Pogo

Tlhaloso: Boitemogelo jo motho a tsenang mo go jone fa a itshoketse botlhoko kana tlalelo. Pogo e ka nna ya mmele, ya tlhaloganyo, kana ya boikutlo. Go na le dilo tse dintsi tse di ka tsalang pogo; ka sekai, tshenyo e e nnang gone ka ntlha ya ntwa le bogagapa jwa papadi, matswela a a maswe a segotso, bolwetsi, dikotsi, “dikudumedi tsa tlholego,” dilo tsa letlhoo tse di buiwang kana di dirwang ke ba bangwe, dikgatelelo tsa sedimona, go lemoga masetlapelo a a atamelang, kana boramatla jwa motho ka sebele. Pogo e e nnang gone ka ditsela tseno tse di farologaneng e tla akanyediwa fano. Lefa go ntse jalo, pogo e ka itemogelwa ka ntlha ya go amega ga motho thata ka mathata a batho ba bangwe kana khutsafalo ya gagwe ka go bona boitshwaro jo e seng jwa bomodimo.

Ke goreng Modimo o dumelela pogo?

Yo tota a tshwanetseng go pegwa molato wa yone ke mang?

Batho ba tshwanetswe go pegwa molato wa pogo e ntsi e e kana. Ba tlhabana dintwa, ba dira bokebekwa, ba kgotlela tikologo, gantsi ba dira papadi ka mokgwa o o tlhotlhelediwang ke bogagapa go na le kamego ka mongwe ka bone, mme ka dinako tse dingwe ba thabuela mo mekgweng eo ba itseng go re e ka nna diphatsa mo botsogong jwa bone. Fa ba dira dilo tseno, ba gobatsa ba bangwe le bone ka bobone. A go tshwanetswe ga lebelelwa gore batho ga ba ka ke ba tlhabantshiwa ke matswela a seo ba se dirang? (Bagal. 6:7; Dia. 1:30-33) A go a utlwala go pega Modimo molato wa dilo tseno tsotlhe tse batho ka bobone ba di dirang?

Satane le badimona ba gagwe gape le bone ba na le boikarabelo. Bibela e senola gore pogo e ntsi ke ka ntlha ya tlhotlheletso ya meya e e boikepo. Pogo e batho ba bantsi ba ba kana ba e pegelang Modimo molato ga e tswe mo go ene gotlhelele.—Tshen. 12:12; Dit. 10:38; bona gape ditsebe 348, 349, tlase ga setlhogo “Satane Diabolo.”

Pogo e ne ya simolola jang? Tlhatlhobiso ya se se e tsalang e remelela mo batsading ba rona ba ntlha ba batho, Adame le Efa. Jehofa Modimo o ne a ba bopa ba itekanetse mme a ba baya mo ditikologong tsa paradaise. Fa ba ka bo ba ne ba utlwa Modimo, ba ka bo ba ne ba ise ba ko ba lwale kana ba a swa. Ba ka bo ba ile ba ipelela botshelo jo bo itekanetseng go ya go ile. Pogo e ne e se karolo ya boikaelelo jwa ga Jehofa ka setho. Mme Jehofa ka papamalo o ne a bolelela Adame gore go tswelela a ipelela seo Ene a neng a se ba file go ne go ikaegile ka kutlo. Ka phepafalo, ba ne ba tshwanetse ke gore ba heme, ba je, ba nwe, le go robala e le gore ba tle ba tswelele ba tshela. Mme ba ne ba tshwanetse gore ba boloke ditekanyetso tsa boitsholo tsa Modimo e le gore ba tle ba ipelele botshelo ka botlalo le go segofadiwa ka botshelo jo bo ntseng jalo ka bosakhutleng. Mme ba ne ba ikgethela tsela ya bone, go itlhomela ditekanyetso tsa bone tsa se se molemo le se se bosula, mme ka gone ba ne ba huralela Modimo, Monei-Botshelo. (Gen. 2:16, 17; 3:1-6) Boleo bo ne jwa gogela losong. Adame le Efa ba ne ba tshola bana e le baleofi, mme ba ne ba ka se ka ba fetisetsa mo baneng ba bone se ba neng ba sa tlhole ba na le sone. Botlhe ba ne ba tsalelwa mo boleong, ka ditshekamelo tsa go dira bosula, makoa ao a ka gogelang mo bolwetsing, go rua boleo moo e neng e tla re kgabagare go felele ka loso. Ka ntlha ya gore mongwe le mongwe mo lefatsheng gompieno o ne a tsalwa ka boleo, rotlhe re itemogela pogo ka ditsela tse di farologaneng.—Gen. 8:21; Bar. 5:12.

Moreri 9:11 e bolela gore “motlha le bowèlō” gape ke mabaka ao a nnang le mo gontsi mo go seo se re diragalelang. Re ka nna ra gobala, eseng ka ntlha ya gore Diabolo ka tlhamalalo a go dira kana ka go bo motho ope a go dira, mme ka go bo re iphitlhela re le mo lefelong lengwe ka nako e e sa tshwanelang.

Ke goreng Modimo a sa dire sengwe go tlisetsa setho kgololo? Ke goreng rotlhe re tshwanetse go boga ka sengwe se Adame a se dirileng?

Mo Bibeleng, Modimo o re bolelela kafa re ka tilang pogo e ntsi ka teng. O ile a re baakanyetsa kgakololo e e molemo-lemo ya go tshela. Fa e dirisiwa, seno se tlatsa matshelo a rona ka bokao, se felela ka botshelo jwa lelapa je le itumetseng, se re atametsa gautshwanyane le batho bao eleruri ba ratanang thata, mme le go re babalela kgatlhanong le ditlwaelo tseo di ka tlisang pogo ya mo mmeleng e e sa tlhokafaleng. Fa re tlhokomologa thuso eo, a go a utlwala go pega Modimo molato ka matshwenyego ao re a itlisetsang le go a tlisetsa ba bangwe?—2 Tim. 3:16, 17; Pes. 119:97-105.

Jehofa o dirile paakanyetso ya go khutlisa pogo yotlhe. O ile a bopa batho ba babedi ba ntlha ba itekanetse, mme ka lorato a dira paakanyetso nngwe le nngwe e le gore botshelo bo tle bo ba natefelele. Fa ba ne ba huralela Modimo ka bomo, a Modimo o ne a tlamega gore a tsenye seatla go sireletsa bana ba bone mo matsweleng a seo batsadi ba bone ba neng ba se dirile? (Dute. 32:4, 5; Yobe 14:4) Jaaka re itse sentle, banyalani ba ka nna le maipelo ao a tlang ka go tsala bana, mme gape ba na le maikarabelo. Maikutlo le ditiro tsa batsadi di ama bana ba bone. Legale, Jehofa, ka ntlha ya bopelonomi jo bo sa tshwanelang jo bo lorato jo bo gakgamatsang, o ne a romela Morwawe sebele yo o rategang mo lefatsheng go tla go ntsha botshelo jwa gagwe jaaka thekololo, go baakanyetsa kgololo go ditlogolwana tsa ga Adame tseo di tla bontshang tumelo ka kanaanelo mo paakanyetsong eno. (Yoh. 3:16) Ka ntlha ya gone moo, sebaka se bulegetse batho ba ba tshelang gompieno go nna le se Adame a se latlhileng—botshelo jwa setho jo bo itekanetseng, bo se na pogo, mo lefatsheng la paradaise. Abo seo e le paakanyetso ya bopelontle jang ne!

Bona gape ditsebe 392-394, tlase ga “Thekololo.”

Mme ke goreng fa Modimo o o lorato o ka letlelela pogo go tswelela ka lobaka lo lo kana?

A re ile ra solegelwa molemo ke go bo a e letleletse go tla go fitlha jaana? “[Jehofa] ga a bonya kaga polèlō ea gagwè ea choloheco, yaka bañwe ba tle ba kaee bonya; me o pelotelele mo go lona, a sa rate gore opè a shwè, ha e se gore botlhe ba tlè mo boikwatlhaoñ.” (2 Pet. 3:9) Fa e le gore Modimo o ka bo e rile fela gone foo a bolaya Adame le Efa, morago ga boleo jwa bone, ga go ope wa rona yo o ka bong a le teng gompieno. Eleruri seo ga se sone seo re neng re se batla. Gape-gape, fa e ka bo erile nako nngwe moragonyana Modimo a senya baleofi botlhe, re ka bo re se ka ra tsalwa. Lebaka la go bo Modimo a ile a letlelela lefatshe leno le le nang le boleo go nna gone nako kgolo ke eno go ile ga re dumelela sebaka sa go tshela le go ithuta ditsela tsa gagwe, go dira diphetogo tse di tlhokafalang mo matshelong a rona, le go sola molemo dipaakanyetso tsa gagwe tse di lorato tsa botshelo jo bo sa khutleng. Go bo Jehofa a ile a re baakanyetsa ka paka eno ke tshupo ya lorato lo logolo mo go ene. Bibela e bontsha gore Modimo o ile a tlhoma nako ya go senya tsamaiso eno e e boikepo mme o tla tloga a dira jalo.—Hab. 2:3; Sefa. 1:14.

Modimo o ka dirolola ebile o tla dirolola kgobalo eo e ka tlelang batlhanka ba gagwe mo tsamaisong eno ya dilo. Modimo ga se ene yo o dirang pogo. Mme ka Jesu Keresete, Modimo o tla tsosa baswi, a fodise batho ba ba kutlo matlhoko otlhe a bone, a tlose motswe mongwe le mongwe wa boleo, le eleng go dira gore kutlo botlhoko ya pele e nyelele mo megopolong ya rona.—Yoh. 5:28, 29; Tshen. 21:4; Isa. 65:17.

Nako e e fetileng e ne e tlhokelwa go rarabolola dikgang kgolo tse di neng tsa tsosiwa mo Edena. Go bona ditlhaloso tse dingwe, bona ditsebe 348, 349, le 92-95.

Rona ka borona re tlhoafaletse go bona kgololo. Mme fa Modimo a tsaya kgato, e tshwanetse ya bo e le mo boemong jwa botlhe ba ba ratang se se siameng, eseng ba sekaenyana fela. Modimo ga se motlhaodi wa batho.—Dit. 10:34.

Ditshwantshetso: A ga go boammaaruri gore motsadi yo o lorato o ka letlelela ngwana wa gagwe gore a ariwe loaro lo lo botlhoko ka ntlha ya matswela a a molemo a a tla nnang teng morago ga lone? Gape, a ga go boammaaruri gore fa motho a ikalafa bolwetsi jo bo botlhoko ka “kalafi ya lepotlapotla” ga a kgone go fola sentle? Gantsi go tlhokega nako e ntsinyana gore a alafiwe se se bakang bolwetsi.

Ke goreng Modimo o ne o sa itshwarele Adame mme ka jalo wa thibela pogo e e maswe-maswe e e itemogetsweng ke setho?

A seo tota se ka bo se ile sa thibela pogo kana, mo boemong jwa moo, se ne se ka se dire gore Modimo a nne le boikarabelo mo go yone? Go diragalang fa rre ga motlhofo fela a itlhokomolosa phoso e e dirwang ka bomo ke bana ba gagwe go na le gore a tseye dikgato tse di tsepameng tsa kotlhao? Bana gantsi ba tsenelela mo sebopegong se le sengwe fela sa go dira phoso mme go tswa foo mo go se sengwe, mme boikarabelo jo bontsi bo ikaega ka rre.

Ka mo go tshwanang, fa Jehofa a ka bo a ile a itshwarela boleo jwa ga Adame jwa ka bomo, tota eleruri go ka bo go ile ga dira gore Modimo a nne le seabe mo go direng phoso moo. Seo se ka bo se se ka sa tokafatsa maemo mo lefatsheng gotlhelele. (Bapisa Moreri 8:11.) Gape gape, go ka bo go ile ga felela ka gore bomorwa Modimo ba baengele, ba se ka ba mo tlotla, mme go ka bo go ile ga raya gore go ne go se na motheo ope wa mmatota wa tsholofelo ya sengwe se se botoka. Mme seemo se se ntseng jalo se ka bo se ile sa se ka sa diragala, ka jaana tshiamo ke motheo o o sa fetogeng wa bobusi jwa ga Jehofa.—Pes. 89:14.

Ke goreng Modimo a letlelela bana go tsalwa ka bogole jo bo maswe jwa mmele le tlhaloganyo?

Modimo ga se ene a tlisitseng bogole jo bo ntseng jalo. O ne a bopa batho ba ntlha ba babedi ba itekanetse, ka kgono ya go tsala bana ba ba itekanetseng mo setshwanong sa bone.—Gen. 1:27, 28.

Re ruile boleo mo go Adame. Ka ntlha ya go bo rua, go nna le kgonego ya bogole jwa mmele le tlhaloganyo. (Bar. 5:12; kaga ditlhaloso tse dingwe gape bona tsebe 324.) Re rua boleo jono go tswa nakong eo re imiwang ka yone mo sebopelong. Ke ka lebaka leo Kgosi Dafide a neng a kwala ka gore: “Mmè o ne a inthwalèla mo boleuñ.” (Pes. 51:5) Fa Adame a ka bo a sa leofa, go ka bo go fetisiwa fela ditlwaelo tse di molemo. (Go bona dikakgelo ka Yohane 9:1, 2, bona tsebe 181.)

Batsadi ba ka gobatsa bana ba bone ba ba iseng ba tsalwe—ka sekai, ka kgobololo ya diokobatsi, ka go goga nako e ba ithweleng ka yone. Legale, ga go boammaaruri gore mo kgannyeng e nngwe le e nngwe mmè kana rre o ikarabelela bogole jwa botsalo kana botsogo jo bo bokoa jwa ngwana wa bone.

Jehofa ka lorato o atolosetsa go bana melemo ya setlhabelo sa thekololo sa ga Keresete. Ka ntlha ya kakanyetso ya batsadi bao ba direlang Modimo ka boikanyego, o leba bana ba bone ba bannye jaaka ba ba itshepileng. (1 Bakor. 7:14) Seno se tlhotlheletsa batsadi ba ba boifang Modimo go nna kelotlhoko kaga kemo ya bone le Modimo, ka ntlha ya kamego e e lorato ya bana ba bone. Banana bao ba setseng ba godile ka mo go lekaneng go ka bontsha tumelo le go supa kutlo mo ditaolong tsa Modimo, Jehofa o atolosetsa tshiamelo ya gore ba nne le seemo se se amogelesegang jaaka batlhanka ba gagwe. (Pes. 119:9; 148:12, 13; Dit. 16:1-3) Go a tshwaega gore Jesu, yo e neng e le setshwano se se itekanetseng sa ga Rraagwe, o ne a bontsha kgatlhego e e kgethegileng mo molemong wa bananyana, le eleng go tsosa ngwana mo losong. Eleruri o tla tswelela a dira jalo jaaka Kgosi ya Bomesia.—Math. 19:13-15; Luke 8:41, 42, 49-56.

Ke goreng Modimo o dumelela “dikudumedi tsa tlholego,” tseo di senyang dithoto le matshelo ka tsela e e maswe go le kana?

Modimo ga o dire dithoromo tsa mafatshe, ditsuatsue, merwalela, mauba, le go thunya ga lekgwamolelo tseo gantsi di bonalang mo dikgannyeng tsa gompieno. Ga a dirise tseno go otlhaya batho bangwe ba ba rileng. Go ya bokgakaleng jo bo rileng, tseno di dirwa ke maatla a tlholego fela ao a ileng a nna a dira fa e sa le popo ya lefatshe. Bibela e boleletse pele kaga dithoromo tse dikgolo tsa lefatshe le ditlhaelo tsa dijo mo motlheng wa rona, mme seo ga se reye gore e ka tswa e le Modimo kana Jesu ba ba ikarabelelang mo go tsone, fela jaaka e le gore molepa loapi ga a ikarabelele boemo jwa bosa jo a bo bonelang pele. Ka go bo tseno di direga mmogo le dilo tse dingwe tse di boleletsweng pele jaaka sesupo se se dikarolo dintsi sa bofelo jwa tsamaiso eno ya dilo, ke karolo ya bosupi jwa gore masego a Bogosi jwa Modimo a gaufi.—Luke 21:11, 31.

Batho gantsi ba na le boikarabelo jo bo boima mo kgobalong e e dirwang. Ka tsela efe? Le eleng fa ba ile ba neelwa tlhagiso e e lekanetseng, batho ba bantsi ba gana go tswa mo kgaolong e e kotsi kana ba palelwa ke go tsaya dikgato tsa phalolo tse di tlhokafalang.—Dia. 22:3; bapisa Mathaio 24:37-39.

Modimo o ka laola maatla a tlholego a a ntseng jalo. O ne a neela Jesu Keresete maatla a go sisibatsa setsuatsue mo Lewatleng ja Galalia, jaaka sekai seo A tla se direlang setho tlase ga Bogosi jwa Gagwe jwa Bomesia. (Mar. 4:37-41) Ka go furalela ga gagwe Modimo, Adame o ne a gana thuso e e ntseng jalo ya bomodimo mo boemong jwa gagwe le ditlogolwana tsa gagwe. Bao ba neelwang botshelo tlase ga Puso ya Bomesia ya ga Keresete ba tla itemogela tlhokomelo e e ntseng jalo e e lorato, tlhokomelo ya mofuta oo e ka tlang fela ka goromente yo o neilweng maatla ke Modimo.—Isa. 11:9.

A batho ba ba bogang botlhoko ba a bo ba otlhaiwa ke Modimo ka ntlha ya boikepo?

Bao ba tlolang ditekanyetso tsa bomodimo tsa go tshela ba itemogela matswela a a maswe. (Bagal. 6:7) Ka dinako tse dingwe ba roba matswela a a bosula ka bofefo. Mo dipakeng tse dingwe, ba ka bonala ekete ba tlhogonolofala ka lobaka lo loleele. Mo phapaanong le seo, Jesu Keresete, yo o iseng a ke a dire se se phoso, o ne a tshwarwa makgwakgwa mo go setlhogo mme a bo a bolawa. Jalo, mo tsamaisong eno ya dilo tlhogonolofalo ga e ya tshwanelwa go lejwa jaaka tshupo ya gore motho o segofadiwa ke Modimo, lefa e le gone go re botlhoko bo tshwanetse go tsewa jaaka tshupo ya gore ga a mo amogele.

Fa Jobe a ne a latlhegelwa ke dithoto tsa gagwe mme a tlhaselwa ke bolwetsi jo bo ferosang sebete, seo e ne e se ka go bo Modimo a ne a sa mo amogele. Bibela ka phepafalo e re Satane o ne a ikarabelela go seo. (Yobe 2:3, 7, 8) Mme balekane ba ba neng ba tla go etela Jobe ba ne ba ganeletse mo goreng botlhoko jwa ga Jobe e tshwanetse ya bo e le tshupo ya gore o dirile sengwe se se boikepo. (Yobe 4:7-9; 15:6, 20-24) Jehofa o ne a ba kgalemela, ka go re: “Bocarara yoa me bo [lo] tuketse, . . . gonne ga loa bua se se siameñ kaga me, yaka Yobe motlhanka oa me a buile.”—Yobe 42:7.

Tota, baikepi ba ka nna, ba tlhogonolofala ka lobakanyana. Asafe o ne a kwala ka go re: “Gonne, e rile ke bōna letlhōgōnōlō ya baitelaganyi ka nna pelotshètlha kaga bōnè baikepi. Ga ba mo tlaleloñ yaka batho ba bañwe; le gōna ga ba chwenyege yaka batho ba bañwe. Baa shotla, me ba bue patikō ba le mo boshuleñ: ba bue ka boikganchō. Bōna, bauō ke bōnè baikepi; me ereka ba nntse ba le mo boiketloñ ka metlha eotlhe, boo ba totèlwa ke dikhumō.”—Pes. 73:3, 5, 8, 12.

Letsatsi ja go ikarabelela go Modimo le tla tla. Ka nako eo o tla otlhaya baikepi, a ba senyetsa ruri. Diane 2:21, 22 e re: “Gonne bathōkgami ba tla aga mo lehatshiñ, le baitekanedi ba tla sala ba nntse rure mo go yeōna. Me baikepi ba tla kgaolwa ba tlosiwa mo lehatshiñ, le ba ba dihañ ka bonōñwane ba tla khumolwa mo go yeōna.” Go tswa foo he baitekanedi, bao bontsi jwa bone ba ileng ba boga botlhoko, ba tla ipelela botsogo jo bo itekanetseng le go abalana ka botlalo mo letlotlong je legolo la lefatshe.

Fa Mongwe A Re—

‘Ke goreng Modimo o dumelela pogo e yotlhe?’

O ka nna wa araba ka gore: ‘Eo ke kgang e e re amang rotlhe tota. Mme mma ke go botse jaana, Ke eng se se dirang gore o bue kaga yone gompieno?’ Mme gongwe o bo o ka oketsa jaana: (1) ‘(Dirisa boikitsiso jo bo mo ditsebeng 323-326.)’ (2) ‘(Ntsha dikwalo tse dingwe tse di solofetsang kgololesego ya mofuta o o papametseng ya boemo bongwe jo bo ileng jwa tlisa pogo e ntsi go motho yoo ka sebele.)’

Kana o ka nna wa re: (fa kamego ya bone e le ka ntlha ya ditshiamololo tsa lefatshe): ‘Bibela e bontsha gore ke ka baka lang fa maemo ano a le gone gompieno. (Mor. 4:1; 8:9) A o ne o itse gore e bontsha gore Modimo gape o tla dira sengwe go re tlisetsa kgololo? (Pes. 72:12, 14; Dan. 2:44)’

Se sengwe se se ka dirisiwang: ‘Ka phepafalo o motho yo ruri a dumelang mo Modimong. A o dumela gore Modimo o lorato? . . . A o dumela gore o botlhale le gore o maatla otlhe? . . . Jalo he o tshwanetse a bo a na le mabaka mangwe a a utlwalang a go dumelela pogo. Bibela e bontsha mabaka ao gore ke afe. (Bona ditsebe 323-326.)’