Ba Golafetse—Mme Tiro ya Bone E na Le Matswela
1 Fa e le gore o mongwe wa Basupi ba bantsi ba ga Jehofa ba ba golafetseng ka tsela nngwe, o sa ntse o ka dira bodiredi jo bo nang le matswela. E bile, boemo jwa gago bo ka go bulela ditsela tse di kgethegileng tsa go rera le go kgothatsa ba bangwe.
2 Ditsela Tsa go Neela Bosupi: Batho ba le bantsi ba ba golafetseng ba na le seabe se segolo mo bodireding. Ka sekai, kgaitsadi mongwe yo e rileng a sena go ariwa a bo a sa kgone go tsamaya le go bua sentle, o ne a fitlhela gore o ne a kgona go dira tiro ya dimakasine fa monna wa gagwe a pakile koloi ya bone gaufi le tselana ya dinao e e dirisiwang ke batho ba le bantsi. Nako nngwe o ne a tsamaisa dimakasine di le 80 ka diura di le pedi fela! Seemo sa gago se se sa tlwaelegang gape se ka dira gore o kopane le batho ba ka dinako tse dingwe go leng thata go kopana le bone. Fa go ntse jalo, ba tseye e le tshimo ya gago e e sa tshwaneng le tse dingwe.
3 Tiro ya gago ya go rera e ka nna le matswela tota! Fa batho ba bangwe ba ntse ba bona kafa o ititeileng sehuba ka teng le kafa boammaaruri jwa Baebele bo nnang le matswela a a molemo ka teng mo botshelong jwa gago, ba ka kgatlhegela molaetsa wa Bogosi. Mo godimo ga moo, fa o kopana le batho ba ba bogang, se se go diragaletseng mo botshelong se ka go thusa gore o kgone go ba gomotsa ka Lefoko la Modimo.—2 Bakor. 1:4.
4 Kgothatsa ba Bangwe: A ga o a ka wa kgothadiwa ke pego ya botshelo ya ga Laurel Nisbet, yo o neng a tshela dingwaga di le 37 mo motšhineng o o mo thusang go hema mme a kgona go thusa batho ba le 17 gore ba nne le kitso e e tlhomameng ya boammaaruri jwa Baebele? Ka tsela e e tshwanang, sekao sa gago se ka tlhotlheletsa badumedi ka wena gore ba dire ka natla mo tirelong ya ga Jehofa.—g93 1/22 ts. 18-21.
5 Tota le fa seemo sa gago se sa go letle gore o ka ya bodireding ka selekanyo se o neng o ka rata go ya ka sone, o sa ntse o ka nonotsha ba bangwe. Mokaulengwe mongwe o ne a re: “Ke ile ka lemoga gore le e leng motho yo o golafetseng thata a ka thusa thata mo go direleng ba bangwe. Nna le mosadi wa me re ile ra tshegetsa bangwe mo phuthegong. Ka ntlha ya boemo jwa rona, re nna re le teng ka metlha, re ka thusa nako nngwe le nngwe.” Le fa go ntse jalo, ka gonne o golafetse, go a utlwala gore ga se ka dinako tsotlhe o tla kgonang go dira kafa o ka ratang ka gone. Mme gone, fa o thusiwa ka tsela nngwe o ka kgona go nna le seabe se segolo mo bodireding. Ka jalo, fa o tlhoka go thusiwa, o se ka wa okaoka go bolelela bagolwane kgotsa ba bangwe mo phuthegong ba ba ka go thusang.
6 Jehofa o bona sengwe le sengwe se o se dirang ka gonne o batla go mo direla, mme o itumelela tirelo ya gago e o e dirang ka moya otlhe. (Pes. 139:1-4) Fa o ntse o ikaega ka ene, a ka go naya maatla a gore o dire bodiredi jo bo nang le matswela e bile bo na le mosola.—2 Bakor. 12:7-10.