“Supang Bopelotelele”
1 Jaaka re bona bofelo jwa tsamaiso ya bogologolo ya ga Satane bo ntse bo atamela, go botlhokwa gore re ‘supe bopelotelele’ fa re ntse re letetse letsatsi la ga Jehofa la poloko. Segolobogolo mo nakong eno ya bofelo, masole a a boikepo a mmaba a ikaeletse go tlosa tlhokomelo ya rona mo kgannyeng ya botlhokwatlhokwa ya bolaodi jwa ga Jehofa le go re raela gore re itewe tsebe ke dilo di le dintsintsi fela tse re ipatlelang tsone. Ka tsela eno, Satane o tla re tsietsa gore re tlogele tiro eno ya go rera ka Bogosi kana re goge dinao fa re e dira. (Jak. 5:7, 8; Math. 24:13, 14) Re ka bontsha bopelotelele jo bo tlhokegang jono ka ditsela dife?
2 Ka go Itshoka: Fa batho ba sa kgatlhegele se re se buang kana ba re ganetsa mo bodireding jwa rona, go itshoka go tla re thusa go tswelela re rera. Ga re kitla re tshosediwa motlhofo fela kana re kgotšwa fa batho ba re kopanang le bone ba le mafega kana ba le bogale. (1 Pet. 2:23) Nonofo eno e re nang le yone e ka re thibela gore re se ke ra bua ka tsela e e kgobang marapo ka batho ba ba mo tshimong ya rona ba ba sa kgatlhegeleng tiro ya rona kana ba ba sa e rateng, re lemoga gore go dira jalo go tla re kgoba marapo mmogo le ba ba dirang le rona mo bodireding.
3 Ka go Nna Pelotelele, Re sa Ineele: Go ka re kgoba marapo tota fa e re re sena go buisana sentle jaana le motho yo o kgatlhegang mo tirelong ya tshimo, re bo re sa mo fitlhele fa re boa gape. Go ntse jalo gape fa e le gore batho ba re ithutang le bone ba diega go gatela pele kana go emela boammaaruri. Le fa go ntse jalo, go nna pelotelele, re sa ineele, gantsi go nna le matswela a a molemo. (Bagal. 6:9) Kgaitsadi mongwe o ne a nna a boela makgetlo a le mmalwa mo mosading mongwe yo mosha pele ga thuto ya Baebele e ka simololwa. Mo maetong a ntlha a matlhano, mosadi yono o ne a tshwaregile thata ka dilo tse dingwe. Mo lekgetlong la borataro, kgaitsadi yono o ne a kolobile tota ke pula ya matlakadibe, mme a fitlhela go se na ope mo ntlong. Le fa go ntse jalo, e re ka kgaitsadi yono a ne a batla go naya mosadi yono sebaka se sengwe gape, o ne a boela gape kwa go ene, mme a fitlhela mosadi yono a ipaakanyeditse go ithuta. Morago ga moo, moithuti yono o ne a gatela pele ka bonako mme mo nakong e khutshwane fela a neela botshelo jwa gagwe mo go Jehofa.
4 Re a itse gore letsatsi la ga Jehofa ga le kitla le diega. Ka jalo re nna re letile go bona tsela e a dirang dilo ka yone, re ntse re itse gore bopelotelele jwa Modimo bo tla tlhagisa maungo a a molemo. (Hab. 2:3; 2 Pet. 3:9-15) Re tshwanetse go bontsha bopelotelele jaaka Jehofa mme re se ke ra tlogela bodiredi. “Ka tumelo le ka bopelotelele,” leba kwa go Jehofa gore a go duele go bo o dirile ka natla.—Baheb. 6:10-12.