A o Solegelwa Molemo?
1 Dimilione tsa batho gompieno di batla go itse tsela ya go fenya mathata le go itumelela botshelo. Ba itumelela go bala dibuka tsa dikgakololo kana ba senka kgakololo e e malebana le go tokafatsa matshelo a bone mo ditlhopheng le mo mekgatlhong mengwe. Gongwe bangwe ba ka umaka melemo e sekae e ba e boneng mo go tsone. Le fa go ntse jalo, fa re leba tsela e batho ba tshelang ka yone gompieno, a ka kakaretso dithulaganyo tsa batho tsa go ruta di ile tsa kgona go ba thusa go tshela matshelo a a ritibetseng, a a kgotsofatsang? Legoka!—1 Bakor. 3:18-20.
2 Mo letlhakoreng le lengwe, Mmopi wa rona o neela batho botlhe ba ba tla reetsang thuto e e molemolemo ya mahala. Jehofa o batla gore mongwe le mongwe a solegelwe molemo ke thuto ya gagwe. O neetse batho Lefoko la gagwe le le tlhotlheleditsweng ka bopelotshweu gore le ba kaele ka tshiamo, mme o dirile gore dikgang tse di molemo tsa Bogosi jwa gagwe di bolelwe mo lefatsheng lotlhe. (Pes. 19:7, 8; Math. 24:14; 2 Tim. 3:16) Re ka bona botshelo jo bo itumedisang fa re ela tlhoko ditaelo tsa ga Jehofa.—Isa. 48:17, 18.
3 Kaelo ya ga Jehofa e gaisa thata e e tswang mo dibukeng dipe tsa dikgakololo kana mo dithulaganyong tsa go itokafatsa tse re di bonang mo lefatsheng leno. Re ka bona thuso ya mmatota le melemo e e nnelang ruri fa re dirisa dithulaganyo tsa ga Jehofa ka botlalo tse di kwadilweng mo Lefokong la gagwe le tse di rutwang ke phuthego ya gagwe.—1 Pet. 3:10-12.
4 Solegelwa Molemo Kwa Dipokanong Tsa Phuthego: Gompieno, Jehofa o bontsha gore o re kgatlhegela ka tsela ya mmatota ka go re ruta ditsela tsa gagwe, mme re solegelwa molemo fa re ela tlhoko se a re rutang sone. Dipokano tsa rona tse tlhano tsa beke le beke di supa gore Jehofa o amega ka rona ka tsela e e lorato. Kitso ya rona ka Modimo e a oketsega fa re nna gone kwa dipokanong tsa phuthego. Re ithuta tsela ya go itshireletsa mo go se se bosula ka go tsalana thata le Jehofa. Seno se dira gore re itumele.
5 Go na le go feta moo. Re kgona go ‘pitlologa’ kwa dipokanong tsa phuthego. (2 Bakor. 6:13) Seno se akaretsa go itse batho ba bangwe mo phuthegong. Re solegelwa molemo ka go kgothatsana, go go tshwanang le go moaposetoloi Paulo a neng a kwala ka gone mo lekwalong le a neng a le kwalela Baroma. (Bar. 1:11, 12) Fa a ne a kwalela Bahebera, o ne a tlhagisa batho ba ba ka tswang ba ne ba na le mokgwa wa go lesa go kopana le bakaulengwe ba Bakeresete.—Baheb. 10:24, 25.
6 Go tshela re itumetse go amana thata le go kgatlhegela boitekanelo jwa batho ba bangwe. Re kgothalediwa go batla ditsela tse re ka itumedisang ba bangwe ka tsone. Ka gone, dipokano tsa rona tsa Bokeresete eleruri di solegela rona molemo le batho ba re itsalanyang le bone ka tsela e e molemo. Go tlhokega fela gore rona re nne le seabe ka tlhoafalo.
7 Moaposetoloi Paulo o ne a tlhalosa se se tshwanang fa a ne a gakolola Timotheo, a kwala jaana: “Ithapise, mokgele wa gago e le boineelo jwa bomodimo.” (1 Tim. 4:7) Re ka ipotsa jaana: ‘A ke a ithapisa? A ke kgona go solegelwa molemo ke se ke se utlwang kwa dipokanong tsa phuthego?’ Re tla dumalana le seo fa re ela tlhoko se re se utlwang kwa dipokanong le go leka go dirisa se re se utlwang. Ga re a tshwanela go bona bakaulengwe e le bone fela ba ba rutang, mme ka matlho a tumelo, re bone Jehofa e le Motlhatlheledi yo Mogolo wa batho ba gagwe.—Isa. 30:20, NW.
8 Sekolo sa Bodiredi sa Puso ya Modimo le Pokano ya Tirelo: Dipokano tseno tse pedi di diretswe go re thusa go nna le matswela mo bodireding jwa Bokeresete. Sekolo sa Puso ya Modimo se diretswe boikaelelo joo—go nna sekolo se se rutang baithuti le go ba gakolola ka metlha. O na le sebaka sa go bontsha gore o gatela pele o le sebui sa phatlalatsa le morutisi wa Lefoko la Modimo. Mme gore sekolo se go solegele molemo, o tshwanetse go ikwadisa, go nna gone mo go sone, go nna le seabe ka metlha, le go tlhoafalela go dira dikabelo tsa gago. Fa o amogela le go dirisa kgakololo e o e neelwang go tla go thusa gore o gatele pele.
9 Pokano ya Tirelo e re ruta botlhokwa jwa bodiredi jwa Bokeresete mme e re bontsha tsela e re ka nnang le seabe ka yone mo tirong ya go dira barutwa. A wena le lelapa la gago lo solegelwa molemo ka botlalo ke dipuo tse di neelwang kwa dipokanong tseno tse pedi? Banyalani bangwe ba Bakeresete ba bolela jaana: “Kwa Pokanong nngwe ya Tirelo, re ne ra utlwa gore re tshwanetse go sekaseka temana ya letsatsi re le lelapa. Re ne re sa dire seno, mme jaanong re a se dira.” Seno se ba solegetse molemo jang? Ba dumela jaana: “Re lemoga gore re itumelela metlotlo ya rona thata fa re ja. Ga re tlhole re ngangisana thata fa re ja dijo tsa motshegare.” A tota le bana ba bannye ba solegelwa molemo ke dipokano? Ee. Mmè o bolela jaana: “Go bonala sentle gore dipokano di thusa bana ba rona thata. Mo bekeng nngwe re ne ra utlwa morwaarona wa dingwaga tse thataro a bua maaka. Mme mo bekeng eo kwa pokanong, puo ya tao e ne e bua ka go bua maaka. Morwaarona o ne a leba rraagwe mme go tswa foo a oba tlhogo a lebega a swabile mo sefatlhegong. O ne a ithuta sengwe, mme ga re a ka ra tlhola re nna le bothata.”
10 Kgaitsadi mongwe wa mmulatsela o bolela gore o itumelela go bo go neelwa dikakantsho tsa go tokafatsa bodiredi jwa rona mo Pokanong ya Tirelo. Ka ntlha yang? O tlhalosa jaana: “Ke dira dilo ka tsela ya seomodiro fela. Ka dinako tse dingwe ke akanya gore se se akantshiwang mo go Tirelo ya Rona ya Bogosi se ka se thuse. Mme fa ke utlwa kwa Pokanong ya Tirelo gore re tshwanetse go se leka, ke nna matlhagatlhaga gore ke dirise dikakantsho tseo. Go dira gore bodiredi bo itumedise!” Morago ga dibeke di le mmalwa a ntse a dirisa kakantsho ya gore a leke go simolola thuto ya Baebele mo loetong lwa ntlha, o ne a simolola thuto mo loetong lwa ntlha le mosetsana mongwe yo o neng a rapelela go thusiwa.
11 Fa o utlwa puo e e akaretsang kgakololo ya Baebele e e malebana le dilo tse o itlhophelang tsone, a o tlhaloganya gore Jehofa o bua le wena ka tlhamalalo? Mokaulengwe mongwe o ne a ikutlwa ka tsela eo. O ne a re: “Bosheng jaana kwa pokanong nngwe, go ne go na le puo e mo go yone mokaulengwe a neng a tlotla ka mefuta ya boitlosobodutu e e tshwanetseng Bakeresete le e e sa ba tshwanelang. Ke ne ke tle ke rate go lebelela motshameko wa mabole mo thelebisheneng. Mme morago ga pokano eo, ke ne ka dira tshwetso ya gore motshameko ono ke karolo ya mefuta ya boitlosobodutu e e sa tshwaneleng Bakeresete. Ka jalo ga ke tlhole ke o lebelela.” Ee, le fa gone mokaulengwe yono a ne a rata motshameko wa thubakanyo, ka boikokobetso o ne a tsibogela kaelo ya ga Jehofa.—Pes. 11:5.
12 Pokano ya Phatlalatsa, Thuto ya Tora ya Tebelo le Thuto ya Buka ya Phuthego: Dipuo tsa phatlalatsa tse re di utlwang beke le beke di bua ka ditlhogo tse di farologaneng tsa Baebele. Ke eng se o se amogelang mo dipuong tseno? Monna mongwe yo o nyetseng wa Mokeresete o ne a akgela ka melemo e a e boneng: “Puo nngwe ya phatlalatsa e ne ya gatelela maungo otlhe a moya. Sebui se ne sa bolela ka fa se kgonneng ka gone gore se berekele mo go nneng le maungo ano, se ne se tlhopha nonofo e e rileng se bo se berekela mo go yone ka beke. Kwa bofelong jwa beke eo, o ne a akanya ka tsela e a bontshitseng leungo leno ka yone mo ditirong tsa gagwe tsa letsatsi le letsatsi. Go tswa foo o ne a berekela mo nonofong e nngwe mo bekeng e e latelang. Ke ne ke rata ntlha eo mme le nna ka simolola go dira jalo.” A bo e le go dirisa sentle se o se ithutileng jang ne!
13 Thuto ya Tora ya Tebelo e re ruta go dirisa melaometheo ya Baebele mo maemong a a farologaneng a botshelo. Seno se re thusa go ritibala mo mogopolong le mo dipelong le fa gone re tlhobaela mo botshelong. Thuto ya Tora ya Tebelo gape e re itsise boammaaruri jo bo ntseng bo gatela pele. Ka sekai, a ga re a solegelwa molemo ke thuto ya Tora ya Tebelo ya May 1, 1999, ya ditlhogo tse di reng: “Dilo Tseno di Tshwanetse go Diragala,” “A Mmadi a Dirise Temogo,” le “Nna Tlhaga O bo O Tlhoafale!” Ditlhogo tseno di go thusitse jang? A o bontsha ka ditiro gore o tlhwaela tsebe tlhagiso ya ga Jesu e e malebana le isagwe? A o ipaakanyetsa diteko tse di larileng kwa pele tsa fa re bona “selo se se ferosang sebete se se bakang kgakgabalo . . . se eme mo lefelong le le boitshepo”? (Math. 24:15-22) A mekgele ya gago le tsela e o tshelang ka yone di bontsha gore o tsaya go itshepisiwa ga leina la ga Jehofa e le selo sa botlhokwa, mme e seng go ikokoanyetsa dithoto? A mo Thutong ya Tora ya Tebelo ga re ithute go solegelwa molemo gone jaanong?
14 Akanya ka se re se ithutang kwa Thutong ya Buka ya Phuthego beke le beke. Gone jaanong re ithuta buka ya Baebele ya Daniele. Mo dikgweding tse nnè re ntse re ithuta buka eo ya Baebele ka tsone, a ga re a bona tumelo ya rona e gola beke le beke? Fela jaaka moporofeti yo o rategang wa ga Jehofa e bong Daniele, re nonotsha tumelo ya rona gore re itshoke.
15 Jehofa o re Ruta go Tshela re Itumetse: Re tila mahutsana a mantsi fa re ela tlhoko ditaelo tsa Modimo. Mo godimo ga moo, re itumelela go tshela botshelo jo bo monate. Fa re latela kaelo ya ga Jehofa, re nna le seabe mo tirong ya gagwe, re sa nne babogedi fela. Mme batho ba ba dirang tiro ya Modimo ba itumetse.—1 Bakor. 3:9; Jak. 1:25.
16 Akanya thata ka tsela e o ka dirisang dilo tse o di utlwang ka yone fa o le kwa dipokanong. (Joh. 13:17) Direla Jehofa ka matlhagatlhaga, ka pelo yotlhe. O tla itumela fela thata. O tla tshela botshelo jo bo botoka, jo bo botlhokwa. Ee, o tla solegelwa molemo.