O ne A Direla Jehofa ka Boikokobetso

SE SE botlhokwa thata ga se kwa o direlang teng mme ke motho yo o mo direlang.” John Booth o ne a rata go bua mafoko ao, mme o ne a a dirisa mo botshelong jwa gagwe. Botshelo jwa gagwe jwa mo lefatsheng, jo a bo weditseng ka Mosupologo, January 8, 1996, bo ne jwa supa ka phepafalo gore o ne a tlhopha go direla mang.

Fa John Booth a ne a sale lekawana bogologolo ka 1921, o ne a batla go tshela ka tsela e e mosola. O ne a ruta sekolo sa Sontaga kwa Kerekeng ya Dutch Reformed, mme o ne a gana mogopolo wa gore a ithapisetse go nna moruti ka gonne o ne a akanya gore baruti ba ne ba tshela matshelo a bopelotshetlha. E rile a bona taletso ya puo ya setlhogo se se reng “Dimilione Tse di Tshelang Jaanong ga di Kitla di Swa,” gone fela foo o ne a romela kopo ya dibuka tse di neng di tlhalosiwa mo go yone. E re ka a ne a gapilwe maikutlo ke se a neng a se badile, go ise go ye kae o ne a tsamaya ka baesekele dikilometara di le 24 go ya kwa dipokanong tsa Baithuti ba Baebele, jaaka Basupi ba ga Jehofa ba ne ba itsiwe ka nako eo. O ne a kolobediwa ka 1923 a ba a simolola go rera ka ntlo le ntlo kwa karolong ya Wallkill, New York, koo lelapa la gagabo le neng le na le polasi ya dikgomo tsa mashi teng.

Mokaulengwe Booth o ne a tsenela bodiredi jwa nako e e tletseng ka April 1928. O ne a rera mo tshimong ya gagabo le kwa Borwa kwa metseng ya selegae, a ananya dibuka tsa Baebele ka dijo le bonno. O ne a tshwanetse go nna pelokgale gore a lebane le batho ba ba kotsi ba ba jaaka beng ba madirelo a a seng kafa molaong a majalwa ba ba dirisang ditlhobolo, ba mongwe wa bone a neng a thuntsha a ba a gobatsa mmulatsela yo o neng a dira mmogo le John Booth. Ka 1935, Mokaulengwe Booth o ne a tlhomiwa go nna molebedi yo o etang mme a simolola go etela diphuthego le ditlhopha tse dipotlana mo nageng eo. O ne a rulaganya gore go nne le dikopano a ba a thusa bakaulengwe le bokgaitsadi gore ba itshoke lefa ba ganediwa. Mokaulengwe Booth o ne a ba a tlwaela go lebana le digopa tsa batho ba ba shakgetseng, go ema a nitame kwa kgotlatshekelong, le go tsenngwa mo kgolegelong. O kile a kwala a re: “Nka kwala buka fa nka tlhalosa ka botlalo ditiragalo tsa metlha eo e e kgatlhang.”

Ka 1941, Joseph F. Rutherford, yo e neng e le poresidente ya Mokgatlho wa Watch Tower ka nako eo, o ne a abela Mokaulengwe Booth gore a dire kwa Polasing ya Bogosi, gaufi le Ithaca, New York. O ne a direla koo ka boikanyegi ka dingwaga di le 28. Lorato lwa gagwe lwa bodiredi ga lo a ka lwa tsidifala, mme o ne a itumelela gore mo dingwageng tse di ntseng di feta a bo a ile a dirisana le diketekete tsa baithuti ba Sekolo sa Baebele sa Watchtower sa Gileate se se thapisang barongwa, se se neng se le gone kwa Polasing ya Bogosi go fitlha ka 1961. Ka 1970, Mokaulengwe Booth o ne a kopiwa go ya go direla kwa Watchtower Farms kwa Wallkill, New York, ka jalo a iphitlhela a le mo go lone lefelo le a neng a simolotse go bula tsela a le mo go lone dingwaga di ka nna 45 pele ga foo.

Ka 1974, Mokaulengwe Booth o ne a tlhomiwa go nna leloko la Setlhopha se se Laolang sa Basupi ba ga Jehofa kwa Brooklyn, New York. O ne a ikanyega mo tirelong eo go fitlha a tlhokafala a na le dingwaga di le 93. John Booth o ne a ratiwa thata ka ntlha ya botho jwa gagwe jwa Bokeresete jwa motho yo o ikokobeditseng le yo o pelontle. O ne a ineetse mo tirong ya go rera ka ntlo le ntlo le mo mebileng ya toropokgolo go fitlha a sa tlhole a kgona ka ntlha ya botsogo le go felelwa ke maatla.

Ntswa ba ba neng ba direla le ene ba hutsafetse ka go bo a tlhokafetse, ba gomodiwa ke tsholofetso ya Baebele e e malebana le Bakeresete ba ba ntseng jalo ba ba tloditsweng, ya gore ba tsosediwa go ya go tshela kwa legodimong le gore “dilo tse ba neng ba di dira di tsamaya fela le bone.” (Tshenolo 14:13, NW; 1 Bakorinthe 15:51-54) Ruri o ya mo tikologong e ntšha, mme mo go yone John Booth o tla kgona go direla Jehofa ka bosakhutleng!

[Setshwantsho mo go tsebe 32]

John Booth 1903-1996

[Setshwantsho mo go tsebe 32]

HERALD-AMERICAN, ANDOVER 1234

76 Jehovites Jailed in Joliet

[Motswedi wa Setshwantsho]

Chicago Herald-American