LAEBORARI YA MO INTERNET
Watchtower
LAEBORARI YA MO INTERNET
Setswana
š
  • ê š ô Ê Š Ô
  • BAEBELE
  • DIKGATISO
  • DIPOKANO
  • w88 7/1 ts. 7-12
  • “Lo Nnè Lo Lebogè”

Ga go na bidio mo karolong eno.

Tshwarelo, bidio eno ga e kgone go tlhaga.

  • “Lo Nnè Lo Lebogè”
  • Tora ya Tebelo E Itsise Bogosi Jwa ga Jehofa—1988
  • Ditlhogwana
  • Tse di Tsamaisanang le Setlhogo Seno
  • Mabaka a Mantsi a go Leboga
  • Kafa ba ka Bontshang Tebogo ka Gone
  • Bopelotshweu jo bo Tswang mo Pelong
  • Dikai tsa Motlha wa Segompieno
  • Ditsela tsa go Bontsha Tebogo
  • Sekao se se Molemo sa Motlholagadi wa Mohumanegi
  • Dikgakololo tsa Gore go Ntshiwe Malebogo di Mosola
  • “Itshupeng Lo na Le Tebogo”
    Tora ya Tebelo E Itsise Bogosi Jwa ga Jehofa—2003
  • Mabaka a Mangwe a Gore O Leboge
    Tora ya Tebelo E Itsise Bogosi Jwa ga Jehofa—1988
  • Ke Eng fa O Tshwanetse go Leboga?
    Tora ya Tebelo E Itsise Bogosi Jwa ga Jehofa—1988
  • Bontsha Gore O na Le Tebogo
    Tirelo ya Rona ya Bogosi—2004
Bona Ditlhogo Tse Dingwe
Tora ya Tebelo E Itsise Bogosi Jwa ga Jehofa—1988
w88 7/1 ts. 7-12

“Lo Nnè Lo Lebogè”

“A kagishō ea ga Keresete e laolè ma peduñ tsa lona . . . me lo nnè lo lebogè.”—BAKOLOSA 3:15.

1. Ke eng seo Bakeresete ba tshwanetseng go itisa kgatlhanong le sone mo lefatsheng leno le le sa lebogeng?

LEKGOLO leno la dingwaga la bo-20 le le tletseng matshwenyego le fitlhile seemong seo batho ba le bantsi ba lebetseng kafa ba ka lebogang ka gone. Mafoko a a bontshang kanaanelo a “tswee-tswee” le “ke a leboga” ga se gantsi a utlwala mo ngwageng mongwe le mongwe o o fetang. Go sa leboge go nnile bontlhanngwe jwa “moya,” ebong bopelotshetlha joo bo laolang batho ba lefatshe leno. (Baefesia 2:1, 2) Lemororo Bakeresete ‘ba se ba lefatshe,’ ba santse ba tla nna mo go lone fa fela tsamaiso ya jaanong ya dilo e santse e le gone. (Yohane 17:11, 16) Ka jalo, ba tshwanetse go disa gore moya ono wa go sa leboge o seka wa fetela mo go bone, o dira gore go leboga ga bone go nyelele.

2. (a) Dingwe tsa ditsela tse batlhanka ba ga Jehofa ba ka bontshang tebogo ya bone go ene ke dife? (b) Ke eng se se tlhokafalang kwantle ga go leboga fela ka molomo?

2 Go lebogela bomolemo jwa Modimo gantsi go ka nna ga bontshiwa mo motlotlong le badumedi mmogo. Bakeresete ba le bantsi ba ba ineetseng ba ka nna ba bo ba leboga Rraabo wa selegodimo, ebong Jehofa, ka ntlha ya bomolemo jwa gagwe ka makgetlo a sekae mo letsatsing, ba dira jalo ka thapelo ya botho. Ditebogo tse dingwe gape di bontshiwa mo dithapelong tsa mo phuthegong lefa go opelwa dipina tsa Bogosi kwa dipokanong tsa Bokeresete. Legale, ke selo se se motlhofo fela go bua mafoko a tebogo ka molomo. Lefa go ntse jalo, moaposetoloi Paulo, o ne a kgothaletsa bakaulengwe ba gagwe kwa Kolosa gore ba seka ba bua fela ba re baa leboga mme gape ba ne ba tshwanetse go bontsha kana go supa ditebogo mo matshelong a bone a malatsi otlhe. O ne a kwala are: “A kagishō ea ga Keresete e laolè mo peduñ tsa lona, e lo bileñ lo biledicwe eōna mo mmediñ o le moñwe hèla; me lo nnè lo lebogè.”—Bakolosa 3:15.

Mabaka a Mantsi a go Leboga

3. Ke ka ntlhayang fa rona rotlhe re tshwanetse go leboga Modimo?

3 Mongwe le mongwe yo o tshelang o na le mabaka a le mantsi a gore a leboge. Lebaka le le kwa pelepele ke go ipelela botshelo ka bojone, gonne sengwe le sengwe se re nang naso kana se re rulaganyeditseng go se dira ka tshoganyetso se tla nna se se senang mosola fa re ka latlhegelwa ke botshelo jwa rona. Mopesalema Dafide o ne a kgothaletsa batho ootlhe go gakologelwa gore “mocwedi oa botshelō o nntse nau [Jehofa Modimo].” (Pesalema 36:9) Mme moaposetoloi Paulo o ne a gakolola baagi ba Athena ka boammaaruri jo bo sa khutleng jo bo tshwanang fa a ne a bua le bone mo Areopago. (Ditihō 17:28) Ee, gone fela go tshela ke lebaka le le nonofileng la go leboga. Mme kanaanelo ya rona e nna e ntse e nonofa fa re gakologelwa dinonofo tse Modimo o di re fileng—kgono ya rona ya moutlwalo wa loleme, ya go ama, ya go dupa, ya go bona, le go ya utlwa—gore re tle re ipelele botshelo le bontle jwa popo e re mo go yone.

4. Ke eng seo se tla re sireletsang gore re seka ra tsaya mas ego motlhofo fela?

4 Lefa go le jalo, batho ba le bantsi ba tsaya dilo tseno tse di molemo motlhofo fela. Mme batho ba le bantsi ba simolola go lemoga gore ba ne ba na le masego a ba paletsweng ke go a anaanela fa ba santse ba na le botsogo jo bo siameng, fa ba latlhegelwa ke kgono nngwe, jaaka pono ya matlho kana go utlwa ka ditsebe. Bakeresete ba ba ineetseng ba tshwanetse gore ka metlha yotlhe ba itlhokomele gore ba seka ba wela mo maemong a a tshwanang a go tlhoka kanaanelo. Ba tshwanetse go dira ka natla go boloka boikutlo jo bo tshwanang jwa go leboga jaaka jo bo neng jwa supiwa ke mopesalema yo o neng are: “Yehofa, Modimo oa me, di dintsi ditihō tsa gago tse di gakgamatsañ, tse u di dihileñ, le megopolō ea gago e e kwano go rona: ga u kake ua di rulaganyediwa: ha ke rata go di bolèla, le go bua kaga cona, di heta mo go ka balwañ.”—Pesalema 40:5.

5. Go sa kgathalesege masego a mantsi a Iseraele a a tswang go Jehofa, ke tsela efe e e tlhabisang ditlhong e ba neng ba e tsaya?

5 Pesalema ya bo-106 e sobokanya ka tsela ya go boka ditiro tse dikgolo tsa nonofo tse Jehofa a di diretseng batho ba gagwe, ba Iseraele. Ditiro tse a di ba diretseng di ne di akaretsa bomolemo le masego a a tlwaelesegileng a botshelo tseo a di fang setho ka kakaretso. Lefa go ntse jalo, kwantle ga melemo eno, mopesalema o supa gore Baiseraele ba ne ba seka ba tswelela pele go bontsha kanaanelo ka ntlha ya masego a bone a mofuta wa one fela. Temana 13 e tlhalosa jaana: “Ba tloga ba lebala ditihō tsa gagwè ka bonakō; ba se ka ba lebèlèla kgakololo ea gagwè.” Nnyaa, e ne e se go feta ga nako moo ka bonya go neng ga ngotla go leboga ga bone, moo go neng ga dira gore masome a dingwaga moragonyana ba bo ba sa tlhole ba gakologelwa se Modimo o neng a se ba diretse. Go na le moo, ba ne ba lebala ka bofefo—fa go sena go feta dibeke fela Jehofa a sena go ba direla dikgakgamatso tse dikgolo mo Lewatleng le Lehibidu. (Ekesodo 16:1-3) Ka maswabi, ditiragalo tse di neng di le kwa pele tsa go tlhoka tebogo di ne tsa diragala mo matshelong a bone ka kakaretso.

Kafa ba ka Bontshang Tebogo ka Gone

6. Ke ka ntlhayang fa patlafalo ya go ntsha ditsabosome e ne e se bothata bope?

6 Ka thulaganyo e e tletseng, Jehofa o ne a bolela ditsela di le tharo tse di tsepameng tseo Baiseraele ba neng ba tshwanetse go bontsha ka teng kanaanelo ya bone ya mmannete mo molemong wa gagwe. E nngwe e ne e le ya go tlhokomela patlafalo ya gore ba ntshe ditsabosorne ka go neela Jehofa sengwe le sengwe sa bone sa bosome sa dilo tseo ba di bapetseng mo masimong gammogo le tsa diruiwa tsa bone. (Lefitiko 27:30-32) Selo sena se ne se se kitla se nna bothata, ka go bo Modimo e ne e le ene a dirileng letsatsi, mmu o o nonneng, pula, le kgakgamatso ya go godisa dijalo. Jalo, go ntshetsa baperesiti ba ba mo motlaaganeng wa ga Jehofa ditsabosome e ne e le fela go supa ka tsela e e bonalang gore ba leboga Jehofa ka boene.

7. (a) Ke pharologanyo efe e kgolo e e neng e le gone fa gare ga go ntsha ditsa-bosome le go ntshetsa Jehofa meneelo? (b) Seno se ne se letlelela gore Baiseraele ba senole eng se se mo go bone?

7 Patlafalo e nngwe e ne e le ya gore ba ntshetse Modimo meneelo eo selekanyo sa yone se neng se laolwa ke boikutlo jwa pelo ya Moiseraele mongwe le mongwe ka sebele sa gagwe. Lemororo go ne go sena selekanyo sepe se se beilweng, meneelo eo e ne e tshwanetse go nna ya mabutswapele—ebong dijalo tsa peo ya ntlha, beine, le boboya jwa dinku. (Dipalō 15:17-21; Duteronome 18:4) Mme gape, Jehofa o ne a laotse gore batho ba gagwe ‘ba ne ba sa tshwanela go nyahala mo go iseng tshupelo’ mme ebile ba ne ba tshwanetse go ntsha ‘sa ntlha sa mabutswapele a mmu.’ (Ekesodo 22:29; 23:19) Seno se ne sa fa Baiseraele dipaka tsa gore ba bontshe tebogo ya bone go Jehofa ka tsela e e bonalang tota. Ba ne ba ka senola boteng jwa tebogo ya bone ka selekanyo sa meneelo. A ba ne ba tla ntsha meneelo ya lesitlha le le lengwe la maungo a mofine? Kana a bopelotshweu jwa motho bo ne bo tla mo tlhotlheletsa gore a ntshe seroto se se tletseng? Ka jalo, motho mongwe le mongwe, kana lelapa lengwe le lengwe le ne le ka bontsha tebogo ya gagwe kwantle ga go patelediwa.

8. (a) Ke melemo efe e le mebedi eo thulaganyo ya go kotula e neng e e baakanyetsa? (b) Bopelotshweu le go leboga di ne di ka bontshiwa jang ke ootlhe ba ba neng ba kopanyelediwa mo thulaganyong ya go kotula?

8 Tsela ya boraro e e tsepameng ya go bontsha tebogo e ne e le malebana le paakanyetso ya Modimo ya go kotula. Ka nako ya thobo, go ne go tshwanetse gore go tlogelwe dikarolo dingwe di sa rojwa gore di salele batlhoki. Selo sena se ne se sa ba rute go nna pelotlhomogi fela le go nna bopelontle mo go ba ba humanegileng mme gape se ne se tiisetsa gore ba seka ba ikaega fela ka dimpho tse di ba tsenyang botshwakga tse di neng di sa tlhoke gore bone ka bobone ba tsenye letsogo. (Lefitiko 19:9, 10) Tota gore batlhoki ba ne ba tshwanetse go sadisediwa go le kana kang go ne go sa bewa selekanyo. Mme fa balemi ba Baiseraele ba ne ba bontsha moya wa bopelotshweu ka go sadisa go le gontsi mo ditlhakoreng tsa masimo a bone mme ka jalo ba bontsha tlhomogelo-pelo mo mohumaneging, ba ne ba tla bo ba galaletsa Modimo. (Diane 14:31) Go ne go beilwe mo go bone fela gore ba itlhomamisetse gore a ba ne ba tla tlogela selekanyo se sesesane kana se se sephara se sa rojwa kana nnyaa. Mme Modimo o ne a ntsha ditaolo tse di nonofileng tebang le bopelotshweu ka go laola gore diako dipe tse di sa boñ wang fa go rojwa mo tshimong le maungo ape fela a a sadisitsweng mo setlhareng kana mo masimong di tlogelelwe bakotudi. (Duteronome 24:19-22) Mme morago ga moo, le bone bakotudi ba ne ba ka bontsha tebogo ya bone go Jehofa ka ntlha ya paakanyetso eno ka go ntsha moneelo wa bosome wa dilo tse ba di kotutseng kwa lefelong la gagwe la kobamelo.

Bopelotshweu jo bo Tswang mo Pelong

9. Ke ka ntlhayang fa botlhe ba ba neng ba bontsha boikutlo jwa bopelotshetlha e ne e le bone tota ba ikutlwisang botlhoko?

9 Fa Baiseraele ba ne ba ntsha meneelo ka boithatelo, Jehofa o ne a segofatsa magae a bone. (Bapisa Esekiele 44:30; Malaki 3:10.) Lefa go ntse jalo, go sa kgathalesege dithobo tse dikgolo tseo ba neng ba di bona, gant si ba ne ba tle ba palelwe ke go ntsha meneelo eno. Mme Modimo o ne a ba gakolola ka dikgosi le baperofeti gore ba ba lemotshe kafa go tlhokafalang ka gone gore ba leboge. Tota, Baiseraele ba ba pelotshetlha ke bone ba ba neng ba latlhegelwa, ka go bo Jehofa o ne a ka seka a tshegofatsa ootlhe ba ba neng ba ikgogona ka meneelo e e neng e tsamaisanya le kobamelo ya gagwe kana e le ya bahumanegi.

10. (a) Ke matswela afe a a itumedisang ao a neng a tlhagisiwa ke dikgakololo tsa ga Kgosi Hesekia kaga go bontsha malebogo? (b) A maemo a a ntseng jalo a ne a diega?

10 Mo pakeng nngwe, dikgakololo tse di neng tsa ntshiwa ke Kgosi Hesekia di ne tsa felela ka gore go nne le mokete o mogolo wa boitumelo mo Jerusalema wa malatsi a le 14. Batho ba ne ba tsosolosiwa semoyeng. Santlha, ba ne ba senya dikamano tsotlhe tsa kobamelo ya medimo ya disetwa le bone mme go tswa foo ‘ba ntsha mekoakoa fela. . . . Mme ya re Hesekia a tla le dikgosana, mme ba bona mekoakoa, ba baka Jehofa le batho ba gagwe ba Iseraela.’ (2 Ditihalō 30:1, 21-23; 31:1, 6-8) Lefa go le jalo, ka maswabi, morago ga ditsosoloso tse di ntseng jalo tsa nako le nako, batho ba ne ba boela gape ba nna ba ba sa lebogeng. Labofelo, bopelotelele jwa Modimo bo ne jwa fela, mme o ne a letlelela gore batho ba gagwe ba tsewe e le ditshwarwa go isiwa Babelona. Motse wa bone le tempele ya bone e ntle di ne tsa senngwa. (2 Ditihalō 36:17-21) Maemo kgabagare a ne a nna masisi thata mo eleng gore Jehofa o ne a tshwantsha bohula jwa Bajuda le go utswa mo go ene, ba mo thukhutha!—Malaki 3:8.

11. Ke molao-motheo ofe o o ithutiwang mo ditiragalong tsa Baiseraele oo o ka solegelang Bakeresete ba ba tshelang mo nakong eno molemo?

11 Ke molao-motheo ofe o o ka ithutiwang mo ditiragalong tseno tse di fetofetogang tsa Baiseraele? Go ka ithutiwa sena: Fa fela dipelo tsa bone di santse di tletse malebogo, ba supe seo ka boitumelo ka go ntshetsa Jehofa “mekoakoa hèla.” Mme e ne e re fa ba ka lebala go bontsha tebogo kana tebogo ya bone e fokotsega thata, go ntsha dilo tse di bonalang ka boitumelo go ne go ema gotlhelele. A boikutlo jo bo ntseng jalo jo bo bosula bo ka bontshiwa ke Bakeresete ba ba ineetseng gompieno? Ee, ka go bo go sa itekanelang ga batho go sa ntse go le mo go rona. Abo re itumela jang ne go bo Modimo a kwadile ditirisano tsa gagwe le Baiseraele gore, rona ba re tshelang mo dikhutlong tsa motlha ono wa dilo, re ithute re bo re solegelwe molemo!—Baroma 15:4; 1 Bakorintha 10:11.

12. (a) Batho ba ga Jehofa gompieno ba mo boemong jo bo tshwanang le jwa Baiseraele ka tsela efe? (b) Ke dipotso dife tse re tshwanetseng go di botsa?

12 Fela jaaka Baiseraele, batho ba ga Jehofa gompieno ba na le mabaka a le mantsi a a dirang gore ba leboge. Le rona gape re amogela masego a mantsi go gaisa a a bonwang ke batho ba bangwe. Tota, re itse go le gontsi thata ka maikaelelo a ga Jehofa go feta batho ba Iseraele. Re ile ra ithuta kafa Modimo ka go rata ga gagwe a neng a dumelela gore Morwawe a isiwe setlhabelo, mme gape re lemoga masego ao a tla tlisiwang ke sena mo go botlhe bao ba amogelwang ke Modimo. Mme ebile gompieno re na le tshiamelo ya go bo re le mo paradaiseng ya semoya, ka go bo fa esale go tloga ka 1919, Jehofa o ile a ntshetsa batho ba gagwe leruo le legolo la moya. Ee, Basupi ba ga Jehofa ba na le mabaka a le mantsi a gore ba leboge. Jalo re tshwanetse go ipotsa ra re: Tebogo ya rona mo Modimong e kgolo go le kana kang? Mme re ka itshupa jang gore re a leboga mo lekgolong leno la bo-20 la dingwaga?

Dikai tsa Motlha wa Segompieno

13, 14. Lemororo Bakeresete ba se kafa Uase ga Molao wa ga Moshe, a go na le sengwe se ba ka se ithutang mo molaong wa go ntshiwa ga ditsa-bosome?

13 Bakeresete ga ba kafa tlase ga Molao wa ga Moshe o o neng o rulaganya kafa ba neng ba tshwanetse go bontsha tebogo go Modimo. (Bagalatia 3:24, 25) “Chupèlō” ya rona ya go baka Jehofa ke “louñō loa melomo e e ipolèlañ leina ya gagwè.” (Bahebera 13:15) Seno, he, ke tsela ya konokono eo Bakeresete ba ba ineetseng ba ka bontshang tebogo go Modimo ka yone. Mme dikai tse di kgatlhisang di ka nna tsa bonwa mo melaong e e neng e tlhalosa kaga go ntsha ditsabosome, meneelo, le go kotula.

14 Go ntsha ditsabosome go ne go raya go ntsha selekanyo se se tsepameng sa bongwe mo lesomeng—mme go ne go sa bewa sepe se sengwe gore motho o ka se itlhophela. Gompieno, ka tsela e e tshwanang, go na le ditaelo tse di tlhomameng tseo di beilweng mo batlhankeng ba ga Jehofa, Mme le tsone go sena gore motho o ka itlhophela sengwe se sele. Re tshwanetse go kopana mmogo ka metlha yotlhe, Mme re tshwanetse go rera mafoko a a molemo a Bogosi jwa ga Jehofa phatlalatsa le go thusa ba bangwe go nna barutwa ba ga Keresete.—Bahebera 10:24, 25; Mathaio 24:14; 28:19, 20.

15. Ke ditshupo dife tsa bopelotshweu mo metlheng ya segompieno tse di tshwanang fela le tseo di neng tsa senolwa ke dithulaganyo tsa go ntsha meneelo le go kotula mo Iseraele wa bogologolo?

15 Gakologelwa gape dithulaganyo tsa go ntsha meneelo le go kotula. Go ne go sa bewa dilekanyo dipe tse di tsepameng. Ka tsela e e tshwanang, Dikwalo ga di tlhome selekanyo sepe se se tsepameng ka nako eo Mosupi wa ga Jehofa mongwe le mongwe a ka e senyang mo tirelong e e boitshepo. Selekanyo sa nako se se beelwang go ithuta Lefoko la Modimo le go rerela ba bangwe di tlogelelwa tlhotlheletso ya go nna pelotshweu le go sa nneng bogagapa. Ka tsela e e tshwanang, selekanyo sa meneelo ya dilo tse di bonalang go tsweledisa pele dikgatlhego tsa Bogosi se tlogelelwa gore se laolwe ke pelo ya motho mongwe le mongwe. Boteng jwa tebogo bo tla tlhomamisa fa e le gore a mongwe wa batlhanka ba Modimo gompieno o tla tlisa “mekoakoa hèla” kana sengwe fela se a ka ikgololang ka sone. (2 Ditihalō 31:6) Lefa go ntse jalo, jaaka go ne go ntse le ka Baiseraele, fa motho a ne a supa ka tsela e kgolwane gore o a leboga, o ne a ka bona masego a le mantsi go tswa mo Modimong.

Ditsela tsa go Bontsha Tebogo

16-18. Ke ka ditsela dife tse di tsepameng tseo Bakeresete ba ba ineetseng ba ka itshupang gore ba ntsha malebogo?

16 Nngwe ya ditsela tse di tlhamaletseng tsa go bontsha tebogo go Jehofa ke go tshwarega mo bodiheding jwa nako e e tletseng. A tebogo ya gago e kgolo mo eleng gore pelo ya gago e nyoretswe selo seo? Go ile ga lemosega sentle gore mmulatsela yo o atlegang sentle selo santlha o tshwanetse go nna le keletso ya go direla Mme go tswa foo a nne le maemo a a siameng. Fa tebogo e nonofile, keletso e e tlhotlheletsang gore a direle Modimo ka botlalo e a nonofa mo pelong e e bontshang kanaanelo. A ke kafa o ikutlwang ka teng? Le eleng fa maemo a gago a jaanong a dira gore o seka wa kgona go tsenelela mo bodiheding jwa nako e e tletseng, sena ga se a tshwanela go fedisa moya wa bobulatsela. O ka neela tshegetso ya pelo yotlhe le kgothatso mo babulatseleng.

17 Fa o sa kgone go ka bulatsela gone jaanong jaana, a o ka nna mmulatsela yo o thusang nako le nako? Go na le dipaka tse di kgethegileng mo ngwageng mongwe le mongwe tse ka tsone phuthego ya Bokeresete e kgothaletsang boiteko jo bo fetang jwa ka metlha mo tirong ya go rera. Ka sekai, dikgwedi tsa selemo, ke tseo mo bathong ba le bantsi, di leng molemo, Mme ka October go na le tiro e nngwe gape e e amanang le tlhabano ya go batla dipeeletso tsa dimakasine. Mabapi le nako e e oketsegileng e e dirisiwang mo tirelong e e boitshepo, molao-motheo wa gore fa motho a bontsha tebogo o tla ntsha ka bopelotshweu o a dira.

18 Tsela e nngwe e e tsepameng ya go bontsha tebogo ke ya go tshegetsa thulaganyo ya bolegodimo ya go aga e e diragalang mo lefatsheng lotlhe. Mo mafatsheng a mantsi, diholo tsa Bogosi tse dintsi di a agiwa, mme Diholo tse di gone di a atolosiwa ka ntlha ya go pitlagana ga batho. Diholo tsa Kopano tse disha di a agiwa, mme Magae a Bethele le difeketiri di ntse di atolosiwa. Abo seno e le tsela e e dirang ya go bontsha tebogo go Jehofa jang ne—fa re ntsha moneelo wa diatla kana wa madi go tlhokomela dithulaganyo tseno tsa kago!

Sekao se se Molemo sa Motlholagadi wa Mohumanegi

19. Ke eng se se go kgatlhang thata kaga motlholagadi wa mohumanegi kwa tempeleng?

19 Sekao se se itsiweng thata se se mo Bibeleng sa go bontsha tebogo ka go ntsha meneelo ka bopelotshweu ke sa motlholagadi yo o tlhalositsweng ke Jesu. (Luke 21:1-4) O tshwanetse a bo a ile a lemoga gore madinyana a gagwe a mabedi a eseng a sepe a ne a se kitla a thusa thata mo go tswelediseng dilo tsa tempele le ba ba neng ba nna koo. Mme o ne a seka a leba tempele le baperesiti ba ba direlang koo mme a akanya ka go re: ‘Ba tshela botoka go nkgaisa ebile kago ya bone e botoka thata go na le ntlwana ya me e e seng ya sepe.’ Gone ke boammaaruri, tempele e ne e lebega e le manobonobo ebile e le ntle. “E kgabisicwe ka mayè a mantlè, le ka dinèō.” (Luke 21:5) Mme selo seo ga se a ka sa kgoreletsa motlholagadi gore a ntshe moneelo. O ne a batla go itshupa a leboga Jehofa, eseng batho bao ba neng ba dira mo tempeleng eo.

20. Re ka bontsha jang boikutlo jo bo tshwanang jo bo rategang fela jaaka jole jo bo neng jwa bontshiwa ke motlholagadi yole wa mohumanegi?

20 Batho ba ga Jehofa gompieno ba ithuta sengwe mo sekaong seno. Fela jaaka motlholagadi wa mohumanegi, ba itse gore meneelo ya bone, a e ka ne e le megolo kana e le mebotlana, e neelwa Modimo. Mme ba tiisiwa ke go itse gore phuthego e e mo lefatsheng ya ga Jehofa e dirilwe ka tsela ya gore go se nne motho ope a le esi yo o ka bonang poelo epe ya madi. Dikago tsa Mokgatlho di agilwe le go tsamaisiwa ka tsela ya gore badiri ba ba dinatla ba ba dirang moo ba tlhagise ka tsela e e matsetseleko Dibibela le dibuka tsa Bibela mo go diragatseng dikgatlhego tsa Bogosi. Seno se fapaana gotlhelele le go sa dirise madi a a ntshitsweng meneelo botlhaswa mo go bolelwang go dirwa ke bareri bangwe ba thelebishene.

Dikgakololo tsa Gore go Ntshiwe Malebogo di Mosola

21, 22. Ke phelelo efe eo dikgakololo tse di pelonomi tsa gore re itshupe re leboga di tshwanetseng go e tlhotlheletsa mo dipelong tse di bontshang kanaanelo?

21 Go ne go tlhokafala gore Baiseraele ka metlha yotlhe ba gakololwe ka boikarabelo jwa bone mo go Jehofa, segolo bogolo kafa go neng go tlhokafala ka gone go bontsha moya wa tebogo. Gantsi, fa ba ne ba tlhokomedisiwa kgang eno, tebogo e ne e tsosolosiwa mo dipelong tsa bone, mme seno ga se a felela fela ka mafoko a go tlhalosa gore ba a anaanela. Ba ne ba ikemiseditse gore ba tla ntsha “mekoakoa hèla” ya dilo tse ba di bapetseng go di neela Jehofa gore di dirisiwe mo ntlong ya gagwe ya kobamelo.

22 Jalo he ekete bao gone jaanong jaana eleng ba “Iseraela oa Modimo,” le ba “boidiidi yo bogolo” jwa ditsala tsa bone ka metlha yotlhe ba ka ikutlwa jalo. (Bagalatia 6:16; Tshenolō 7:9) Ekete dipelo tsa bone tse di tletseng tebogo di ka ba tlhotlheletsa go ntsha “mekoakoa hèla” ya pako go Jehofa. Mme eleruri ba ka re: “Re itshupa re leboga Modimo wa rona yo o lorato le yo o pelotshweu, Jehofa.”

A O A Gakologelwa?

◻ Ke ka ntlhayang ta Bakeresete ka metlha yotlhe ba tshwanetse go itlhatlhoba gore ba leboga ka selekanyo se se kana kang?

◻ Ke ka ntlhayang ta batho ba ga Jehota ka metlha yotlhe ba ile ba nna le lebaka le le kgethegileng la gore ba leboge?

◻ Ke ka ditsela dite tse di tsepameng tseo Baiseraele ba neng ba ka bontsha gore ba leboga Jehota?

◻ Fela jaaka Baiseraele, ke dilo dite tseo di tsepameng tse re ka di dirang go supa gore re a leboga?

◻ Ke eng se re ka se ithutang mo motlholagading wa mohumanegi kwa tempeleng?

[Setshwantsho mo go tsebe 7]

Baiseraele ba ne ba supa tebogo ka go ntsha ditsa-bosome le mabutswapele le ka go thusa bahumanegi gore ba kotule mo masimong a bone

[Setshwantsho mo go tsebe 8]

Mopesalema o ne a lebogela Jehofa ditiro tsa Gagwe tse di molemo le megopolo ya gagwe mo bathong ba Gagwe

[Ditshwantsho mo go tsebe 10]

Basupi ba ga Jehofa gompieno ba su pa tebogo ka go kopanela mo tirelong ya tshimo mo dikagong tsa bolegodimo, gammogo le ka go ntsha dimpho ka dUo tse di bonalang

    Dikgatiso Tsa Setswana (1978-2026)
    Tswa
    Tsena
    • Setswana
    • Romela
    • Tse O ka Di Tlhophang
    • Copyright © 2025 Watch Tower Bible and Tract Society of Pennsylvania
    • Melawana ya Tiriso
    • Molawana wa Tshireletsego
    • Di-setting Tsa Websaete
    • JW.ORG
    • Tsena
    Romela