Kafa o ka Simololang Dithuto ka Gone ka Buka ya Baebele e Ruta Eng?

Bontsi jwa rona re ka itumelela go tshwara thuto ya Baebele fa fela re ka kgona go e simolola. Buka e ntšha ya Totatota Baebele e Ruta Eng? e ka re thusa. Ketapele e e mo tsebeng ya 3-7 e diretswe go go thusa go dira gore mong wa ntlo a tlotle le wena ka Baebele lo dirisa buka eno. Tota le batho ba ba se nang maitemogelo a a kalo mo bodireding ba tla fitlhela go le motlhofo go dirisa buka eno go simolola dithuto.

◼ O ka nna wa leka mokgwa ono o dirisa tsebe 3:

Fa o sena go umaka kgang nngwe kgotsa bothata jo bo amang batho ba mo tshimong ya lona, bontsha mong wa ntlo dipotso tse di kwadilweng ka mokwalo o mokima mo tsebeng ya 3, mme o mmotse gore o ne a ka reng go araba dipotso tseno. Morago ga moo bula tsebe 4-5.

◼ Kgotsa o ka nna wa batla go simolola ka go buelela tsebe 4-5:

O ka nna wa re, “A go ne go ka se nne molemo fa dilo di ne di ka nna jaaka di tshwantshitswe fano?” Kgotsa o ka nna wa botsa jaana, “Mo dilong tse re di solofediwang mono ke sefe se o neng o ka rata go bona se diragadiwa?” Reetsa ka kelotlhoko fa a araba.

Fa mong wa ntlo a bontsha gore o kgatlhegela thata nngwe ya ditemana, mmontshe se Baebele e se rutang ka kgang eo ka go sekaseka dirapa mo bukeng eno tse di tlotlang ka temana eo. (Bona lebokoso mo tsebeng eno ya tsenyeletso.) Tlotla ka dintlha tseno ka tsela e o neng o ka dira ka yone fa o tshwere thuto ya Baebele. Seno se ka dirwa ka metsotso e le metlhano go ya go e le lesome mo loetong lwa ntlha o le fa kgorong.

◼ Tsela e nngwe ke go dira gore motho a ntshe maikutlo a gagwe ka go dirisa tsebe 6:

Bontsha mong wa ntlo dipotso tse di kwa tlase mo tsebeng eno, mme o mmotse jaana, “A o kile wa ipotsa nngwe ya dipotso tseno?” Fa a kgatlhegela nngwe ya dipotso tseno, bula mo dirapeng tse di arabang potso eo mo bukeng. (Bona lebokoso mo tsebeng eno ya tsenyeletso.) Fa lo sekaseka tshedimosetso eno mmogo, o tshwere thuto ya Baebele.

◼ Go ka nna ga dirisiwa tsebe 7 go bontsha gore thuto ya Baebele e tshwarwa jang:

Bala mela ya ntlha e meraro mo tsebeng eno, o bo o ya kwa kgaolong 3 o bo o bontsha gore thuto e tshwarwa jang o dirisa serapa 1-3. Rulaganya go boa go tla go tlotla ka dikarabo tsa dipotso tse di mo serapeng sa 3.

◼ Kafa o ka rulaganyang go boela ka gone:

Fa o konela thuto ya ntlha, dira dithulaganyo tsa go tsweletsa motlotlo pele. O ka nna wa re fela: “Mo metsotsong e le mmalwa fela, re ithutile se Baebele e se rutang ka kgang eno e e botlhokwa. Mo nakong e e latelang, re tla tlotla [mmontshe potso e lo tla tlotlang ka yone]. A nka tla ka yone nako e beke e e tlang?”

Jaaka fa re atamela nako e e tlhomilweng ya ga Jehofa, Jehofa o tswelela a re tlhomelela go dira tiro e re tshwanetseng go e dira. (Math. 28:19, 20; 2 Tim. 3:17) A re diriseng sedirisiwa seno se sesha se se kgatlhang ka botlalo go simolola dithuto tsa Baebele.

Kafa o ka Tsamaisang Buka ya Baebele e Ruta Eng? ka Gone

Tsenyeletso eno e na le dikakantsho di le mmalwa tsa go tsamaisa buka ya Baebele e Ruta Eng? Fa o batla go atlega mo go tsone, di bue ka mafoko a gago, o dire gore puisano ya gago e tshwanele batho ba mo tshimong ya lona, mme o itse dintlha tse o ka di buelelang mo bukeng eno. Go ka nna ga dirisiwa le dipuisano tse dingwe tse di tshwanelang tshimo ya lona.—Bona Tirelo ya Rona ya Bogosi ya January 2005, ts. 8.

Haramagedona

◼ “Fa batho ba utlwa lefoko ‘Haramagedona,’ ba le bantsi ba akanya ka go bolawa ga batho ba le bantsintsi. A o ne o itse gore mme tota Haramagedona ke sengwe se re ka eletsang gore se tle? [Mo letle gore a arabe. Morago ga moo bala Tshenolo 16:14, 16.] Ela tlhoko se buka eno e se buang fa e bontsha gore botshelo bo tla bo bo ntse jang morago ga Haramagedona.” Bula tsebe 82-4, mme o bale serapa 21.

Baebele

◼ “Gantsi batho ba re Baebele ke Lefoko la Modimo. A o kile wa ipotsa gore go ka buiwa jang ga twe buka eno e e kwadilweng ke batho ke Lefoko la Modimo? [Mo letle gore a arabe. Morago ga moo bala 2 Petere 1:21 le serapa 5 mo tsebeng ya 19.] Buka eno e araba dipotso tseno ka Baebele.” Mmontshe dipotso tse di mo tsebeng ya 6.

◼ “Gompieno, batho ba kgona go bona tshedimosetso e ntsi go feta le fa e le leng pele. Mme o akanya gore re ka bona kae kgakololo e e molemo e e ka re thusang go tshela botshelo jo bo itumedisang le jo bo atlegileng? [Mo letle gore a arabe. Morago ga moo bala 2 Timotheo 3:16, 17 le serapa 12 mo tsebeng ya 22.] Buka eno e tlhalosa kafa re ka tshelang ka gone ka tsela e e itumedisang Modimo le e e re solegelang molemo.” Mmontshe tšhate le setshwantsho se se mo tsebeng ya 122-3.

Loso/Tsogo

◼ “Batho ba le bantsi ba ipotsa gore tota go direga eng fa re swa. A o akanya gore go a kgonega gore re itse? [Mo letle gore a arabe. Morago ga moo bala Moreri 9:5 le serapa 5-6 mo tsebeng ya 58.] Gape buka eno e tlhalosa gore tsholofetso ya Baebele ya gore go tla nna le tsogo ya baswi e tla kaya eng ka batho ba ba suleng.” Mmontshe setshwantsho se se mo tsebeng ya 75.

◼ “Fa motho yo re mo ratang a swa, ke selo sa tlholego fela gore re batle go mmona gape. A ga go jalo? [Mo letle gore a arabe.] Batho ba le bantsi ba gomoditswe ke se Baebele e se solofetsang ka tsogo ya baswi. [Bala Johane 5:28, 29 le serapa 16-17 mo tsebeng ya 72.] Gape kgaolo eno e araba dipotso tseno.” Mmontshe dipotso tse di simololang mo tsebeng ya 66.

Botshelo Jo bo Sa Khutleng

◼ “Batho ba le bantsi ba eletsa go nna le botsogo jo bo molemo le go tshela lobaka lo loleele. Mme gone, fa go ne go kgonega, a o ne o ka rata go tshelela ruri? [Mo letle gore a arabe. Morago ga moo bala Tshenolo 21:3, 4 le serapa 17 mo tsebeng ya 54.] Buka eno e tlhalosa kafa re ka bonang botshelo jo bo sa khutleng ka gone le gore botshelo bo tla nna jang fa tsholofetso eo e diragadiwa.”

Lelapa

◼ “Rotlhe re batla go nna le botshelo jo bo itumedisang jwa lelapa. A ga go jalo? [Mo letle gore a arabe.] Baebele e tlhalosa se mongwe le mongwe mo lelapeng a ka se dirang go dira gore lelapa e nne le le itumetseng—go etsa Modimo mo go bontsheng lorato.” Bala Baefeso 5:1, 2 le serapa 4 mo tsebeng ya 135.

Matlo

◼ “Mo mafelong a le mantsi, go boima go bona lefelo le le siameng la bonno le le sa tureng. A o akanya gore go tla tsamaya go nna le letsatsi lengwe le go tla nnang le matlo a a lekaneng gore batho botlhe ba nne le mo ba nnang teng? [Mo letle gore a arabe. Morago ga moo bala Isaia 65:21, 22 le serapa 20 mo tsebeng ya 34.] Buka eno e tlhalosa kafa tsholofetso eno ya Modimo e tla diragadiwang ka gone.”

Jehofa Modimo

◼ “Batho ba le bantsi ba ba dumelang mo Modimong ba ka rata go atamalana le ene. A o ne o itse gore Baebele e re kgothaletsa gore re atamalane le ene? [Mo letle gore a arabe. Morago ga moo bala Jakobe 4:8a le serapa 20 mo tsebeng ya 16.] Buka eno e diretswe go thusa batho go ithuta go le gontsi ka Modimo, ba dirisa Baebele ya bone.” Mmontshe dipotso tse di simololang mo tsebeng ya 8.

◼ “Batho ba le bantsi ba rapelela gore leina la Modimo le itshepisiwe kgotsa le tlotlwe. A o kile wa ipotsa gore leina leo ke mang? [Mo letle gore a arabe. Morago ga moo bala Pesalema 83:18 le serapa 2-3 mo tsebeng ya 195.] Buka eno e tlhalosa se Baebele e se rutang ka Jehofa Modimo le se a se ikaeletseng ka batho.”

Jesu Keresete

◼ “Batho mo lefatsheng lotlhe ba kile ba utlwa ka Jesu Keresete. Bangwe ba re e ne e le motho fela yo o tlhomologileng. Ba bangwe ba a mo obamela ba re ke Modimo Mothatayotlhe. A o akanya gore se re se dumelang ka Jesu Keresete se botlhokwa?” Mo letle gore a arabe. Morago ga moo bala Johane 17:3 le serapa 3 mo tsebeng ya 37. Mmontshe dipotso tse di simololang tse di kafa tlase ga setlhogo sa kgaolo eno.

Thapelo

◼ “A o kile wa ipotsa gore Modimo o araba dithapelo jang? [Mo letle gore a arabe. Morago ga moo bala 1 Johane 5:14, 15 le serapa 16-18 mo tsebeng ya 170-1.] Kgaolo eno e tlhalosa gape gore ke ka ntlha yang fa re tshwanetse go rapela Modimo le gore re tshwanetse go dira eng gore a re utlwe.”

Bodumedi

◼ “Batho ba le bantsi ba simolola go leba madumedi a lefatshe e le one a a bakang mathata a batho go na le gore a a rarabolole. A o akanya gore bodumedi bo kaela batho kwa tseleng e e siameng? [Mo letle gore a arabe. Morago ga moo bala Mathaio 7:13, 14 le serapa 5 mo tsebeng ya 145.] Kgaolo eno e tlotla ka dikarolo tse thataro tse di tlhaolang kobamelo e Modimo a e amogelang.” Mmontshe lenaane le le mo tsebeng ya 147.

Masetlapelo/Pogo

◼ “Fa go nna le masetlapelo, batho ba le bantsi ba ipotsa gore a tota Modimo o amega ka batho le gore a o bona tsela e ba bogang ka yone. A o kile wa ipotsa jalo? [Mo letle gore a arabe. Morago ga moo bala 1 Petere 5:7 le serapa 11 mo tsebeng ya 11.] Buka eno e tlhalosa kafa Modimo a tla tlosang pogo yotlhe ya batho ka gone.” Mmontshe dipotso tse di simololang mo tsebeng ya 106.

Dintwa/Kagiso

◼ “Batho gongwe le gongwe ba eletsa gore go nne le kagiso. A o akanya gore go solofela kagiso mo lefatsheng ke toro fela? [Mo letle gore a arabe. Morago ga moo bala Dipesalema 46:8, 9.] Buka eno e tlhalosa kafa Modimo a tla diragatsang se a se ikaeletseng ka gone le go tlisa kagiso ya lefatshe lotlhe.” Mmontshe setshwantsho se se mo tsebeng ya 35 mme o tlotle le ene ka serapa 17-21 mo tsebeng ya 33-4.

[Box on page 5]

Ditsela Tsa go Umaka Thulaganyo ya Moneelo

“Fa e le gore gompieno jaana o ka rata go ntsha moneelo o monnye go tshegetsa tiro ya rona ya lefatshe lotlhe, nka o itumelela.”

“Le fa re sa rekise dibuka tsa rona, re amogela meneelo e e ntshediwang tiro ya rona ya lefatshe lotlhe.”

“O ka ne o ipotsa gore re kgona jang go dira tiro eno. Ke ka gonne tiro ya rona ya lefatshe lotlhe e tshegediwa ka meneelo e e ntshiwang ka go rata. Fa o rata go ntsha moneelo o monnye, nka o itumelela.”

(1) Potso, (2) Temana, le (3) Kgaolo

Tsela e e motlhofo ya go tsamaisa buka ya Totatota Baebele e Ruta Eng? ke go (1) botsa potso e e tla dirang gore motho a tlhalose maikutlo a gagwe, (2) go bala temana e e tshwanelang, le (3) go bontsha mong wa ntlo kgaolo e e tlotlang ka setlhogo seo mo bukeng ka go bala dipotso tse di simololang tse di kafa tlase ga setlhogo sa kgaolo eo. Fa mong wa ntlo a kgatlhega, o ka nna wa mmontsha kafa thuto ya Baebele e tshwarwang ka gone o dirisa dirapa tse di simololang tsa kgaolo eo. Go ka nna ga dirisiwa mokgwa ono go simolola thuto fa o dira loeto lwa ntlha kgotsa loeto lwa go boela.

◼ “A o akanya gore go a kgonega gore batho ba e seng ba sepe fela ba itse Mmopi wa rona yo o maatla, jaaka go bontshiwa mono mo Baebeleng?” Bala Ditiro 17:26, 27, mme o mo letle gore a arabe. Morago ga moo buelela kgaolo 1.

◼ “Fa motho a akanya ka mathata a re lebanang le one gompieno, a o akanya gore go a kgonega go bona kgomotso le tsholofelo tse di tlhalosiwang fano?” Bala Baroma 15:4, mme o mo letle gore a arabe. Morago ga moo buelela kgaolo 2.

◼ “Fa o ne o na le maatla a go dira jalo, a o ne o tla tlisa diphetogo tseno?” Bala Tshenolo 21:4, mme o mo letle gore a arabe. Morago ga moo buelela kgaolo 3.

◼ “A o akanya gore bana ba rona ba tla tsamaya ba itumelela maemo a a tlhalositsweng mo pineng eno ya bogologolo?” Bala Pesalema 37:10, 11 mme o mo letle gore a arabe. Morago ga moo buelela kgaolo 3.

◼ “A o akanya gore maemo a a tlhalosiwang fano a tla tsamaya a direga?” Bala Isaia 33:24, mme o mo letle gore a arabe. Morago ga moo buelela kgaolo 3.

◼ “A o kile wa ipotsa gore a baswi ba itse se batshedi ba se dirang?” Mo letle gore a arabe. Morago ga moo bala Moreri 9:5 mme o buelele kgaolo 6.

◼ “A o akanya gore go ka direga gore letsatsi lengwe re boe re bone baratiwa ba rona ba ba suleng, jaaka Jesu a tlhalositse mo ditemaneng tseno?” Bala Johane 5:28, 29, mme o mo letle gore a arabe. Morago ga moo buelela kgaolo 7.

◼ “O akanya gore go tshwanetse ga diregang gore thato ya Modimo e dirwe mo lefatsheng jaaka e dirwa kwa legodimong, jaaka go umakilwe mo thapelong eno e e itsegeng?” Bala Mathaio 6:9, 10, mme o mo letle gore a arabe. Morago ga moo buelela kgaolo 8.

◼ “A o akanya gore re tshela mo nakong e e tlhalosiwang mo boporofeting jono?” Bala 2 Timotheo 3:1-4, mme o mo letle gore a arabe. Morago ga moo buelela kgaolo 9.

◼ “Batho ba le bantsi ba ipotsa gore ke ka ntlha yang fa mathata a batho a bonala a nnela maswe go ya pele. A o kile wa akanya gore gongwe ke ka ntlha ya seno?” Bala Tshenolo 12:9, mme o mo letle gore a arabe. Morago ga moo buelela kgaolo 10.

◼ “A o kile wa batla go itse karabo ya potso e e tshwanang le eno?” Bala Jobe 21:7, mme o mo letle gore a arabe. Morago ga moo buelela kgaolo 11.

◼ “A o akanya gore go dirisa kgakololo eno e e tswang mo Baebeleng go tla thusa batho go itumelela botshelo jo bo itumetseng jwa lelapa?” Bala Baefeso 5:33, mme o mo letle gore a arabe. Morago ga moo buelela kgaolo 14.

Thuto ya Baebele e ka begwa fa e tshwerwe makgetlho a le mabedi fa go sena go bontshiwa gore thuto e tshwarwa jang e bile fa o akanya gore thuto e tla tswelela pele.