Go Itsise Leina la ga Jehofa mo Lefatsheng Lotlhe
1 Fa Jesu a ne a laela barutwa ba gagwe go nna basupi “go ya karolong e e kwa kgakalakgakala ya lefatshe,” o ne a setse a ba tlhometse sekao se ba tshwanetseng go se latela. (Dit. 1:8) Nako le nako fa a bona batho gongwe le gongwe, o ne a bua le bone ka boikaelelo jwa Modimo ka batho. Setlhopha sa motlhanka yo o boikanngo se etsa Jesu ka go dirisa ditsela tse dintsi tse di farologaneng go dira gore leina la ga Jehofa le “itsiwe mo lefatsheng lotlhe.”—Isa. 12:4, 5.
2 Se se Dirilweng mo Nakong e e Fetileng: Mo dingwageng tse di fetileng, dithero di ne di gatisiwa mo makwalodikgannyeng; go ne ga dirwa “Photo-Drama of Creation” mme ya bontshiwa batho ba le dimilione; go ne ga dirisiwa dikoloi tse di tsentsweng digodisamodumo; mme go ne ga dirisiwa thata fonokerafa e bile ka nako nngwe le radio—tsotlhe di dirisiwa go rera dikgang tse di molemo. Gone mme, ka dinako tsotlhe go ne go gatelelwa thata gore go buisanwe le batho ka namana gore go tle go boelwe kwa go ba ba bontshitseng kgatlhego. Ka jalo, bodiredi jwa ntlo le ntlo bo ne jwa itshupa e le mokgwa o o nang le matswela wa go itsise leina la ga Jehofa gongwe le gongwe.—Dit. 5:42.
3 Se se Dirwang mo Motlheng wa Rona: Mo dinakong tse di ntseng di fetoga tseno lefatshe le itlhaganetse thata mme kwa mafelong a mantsi batho ba bonwa sewelo kwa gae. Ke ba le mmalwa fela ba ba ratang go dirisa nako e e rileng ba bala le go tlhatlhanya ka dilo tsa semoya. Ke gone ka moo re tshwanetseng go fetola bodiredi jwa rona ka tsela e e tshwanetseng. Mo godimo ga go kgothalediwa go nna re bereka tshimo ya rona yotlhe ka ntlo le ntlo, re ile ra kgothalediwa gape gore re ye kwa batho ba leng teng le gore ‘ka metlha re iketleeletse’ go femela tsholofelo e e mo go rona. (1 Pet. 3:15) Seno se bolela gore re leke go rerela badirimmogo le rona, bana ba re tsenang sekolo le bone, batho ba ba mo seterateng le mo parakeng kana mo go emisiwang dikoloi teng le gongwe le gongwe fela kwa batho ba ka fitlhelwang teng. E re ka Jehofa a re eme nokeng, maiteko a rona a tla atlega. A o na le seabe mo go fitlheleleng batho gongwe le gongwe kwa ba leng teng?
4 E kete mongwe le mongwe wa rona a ka dira bojotlhe go dira gore a itsise leina la ga Jehofa mo tshimong ya rona. Re ka kgotsofala thata fa re swetsa bodiredi jwa rona ka botlalo, fa re ntse re lebile kwa go Jehofa gore a goge ba ba dipelo di siameng.—Joh. 6:44.