Tsela ya go Dira Patlisiso

KGOSI SOLOMONE o ne “a tlhatlhanya a bo a batla ka botlalo, gore a tle a beye diane tse dintsi ka thulaganyo.” Ka ntlha yang? Ka gonne o ne a batla go kwala “mafoko a a nepileng a boammaaruri.” (Mor. 12:9, 10) Luke o “latedisitse dilo tsotlhe ka tlhomamo go tswa kwa tshimologong” gore a tle a kgone go bolela ditiragalo tsa botshelo jwa ga Keresete ka tatelano. (Luke 1:3) Batlhanka bano ba Modimo ka bobedi ba ne ba dira patlisiso.

Patlisiso ke eng? Ke go batla tshedimosetso nngwe e e amanang le kgang nngwe ka kelotlhoko. E akaretsa go bala, e bile e batla gore go dirisiwe melaometheo ya fa o ithuta. Gape e ka akaretsa go botsolotsa batho.

Ke maemo afe a a batlang gore go dirwe patlisiso? Dikai di le mmalwa ke tseno. Go ithuta ga gago ka namana kgotsa go bala Baebele go ka tsosa dipotso tse di botlhokwa mo go wena. Mongwe yo o mo neelang bosupi a ka nna a botsa potso e o tla ratang gore o nne le tshedimosetso e e maleba ka yone gore o mo arabe. O ka tswa o abetswe go neela puo.

Akanya ka kabelo eno ya go neela puo. Dintlha tse o abetsweng go bua ka tsone di ka nna tsa lebega e le dintlha fela tse di akaretsang. O ka di dirisa jang mo lefelong la ga lona? Di tsenye mooko ka go dira patlisiso. Fa go na le dipalopalo dingwe tse o ka di tlhagisang go tshegetsa puo ya gago kgotsa sekai sengwe se se tshwanelang puo ya gago e bile se ama matshelo a bareetsi ba gago, ntlha e e neng e lebega e le e e tlwaelegileng fela e fetoga go nna e e rutang, e bile e le e e tlhotlheletsang. Dintlha tse di gatisitsweng tse o di dirisang di ka tswa di kwaletswe babadi mo lefatsheng lotlhe, mme o tshwanetse go di godisa, go di tlhalosa sentle ka phepafalo, o bo o di dirise mo phuthegong e le nngwe kgotsa mo mothong a le mongwe. O tshwanetse go dira seno jang?

Pele ga o simolola go dira patlisiso, akanya ka bareetsi ba gago. Ke eng se ba tla bong ba setse ba se itse? Ke eng se ba tlhokang go se itse? Morago ga moo leba gore mokgele wa gago ke ofe. A ke go tlhalosa? go ba tlhatswa pelo? go supa fa kgang nngwe e se boammaaruri? kgotsa go ba tlhotlheletsa? Go tlhalosa go batla gore o ba neye tshedimosetso e e oketsegileng gore kgang e utlwale sentle. Le mororo dintlha tsa konokono di ka tswa di tlhaloganngwa, o ka nna wa tlhoka go tlhalosa gore se o se bolelang se tshwanetse go dirwa leng kgotsa jang. Go ba tlhatswa pelo go batla gore o ntshe mabaka a gore ke ka ntlha yang fa selo seo se ntse jalo, o bo o ntshe le bosupi. Go supa fa kgang nngwe e se boammaaruri go batla gore o bo o itse dikgang ka bobedi jwa tsone sentle le go sekaseka ka kelotlhoko bosupi jo bo dirisiwang. Ke boammaaruri gore se re se batlang ga se go ntsha fela mabaka a a nonofileng thata mme re batla ditsela tsa go tlhalosa dintlha ka mokgwa o o bonolo. Go tlhotlheletsa go akaretsa go fitlhelela pelo. Go raya go tlhotlheletsa bareetsi ba gago le go dira gore ba eletse go dira tumalanong le se go tlotliwang ka sone. Dikai tsa mmatota tsa batho ba ba tsereng kgato e e ntseng jalo, le fa ba ne ba lebane le mathata, di ka go thusa go fitlhelela pelo.

A jaanong o siametse go simolola? Nnyaa, e seng jaanong. Leka go bona gore o tlhoka tshedimosetso e e kana kang. Nako e ka tswa e le botlhokwa. Fa e le gore o tlile go neela tshedimosetso eno mo bathong ba bangwe, o tla bo o na le nako e e kana kang ya go dira jalo? A ke metsotso e le metlhano? Metsotso e le 45? A go lekanyeditswe nako, jaaka kwa dipokanong tsa phuthego kgotsa a ke nako e e sa lekanyediwang, jaaka fa o tshwere thuto ya Baebele kgotsa mo loetong lwa bodisa?

Sa bofelo, o na le didirisiwa dife tsa go dira patlisiso? Mo godimo ga tse o nang le tsone kwa gae, a go na le tse dingwe gape mo laeboraring ya kwa Holong ya lona ya Bogosi? A bakaulengwe ba ba feditseg dingwaga di le dintsi ba direla Jehofa ba tla go letla gore o dirise didirisiwa tsa bone tsa go dira patlisiso? A go na le laeborari e e dirisiwang ke botlhe mo lefelong la lona e motho a ka dirisang dibuka tsa yone tsa ditshupiso fa go tlhokega?

Go Dirisa Sedirisiwa sa Rona se se Botlhokwatlhokwa go Batlisisa—Baebele

Fa e le gore patlisiso ya gago e akaretsa go batla bokao jwa temana, simolola ka Baebele ka boyone.

Sekaseka Kgang Yotlhe e o Balang ka Yone. Ipotse jaana: ‘Mafoko ano a ne a buiwa le mang? Ditemana tse di dikologileng di supa eng ka maemo a a dirileng gore go buiwe se se builweng kgotsa ka maikutlo a batho ba go buiwang ka bone ba nang le one?’ Gantsi dintlha tse di ntseng jalo di ka re thusa go tlhaloganya temana, e bile gape di ka tsenya botshelo mo puong e o ka nnang wa di dirisa mo go yone.

Ka sekai, Bahebera 4:12 e nopolwa gantsi go bontsha maatla a Lefoko la Modimo le nang le one a go ama dipelo tsa batho le go tlhotlheletsa matshelo a bone. Ditemana tse di e dikologileng di re thusa go anaanela botokanyana gore seo se ntse jalo jang. Di tlotla ka se se neng sa diragalela Baiseraele dingwaga di le 40 ba le mo gare ga naga pele ba tsena mo lefatsheng le Jehofa a neng a le solofeditse Aborahame. (Baheb. 3:7–4:13) “Lefoko la Modimo,” tsholofetso ya gagwe ya go ba tlisa mo lefelong la boikhutso tumalanong le kgolagano ya gagwe e a e dirileng le Aborahame, le ne le sa swa; le ne le tshela e bile le tlile go diragadiwa. Baiseraele ba ne ba na le mabaka a a utlwalang a go le dumela. Le fa go ntse jalo, jaaka fa Jehofa a ne a ba etelela pele go tswa Egepeto go ya kwa Thabeng ya Sinai le go tswela pele go ya kwa Nageng e e Solofeditsweng, ba ne ba nna ba bontsha go tlhoka tumelo gangwe le gape. Ka jalo, se se neng se le mo dipelong tsa bone se ne sa bonadiwa ke tsela e ba neng ba itshwara ka yone malebana le tsela e Modimo a neng a diragatsa Lefoko la gagwe ka yone. Ka tsela e e tshwanang, mo motlheng wa rona lefoko la Modimo la tsholofetso le senola se se leng mo dipelong tsa batho.

Leba Ditemana Tse o Kaelwang go ya Kwa go Tsone. Dibaebele dingwe di na le ditemana tse o kaelwang go ya kwa go tsone gore o bone tshedimosetso e e oketsegileng. A ya gago e na le tsone? Fa e le gore e na le tsone, di ka go thusa. Leba sekai se se mo Baebeleng ya Thanolo ya Lefatshe le Lesha ya Dikwalo Tse di Boitshepo. Petere wa Ntlha 3:6 e bua ka Sara e re ke sekai se se tshwanetseng go ediwa ke basadi ba ba nyetsweng ba Bakeresete. Temana e re kaelwang kwa go yone ya Genesise 18:12 e tshegetsa seo ka go bolela gore Sara o ne a bitsa Aborahame morena “kafa teng.” Ka jalo, o ne a ikokobetsa go tswa pelong. Mo godimo ga gore di go neye tshedimosetso eno, ditshupiso tseno di ka nna tsa go isa kwa ditemaneng tse di bontshang go diragadiwa ga boporofeti jwa Baebele kgotsa ga kgolagano ya Molao. Le fa go ntse jalo, o gakologelwe gore ditshupiso dingwe ga di a direlwa go go naya ditlhaloso tse di ntseng jalo. Di ka nna tsa go isa fela kwa ditemaneng tse di nang le kgang e e tshwanang le e o balang ka yone kgotsa kwa tshedimosetsong e e kaga botshelo jwa motho yo o balang ka ene kgotsa naga e o balang ka yone.

Dira Patlisiso ka Khonkhodense ya Baebele. Khonkhodense ya Baebele ke kaedi ya mafoko a a dirisitsweng mo Baebeleng mme a beilwe go ya ka tatelano ya ditlhaka. E ka go thusa go bona ditemana tse di amanang le kgang e o e batlisisang. Fa o ntse o e sekaseka, o tla ithuta dintlha tse dingwe gape tse di mosola. O tla bona bosupi jwa “sekao” sa boammaaruri jo bo tlhalosiwang mo Lefokong la Modimo. (2 Tim. 1:13) Thanolo ya Lefatshe le Lesha e na le lenaane la konokono la “Kaedi ya Mafoko a Baebele.” Comprehesive Concordance yone e na le tshedimosetso e ntsinyana. Fa e le gore e teng ka puo ya lona, e tla go isa kwa ditemaneng tsotlhe tse di nang le lefoko lengwe le lengwe la mafoko a konokono a a mo Baebeleng.

Go Ithuta go Dirisa Didirisiwa Tse Dingwe Tsa go Dira Patlisiso

Lebokoso le le mo tsebeng ya 33 le na le lenaane la didirisiwa tse dingwe tsa go dira patlisiso tse di tlhagisitsweng ke “motlhanka yo o boikanyego le yo o botlhale.” (Math. 24:45-47) Bontsi jwa tsone di na le tsebe ya diteng, mme di le dintsi tsa tsone di na le kaedi ya mafoko ka kwa morago, e e diretsweng go go thusa go bona tshedimosetso e e maleba. Kwa bofelong jwa ngwaga mongwe le mongwe, go gatisiwa dikaedi tsa ditlhogo tsa ngwaga oo mo makasineng wa Tora ya Tebelo le Tsogang!

Fa o tlwaelane le mofuta wa tshedimosetso e e leng mo dikgatisong tseno tse di re thusang go ithuta Baebele, seno se ka akofisa tsela e o dirang patlisiso ka yone. Ka sekai, a re re o batla go itse ka boporofeti, thuto nngwe, boitsholo jwa Bokeresete, kgotsa gore melaometheo mengwe ya Baebele e dira jang. Go ka direga gore Tora ya Tebelo e tla nna le se o se batlang. Tsogang! e tlotla ka ditiragalo tsa bosheng, mathata a gone jaanong, bodumedi, saense le batho ba dinaga tse di farologaneng. Mo bukeng ya Monna Yo Mogolo go Gaisa Botlhe Ba Ba Kileng Ba Tshela go na le ditlhaloso tsa pego nngwe le nngwe ya Diefangele ka tatelano ya tsone. Mo dibukeng tse di jaaka Tshenolō—Konelo ya Yone e e Molemolemo e Atametse! le Ela Tlhoko Boporofeti Jwa ga Daniele!, le dibolumo tse pedi tsa Boporofeti Jwa ga Isaia—Lesedi la Batho Botlhe, go tlotliwa ka dibuka tseno tsa Baebele temana ka temana. Mo bukeng ya Go Fetolana ka Dikwalo, o tla bona dikarabo tse di kgotsofatsang tsa dipotso di le makgolokgolo tsa Baebele tse gantsi di bodiwang ke batho mo tshimong. Gore o tlhaloganye ditumelo tse dingwe sentle, dithuto tsa tsone le hisitori ya tsone, bona buka ya Matsapa a a Tserweng ke Motho go Batla Modimo. Mo kgatisong ya Basupi ba ga Jehofa—Baboledi ba Bogosi jwa Modimo go na le pego e e feletseng ya hisitori ya motlha wa segompieno ya Basupi ba ga Jehofa. Go bona dintlha kaga gore go fitlheletsweng mo tirong ya lefatshe lotlhe ya go rerwa ga dikgang tse di molemo, bona makasine wa bosheng thata wa Tora ya Tebelo wa January 1. Insight on the Scriptures ke saetlopedia le atlelase e e theilweng mo Baebeleng. Fa o batla dintlha tse di oketsegileng ka batho, mafelo, dilo, dipuo, kgotsa ditiragalo tsa hisitori tse di amanang le Baebele, ke yone sedirisiwa se se siameng.

“Watch Tower Publications Index.” Index eno, e e gatisitsweng ka dipuo di feta di le 20, e tla go isa kwa tshedimosetsong e e fitlhelwang mo dikgatisong tsa rona tse dintsi tse di farologaneng. E kgaogantswe ka tatelano ya ditlhogo le tatelano ya ditemana. Fa o batla go dirisa tatelano ya ditlhogo, batla lefoko le le emelang setlhogo se o batlang go se batlisisa. Fa o batla go dirisa tatelano ya ditemana, mo lenaaneng la ditemana, batla e o batlang go e tlhaloganya botoka. Fa go na le sengwe se se gatisitsweng ka puo ya gago se se buang ka setlhogo seo kgotsa temana eo mme se tlhaga mo dingwageng tse di tlhagang mo go Index, o tla fitlhela go na le lenaane la dibuka tse o ka di dirisang. Dirisa tshedimosetso e e kwa tshimologong ya Index go bona gore dikhutshwafatso ke tsa maina a dikgatiso dife. (Fa o dirisa tshedimosetso eo, ka sekai, o tla lemoga gore w99 3/1 15 e raya Tora ya Tebelo ya 1999, March 1, tsebe 15. Fa o bona go tsentswe le ‘TN’ mo tshupisong epe fela, seo se raya gore e teng le ka Setswana.) Ditlhogo tse dikgolo tse di jaaka “Field Ministry Experiences” le “Life Stories of Jehovah’s Witnesses” di ka thusa fela thata mo go baakanyetseng dipuo tse di tlhotlheletsang tse di neelwang kwa phuthegong.

E re ka go dira patlisiso go ka batla gore o tlhome mogopolo otlhe mo go se o se balang, tlhokomela gore o se ka wa itewa tsebe ke sepe se sengwe. Baya tlhokomelo mo mokgeleng wa gago wa go batlisisa ka dintlha tse o di tlhokang tse di amanang le se o berekang ka sone. Fa Index e go romela kwa bukeng nngwe e e rileng, bula tsebe kgotsa ditsebe tse di umakilweng, mme o bo o dirisa ditlhogwana le dipolelo tse di simololang tsa dirapa gore di go ise kwa dintlheng tse di tsamaisanang le se o se batlang. Fa e le gore o batla bokao jwa temana e e rileng ya Baebele, batla pele fa temana eo e umakilweng gone mo tsebeng e o isitsweng kwa go yone. Morago ga moo sekaseka dikakgelo tse di e dikologileng.

“Watchtower Library” ka CD-ROM. Fa o na le khomputara, o ka nna wa solegelwa molemo ke go dirisa Watchtower Library ka CD-ROM, e e nang le dikgatiso di le dintsi tsa rona. Thulaganyo e e motlhofo eno ya go dira patlisiso e dira gore o kgone go batla lefoko, mafoko, kgotsa lokwalo mo kgatisong epe fela ya Watchtower Library. Tota le fa sedirisiwa seno sa go dira patlisiso se seyo ka puo ya lona, e ka nna ya go solegela molemo fa o e dirisa ka puo e e dirisiwang thata ya boditšhabatšhaba e o e itseng.

Dibuka Tse Dingwe Tsa Laeborari ya Dilo Tsa Puso ya Modimo

Paulo, mo lekwalong la gagwe la bobedi le le tlhotlheleditsweng le a neng a le kwalela Timotheo, o ne a mo kopa gore a tle le “dikwalo tsa momeno, segolobogolo dikwalelo tsa letlalo” fa a tla Roma. (2 Tim. 4:13) Paulo o ne a rata dikwalo dingwe thata mme a di boloka. Le wena o ka dira jalo. A o boloka dikhopi tsa gago tsa Tora ya Tebelo, Tsogang! le Tirelo ya Rona ya Bogosi le fa di setse di badilwe kwa dipokanong tsa phuthego? Fa e le gore o dira jalo, o tla kgona go di dirisa go nna didirisiwa tsa gago tsa go dira patlisiso, mmogo le dikgatiso tse dingwe tsa Bokeresete tse o nang le tsone. Diphuthego di le dintsi di leka go dira gore go nne le dikgatiso tsa puso ya Modimo mo laeboraring kwa Holong ya Bogosi. Tsone di diretswe phuthego yotlhe gore e di dirise fa e le kwa Holong ya Bogosi.

Nna le Difaele Tsa Gago

Nna o etse tlhoko gore o bone dintlha tse di kgatlhang tse o ka di dirisang fa o neetse puo le fa o ruta. Fa o ka bona ntlha nngwe, dipalo dingwe, kgotsa sekai mo lokwalodikgannyeng kgotsa mo makasineng mongwe tse o ka di dirisang mo bodireding jwa gago, e tseye kgotsa o e kwalololele golo gongwe. Tsaya le letlha la teng, setlhogo sa kgatiso eo, gongwe le leina la mokwadi kgotsa mogatisi. Kwa dipokanong tsa phuthego, kwala dintlha tse di ka nnang tsa go thusa go tlhalosetsa ba bangwe boammaaruri. A o kile wa akanya ka papiso nngwe e e molemo mme wa se ka wa nna le tshono ya go e dirisa ka nako eo? E kwale mme o e boloke mo faeleng. Fa o setse o na le nakonyana o le mo Sekolong sa Bodiredi sa Puso ya Modimo, o tla bo o setse o kile wa baakanyetsa dipuo di le mmalwa. Go na le gore o latlhe dipampiri tse o kwalelang dintlha tsa dipuo mo go tsone, di boloke. Patlisiso e o e dirileng e ka nna ya go solegela molemo moragonyana.

Bua le Batho ba Bangwe

Batho ke motswedi o o botlhokwa thata wa tshedimosetso. Fa Luke a ne a kwala pego ya gagwe ya Efangele, go bonala a ne a bona tshedimosetso e ntsi ka go botsolotsa basupi ba ba iponetseng ditiragalo ka matlho. (Luke 1:1-4) Gongwe Mokeresetekawena a ka nna a go naya lesedinyana malebana le kgang e o ntseng o leka go dira patlisiso ka yone. Go ya ka Baefeso 4:8, 11-16, Keresete o dirisa “dimpho [tse e leng] banna” go re thusa go gola mo “kitsong e e boammaaruri ka Morwa Modimo.” Go botsolotsa ba ba nang le maitemogelo mo go direleng Modimo go ka nna ga go naya dikgopolo tse dintle. Go tlotla le batho ba bangwe le gone go ka senola gore ba akanya eng, mme seno se ka go thusa go baakanyetsa puo e ruri e ba amang.

Sekaseka Dintlha Tse o di Kokoantseng mo Patlisisong ya Gago

Fa korong e sena go rojwa, ditlhaka di tshwanetse go ntshiwa mo teng ga diako. Go ntse jalo le ka matswela a patlisiso e o e dirileng. Pele ga o ka e dirisa, o tshwanetse go tlhaola se se mosola mo go se se sa tlhokegeng.

Fa e le gore o ya go dirisa tshedimosetso eno mo puong, ipotse jaana: ‘A tota ntlha e ke ikaeletseng go e dirisa e thusa ka sengwe mo puong ya me? Kgotsa, le fa e le ntlha e e kgatlhang, a e faposa mogopolo mo kgannyeng e ke tshwanetseng go bo ke bua ka yone?’ Fa e le gore o akanyetsa go dirisa ditiragalo tsa bosheng kgotsa dintlha tse di tswang mo dithutong tse di nnang di ntse di fetoga tsa saense le kalafi, tlhokomela gore tshedimosetso e o e dirisang ke e e mo nakong. Gape, ela tlhoko gore dintlha dingwe mo dikgatisong tsa rona tsa bogologolo di ka tswa di ile tsa tokafadiwa, ka jalo dirisa se se sa tswang go gatisiwa bosheng ka kgang eo.

Go botlhokwa thata gore o nne kelotlhoko fa o tlhopha go dirisa dintlha tse di tswang mo dibukeng tsa lefatshe. Le ka motlha o se ka wa lebala gore Lefoko la Modimo ke boammaaruri. (Joh. 17:17) Jesu o na le seabe se se botlhokwa thata mo go diragadiweng ga maikaelelo a Modimo. Ka jalo, Bakolosa 2:3 e bolela jaana: “Mo go ene go subilwe matlotlo otlhe ka kelotlhoko a botlhale le a kitso.” Sekaseka dintlha tse o di boneng mo patlisisong ya gago o akantse ka dilo tse di tshwanang le tseno. Malebana le go batlisisa mo dibukeng tsa lefatshe, ipotse jaana: ‘A dintlha tseno di feteletsa dilo, a ke dilo fela tse di fopholediwang, kgotsa a di bontsha go sa akanyetse dilo kwa pele? A di kwadilwe ka maikutlo a bopelotshetlha kgotsa a go dira kgwebo? A dibuka dingwe tse di ka ikanngwang di dumalana le tsone? Mo godimo ga tsotlhe, a di dumalana le boammaaruri jwa Baebele?’

Diane 2:1-5 e re kgothaletsa go nna re batla kitso, tlhaloganyo le temogo “jaaka selefera [le] jaaka matlotlo a a fitlhegileng.” Seno se bolela gore re iteke thata mme gape se bolela gore re tla bona maduo a mantsi. Go dira patlisiso go tsaya matsapa, mme go e dira go tla go thusa go bona tsela e Modimo a lebang dilo ka yone, go tla go thusa go baakanya dikgopolo tse e seng tsone le gore o ngangatlele boammaaruri. Gape go tla tsenya mooko le botshelo mo dipuong tse o di neelang, go dira gore o itumelele go di neela di bo di nne monate go di utlwa.