Neela Bosupi Jaaka Moagelani yo o Molemo
1 Jesu o ne a re “o rate moagelani wa gago jaaka o ithata.” (Math. 22:39) Ga go na pelaelo gore o ntse o ‘dira se se molemo’ mo badumeding ka wena, le fa go ntse jalo, a o ka pitlologa mo loratong lo o ratang batho ba ba nnang gaufi le wena ka lone? (Bagal. 6:10) Ka ditsela dife?
2 Ka go Dira Gore o Itsiwe: A baagelani ba gago ba a itse gore o Mosupi? Fa ba sa itse, ke eng fa o sa ba etele ka nako ya fa o le mo tirelong ya tshimo? O ka nna wa gakgamadiwa ke diphelelo tsa seno! Kana fa o se na mathata le gone, leka go ba naya bosupi ka tsela e e seng ya ka tlwaelo. Fa o tswetse kwa ntle, o ka nna wa ba bona ba bereka mo tshingwaneng ya bone kana ba itsamatsamaela mo mmileng. Ba atamele ka monyenyo o o botsalano. Leka go bua le bone ka dilo tse o di dumelang, ka lefelo le Holo ya Bogosi e leng kwa go lone, le gore go dirwang koo, mme o ba bolelele le gore ke bomang gape mo lefelong la lona ba ba kopanelang. Ba laletse go tla dipokanong. Ikemisetse go naya mongwe le mongwe yo o mo itseng bosupi ka dikgang tse di molemo ka botlalo.—Dit. 10:42; 28:23.
3 Ka Boitshwaro Jwa Gago jo bo Tlhomang Sekao: Boitshwaro jwa gago jo bontle bo bolela go le gontsi ka wena mme bo ka dira gore o kgone go neela bosupi. Gape bo ‘kgabisa thuto ya Modimo.’ (Tito 2:7, 10) Bontsha gore o kgatlhegela baagelani ba gago ka tsela ya mmatota. Nna motho yo o botsalano le yo o tlhaloganyang. Ga go reye gore o ba tlhokise nako ya go nna ba le bosi le go nna ka kagiso. Fa mongwe wa bone a lwala, mo akanyetse mme o mo thuse. Fa lelapa le lesha le fudugela mo lefelong la lona, le etele mme o le amogele. Go dira jalo go dira gore baagelani ba gago ba nne le boikutlo jo bo siameng ka wena e bile go itumedisa Jehofa.—Baheb. 13:16.
4 Ka Tsela e Dilo Tsa Gago di Lebegang ka Yone: Go nna moagelani yo o molemo go akaretsa go tlhokomela legae la gago gore le lebege sentle. Ntlo le jarata e e phepa le e ntle di neela bosupi ka botsone. Mme ntlo e e leswe kana e o fitlhelang matlakala a tletse gongwe le gongwe mo go yone, e ka nna ya dira gore batho ba se ka ba amogela molaetsa wa Bogosi. Ka jalo, go botlhokwa thata go boloka ntlo, jarata le dikoloi tsa gago di le phepa e bile di baakantswe sentle.
5 Fa o bontsha gore o amega ka batho ba ba seng mo phuthegong ya Bokeresete, o tla bo o supa gore o rata baagelani ba gago. Seno se ka felela ka eng? Se ka nna sa felela ka gore bangwe ba bone ba ‘galaletse Modimo . . . ka ntlha ya ditiro tsa rona tse di molemo tse ba leng basupi ba tsone.’—1 Pet. 2:12.