Kafa o ka Simololang Dithuto ka Gone ka Buka ya Baebele e Ruta Eng?
Bontsi jwa rona re ka itumelela go tshwara thuto ya Baebele fa fela re ka kgona go e simolola. Buka e ntšha ya Totatota Baebele e Ruta Eng? e ka re thusa. Ketapele e e mo tsebeng ya 3-7 e diretswe go go thusa go dira gore mong wa ntlo a tlotle le wena ka Baebele lo dirisa buka eno. Tota le batho ba ba se nang maitemogelo a a kalo mo bodireding ba tla fitlhela go le motlhofo go dirisa buka eno go simolola dithuto.
◼ O ka nna wa leka mokgwa ono o dirisa tsebe 3:
Fa o sena go umaka kgang nngwe kgotsa bothata jo bo amang batho ba mo tshimong ya lona, bontsha mong wa ntlo dipotso tse di kwadilweng ka mokwalo o mokima mo tsebeng ya 3, mme o mmotse gore o ne a ka reng go araba dipotso tseno. Morago ga moo bula tsebe 4-5.
◼ Kgotsa o ka nna wa batla go simolola ka go buelela tsebe 4-5:
O ka nna wa re, “A go ne go ka se nne molemo fa dilo di ne di ka nna jaaka di tshwantshitswe fano?” Kgotsa o ka nna wa botsa jaana, “Mo dilong tse re di solofediwang mono ke sefe se o neng o ka rata go bona se diragadiwa?” Reetsa ka kelotlhoko fa a araba.
Fa mong wa ntlo a bontsha gore o kgatlhegela thata nngwe ya ditemana, mmontshe se Baebele e se rutang ka kgang eo ka go sekaseka dirapa mo bukeng eno tse di tlotlang ka temana eo. (Bona lebokoso mo tsebeng eno ya tsenyeletso.) Tlotla ka dintlha tseno ka tsela e o neng o ka dira ka yone fa o tshwere thuto ya Baebele. Seno se ka dirwa ka metsotso e le metlhano go ya go e le lesome mo loetong lwa ntlha o le fa kgorong.
◼ Tsela e nngwe ke go dira gore motho a ntshe maikutlo a gagwe ka go dirisa tsebe 6:
Bontsha mong wa ntlo dipotso tse di kwa tlase mo tsebeng eno, mme o mmotse jaana, “A o kile wa ipotsa nngwe ya dipotso tseno?” Fa a kgatlhegela nngwe ya dipotso tseno, bula mo dirapeng tse di arabang potso eo mo bukeng. (Bona lebokoso mo tsebeng eno ya tsenyeletso.) Fa lo sekaseka tshedimosetso eno mmogo, o tshwere thuto ya Baebele.
◼ Go ka nna ga dirisiwa tsebe 7 go bontsha gore thuto ya Baebele e tshwarwa jang:
Bala mela ya ntlha e meraro mo tsebeng eno, o bo o ya kwa kgaolong 3 o bo o bontsha gore thuto e tshwarwa jang o dirisa serapa 1-3. Rulaganya go boa go tla go tlotla ka dikarabo tsa dipotso tse di mo serapeng sa 3.
◼ Kafa o ka rulaganyang go boela ka gone:
Fa o konela thuto ya ntlha, dira dithulaganyo tsa go tsweletsa motlotlo pele. O ka nna wa re fela: “Mo metsotsong e le mmalwa fela, re ithutile se Baebele e se rutang ka kgang eno e e botlhokwa. Mo nakong e e latelang, re tla tlotla [mmontshe potso e lo tla tlotlang ka yone]. A nka tla ka yone nako e beke e e tlang?”
Jaaka fa re atamela nako e e tlhomilweng ya ga Jehofa, Jehofa o tswelela a re tlhomelela go dira tiro e re tshwanetseng go e dira. (Math. 28:19, 20; 2 Tim. 3:17) A re diriseng sedirisiwa seno se sesha se se kgatlhang ka botlalo go simolola dithuto tsa Baebele.
[Box on page 3]
Fa go Tlotlwa ka Ditemana Tse di mo Tsebeng ya 4-5
◻ Tshenolo 21:4 (ts. 27-8, ser. 1-3)
◻ Isaia 33:24; 35:5, 6 (ts. 36, ser. 22)
◻ Johane 5:28, 29 (ts. 72-3, ser. 17-19)
◻ Pesalema 72:16 (ts. 34, ser. 19)
Dikarabo Tsa Dipotso Tse di mo Tsebeng ya 6
◻ Ke ka ntlha yang fa re boga? (ts. 108-9, ser. 6-8)
◻ Re ka lebana jang le ditlhobaelo tsa botshelo? (ts. 184-5, ser. 1-3)
◻ Re ka dira jang gore botshelo jwa lelapa la rona e nne jo bo itumedisang le go feta? (ts. 142, ser. 20)
◻ Go direga eng ka rona fa re swa? (ts. 58, ser. 5-6)
◻ A re tla boa gape re bona baratiwa ba rona ba ba suleng? (ts. 72, ser. 17-19)
◻ Re ka tlhomamisega jang gore Modimo o tla diragatsa ditsholofetso tsa gagwe tsa mo isagweng? (ts. 24, ser. 17)