, se se itshepileñ, le se se lebosègañ mo Modimoñ.”—BAROMA 12:1.

1. Go ya ka moaposetoloi Paulo, ke ka ntlhayang fa go tlhokega gore re nne phepa mo mogopolong le mo mmeleng?

MOTHO yo o eletsang go direla Modimo o o boitshepo Jehofa o tshwanetse go itsheka mo semoyeng le mo boitsholong. Ka mo go utlwalang, seno se kaya gape go nna phepa mo mogopolong le mo mmeleng. Ereka tsamaiso ya jaanong ya dilo e ntse jaaka e ntse, batho bao ba tswang mo go yone go tla go direla Jehofa ba tshwanetse go dira diphetogo eseng fela mo mekgweng ya bone ya go akanya mme gantsi le mo ditlwaelong tsa bone tsa botho. Moaposetoloi Paulo o ne a kwalela Bakeresete ba kwa Roma jaana: “Ke gōna, ba ga echo, kea lo rapèla ka mautlwèlō botlhoko a Modimo, gore lo ntshè mebele ea lona setlhabèlō se se tshedileñ, se se itshepileñ, le se se lebosègañ mo Modimoñ, mo e leñ tihèlō e e lo lebanyeñ. Me lo se ka loa bopèga yaka lehatshe yeno: me lo hetolwè ke boshahaco yoa pelo tsa lona, gore lo lemogè mo e leñ go rata ga Modimo, mo go molemō, le mo go lebosègañ, le mo go itekanetseñ.” (Baroma 12:1, 2) Go nna phepa mo mogopolong le mo mmeleng go kopanyeletsa eng?

Bophepa Jwa Mogopolo

2. Matlho a rona le dipelo di ka re dira gore re dire boitsholo jo bo repileng jang, mme go tlhokega eng gore re tile seno?

² Le eleng pele ga Molao o neelwa, Jobe yo o ikanyegang o ile a bontsha gore matlho a rona le dipelo tsa rona di ka re dira gore re dire boitsholo jo bo repileng fa re sa di laole. O ne a bua jaana: “Ke ne ka diha kgōlaganō le matlhō a me; me yalo ke ne ke ka leba mosetsana yañ? Ha pelo ea me e kile ea hepisiwa ke mosadi . . . mouō e ne e tla nna mathamō: E, e ne e tla nna boikèpō yoa go bediwa ke baatlhodi.” (Jobe 31:1, 9-11) Fa matlho a rona e le a a lebang kwa le kwa le dipelo tsa rona e le tse di sa tlhomamang, re tlhoka go ruta megopolo ya rona, ka “thutō ea go diha ka botlhale.”—Diane 1:3.

3, 4. (a) Sekai sa ga Dafide le Bathe-shebe se bontsha eng, mme ke eng seo re tlhokang go se dira go fetola mekgwa ya rona ya go akanya e e phoso? (b) Ke ka ntlhayang fa bagolwane ba Bakeresete ba tshwanetse go nna kelotlhoko thata?

³ Matlho a ga Kgosi Dafide a ne a mo gogela mo go direng boaka le Bathe-shebe. (2 Samuele 11:2, 4) Sekai seno se bontsha gore le eleng banna bao ba dirisiwang ke Jehofa thata ba ka wela mo boleong fa ba sa laye megopolo ya bone. Go ka tlhokega boiteko jo bogolo go fetola ditshekamelo tsa rona tsa go akanya. Boiteko jo bo ntseng jalo bo tshwanetse go pataganngwa le go rapelela thuso ya ga Jehofa ka tlhoafalo. Morago ga go ikwatlhaela boleo jwa gagwe le Bathe-shebe, Dafide o ne a rapela jaana: “Modimo, bopa pelo e e itshekileñ mo go nna; u bo u shahatsè mōea o o siameñ mo teñ ga me.”—Pesalema 51:10.

⁴ Bagolwane ba Bakeresete ba tshwanetse go nna kelotlhoko fela thata gore ba se ka ba fitlha dikeletso tse di phoso tseo di ka ba isang mo boleong jo bo masisi. (Yakobe 1:14, 15) Paulo o ne a kwalela mogolwane wa Mokeresete, Timotheo jaana: “Bohèlèlō yoa taeō euō ke loratō lo lo cwañ mo peduñ e e itshekileñ, le segakolodi se se molemō, le tumèlō e e senañ boitimokanyō.” (1 Timotheo 1:5) E tla bo e le boitimokanyo eleruri gore mogolwane wa Mokeresete a dire ditiro tsa semoya mme a ntse a letla leitlho la gagwe gore le lebe kwa le kwa le tlhotlheletsa pelo ya gagwe go akanya go dira sengwe se se maswe.

5. Ke eng seo se tshwanetseng go tilwa e le gore re boloke megopolo e e phepa?

⁵ Bakeresete botlhe ba tshwanetse go dira bojotlhe jwa bone go nna phepa mo mogopolong. Seno se raya go tila dibaesekopo, dithulaganyo tsa TV, kana go bala dibuka dipe fela tseo di ka nnang le tlhotlheletso e e senyang go akanya ga rona. Boitekanelo jwa mogopolo bo kopanyeletsa boiteko jo bogolo jwa go akanya ka dilo tse di “boamarure, . . . tse di itshekileñ, . . . tse di ratègañ.” Moaposetoloi Paulo o oketsa ka go re: “Ha go na le molemō moñwe, me ha go na le pakō, lo gopolè dilō tse.”—Bafilipi 4:8.

Boitekanelo Jwa Botho

6. (a) Naya dikao go tswa mo bukeng ya Lefitiko tseo di bontshang gore boitekanelo jwa motho ka bongwe gammogo le jwa morafe oo otlhe bo ne bo tlhokega kwa Iseraele. (b) Boikaelelo jwa melao eo e ne e le bofe?

⁶ Go ile ga bolelwa gore “bophepa bo gaufi le bomodimo.” Ka boammaaruri, motho yo a leng phepa mo boitsholong le mo mmeleng e ka nna ya bo e se motho wa bomodimo. Mme motho wa bomodimo o tshwanetse, e bile go a tlhokega, gore a nne phepa mo boitsholong le mo mmeleng. Molao wa ga Moshe o ne o na le ditaelo tse di tlhamaletseng tsa go phepafatsa matlo a a leswafetseng le go itlhapisa mmele mo mabakeng a a farologaneng a go leswefala. (Bona Lefitiko, dikgaolo 14 le 15.) Baiseraele botlhe ba ne ba tshwanetse go itshupa ba le boitshepo. (Lefitiko 19:2) Kgatiso Insight on the Scriptures e bua jaana: “Melao ya dijo, ya go phepafatsa, le ya boitsholo eo Modimo o neng o e neile [Baiseraele] e ne e ba gakolola ka metlha ka go lomololelwa ga bone le go nna boitshepo ga bone mo Modimong.”—Bolumo 1, tsebe 1128.

7. Ke eng seo se leng boammaaruri ka Basupi ba ga Jehofa jaaka batho, mme ke eng seo balebedi bangwe ba ba etang ba ileng ba se bega?

⁷ Lefa Basupi ba ga Jehofa e le batho bao ba senang leswe lepe la ditumelo tsa maaka tsa Sebabelona ba bile ba sa mpampetse boitsholo jo bo seng phepa mo gare ga bone, dipego dingwe ka balebedi ba ba etang di bontsha gore batho bangwe ga ba tlhokomele boitekanelo le go nna bothakga. Re ka tlhomamisa jang gore re phepa le mo go seo? Sekao se se molemo sa magae otlhe a Bakeresete ke Bethele, leina leo le kayang “Ntlo ya Modimo.”

8, 9. (a) Ke kgakololo efe eo e neelwang maloko otlhe a masha a lelapa la Bethele? (b) Ke melao-metheo efe e e latelwang mo Magaeng a Bethele eo e tshwanetseng go nna dikao mo legaeng lengwe le lengwe la Bakeresete?

⁸ Fa motho e nna leloko la lelapa la Bethele kwa ntlo-kgolong ya Mokgatlho wa Watch Tower kana nngwe ya makala ape fela a yone go ralala lefatshe, o fiwa boroutšhara eo e kwadilweng ke Setlhopha Se Se Laolang. Kgatiso eno e tlhalosa se se lebeletsweng mo go ene mabapi le mekgwa ya gagwe ya go dira le mekgwa ya gagwe ya botho. E bua jaana kafa tlase ga setlhogo “Go Tlhokomela Kamore le Bophepa”: “Botshelo jwa Bethele bo tlhoka gore go tshegediwe ditekanyetso tse di kwa godimo tsa botho, boitsholo le semoya. Mongwe le mongwe mo Bethele o tshwanetse go amega ka go itshola a le phepa gammogo le kamore ya gagwe. Seno se tlatseletsa mo boitekanelong jo bo molemo. Ga go na lebaka la gore ope fela a nne leswe. Ke mokgwa o o molemo go itlwaetsa go tlhapa letsatsi le letsatsi. . . . Go tlhapa pele ga dijo go a tlhokega mme botlhe ba lebeletswe go dira jalo. Ka go akanyetsa bao re nnang le bone mo dikamoreng le baphepafatsi, sejana se se tlhapelang kana bata e tshwanetse go tlhatswiwa morago ga go dirisiwa.”

⁹ Mo Magaeng a Bethele, dintlwana tsa boithomelo di tshwarwa di le phepa fela thata, mme go dirwa dipaakanyetso tsa gore bao ba di dirisang ba tlhape diatla tsa bone fela fa ba fetsa. Maloko a lelapa a lebeletswe gore a tlogele ntlwana ya boithomelo e le phepa morago ga go e dirisa, seo se rayang gore o e sekaseke morago ga go e dirisa. Seno se bontsha go akanyetsa yo o latelang yo o tla e dirisang kana mophepafatsi. A melao-metheo e e ntseng jalo e e molemo, e e lorato ga e a tshwanelwa go dirisiwa mo legaeng lengwe le lengwe la Bakeresete?

10. (a) Ke ka ntlhayang fa go sa tlhokege ntlwana e e tlhapelang e e maatlametlo gore motho a itshole a le phepa gammogo le bana ba gagwe? (b) Ke melao efe ya Iseraele e e neng e tlatseleletsa mo boitekanelong jo bo molemo, mme ke thuto efe eo batho ba ga Jehofa gompieno ba ka e ithutang go tswa go seno?

¹⁰ Ka tlholego fela, maemo a a farologana go tswa mo nageng e nngwe go ya go e nngwe. Mo mafelong a mangwe, magae ga a na bata e kgolo e e tlhapelang lefa e le shawara. Lefa go le jalo, fa re bua fela ka kakaretso, banna le basadi ba Bakeresete ba ka kgona go bona sesepa le metsi a a lekaneng go boloka mebele ya bone e le phepa le go bona gore bana ba bone ba phepa.a Magae a le mantsi go ralala lefatshe ga a na tsamaiso ya go tlosa mantle. Mme mantle a ka latlhiwa ka go epelwa, jaaka seo se neng se tlhokega mo Baiseraeleng le eleng mo bothibelelong jwa sesole. (Duteronome 23:12, 13) Mo godimo ga seno, melao ya ga Jehofa eo e neng e kaela botshelo mo bothibelelo e ne e tlhoka gore ba tlhatswe diaparo tsa bone le go tlhapa nako le nako, ba lemoge bolwetsi ka bonako ba bo ba bo alafe, le go boloka mebele ya baswi ka tsela e e tshwanetseng, le go boloka metsi le dijo di le phepa. Melao yotlhe eno e ne e tlatseletsa mo boitekanelong jwa morafe otlhe. A batho ba Modimo gompieno ga ba a tshwanela go nna phepa mo mekgweng ya bone ya botho ka tsela e e tshwanang?—Baroma 15:4.

Magae A A Phepa le Dikoloi Tse Di Phepa

11. (a) Magae a mantsi a maemo a a kwa tlase a Bakeresete a tshwanetse go nna jang? (b) Ke tirisano-mmogo efe e e tlhokegang mo malokong otlhe a lelapa la Bethele?

¹¹ Magae a rona, lefa a ka tswa e le a maemo a a kwa tlase jang, go ka kgonega gore e nne a a baakantsweng sentle le a a phepa, mme seno se raya gore go nne le thulaganyo e e molemo ya lelapa. Mmè wa Mokeresete o tla batla go senya nako e ntsi ka mo go kgonegang mo dilong tsa semoya, go akareletsa le tiro ya go rera, ka jalo ga a tshwanela go senya nako ya gagwe e ntsi letsatsi le letsatsi a phepafatsa morago ga maloko a lelapa a sena go tlogela diaparo, dibuka, dipampiri, dimakasine, jalo le jalo, di latlhetswe gongwe le gongwe fela. Mo Bethele, lefa go na le baphepafatsi bao ba phepafatsang, leloko lengwe le lengwe la lelapa le lebeletswe gore le alole bolao jwa lone le go tlogela kamore e le phepa mo mosong. Rotlhe re anaanela Diholo tsa rona tsa Bogosi le Diholo tsa Dikopano tse di bothakga ebile di le phepa. Ekete magae a rona le one a ka bontsha gore re karolo ya batho ba ba phepa le ba ba boitshepo ba ga Jehofa!

12, 13. (a) Ke kgakololo efe e e fiwang mabapi le dikoloi tseo di dirisiwang mo tirelong ya ga Jehofa, mme ke ka ntlhayang fa seno se sa tshwanela go tsaya nako e ntsi? (b) Ke lebaka lefe la semoya leo le leng gone la go itshola re le phepa mo mmeleng le go nna le magae le dikoloi tse di phepa?

¹² Bontsi jwa batlhanka ba ga Jehofa gompieno ba dirisa dikoloi fa ba ya kwa dipokanong le mo tirelong ya tshimo. Mo dinageng tse dingwe koloi ke selo se se tlhokegang fela thata mo tirelong ya ga Jehofa. Ka gone, e tshwanetse go tsholwa e baakantswe sentle e bile e le phepa, fela jaaka magae a rona. Gone, Bakeresete ba ka seka ba senya nako ya bone e ntsi ba tlhokomela dikoloi tsa bone ka mo go feteletseng ka tsela eo batho bangwe ba lefatshe ba dirang ka yone. Mme kwantle ga go feteletsa dilo, batlhanka ba ga Jehofa ba tshwanetse go leka go tshola dikoloi tsa bone di le phepa di bile di baakantswe sentle. Mo dinageng tse dingwe, go tlhatswa koloi kwa lefelong la peterole ga go je madi a mantsi e bile ga go tseye nako e telele. Fa e le kafa teng ga koloi, o ka dira dikgakgamatso fela ka go senya metsotso e le lesome fela o phepafatsa le go baya dilo sentle. Bagolwane le batlhanka ba bodihedi, segolo bogolo, ba tshwanetse go leka go nna dikao mo ntlheng eno, ereka gantsi ba dirisa dikoloi tsa bone go isa ditlhopha tsa baboledi mo tirelong ya tshimo. Fa mmoledi mongwe a pega motho yo o kgatlhegang a mo isa kwa dipokanong, eleruri go tla bo go sa neye bosupi jo bo molemo fa koloi ya gagwe e le leswe e bile e tlhakatlhakane.

¹³ Ka gone, ka maiteko a rona a go itshola re le phepa mo mmeleng le go nna le magae le dikoloi tse di phepa, re tla bo re tlotla Jehofa jaaka maloko a phuthego ya gagwe e e phepa.

Bophepa Fa go Ntshiwa Ditlhabelo tsa Semoya

14. Ke melao efe e e neng e tlhomamisa go nna phepa ga Baiseraele mo kobamelong, mme melao eno e supa eng?

¹⁴ Baiseraele ba ne ba tshwanetse go nna phepa ka metlha fa ba ya go obamela, ba ne ba ka atlholelwa loso fa ba sa dire jalo. Jehofa o ne a bolelela Moshe le Arone jaana: “Bana ba Iseraele lo tla ba lomolola yalo mo go itshekologeñ ga bōnè: gore ba se ka ba shwèla mo boitshekologoñ yoa bōnè, ha ba itshekolola motlaagana oa me, o o mo gare ga bōnè.” (Lefitiko 15:31) Ka Letsatsi la Tetlanyo, moperesiti yo mogolo o ne a tshwanetse go tlhapa mmele wa gagwe gabedi mo metsing. (Lefitiko 16:4, 23, 24) Go ne go na le sejana sa koporo mo motlaaganeng, mme moragonyana kwa tempeleng go ne ga nna le lewatlana le legolo la koporo, tseo di neng di na le metsi ao baperesiti ba neng ba tlhapa mo go one pele ba ka isetsa Jehofa ditlhabelo. (Ekesodo 30:17-21; 2 Ditihalō 4:6) Go tweng ka Baiseraele ka kakaretso? Fa ba ne ba ka leswefala ka mabaka ape fela, ba ne ba thibelwa mo go tseyeng karolo mo kobamelong go fitlha ba fitlheletse ditekanyetso tsa boitsheko. (Dipalō 19:11-22) Sotlhe seno se ne se gatelela gore bao ba obamelang Modimo o o boitshepo Jehofa ba ne ba tshwanetse go nna phepa mo mmeleng.

15. Ke ka ntlhayang fa ditlhabelo tsa diphologolo di sa tlhole di tlhokega, mme go tsoga dipotso dife?

¹⁵ Ka boammaaruri, batho ba ga Jehofa gompieno ga ba tlhoke go isa ditlhabelo tsa diphologolo mo tempeleng ya selefatshe. Ditlhabelo tsa Molao di tseetswe sebaka ke go ‘ntshiwa setlhabelo ga mmele wa ga Keresete go go dirilweng gangwe fela.’ (Bahebera 10:8-10) Re ‘obamela Rara ka moya le ka boammaaruri.’ (Yohane 4:23, 24) Mme a seno se raya gore ga re na ditlhabelo dipe tseo re ka di neelang Modimo wa rona o o boitshepo Jehofa? Mme a bophepa bo santse bo tlhokega mo go rona fela jaaka bo ne bo tlhokega mo Baiseraeleng?

16. Boperofeti jwa Malaki 3:3, 4 bo ile jwa diragadiwa jang mo Bakereseteng ba ba tloditsweng fa esale ka 1918, mme ke ditlhabelo dife tseo di amogelesegang tseo ba ka di neelang Jehofa?

¹⁶ Boperofeti jwa ga Malaki bo bontsha gore Bakeresete ba ba tloditsweng ba ba mo lefatsheng mo nakong eno ya bokhutlo ba ne ba tla phepafadiwa, kana ba itshekisediwa tirelo ya tempele. Hisitori e bontsha gore go phepafadiwa go go ne ga simolola ka 1918. Fa esale ka 1919 masalela a a tloditsweng a ile a “isetsa Yehofa dichupèlō mo tshiamoñ,” mme ditshupelo tsa bone di “natehèla Yehofa.” (Malaki 3:3, 4) Ka gone, ba kgona go “isa ditlhabèlō tsa semōea, tse di lebosègañ mo Modimoñ ka Yesu Keresete.” (1 Petere 2:5) Moaposetoloi Paulo o ne a kwala jaana: “Yalo a re nneñ re isetsè Modimo chupèlō ea pakō ka èna ka metlha eotlhe, eboñ louñō loa melomo e e ipolèlañ leina ya gagwè.”—Bahebera 13:15.

17. Lemororo ba “boidiidi yo bogolo” e se karolo ya boperesiti jwa segosi, ke ka ntlhayang fa ba tshwanetse go nna phepa mo mmeleng, mo mogopolong, mo boitsholong, le mo semoyeng?

¹⁷ Lefa ba “boidiidi yo bogolo” ba sa bilediwe go dira tirelo ya tempele jaaka masalela a a tloditsweng, ba “dihèla [Jehofa] motshegare le bosigo” mo lelwapaneng la selefatshe la tempele ya gagwe ya semoya. (Tshenolō 7:9, 10, 15) Re tla gakologelwa gore Baiseraele ba e neng e se baperesiti ba ne ba tshwanetse go nna phepa ka metlha e le gore ba kgone go tsaya karolo mo kobamelong kwa motlaaganeng kana, moragonyana, kwa tempeleng. Ka mo go tshwanang, boidiidi jo bogolo jwa dinku di sele ba tshwanetse go nna phepa mo mmeleng, mo mogopolong, mo boitsholong, le mo semoyeng fa ba batla go direla mo tempeleng le go arola le masalela mo go ‘isetseng Jehofa tshupelo ya pako’ ka “louñō loa melomo e e ipolèlañ leina ya gagwè.”

Go Nna Phepa le go Ipaakanyetsa Tirelo ya Tshimo le Dipokano Sentle

18. Fa re le mo tirelong ya go supa phatlalatsa le kwa dipokanong, re tshwanetse go amega jang ka bophepa jwa rona jwa mmele, diaparo tsa rona, le ditlhako?

¹⁸ Tota-tota seno se kaya eng? Go kaya gore go tla bo go sa tshwanela ebile go sa bontshe Jehofa tlotlo go mo emela mo bodiheding jwa ntlo le ntlo, mo mebileng, kana mo legaeng la mongwe fa re se phepa mo mmeleng ebile re sa apara ka tshwanelo. Ka gone, ga re a tshwanela go latlhelela fela mo dintlheng tseno. Re tshwanetse go di elatlhoko thata, gore re dire ka tsela eo e tshwanelang badihedi bao ba emelang leina la ga Jehofa. Ga go tlhokege gore diaparo tsa rona di nne tsa tlhwatlhwa e e kwa godimo, mme di tshwanetse go nna phepa, di kgatlhise, di bile di nne tekatekano. Ditlhako tsa rona le tsone di tshwanetse tsa bo di baakantswe sentle ebile di lebega sentle. Ka mo go tshwanang, mebele ya rona e tshwanetse go nna phepa, gape re tshwanetse go apara sentle le ka tshwanelo, kwa dipokanong tsotlhe, go kopanyeletsa le kwa Thutong ya Buka ya Phuthego.

19. Ke melemo efe ya semoya eo e nnang gone fa re lebega re le phepa re bile re ipaakantse sentle jaaka badihedi ba Bakeresete?

¹⁹ Tebego ya rona e e phepa le e e baakantsweng sentle fa re le mo tirelong ya go supa le kwa dipokanong ke tsela e nngwe ya go “[kgabisa] thutō ea Modimo Moreboloki.” (Tito 2:10) Ke bosupi ka bogone. Batho ba le bantsi ba ile ba kgatlhiwa ke bophepa jwa rona le go ipaakanya ga rona sentle, mme seno se ne sa ba tlhotlheletsa go reetsa molaetsa wa rona mabapi le boikaelelo jo bo molemo jwa ga Jehofa jwa magodimo a masha a a siameng le lefatshe je lesha je le phepafaditsweng.—2 Petere 3:13.

20. Ke melemo efe e mengwe gape eo e ka nnang gone ka go nna phepa mo mogopolong le mo mmeleng?

²⁰ Jaaka tsamaiso e ntšha e e phepa ya ga Jehofa e ntse e atamela, rotlhe re tlhoka go itlhatlhoba go bona fa e le gore re tlhoka go dira diphetogo dingwe mo go akanyeng ga rona kana mo mekgweng ya rona ya botho. Paulo o ne a kwala jaana: “Ke bua kaha mokgweñ oa batho, ka ntlha ea thetelèlō ea nama ea lona: gonne yaka lo kile loa ntsha ditokololō tsa lona go nna batlhanka ba leshwè le ba boikèpō yo bo isañ boikepoñ; go nntse yalo gompiyeno ntshañ ditokololō tsa lona go nna batlhanka ba tshiamō e e isañ boitshepishoñ.” (Baroma 6:19) Bophepa jwa semoya le bophepa jwa mmele bo ntsha maungo a a molemo le eleng jaanong, “louñō loa lona lo isa boitshepishoñ, me bokhutlō [e tla nna] botshelō yo bo sa khutleñ.” (Baroma 6:22) Ka jalo, a re, nneng phepa mo mogopolong le mo mmeleng jaaka re “[ntsha] mebele ea [rona] setlhabèlō se se tshedileñ, se se itshepileñ, le se se lebosègañ mo Modimoñ.”—Baroma 12:1.

[Ntlha e e kwa tlase]

Dintlha Tse Di Tshwanetseng go Gakologelwa

◻ Matlho a rona le dipelo di ka re dira gore re tsenelele mo boitsholong jo bo repileng jang?

◻ Ke melemo efe e Baiseraele ba neng ba e amogela fa ba ne ba obamela melao ya ga Jehofa ya boitekanelo jaaka setlhopha le motho ka bongwe?

◻ Ke melao-metheo efe e e latelwang mo Magaeng a Bethele e e tshwanetseng go nna sekao sa legae lengwe le lengwe la Bakeresete?

◻ Ke leng segolo bogolo re tshwanetseng go elatlhoko tebego ya rona?

◻ Ke mabaka afe a semoya ao batlhanka ba ga Jehofa ba nang le one a go tshola magae le dikoloi tsa bone di le phepa di bile di baakantswe sentle?

[Setshwantsho mo go tsebe 17]

“Botshelo jwa Bethele bo tlhoka go tshegetsa ditekanyetso tse di kwa godimo tsa mmele, boitsholo, le semoya”

[Setshwantsho mo go tsebe 18]

A mmè o tshwanetse go senya nako e ntsi letsatsi le letsatsi a phepafatsa fa morago ga maloko ao a sa akanyetseng a lelapa?

[Setshwantsho mo go tsebe 19]

Mo metsotsong e le lesome, go ka dirwa dikgakgamatso mo go phepafatseng koloi kafa teng