Bolela Dinonofo Tse di Molemolemo Tsa ga Jehofa Gongwe le Gongwe
1. Ke eng se se re tlhotlheletsang go bolela dinonofo tse di molemolemo tsa ga Jehofa gongwe le gongwe?
1 “Bogolo le thata le bontle le tlotlomalo le seriti ke tsa gago wena Jehofa; gonne sengwe le sengwe se se kwa magodimong le mo lefatsheng ke sa gago.” (1 Ditir. 29:11) Tsela e re ratang Jehofa le go mo anaanela ka yone e re ama jang? E re tlhotlheletsa go ‘bolela dinonofo tse di molemolemo gongwe le gongwe tsa yo o neng a re bitsa mo lefifing a re isa mo leseding la gagwe le le gakgamatsang.’ (1 Pet. 2:9) Ga re ka ke ra emisa go bolelela ba bangwe ka Modimo wa rona yo mogolo! Re tla nna le ditshono tse di tlhomologileng tsa go bolela ka dinonofo tse di molemolemo tsa ga Jehofa ka kgwedi ya March, April le May.
2. Go rulagantswe letsholo lefe le le kgethegileng la go itsise ka Segopotso, mme ke bomang ba ba ka nnang le seabe?
2 Letsholo le le Kgethegileng la go Itsise ka Segopotso: Ka Mantaga, April 2, re tla bontsha dinonofo tsa ga Jehofa tse di molemolemo ka go gopola Sejo sa Morena sa Maitseboa. Taletso e e kgethegileng ya tiragalo eno e e botlhokwa e tla abiwa mo lefatsheng lotlhe go simolola ka March 17 go fitlha ka April 2. Botlhe ba kgothalediwa go nna le seabe ka botlalo. Eno e tla nna nako e e siameng ya gore batho ba basha ba simolole go bolela dikgang tse di molemo fa ba tshwanelega. Fa o na le diithuti tsa Baebele kgotsa bana ba ba ka tshwanelegang, tsaya matsapa a go buisana le bagolwane.
3. Re ka reng fa re laletsa batho go tla Segopotsong?
3 Letsholo leno le tla tshwana le la go itsise ka Kopano ya Kgaolo ya “Kgololo e Atametse!” Diphuthego di tla romelelwa ditaletso gore mmoledi mongwe le mongwe a nne le ditaletso di le 30, mme tse di setseng di tla newa babulatsela. Dira gore puisano ya gago e nne khutshwane, gongwe o ka re: “Taletso ya gago ke eno ya go tla kwa tiragalong e e botlhokwa ya ngwaga le ngwaga. O tla amogelwa ka diatla tsoopedi. Dintlha ka botlalo di kwadilwe mo taletsong eno.” Mme gone, fa mong wa ntlo a na le dipotso, iphe nako ya go di araba. Dintlha tse di oketsegileng ka Sejo sa Morena sa Maitseboa tse di mo bukeng ya Baebele e Ruta Eng? go simolola mo tsebeng ya 206 di ka nna tsa thusa mo ntlheng eno. Ka mafelobeke, re tla tsamaisa dimakasine tsa bosheng le taletso e e kgethegileng. Kwala maina a batho botlhe ba ba bontshitseng kgatlhego mme o rulaganye go boela kwa go bone.
4. Re tla aba jang ditaletso tse di kgethegileng tsa Segopotso?
4 Fa go kgonega, taletso eno e e kgethegileng e tshwanetse go neelwa mong wa ntlo ka tlhamalalo. Ka jalo kwala dinomoro tsa matlo a a se nang batho mme o rulaganye go boela ka nako e nngwe. Diphuthego tse di nang le ditaletso di le dintsi tse di setseng di ka nna tsa di tlogela mo matlong a beng ba one ba seyong mo gae mo bekeng ya bofelo pele ga Segopotso, mme e seng pele ga moo. Tlhomamisa gore batho ba re dirang maeto a go boela kwa go bone, diithuti tsa Baebele, ba losika, badirimmogo, baagelani le batho ba bangwe ba re tlwaelaneng le bone ba amogela taletso.
5. Ke ka ntlha yang fa re tshwanetse go simolola gone jaanong go dira dithulaganyo tsa go tsaya bobulatsela jo bo thusang?
5 Bobulatsela jo bo Thusang: A o ka bolela dinonofo tse di molemolemo tsa ga Jehofa ka botlalo ka go tsaya bobulatsela jo bo thusang ka March, April le May? Go tsaya bobulatsela jo bo thusang go ka nna ga tlhoka gore o dire diphetogo dingwe mo thulaganyong ya gago ya letsatsi le letsatsi. (Baef. 5:15-17) O ka tlhomamisega gore go dira boiteko jwa go dira mo go oketsegileng mo tirelong ya ga Jehofa go tla go itumedisa mme Jehofa o tla go segofatsa. (Dia. 10:22) E re ka paka ya Segopotso e atamela, eno ke nako ya go simolola go dira dithulaganyo.—Dia. 21:5.
6. Re ka ithuta eng mo boitemogelong jwa kgaitsadi mongwe wa dingwaga di le 90 yo o neng a tsaya bobulatsela jo bo thusang ngogola?
6 Kgaitsadi mongwe wa dingwaga di le 90 o ne a itumelela tshiamelo ya go tsaya bobulatsela jo bo thusang ngogola. O ne a re: “Le fa gone ke rata thata go bereka mo tshingwaneng e bile ke ne ke batla go simolola go jala, ke ne ka lemoga gore ke ne ke tshwanetse go baya dilo tsa botlhokwa kwa pele. E re ka ke ne ke batla go baya dilo tsa Bogosi kwa pele, ke ne ka swetsa ka gore ke tseye bobulatsela jo bo thusang ka March.” A o ne a segofalediwa go dira maiteko ao? A re, “Ke ikutlwa ke atamalane thata le phuthego mme seno se dirile gore ke atamalane gaufi le Jehofa.” A re ka sekaseka dilo tse re di tsayang di le botlhokwa mo botshelong mme re dire diphetogo tse di tshwanang le tseo go ya kafa go tlhokegang ka gone?
7. A go boima go nna mmulatsela yo o thusang?
7 Go fitlhelela diura di le 50 tse mmulatsela yo o thusang a lebeletsweng go di fitlhelela ga go boima jaaka o ka tswa o akanya. Sekaseka ka thapelo ditiro tsa gago tsa letsatsi le letsatsi, dira thulaganyo mme morago ga moo o e kwale mo thulaganyong ya gago ya dilo tsa semoya. Ke wena o itseng maemo a gago botoka. Fa o na le botsogo jo bo bokoa e bile o se na maatla, gongwe o ka nna le seabe mo bodireding ka diura di le mmalwa letsatsi le letsatsi. Fa o bereka letsatsi lotlhe kgotsa o tsena sekolo, o ka nna wa kgona go tsaya bobulatsela jo bo thusang ka go nna le seabe mo bodireding mo maitseboeng kgotsa ka mafelobeke.
8. Ke eng se se neng sa thusa banyalani bangwe go tsaya bobulatsela jo bo thusang?
8 Ba le bantsi ba ile ba kgona go tsaya bobulatsela jaaka lelapa. Mo dingwageng tse di fetileng banyalani bangwe ba ne ba okaoka go tsaya bobulatsela jo bo thusang ka gonne ba ne ba akanya gore maemo a bone a ne a sa ba letle go tsaya bobulatsela jo bo thusang. Ba ne ba dira eng ka seo? “Re ne ra rapela Jehofa gore a re thuse go diragatsa se re neng re sa bolo go batla go se dira mmogo.” Ba ne ba kgona go fitlhelela mokgele wa bone ka go rulaganya dilo sentle. Ba oketsa jaana: “Go ne go itumedisa. Re ne ra itumelela masego a le mantsi mmogo. Kakantsho ya rona ke gore, lekang fela. Fa rona re kgonne, le lona lo ka nna lwa kgona.”
9. Ke eng se o ka se dirang mo thutong ya lona e e latelang ya lelapa go rulaganyetsa dikgwedi tse di tlang tsa tiro e e kgethegileng?
9 O ka nna wa beela nako kwa thoko ka nako ya thuto ya lona ya lelapa go sekaseka kafa lotlhe lo ka oketsang tiro ya lona mo dikgweding tse di latelang ka teng. Le fa lo sa kgone go bula tsela lotlhe ka lelapa, gongwe leloko le le lengwe le ka bula tsela ka go thusiwa ke maloko a mangwe a lelapa. Fa go sa nna jalo, gongwe lelapa la gago le ka itlhomela mekgele ya go bereka nako e e oketsegileng mo bodireding mo dikgweding tseno tse di kgethegileng tsa tiro.
10. Ke ka ntlha yang fa re tshwanetse go tlotla le ba bangwe ka keletso ya rona ya go tsaya bobulatsela jo bo thusang ka paka eno ya Segopotso?
10 Thusanang: Go tlhagafala mo bodireding go rotloetsa ba bangwe gore le bone ba tlhagafale. Tlotla ka keletso ya gago ya go tsaya bobulatsela jo bo thusang. Seno se ka kgothatsa ba bangwe gore le bone ba bo tseye. Mo godimo ga moo, ba ba ileng ba bula tsela mo nakong e e fetileng ba ka kgona go go naya dikakantsho tse di tla go thusang go rulaganya dilo tsa gago le thulaganyo gore o fitlhelele mokgele wa gago. (Dia. 15:22) Fa o kgona go tsaya bobulatsela jo bo thusang, ke ka ntlha yang fa o sa kope mmoledi yo mongwe, gongwe mongwe yo maemo a gagwe a tshwanang le a gago, go bereka le wena mo tirong eno e e itumedisang?
11. Bagolwane ba ka kgothatsa jang baboledi go tsaya bobulatsela jo bo thusang mo dikgweding tse di tlang?
11 Bagolwane ba le bantsi ba dira dithulaganyo tse di tlhokegang gore ba nne le seabe mo mofuteng ono o o kgethegileng wa tirelo. (Baheb. 13:7) Ruri seno se kgothatsa phuthego! Gape bagolwane ba kgothatsa ba bangwe fa ba tlotla le bone. Bangwe ba ka tswa ba tlhoka go kgothadiwa ka mafoko a sekae fela kgotsa go newa dikakantsho dingwe tse di mosola gore ba tseye bobulatsela jo bo thusang. Gongwe molebedi wa tirelo o tla rulaganya dipokano tse di oketsegileng tsa tirelo ya tshimo gore botlhe ba nne le seabe mo go neeleng bosupi ka setlhopha, tota le morago ga sekolo kgotsa tiro. Go tshwanetse ga dirwa kitsiso ka dithulaganyo tseno ka metlha. Gape o tla tlhomamisa gore botlhe ba na le tshimo le dibuka tse di lekaneng.
12. Ke eng se o ka kgonang go se dira fa o sa kgone go tsaya bobulatsela jo bo thusang?
12 Le fa maemo a go thibela go tsaya bobulatsela jo bo thusang, o ka kgothatsa ba ba ikwadisang, mme o ka ba rapelela. (Dia. 25:11; Bakol. 4:12) Gongwe o ka nna wa kgona go dira dithulaganyo tsa go bereka le bone mo bodireding ka letsatsi lengwe mo gare ga beke kgotsa go bereka nako e telele go feta jaaka o tlwaetse go bereka.
13. Diphuthego tse di kafa tlase ga lekala la Afrika Borwa di tlhometswe mokgele ofe, mme phuthego ya lona e ka thusa jang mo go o fitlheleleng?
13 Mokgele wa Babulatsela ba ba Thusang ba le 14 000 ka April: Palo e e di fetang tsotlhe ya babulatsela ba ba thusang mo dinageng tse di kafa tlase ga lekala la Afrika Borwa e ne e le 11 214. (Botswana 270, Lesotho 326, Namibia 183, South Africa 10 126, St. Helena 18 le Swaziland 291) Ka jalo, mokgele o re ipeetseng one o re ka kgonang go o fitlhelela mo kgweding e e tlang ya April ke babulatsela ba ba thusang ba le 14 000. (Botswana 275, Lesotho 550, Namibia 250, South Africa 12 480, St. Helena 20 le Swaziland 425) Re ka fitlhelela palo eno fa mmoledi a le mongwe mo go ba le barataro mo phuthegong nngwe le nngwe a ka tsenela tiro ya bobulatsela jo bo thusang. Gone mme, diphuthego dingwe di tla nna le baboledi ba ba oketsegileng ba maemo a bone a ba letlang go tsaya bobulatsela jo bo thusang. Mokgele ono wa phuthego go motlhofo gore diphuthego di le dintsi di o fitlhelele. A o ko o akanye fela ka boitumelo jo bo tla nnang teng mo phuthegong ya lona le matswela a a molemo a a tla nnang teng mo tirong ya go rera mo tshimong ya lona!
14. Ke ka ntlha yang fa April e le kgwedi e e molemo ya go tsaya bobulatsela jo bo thusang?
14 Ke ka ntlha yang fa April e le kgwedi e e siameng ya go tsaya bobulatsela jo bo thusang? Segopotso se tla nna fa kgwedi e simolola, mme seno se tla re naya nako e ntsi ya go dira maeto a go boela mo bathong ba ba neng ba tlile mo go sone. Re tla bo re tsamaisa dimakasine ka boikaelelo jwa go tsamaisa buka ya Baebele e Ruta Eng? fa re dira maeto a go boela le go simolola dithuto tsa Baebele. Ka April 14 re tla nna le Letsatsi le le kgethegileng la Dimakasine mo Afrika Borwa le mo dinageng tse di gaufi. Ka jalo, go tsaya bobulatsela jo bo thusang ka April go tla dira gore go nne le ditshono di le dintsi tsa go simolola dithuto tsa Baebele. Ka April maemo a bosa gantsi a itekanetse. Mo godimo ga moo, kgwedi ya April e na le Disontaga di le tlhano le letsatsi la boikhutso la lefatshe, mme seno se dira gore go nne motlhofo gore batho ba ba berekang le ba ba tsenang sekolo ba ikwadise.
15. Ke ka ntlha yang fa re tshwanetse go dira dilo ka tlhoafalo jaaka paka eno ya Segopotso e ntse e atamela?
15 Paka nngwe le nngwe ya Segopotso e e fetang e re atametsa gaufi le bofelo jwa tsamaiso eno ya dilo. Nako e e setseng ya go bolelela ba bangwe ka Modimo wa rona yo Mogolo e khutshwafetse. (1 Bakor. 7:29) Fa paka eno ya Segopotso e setse e fetile, ditshono tse di molemolemo tse e re nayang tsone go galaletsa Rraarona wa selegodimo di tla bo di fetetse ruri. E kete re ka dira dithulaganyo gone jaanong gore re dire bojotlhe jwa rona ka March, April le May go bolela dinonofo tse di molemolemo tsa ga Jehofa gongwe le gongwe!
[Box on page 4]
A re Ka Nna le Babulatsela ba le 14 000 ka April?
◼ Sekaseka dilo tsa botlhokwa tse o di bayang kwa pele
◼ Tlotlang ka mekgele ya lona jaaka lelapa
◼ Tlotla le ba bangwe ka dithulaganyo tsa gago