Thuto 8

Botshelo Jwa Lelapa jo bo Itumedisang Modimo

Boemo jwa monna ke bofe mo lelapeng? (1)

Monna o tshwanetse go tshwara mosadi wa gagwe jang? (2)

Rre o na le maikarabelo afe? (3)

Tiro ya mosadi ke eng mo lelapeng? (4)

Modimo o batla gore batsadi le bana ba dire eng? (5)

Baebele e leba jang go kgaogana le go tlhalana? (6, 7)

1. Baebele e bolela gore monna ke tlhogo ya lelapa la gagwe. (1 Bakorinthe 11:3) Monna o tshwanetse gore a nne le mosadi a le mongwe fela. Ba tshwanetse ba bo ba nyalane sentle go ya kafa molaong.—1 Timotheo 3:2; Tito 3:1.

2. Monna o tshwanetse gore a rate mosadi wa gagwe fela jaaka a ithata. O tshwanetse gore a mo tshware ka tsela e Jesu a tshwarang balatedi ba gagwe ka yone. (Baefeso 5:25, 28, 29) Le ka motlha ga a tshwanela go betsa kana go tshwara mosadi wa gagwe makgwakgwa ka tsela epe. Go na le moo, o tshwanetse gore a mo tlotle.—Bakolosa 3:19; 1 Petere 3:7.

3. Rre o tshwanetse gore a dire ka natla go tlamela lelapa la gagwe. O tshwanetse gore a tlamele mosadi wa gagwe le bana ba gagwe ka dijo, diaparo le ntlo e ba tla nnang mo go yone. Rre o tshwanetse gape a tlhokomela lelapa la gagwe ka dilo tsa semoya. (1 Timotheo 5:8) O etelela pele go thusa lelapa la gagwe go ithuta ka Modimo le maikaelelo a Gagwe.—Duteronome 6:4-9; Baefeso 6:4.

4. Mosadi o tshwanetse go nna mothusi yo molemo wa monna wa gagwe. (Genesise 2:18) O tshwanetse go thusa monna wa gagwe go ruta le go thapisa bana. (Diane 1:8) Jehofa o batla gore mosadi a tlhokomele lelapa la gagwe ka lorato. (Diane 31:10, 15, 26, 27; Tito 2:4, 5) O tshwanetse gore a tlotle monna wa gagwe thata.—Baefeso 5:22, 23, 33.

5. Modimo o batla gore bana ba utlwe batsadi ba bone. (Baefeso 6:1-3) O lebeletse gore batsadi ba rute le go kgalemela bana ba bone. Batsadi ba tshwanetse gore ba dirise nako nngwe ba ntse le bana ba bone le go ithuta Baebele le bone, ba ba tlamele ka dilo tse ba di tlhokang semoyeng le mo maikutlong. (Duteronome 11:18, 19; Diane 22:6, 15) Batsadi le ka motlha ga ba a tshwanela go otlhaya bana ba bone ka tsela e e makgwakgwa kana e e setlhogo.—Bakolosa 3:21.

6. Fa banyalani ba na le mathata a go sa utlwane, ba tshwanetse gore ba leke go dirisa kgakololo ya Baebele. Baebele e re kgothaletsa gore re ratane le go itshwarelana. (Bakolosa 3:12-14) Lefoko la Modimo ga le kgothaletse batho go kgaogana gore ba rarabolole mathata a e seng a sepe. Mme lefa go ntse jalo mosadi a ka nna a batla go tlogela monna wa gagwe fa (1) a gana go tlamela lelapa la gagwe a le tlhogoethata, (2) a rata ntwa thata mo e leng gore botsogo jwa gagwe le botshelo jwa gagwe bo mo kotsing, kana (3) go ganetsa ga gagwe thata go dira gore a se ka a kgona go obamela Jehofa.—1 Bakorinthe 7:12, 13.

7. Banyalani ba tshwanetse gore ba ikanyege mongwe go yo mongwe. Boaka ke go leofela Modimo le motho yo o nyalaneng nae. (Bahebere 13:4) Tlhakanelodikobo kwa ntle ga lenyalo ke lone fela lebaka la Dikwalo a motho a ka tlhalang motho yo a nyalaneng nae mme a bo a gololesegile go ka nyala gape. (Mathaio 19:6-9; Baroma 7:2, 3) Jehofa o ila tlhalo fa batho ba tlhalana kwantle ga mabaka ape a Dikwalo mme ba bo ba nyalana le motho o sele.—Malaki 2:14-16.

[Ditshwantsho mo go tsebe 16, 17]

Rre yo o lorato o tlamela lelapa la gagwe ka dilo tsa senama le tsa semoya

[Setshwantsho mo go tsebe 17]

Modimo o lebeletse gore batsadi ba rute bana ba bone le go ba kgalemela