Legae Le Lesha la Sekolo sa Barongwa sa Gileade
KA FEBRUARY 1, 1943, mookamedi wa pele wa Watchtower Bible and Tract Society, ebong Nathan H. Knorr, o ne a neela tlelase ya ntlha ya sekolo seno se sesha puo e e bulang. O ne a tlhalosetsa diithuti tseo tse di lekgolo gore “ga se maikaelelo a [sekolo] seno go lo baakanyetsa go nna badihedi ba ba tlhomamisitsweng. Lo setse lo le badihedi mme lo ntse lo le mo bodiheding ka dingwaga di le dintsi. . . . Dithuto tse lo di newang . . . lo di newa ka maikaelelo a le mangwe fela eleng a go lo baakanyetsa go nna badihedi ba ba nang le bokgoni.” Sekolo sa Bibela sa Watchtower sa Gileade se tswelela go katisetsa badihedi tiro ya borongwa ya dinaga di sele go tla go fitlha nako kgolo ke e.
Morago kwa ka 1943, Sekolo sa Gileade se ne se le kwa kgaolong ya Finger Lakes kwa New York State. Gileade e ne ya nna koo ka dingwaga di le 17. Mme morago ga moo, ka 1961, e ne ya busediwa kwa Brooklyn. Ka maikaelelo afe? Sekolo sa Gileade ka dinako tsotlhe se ne se diretswe go tlamela ditlhokafalo tsa mokgatlho. Tlhokafalo ya go tokafatsa le gore go rulaganngwe madirelo a makala lefatshe lotlhe e ne ya dira gore diithuti di katisiwe tota ke ditokololo tsa ntlokgolo ya Basupi ba ga Jehofa, e e kwa Brooklyn. Ka jalo ka dingwaga di le mmalwa, tlhokomelo e ne e lebisitswe thata mo go katiseng badihedi ba kwa makaleng. Morago ga moo, tlhokomelo e ne ya boela ya lebisiwa mo tirong ya borongwa.
Mo dingwageng tse 27 tse di latelang, go tloga ka 1961 go fitlhela ka 1988, diithuti tsa Sekolo sa Gileade di ne tsa ipelela tshiamelo ya go nna le go ithuta ba le mo gare ga ditokololo tsa kwa ntlokgolo kwa Brooklyn. Koo diithuti tseno di ne tsa solegelwa molemo ke botsalano jo bo atamalaneng le ditokololo tsa Setlhopha Se Se Laolang sa Basupi ba ga Jehofa le badihedi ba bangwe ba ba nang le boitemogelo. Ke tsela efe e nngwe e e molemo go gaisa eo ya go ithuta kafa lekala la Mokgatlho wa Watch Tower le dirang ka teng? Diithuti tseno ga di a solegelwa molemo fela ke go katisiwa mo tlelaseng mme gape le ke go lebelela ditokololo tsa ntlokgolo di le mo tirong letsatsi le letsatsi.
Ke phelelo efe eo Sekolo sa Gileade se nnileng le yone mo tirong ya go rera ya boditšhabatšhaba? Go bagolaganyi ba dikomiti tsa makala ba ba 93 bao tiro ya bone e leng go boloka tiro ya lefatshe lotlhe e rulagantswe, ba le 74 ke baalogi ba Sekolo sa Gileade. Seno se buelela sentle katiso e e gaisang eo banna bano ba e boneng ya gore ba kgone boikarabelo jo bo boima jwa go disa batho ba Modimo gompieno. Balebedi ba ba etang ba ba senang palo bao jaanong ba thusang phuthego mo ditlhokafalong tsa yone le bone ke baalogi ba Sekolo sa Gileade. Ee, thulaganyo ya go katisa ya kwa Sekolong sa Gileade e ntse e tsamaisana le ditlhokafalo tsa phuthego.
Gileade E Fuduga go Tswa kwa Brooklyn
Lefa go ntse jalo, gape go ne ga dirwa tshwetso ya gore go fudutshiwe Sekolo sa Gileade. Ka jalo ka letlhabula la 1988, fenitšhara le didirisiwa tsa ofise tseo di neng di rwelwe ke diteraka di le nne di ne tsa goroga kwa legaeng la boraro la Gileade—ebong Watchtower Farms, e e kwa Wallkill, kwa New York. Mo dikgweding di le pedi fela, setlhopha se se baakanyang mo go senyegileng teng sa kwa Watchtower Farms, se ne sa baakanya diphaposi tse dintle tsa borutelo, laeborari, le diofise tsa sekolo. Ba bangwe ba ne ba dira bosigo le motshegare go baakanya madirelo a sekolo seno ka nako pele ga fa tlelase e e latelang e simolola katiso ya yone.
Ka October 17, 1988, tlelase ya bo-86 ya Gileade e ne ya simolola. Sekolo se ne sa tswelela ka maikaelelo a sone a go katisa banna le basadi go nna badihedi ba ba nang le bokgoni, go sena le fa e le sepe seo ba se fositseng. Mo tikologong ya sone e ntle ya kwa Watchtower Farms, bontle joo bo neng bo le gone kwa sekolong sa ntlha sa kwa kgaolong e e kwa Finger Lakes bo ne jwa busediwa.
Tlelase ya bo-86 E Ya Aloga
Ka March 5, 1989, badirimmogo botlhe ba kwa ntlongkgolo ya Watchtower kwa Brooklyn le ba kwa Watchtower Farms ba ne ba kokoanela kwa Holong ya Dikopano ya kwa Jersey City go nna gone fa tlelase ya bo-86 e aloga. Daniel Sydlik, ebong tokololo ya Setlhopha Se Se Laolang, o ne a bula thulaganyo ka thapelo. Karl Klein wa Setlhopha Se Se Laolang o ne a direla jaaka modula-setulo. Mo tsenyeletsong ya gagwe, o ne a bontsha pharologanyo magareng ga barongwa ba mafatshe a sele ba La-Bodumedi le bao eleng Basupi ba ga Jehofa. Abo barongwa ba ba katisitsweng kwa Gileade ba atlegile jang ne mo go ruteng boammaaruri jwa lefoko la Modimo kwa dinageng tse di jaaka Japane koo jaanong go nang le Basupi ba ba fetang 131 000 bao ba tsayang karolo mo bodiheding jwa tshimo ka matlhagatlhaga gone!
Ka setlhogo se se reng “A Ditiro tsa Lona Tse Di Molemo E Nne Letshwao la Lona,” Donald Krebs o ne a tlhalosa karolo ya botlhokwa eo barongwa ba Gileade ba nnileng le yone mo koketsegong ya lefatshe lotlhe ya phuthego ya ga Jehofa. “Ditiro tsa lona tse di molemo mo tirong ya borongwa jaaka barutisi ba Lefoko la Modimo e tla nna . . . letshwao leo le lo tlhaolang. Re lo kgothaletsa gore lo dire ka natla. Jehofa o tla segofatsa maiteko a lona ka mo go oketsegileng.”
Tokololo ya Setlhopha Se Se Laolang, ebong George Gangas, o ne a neela puo ka matlhagatlhaga e e nang le setlhogo se se reng “Bibela Ke Buka E E Molemolemo Tlase ga Letsatsi.” O ne a gakolola baalogi jaana: “Lo se ka lwa lebala go ithuta Bibela. Bibela e tletse ka maje a botlhokwa a semoya . . . a a phatsimang le go tsabakela. Yo o a anaanelang o batla go a lebelela gangwe le gape mme a ipelele go tsabakela ga one.”
Setlhogo sa ga Richard Eldred se ne se re “O Ka Dira Pharologano.” Jaaka fa barongwa ba basha bano ba ama matshelo a batho ba bangwe, ba ka dira pharologano e e molemo. Banna le basadi ba metlha ya bogologolo jaaka Dafide, Nehemia, Debora, le Abigaile ba ne ba nna le tlhotlheletso e e molemo mo go ba bangwe ka go amega thata ka bone, ba boloka tumelo ka bopelokgale, le go nna le boikutlo jwa go nna bonolo, le jwa semoya.
Tokololo ya Setlhopha Se Se Laolang, ebong Lyman Swingle, o ne a bolelela tlelase e e alogang jaana, “Balang Masego a Lona.” Morago ga a sena go bala a sekae a masego ao tlelase e nnileng le one, jaaka a go kgona go tlhoma mogopolo mo go ithuteng Bibela ka dikgwedi di le tlhano, o ne a ba kgothatsa jaana: “Jaaka fa bokhutlo bo ntse bo atamela, lo ka nna lwa bona mosepele o akofa, mmila o nna makgwakgwa go sekae, le tsela e nna motlhatlosa go sekae. Mme fela tlhomamisang gore le ka motlha lo seka lwa felelwa ke thata, gore le ka motlha lo seka lwa tlogela, gore le ka motlha lo seka lwa fetoga ba ba tlogetseng tiro ba sa e fetsa.”
Mongwe wa motlhatlheledi, ebong Jack Redford, o ne a tlhalosa setlhogo se se reng “Lo Seka Lwa Letla Nonofo ya Lona Gore E Fetoge Bokoa.” A thaile seno mo kgakololong ya ga Solomone e e nang le mafoko ano, “U se ka ua nna tshiamō ea mo go heteletseñ,” o ne a tlhagisa malebana le go ikaega thata ka seo motho o nang le sone go na le go ikaega ka Jehofa. (Moreri 7:16, 17) “Mekgwa e mentle fa e fetelediwa e ka fetoga serai.” Ka sekai, mongwe yoo nonofo ya gagwe e leng molao le tolamo a ka feteletsa nonofo eo ka go nna yo o gwaletseng le go feta. Ka jalo, o ne a gakolola tlelase jaana: “Rotlhe re tshwanetse go lemoga makoa a rona, mme gape re tshwanetse go lemoga dinonofo tsa rona. Nnang ba ba siameng mme fela lo se ka lwa ithaya lwa re lo siame. Ikaegeng ka Jehofa. Dirang Jehofa nonofo ya lona.”
Ulysses Glass, ebong motlhatlheledi le mokwadisi wa sekolo, o ne a tlhalosa mafoko a ga Jesu a a reng, “Ipeleseñ yokwe oa me.” (Mathaio 11:29, 30) Fano Jesu o laletsa barutwa ba gagwe go ‘tsena kafa tlase ga jokwe ya gagwe’ le ene. Ga a ka a batla go ba imetsa ka morwalo. Dilo tse ba bangwe ba di tlhokang di ne di tla pele mo mogopolong wa gagwe. O ne a bontsha boikokobetso. Ga a ka a sotla barutwa ba gagwe. Jesu o ne a bolela jaana, “Lo ithutè ga me.” Morongwa o tshwanetse go nna le mogopolo wa ga Keresete. Sebui seno se ne sa akgola tlelase ka ntlha ya moya wa bone wa go aba mme o ne a ba kgothaletsa gore ba tswelele ba na le moya o o tshwanang kwa dikabelong tsa bone tsa dinaga di sele.
Fa thulaganyo ya mo mosong e ne e setse e le gaufi le go fela, tokololo ya Setlhopha Se Se Laolang ebong Carey Barber o ne a neela puo ka matlhagatlhaga ya setlhogo se se reng “Thōbō Ke Bokhutlō yoa Lehatshe.” O ne a tlhokomedisa ka tiragatso ya segompieno ya setshwantsho sa ga Jesu sa korong le mofoka. (Mathaio, kgaolo 13) Santlha, go phuthiwa batlodiwa ba ga Keresete. Morago ga moo, segolo-bogolo go tloga ka 1935, dinku di sele di ile tsa kopanela mo go ‘robiweng.’ Sekolo sa Gileade se ile sa swetsa tiro e e molemolemo ya go thusa go roba barutwa ba ga Keresete.
Morago ga gore baalogi ba fiwe di-dipoloma tsa bone, mongwe wa palo ya bone o ne a buisa lekwalo le le monate leo ka lone baalogi ba neng ba tlhalosa maikutlo a bone malebana le katiso le tlhokomelo eo ba e boneng go tswa go batlhatlheledi le lelapa la Bethele. Karolo ya lekwalo leo e ne ya bolela jaana: “Tsela eo lo re kgatlhegelang ka yone eseng fela jaaka tlelase ya Gileade mme jaaka batho ba bangwe go re kgatlhile thata mme ono ke mokgwa o o tshwanelwang ke go etsiwa. Re kgaogana ka maikutlo a a tlhakatlhakaneng—go botlhoko go lo tlogela gonne re tla lo tlhologelelwa mme gape re itumetse ebile re tletse matlhagatlhaga ka kabelo ya rona e ntšha.”
Mo thulaganyong ya thapama, baalogi ba ne ba tsaya karolo mo Thutong ya Tora ya Tebelo e e neng e tsamaisiwa ke Ralph Walls. Mme morago ga moo tlelase e ne ya dira dipontsho tsa dilo dingwe tse di kgatlhisang tsa maitemogelo ao e nnileng le one mo bodiheding jwa tshimo fa ba ne ba nna kwa Watchtower Farms. Komiti E E Rutang ya Setlhopha Se Se Laolang e ne ya neela thulaganyo ya diseketšhe e e nang le setlhogo se se reng “Go Tlotla Taolo go Godisa Kutlwano” le puo ya di-slide e e bontshang boipelo joo barongwa ba ba kwa dinageng di le dintsi ba ileng ba nna le jone ka dingwaga di le dintsi. Thulaganyo e ne ya fela ka thapelo e e tswang botennyeng jwa pelo ka Frederick Franz, ebong mookamedi yo o nang le dingwaga di le 95 wa Sekolo sa Bibela sa Watchtower sa Gileade.
Ka go arabela ga bone thulaganyo ka matlhagatlhaga, bao ba neng ba le gone ba ne ba bontsha kemonokeng ya bone go bano bao e tlileng go nna barongwa le gore ba anaanetse thulaganyo. Ga go belaetse go bo baalogi ba ba 24 bano ba tlelase ya bo-86 ya Gileade ba ikaeletse go dira Jehofa nonofo ya bone jaaka ba ya kwa dikabelong tsa bone tseo e leng tshiamelo mo tirong ya borongwa.
[Lebokoso mo go tsebe 21]
MANAANE-PALO A DIITHUTI
Palo ya banyalani: 12
Palo ya diithuti: 24
Palo ya dinaga tseo diithuti di tswang kwa go tsone: 6
Palo ya dinaga tseo ba abetsweng kwa go tsone: 12
Palogare ya dingwaga tsa bone: 32,3
Palogare ya dingwaga ba le mo boammaaruring: 14,1
Palogare ya dingwaga ba le mo bodiheding jwa nako e e tletseng: 9,1
[Setshwantsho mo go tsebe 23]
Setlhopha Se Se Alogang sa bo-86 sa Sekolo sa Bibela sa Watchtower sa kwa Gileade
Mo lenaaneng le le fa tlase, mela e balwa go tswa fa pele go ya kwa morago, mme maina a thathamisitswe go tsoga kafa molemeng go ya kafa mojeng mo moleng mongwe le mongwe.
(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.