Dira Maeto a go Boela mo Bathong Botlhe ba o Ba Tsamaiseditseng Diboroutšhara
1 Moaposetoloi Paulo o ne a akgola Bafilipi ka go bo ba ne ba ‘tsosolositse megopolo ya bone ka ga gagwe.’ (Bafil. 4:10) Fa re ka dirisa sekao sa bone mo bodireding jwa tshimo, re tla ‘tsosolosa megopolo ya rona’ ka batho ba re ileng ra ba neela bosupi mme re tla itlhaganelela go dira maeto a go boela.
2 Fa e le gore o ne o tsamaisitse boroutšhara jwa “Puso Eo e Tla Tlisang Paradaise,” o ka nna wa bua sengwe se se tshwanang le seno:
◼ “Ke ne ke ntse ke akanya ka motlotlo o re nnileng le one maloba, mme ka gakologelwa makwalo a mabedi a ke ka ratang go a go bontsha. O tla gakologelwa gore re ile ra bua ka nako ya fa Modimo a tla bo a busa lefatshe. Mo Baebeleng, Jehofa Modimo o solofeditse gore seno se tla diragala. [Bala Daniele 2:44.] A o dumela gore seo tota se tla diragala? [Letela karabo.] Utlwa gore Modimo a reng malebana le tsela e a kgonang go diragatsa ditsholofetso tsa gagwe ka yone. [Bala Isaia 55:11.] A seo ga se a tshwanela go re kgothaletsa gore re ikanye Bogosi jwa Modimo? Mme gone Modimo o tla diragatsa leng ditsholofetso tsa gagwe?” Tlhalosa gore o tla araba potso eo fa o boa gape.
3 O ka nna wa simolola jaana fa o dira leeto la go boela mo mothong yo o tsereng boroutšhara jwa “Fa Mongwe Yo O Mo Ratang A Tlhokafala”:
◼ “Ke dirile maiteko a a kgethegileng gore ke boe ka ntlha ya puisano ya rona e e malebana le go swelwa ke mongwe.” Mmontshe setshwantsho se se mo tsebeng ya 30 fa o bolela jaana: “A o gakologelwa pono e e itumedisang eno ya fa batho ba tsosiwa mme ba kopana gape le baratiwa ba bone? Ke ne ka go botsa potso ya gore seno se tla diragala kae, kwa legodimong kana mo lefatsheng. Gongwe o bone karabo ya Baebele e e mo tsebeng ya 26 ya boroutšhara jono.” Tlotla ka dintlha tsa konokono go tloga mo serapeng sa boraro go fitlha mo go sa botlhano mme o bale Johane 5:21, 28, 29. Fa nako e letla, bala dikwalo dipe fela tse di setseng mo tsebeng eo.
4 A o setse o simolotse thuto ka boroutšhara jwa “Bōnañ, Dilō Cotlhe Ke Di Diha Sesha”? Fa o boela o ka nna wa dira seno:
◼ Bula tsebe 30 gape mme o mo lebise mo potsong e e reng: “Baebele e tlhomologile ka ditsela dife?” Bula ditsebe 3 le 4 mme o sekaseke dirapa 1-4 mmogo le setshwantsho se se kafa ntle ga boroutšhara. Bala lekwalo le le lengwe kana di le pedi tse di umakilweng mo ntlhanyaneng e e kafa tlase ya serapa 4. Mo tlhalosetse gore Baebele ke yone fela buka e e nang le tsholofelo e ntle jalo. Dira dithulaganyo tsa leeto la gago le le latelang. Fa o sena go boela ka lekgetlho la boraro, mme o bona gore thuto e tla tswelela pele, o ka nna wa simolola go bega thuto e ntšha!
5 O ka nna wa tsweletsa motlotlo wa boroutšhara jwa “Leina La Modimo Leo Le Tla Nnelang Ruri” ka tsela eno:
◼ “Mo nakong e e fetileng, ke ne ka kgona go go bontsha leina la Modimo mo Baebeleng. Go itse le go dirisa leina Jehofa ke karolo e e botlhokwa ya kobamelo ya rona.” Bula tsebe 31, tlhalosa dintlha tse dikgolo tse di mo dirapeng tsa bofelo tse nne, mme o bale Johane 17:3 le Mika 4:5. Mo tlhalosetse gore re na le thulaganyo ya thuto ya Baebele e e ka kgonang go mmontsha gore leina la Modimo le tla itshepisiwa jang ka tsela e tshwanetseng le ka moo re ka itumelelang masego a lefatshe la paradaise ka gone.
6 Ka jalo, tsosolosa mogopolo wa gago ka batho ba o kopaneng le bone. Nna o ntse o boela kwa go bone gangwe le gape, mme o ipaakanyetse go ba bolelela sengwe se se tla ba solegelang molemo. O ka nna motho yo ‘ruri a ungwang’ mo go direng barutwa ba basha.—Math. 13:23.