Pelo Ya me E Penologa ka Tebogo

JAAKA GO BOLETSE JOHN WYNN

A bo ke ne ke tle ke gane go ya kwa dipokanong tsa Basupi ba ga Jehofa ka makgetlhonyana jang ne! Ke ne ke itira e kete ke tshwerwe ke mala kana ke tlhogo—ke dire sengwe fela gore ke se ka ka nna gone. Mme ka metlha go nitama ga ga mmè go ne go dira gore malwetse a a ntseng jalo a se ka a nna seipato, mme ke bo ke ipone ke tsamaya le ene dikilometara di le tharo go ya kwa Holong ya Bogosi, ke ntse ke reeditse a bua Lefoko la Modimo le tsala ya gagwe e e godileng.

SENO se ne sa nthuta thuto e e botlhokwa: Batsadi ga ba a tshwanela go tlogela go nitama, ka tsela e e lorato, ka se se siameng mo matlhong a Modimo. (Diane 29:15, 17) Le ka motlha ga ba a tshwanela go lebala kaelo ya Modimo ya go “sa lese go phuthega mmogo ga rona.” (Bahebera 10:25) Fa ke lebelela botshelo jwa me jwa pele, a bo ke itumela jang ne gore mmè a ne a batla gore ke dire se se neng se tla ntsholegela molemo thata!

Go Itumelela Dikao Tse di Molemo

Le mororo rre e ne e se modumedi, o ne a se kgatlhanong le bodumedi jwa ga Mmè fa a ne a simolola go nna Moithuti wa Baebele, jaaka Basupi ba ga Jehofa ba ne ba itsiwe ka nako eo. Ka 1913 o ne a ya go reetsa puo e e reng “Se se Diragalang ka Kwa ga Lebitla,” e e neng ya neelwa ke Charles T. Russell, poresidente ya ntlha ya Mokgatlho wa Watch Tower. Le fa go ntse jalo, o ne a fitlha go le thari, mme ditulo di ne di setse di ntswe tsotlhe. Ka jalo o ne a kopiwa go tla go nna le ba bangwe ba ba neng ba tlile thari gaufi le serala, gaufi thata le Modisa Russell. Puo eo e ne ya mo kgatlha thata. Mo letsatsing le le latelang e ne ya gatisiwa mo lokwalodikgannyeng lwa lefelo leo, mme o ne a ipeela khopi ya lone gore a nne a le bale gangwe le gape.

Morago ga pokano eo, Mmè o ne a isa pampitshana e kwadilwe leina la gagwe, mme go ise go ye kae o ne a etelwa ke Moithuti wa Baebele. Kgabagare, o ne a simolola go aba dipampitshana tsa Baebele ka ntlo le ntlo kwa toropong ya gaetsho ya Gloucester, kwa Engelane. Go tloga ka nako ya fa nna le bokgaitsadiake ba babedi re sa ntse re le babotlana thata, re ne re nna le seabe mo tirong ya go rera le Mmè.

Fa Harry Francis, Moithuti mongwe wa Baebele yo o neng a tlhoafetse, a fudugela kwa Gloucester, Mmè o ne a mo amogela sentle ka lorato. Go ise go ye kae, o ne a bontsha kgatlhego ya mmatota mo go nna, mme go nkgothatsa ga gagwe ke gone go dirileng gore moragonyana ke bo ke le mmulatsela, jaaka badiredi ba nako e e tletseng ba bidiwa. Sekao sa ga Mokaulengwe Francis se nthutile thuto e e botlhokwa: Batho ba ba godileng ka dinako tsotlhe ba tshwanetse go batla ditsela tsa go kgothatsa basha.

Fa mmè a ne a simolola go nna Moithuti wa Baebele, ba bangwe kwa Gloucester ba ne ba dira se se tshwanang. Le fa go ntse jalo, bagolwane bangwe mo phuthegong ba ne ba simolola go ikgopola, mme maloko a setlhopha—jaaka phuthego e ne e bidiwa ka nako eo—a ne a simolola go latela batho. Kwa pokanong nngwe, maloko a mangwe a ne a kgotla Mmè kwa morago, ba mo rotloetsa gore a tsholetse letsogo go supa gore o tshegetsa bagolwane bangwe ba ba rileng. Mme Mmè o ne a itse gore ga ba tlhome sekao se se tshwanetseng, mme o ne a gana go tshosediwa. Ka nako eo, mo bokhutlong jwa bo1920, batho ba le bantsi ba ne ba tlogela ba bo ba sa tlhole ba tsamaya mo tseleng ya boammaaruri. (2 Petere 2:2) Le fa go ntse jalo, Mmè ga a ka a tlogela go ema phuthego nokeng ka boikanyegi, ka go dira jalo a ntlhomela sekao se se molemo.

Fa ke Ne ke Emela Boammaaruri

Kgabagare, ka June 1939, fa ke ne ke na le dingwaga di le 18, ke ne ka kolobediwa kwa Nokeng ya Severn. Mo go one ngwaga oo ke ne ka tlhomiwa gape go nna motlhanka yo o tlhokomelang didirisiwa tsa modumo. Mo malatsing ao re ne re dirisa motšhine o o kgonang go gatisa modumo o o neng o utlwatsa molaetsa o o reng “Bodumedi ke Serai le Maano a a Boferefere” mo mafelong a batho botlhe. Ka nako eo go ne go senolwa thata boitimokanyi le dithuto tsa maaka tsa Labokeresete.

Nako nngwe ke ne ke le kwa pelepele ga mokoloko ke tshwere folaga e mo letlhakoreng le lengwe e neng e bolela gore “Bodumedi ke Serai le Maano a a Boferefere” mme mo letlhakoreng le lengwe e ne e re “Direla Modimo le Keresete Kgosi.” Re ne re setswe morago ke petsana e e neng e belege dipampiri tsa phasalatso mo matlhakoreng oomabedi mo mokwatleng wa yone tse di neng di phasalatsa ka puo ya phatlalatsa. A bo mokoloko oo o ka tswa o ne o gakgamatsa jang ne mo motseng wa bodumedi thata wa Gloucester!

Go sa kgathalesege mathata a madi kwa gae, Mmè o ne a nkgothaletsa gore ke nne mmulatsela. Ka gone, ka September 1939, fa Ntwa ya Lefatshe II e ne e simologa, ke ne ka goroga kwa kabelong ya me ya ntlha ya bobulatsela kwa Leamington, e leng torotswana e e kwa Warwickshire. Baruti ba bantsi ba ba tlogetseng tiro ba ne ba agile kwa toropong eo.

Re ne re dirisa fonokerafa e e motlhofo mo bodireding jwa rona jwa ntlo le ntlo, re tshameka dipuo tsa ga Joseph F. Rutherford, yo o neng e le poresidente ya Watch Tower Bible and Tract Society ka nako eo. Mo letlhakoreng le lengwe, motšhine wa rona o o kgonang go gatisa mantswe (o o neng o ka dirisiwa fa go na le bareetsi ba bantsi) o ne o le boima, mme re ne re o rwala ka porema, kana kolotsana ya ngwana. Ka dinako dingwe baruti, ba ba neng ba galefisiwa ke molaetsa o o neng o senola bodumedi jwa maaka, ba ne ba re koba mo dijarateng tsa bone. Mme re ne re sa kgobege marapo. Jehofa o ne a segofatsa tiro ya rona, mme gompieno go na le phuthego e e nang le Basupi ba ba fetang lekgolo kwa Leamington.

Ka 1941, fa Ntwa ya Lefatshe II e ntse e tsweletse, ke ne ka fudugela kwa Wales, koo ke neng ka bula tsela kwa ditoropong tsa Haverfordwest, Carmarthen le Wrexham. Jaaka modiredi wa nako e e tletseng, ke ne ka letlelelwa gore ke se ka ka tsena mo bosoleng, mme batho ba ne ba sa anaanele boitlhaodi jwa rona. Ka gone, nna le modirikanna re ne ra pegwa molato wa gore re ditlhodi kana re setlhopha sa sephiri se se emang baba nokeng. Mo bosigong bongwe, mapodise a ne a dikanyetsa kharabene ya rona. Modirikanna, yo o neng a sa tswa go goroga a tswa kwa tirong ya gagwe ya go olela magala, o ne a ntsha tlhogo go bona gore go na le bomang. Sefatlhego sa gagwe se ne se tletse lorole lwa magala, mme mapodise a ne a ithaya a re o ipaakanyeditse go tlhasela. Go ne ga tlhokega gore a tlhalose!

Re ne ra segofadiwa thata mo dikabelong tsa rona. Ka nako nngwe fa re ne re le kwa Carmarthen, John Barr yo o neng a tswa kwa ofising ya lekala kwa Lontone (yo jaanong e leng leloko la Setlhopha se se Laolang) o ne a re etela go re kgothatsa. Ka nako eo, go ne go na le baboledi ba le babedi fela kwa Carmarthen; gompieno, ba feta lekgolo. Gompieno Wrexham e na le diphuthego di le tharo, mme bosheng jaana ke ile ka nna le tshiamelo ya go kgakola Holo ya Bogosi e ntle kwa Haverfordwest.—1 Bakorintha 3:6.

Go Itumelela Bodiredi Jwa Me

Fa re ntse re le kwa Swansea, kwa South Wales, modirikanna, Don Rendell, ga a ka a neelwa tetla ya go se tsene mo bosoleng. O ne a tsenngwa mo kgolegelong le fa a tlhalositse gore o ne a ka se ye go lwantsha Bakeresetekaene mo dinageng tse dingwe ka ntlha ya segakolodi. (Isaia 2:2-4; Johane 13:34, 35) Go mo kgothatsa, mmogo le go neela bosupi mo baagelaning, ke ne ka baya motšhine o o kgonang go gatisa mantswe gaufi mme ke bo ke tshameka dipuo tsa Baebele.

Le fa go ntse jalo, basadi ba ba neng ba agile gaufi le moo ba ne ba se ka ba rata seno mme ba ne ba koleka madi a a tla duelang masole gore a mpetse mmogo le modirikanna. Re ne ra tsamaya, re siana ka lobelo lo logolo—ke ne ke bile ke kgarametsa porema e e nang le motšhine o o kgonang go gatisa mantswe—re tshabela kwa Holong ya Bogosi gore re sireletsege. Mme fa re fitlha koo, e ne e lotletswe! Mapodise a ne a tsereganya ka bonako mme a re thusa fa re ne re itewa mo go setlhogo.

Go bonala tiragalo eno e ne ya itsege thata. Fa ke ne ke rera kwa nageng e e gaufi le Swansea ka nako nngwe morago ga moo, monna mongwe o ne a mpolelela jaana a amogela se ke se dirang: “Bokeresete go tewa se lona lo se emelang, jaaka lekawana lengwe kwa Swansea le le neng la bolela ka bopelokgale se le neng le se dumela mme la tshwanelwa ke go sia gore le itshireletse.” A bo a ne a gakgamala jang ne fa a utlwa gore e ne e le nna lekawana leo!

Go bula tsela go ne go se motlhofo mo dingwageng tseo tsa ntwa. Re ne re se na dithoto tse dintsi tsa lefatshe, mme se re neng re na le sone, re ne re se anaanela le go se itumelela. Ka dinako tsotlhe re ne re amogela dijo tsa semoya, e bile re ne re sa fose go ya kwa pokanong, kwantle ga fa re ne re lwala. Ke ne ka reka baesekele ya bogologolo, mme re ne re na le bommanki ba bagolo ba re neng re ba pega mo go yone re tsentse fonokerafa le dibuka tsa Baebele. Ka dinako tse dingwe ke ne ke tsamaya dikilometara di le 80 ka letsatsi ka baesekele! Ke ne ka bula tsela dingwaga di le supa mme ke tlala boitumelo fa ke gopola malatsi ao.

Ka 1946, fa Ntwa ya Lefatshe II e sena go khutla, ke ne ka lalediwa go tla go direla kwa Bethele, jaaka dikago tse dikgolo tsa Basupi ba ga Jehofa di bidiwa mo dinageng tsa bone tse di farologaneng. Ka nako eo Bethele ya rona e ne e le kwa 34 Craven Terrace, gaufi thata le London Tabernacle. Ke ne ke itumelela go nna le batho ba ba godileng koo, jaaka Alice Hart, yo rraagwe, Tom Hart, go dumelwang gore e ne e le ene Mosupi wa ntlha kwa Engelane.

Go Bona Mopati yo o Ikanyegang

Ka 1956, ke ne ka tswa kwa Bethele ka ya go nyala Etty, mmulatsela yo ke neng ka tlwaelana le ene a tswa kwa Netherlands a etetse mogolowe yo ka nako eo a neng a nna kwa Lontone. Kwa bokhutlong jwa ntwa, Etty o ne a ruta go tlanya le shorthand kwa kholetšheng ya kgwebo kwa Tilburg, kwa borwa jwa Netherlands. Ka letsatsi lengwe motlhatlheledi mongwe o ne a ithaopela go mo isa gae ka baesekele gore a tlhomamise fa a gorogile ka pabalesego. E ne e le Mokatoliki wa Roma. Fa ba goroga, o ne a buisana le batsadi ba ga Etty ba Baporotesetanta. Botsala bo ne jwa simologa, mme motlhatlheledi yono o ne a nna a etela kwa legaeng la gagabo.

Ka bonako fela morago ga gore ntwa e khutle, motlhatlheledi yono o ne a tla kwa legaeng la boEtty, a goa ka gore, “Ke bone boammaaruri!”

Rraagwe Etty o ne a araba jaana: “Ke ne ke akanya gore o rile o bone boammaaruri fa o ne o le Mokatoliki wa Roma!”

O ne a araba jaana a itumetse: “Nnyaa! Ke Basupi ba ga Jehofa ba ba nang le boammaaruri!”

Mo maitseboeng ao le a mangwe a a neng a latela ba ne ba a dirisa ba bua thata ka Baebele. Ka bonako fela morago ga moo Etty o ne a nna mmulatsela. Le ene mo bodireding jwa gagwe o ne a kopana le kganetso e e botlhoko, e kwa Netherlands e neng e tswa mo Kerekeng ya Katoliki ya Roma. Bana, ba ba neng ba tlhotlhelediwa ke baruti, ba ne ba kgoreletsa dipuisano tsa gagwe fa a tsamaya ka ntlo le ntlo, mme mo lekgetlhong lengwe ba ne ba senya baesekele ya gagwe. O ne a isa baesekele ya gagwe kwa mmaakanying mongwe wa dibaesekele yo o neng a kile a tsaya bukana mo go ene pelenyana. “Bona se bana ba se dirileng!” o ne a bua jalo a lela.

“Jaanong, o se ka wa ineela,” monna yono o ne a araba jalo ka bopelonomi. “O dira tiro e e molemo. Ke tla baakanya baesekele ya gago mahala.” Mme o ne a dira fela jalo.

Etty o ne a lemoga gore baruti ba ne ba sa kgatlhegele thata letsomane la bone go fitlhela fela a simolola go ithuta le bone Baebele. E re morago ga moo baruti le baitlami ba tle go nyatsa tumelo e batho ba nang le yone mo Baebeleng le mo go Jehofa. Go sa kgathalesege seno, o ne a itumelela dithuto tse dintsi tsa Baebele tse di nang le matswela.

Go Itumelela Botshelo Jwa Rona Mmogo

Morago ga lenyalo la rona nna le Etty re ne ra abelwa tiro ya go potologa kwa Engelane, mme mo e ka nnang dingwaga tse tlhano, re ile ra etela diphuthego gore re di kgothatse mo semoyeng. Morago ga moo ke ne ka amogela taletso ya go nna gone mo setlhopheng sa bo36 sa Gileade, se se neng se tshwaretswe kwa ntlokgolong ya Basupi ba ga Jehofa kwa Brooklyn, New York. Khoso e e tsereng dikgwedi di le lesome, e e neng ya fela ka November 1961, e ne e dirilwe ka tsela e e kgethegileng go thapisa banna gore ba tsamaise tiro kwa diofising tsa makala tsa Basupi ba ga Jehofa. Fa ke ntse ke le koo, Etty o ne a setse kwa Engelane kwa Bethele ya Lontone. Fa ke sena go aloga, re ne ra abelwa go direla kwa go yone mmogo.

Ka dingwaga tse 16 morago ga moo, ke ne ke direla mo lephateng la tirelo, ke tlhokometse dilo tse di amanang le ditiro tsa phuthego. Morago ga moo, ka 1978, fa molebedi wa Legae la Bethele, Pryce Hughes, a sena go tlhokafala, ke ne ka tlhomiwa go nna mo boemong jwa gagwe. Go tlhokomela boitekanelo jwa maloko a lelapa la Bethele ya rona e e ntseng e gola—re na le maloko a a fetang 260 mo lelapeng la rona gompieno—go ile ga itshupa e le kabelo e e duelang ka dingwaga tseno tse dintsi.

Ka 1971 mmè yo o rategang o ne a tlhokafala a na le dingwaga di le 85. Nna le Etty re ne ra ya kwa Gloucester kwa phitlhong, koo mokaulengwe mongwe a neng a phepafatsa sentle tsholofelo e Mmè a neng a na le yone ya selegodimo. (Bafilipi 3:14) Ke itumelela tlhokomelo e e lorato e bokgaitsadiake, Doris le Grace, ba neng ba e neela Mmè mo dingwageng tsa gagwe tsa botsofe, ka go dira jalo ba nthusa le Etty gore re tswelele pele mo bodireding jwa nako e e tletseng.

Nna le Etty re akanya thata ka batsadi ba rona le ka fa ba re godisitseng ka teng ka tsela e e lorato, e e nitameng. A bo re ba kolota ka selekanyo se segolo jang ne! Mmè thatathata o ne a ntlhomela sekao se se molemo mmogo le bokgaitsadiake, a dira gore re anaanele Jehofa le phuthego ya gagwe.

Eleruri, dipelo tsa rona di penologa ka tebogo fa letsatsi lengwe le lengwe re akanya ka go direla Rraarona wa selegodimo, Jehofa. A bo e le Modimo yo o molemolemo le yo o lorato jang ne! Mopesalema wa Baebele o ne a tlhalosa maikutlo a rona fa a ne a kwala jaana: “Modimo wa me, ke tlaa go godisa, Kgosi; ke tlaa baka leina la gago ka bosakhutleng le ka bosaengkae. Ke tlaa go baka ka malatsi otlhe; ke tlaa baka leina la gago ka bosakhutleng le ka bosaengkae.”—Pesalema 145:1, 2.

[Setshwantsho mo go tsebe 26]

Ke na le mosadi wa me, Etty