Mekgwa ya go Rera Dikgang Tse di Molemo

JESU o ne a tlhomela balatedi ba gagwe sekao se se molemo ka go nna mmoledi yo o tlhagafetseng wa dikgang tse di molemo. O ne a tsaya kgato pele go ya kwa bathong, a bua le bone le go ba ruta mo magaeng a bone le kwa mafelong a botlhe. (Math. 9:35; 13:36; Luke 8:1) Jesu o ne a bua le batho ka bongwe, a ruta barutwa ba gagwe kwa thoko le go bua le diketekete tsa batho. (Mar. 4:10-13; 6:35-44; Joh. 3:2-21) O ne a dirisa tshono nngwe le nngwe e e mmulegetseng go bua le batho ka mafoko a a ba kgothatsang le a a ba nayang tsholofelo. (Luke 4:16-19) Tota le fa a ne a tlhoka go ikhutsa le go itapolosa, o ne a dirisa tshono nngwe le nngwe go neela bosupi. (Mar. 6:30-34; Joh. 4:4-34) Fa re bala dipego tse di tlhotlheleditsweng tsa bodiredi jwa ga Jesu, a ga re tlhotlheletsege go etsa sekao sa gagwe? Ruri re tlhotlheletsega go etsa sekao sa gagwe, fela jaaka baaposetoloi.—Math. 4:19, 20; Luke 5:27, 28; Joh. 1:43-45.

² Ela tlhoko ditshono tse gompieno Bakeresete ba nang le tsone tsa go nna le seabe mo tirong eno e e neng ya simololwa ke Jesu Keresete mo e ka nnang dingwaga tse 2 000 tse di fetileng.

GO RERA KA NTLO LE NTLO

³ Rona Basupi ba ga Jehofa, re lemoga botlhokwa jwa go rera dikgang tse di molemo ka ntlo le ntlo ka tsela e e rulagantsweng. Re ile ra dirisa mokgwa ono thata jaana mo e setseng e le letshwao le re tlhaolwang ka lone. Molemo wa go dirisa mokgwa ono go fitlhelela dimilione tsa batho mo lobakeng lo lokhutshwane, o bonala ka diphelelo tse di itumedisang tse re nnang le tsone. (Math. 11:19; 24:14) Go rera ka ntlo le ntlo go itshupile e le tsela e e molemo e re bontshang ka yone kafa re ratang Jehofa le moagelani ka teng.—Math. 22:34-40.

⁴ Go rera ka ntlo le ntlo ga se mokgwa o mosha o o simolotsweng ke Basupi ba ga Jehofa. Moaposetoloi Paulo o ne a umaka gore o ne a ruta batho ka go ya kwa magaeng a bone. Fa a ne a tlhalosetsa balebedi ba kwa Efeso ka bodiredi jwa gagwe, o ne a re: “Go tswa letsatsing la ntlha le ke neng ka gata mo kgaolong ya Asia ka lone . . . ke ne ke sa ithibe go lo bolelela sepe sa dilo tse di neng di na le poelo le fa e le go lo ruta . . . ka ntlo le ntlo.” Paulo o ne a dirisa tsela eno le tse dingwe go “naya bosupi ka botlalo mo Bajudeng le mo Bagerikeng kaga boikwatlhao mo Modimong le tumelo mo Moreneng wa rona Jesu.” (Dit. 20:18, 20, 21) Ka nako eo, balaodi ba Roma ba ne ba rotloetsa kobamelo ya medingwana mme batho ba le bantsi ba ne ba “boifa medimo.” Go ne go tlhokega thata gore batho ba batle “Modimo yo o neng a dira lefatshe le dilo tsotlhe tse di mo go lone,” Ene yo ka nako eo a neng a “bolelela batho gongwe le gongwe gore botlhe ba ikwatlhaye.”—Dit. 17:22-31.

⁵ Gompieno go potlakile thata gore batho ba itsisiwe dikgang tse di molemo. Bokhutlo jwa tsamaiso eno e e boikepo ya dilo bo atamela ka bofefo. E re ka re lemoga seno, re tlhotlheletsega go oketsa maiteko a rona mo bodireding. Ga go na tsela e nngwe e e botoka go gaisa mokgwa ono o o sa bolong go dirisiwa wa go tsamaya ka ntlo le ntlo go batla batho ba ba tshwerweng ke tlala ya go itse boammaaruri. Le gompieno, e sa ntse e le mokgwa o o molemo fela jaaka go ne go ntse mo motlheng wa ga Jesu le baaposetoloi.—Mar. 13:10.

⁶ A o kgona go nna le seabe ka botlalo mo bodireding jwa ka ntlo le ntlo? Fa e le gore go ntse jalo, o ka tlhomamisega gore o itumedisa Jehofa. (Esek. 9:11; Dit. 20:35) Go ka nna ga bo go se motlhofo gore o nne le seabe mo bodireding jwa ka ntlo le ntlo. O ka nna wa bo o na le bokoa bongwe jo bo go kgoreletsang kgotsa o rera mo tshimong e mo go yone batho ba le bantsi ba sa rateng go reetsa molaetsa wa Baebele. Gape puso e ka tswa e thibetse tiro ya rona ya go rera. Gongwe o ditlhong mme o fitlhela go le thata go simolola motlotlo le batho ba o sa ba itseng. Ka jalo, nako le nako fa o le mo bodireding jwa ka ntlo le ntlo o a tlalelwa. O se ka wa kgobega marapo. (Ekes. 4:10-12) Itse gore seo ga se diragalele wena fela mme se diragalele le bakaulengwe mo lefatshe lotlhe.

⁷ Jesu o ne a solofetsa barutwa ba gagwe jaana: “Bonang! ke na le lona malatsi otlhe go fitlha bokhutlong jwa tsamaiso eno ya dilo.” (Math. 28:20) Tsholofetso eo e a re nonotsha fa re ntse re tsweletse ka tiro ya go dira barutwa. Re ikutlwa jaaka moaposetoloi Paulo yo o neng a bua jaana: “Mo dilong tsotlhe ke na le nonofo ka ntlha ya yo o nnayang maatla.” (Bafil. 4:13) Dirisa ka botlalo dithulaganyo tsa phuthego tsa go neela bosupi ka ntlo le ntlo. Fa o bereka le ba bangwe, o tla amogela thuso le kgothatso. Rapelela thuso ya gore o kgone go fenya dikgoreletsi dipe fela tse o ka lebanang le tsone, mme o leke ka natla go dira tiro ya go rera dikgang tse di molemo ka tlhagafalo.—1 Joh. 5:14.

⁸ Fa o ntse o bua le batho ba bangwe ka dikgang tse di molemo, o tla nna le ditshono tsa go ba naya ‘lebaka la tsholofelo e e mo go wena.’ (1 Pet. 3:15) O tla lemoga pharologanyo gareng ga batho ba ba nang le tsholofelo ya Bogosi le batho ba ba se nang yone. (Isa. 65:13, 14) O tla kgotsofalela go itse gore o ile wa bontsha gore o ikobela taelo ya ga Jesu ya go dira gore ‘lesedi la gago le phatsime,’ e bile o ka nna wa nna le tshiamelo ya go thusa batho ba bangwe go itse Jehofa le boammaaruri jo bo isang botshelong jo bo sa khutleng.—Math. 5:16; Joh. 17:3; 1 Tim. 4:16.

⁹ Go dirwa dithulaganyo tsa gore go rerwe ka ntlo le ntlo ka mafelobeke le mo gare ga beke. Mo mafelong a go seng motlhofo go fitlhela batho mo gae fa go le motshegare, diphuthego dingwe di rulaganya gore go rerwe maitseboa. Batho ba ka tswa ba rata go etelwa thapama kgotsa fa go nna maitseboa go na le go etelwa mo mosong.

GO BATLA BA BA TSHWANETSENG

¹⁰ Jesu o ne a laela barutwa ba gagwe gore ba batle batho ba ba tshwanetseng. (Math. 10:11) O ne a sa batle batho ba ba nang le tshekamelo e e siameng ka go tsamaya ka ntlo le ntlo fela. Eleruri, o ne a neela bosupi nako nngwe le nngwe fa a bona tshono e e siameng ya go dira jalo, a le mo bodireding le fa a se mo bodireding. (Luke 8:1; Joh. 4:7-15) Gape baaposetoloi ba ne ba neela batho bosupi mo mafelong a a farologaneng.—Dit. 17:17; 28:16, 23, 30, 31.

¹¹ Le gompieno, boikaelelo jwa rona jo bogolo ke go fitlhelela batho botlhe ka mo go ka kgonegang ka teng ka molaetsa wa Bogosi. Seno se bolela gore re etse tsela e Jesu le baaposetoloi ba gagwe ba neng ba dira tiro ya go dira barutwa ka yone le gore re tsamaisane le dinako tse di ntseng di fetoga le maemo a a sa tshwaneng a batho ba tshimo ya rona. (1 Bakor. 7:31) Ka sekai, baboledi ba ile ba atlega fa ba ne ba etela batho kwa mafelong a kgwebo. Go neela bosupi mo mmileng go itshupile go na le diphelelo tse di molemo mo dinageng di le dintsi, fela jaaka go neela bosupi mo diphakeng, mo mafelong a go phaka dikoloi, mo dipalangweng tsa botlhe kgotsa gongwe le gongwe fela kwa batho ba ka fitlhelwang gone. Diphuthego dingwe di rulagantse go rera phatlalatsa ka go baya ditafole kgotsa dikolotsana tsa go bontsha dikgatiso mo tshimong ya tsone. Mo godimo ga moo, ofisi ya lekala e ka dira thulaganyo e e kgethegileng ya go neela bosupi mo ditoropong tse dikgolo tse go nang le batho ba bantsi mo go tsone, go dirisiwa baboledi ba ba tswang mo diphuthegong di le mmalwa. Ka go dira jalo, batho ba ba seyong kwa gae fa baboledi ba ba etela, ba ka fitlhelelwa ka dikgang tse di molemo kwa mafelong a mangwe.

¹² Fa o kopana le motho yo o kgatlhegelang molaetsa wa Baebele, o ka mo naya kgatiso nngwe le nngwe e e tshwanelang maemo a gagwe. O ka mo naya dinomoro tsa gago tsa mogala go tswa foo o bo o rulaganya go mo etela kwa legaeng la gagwe, wa mmontsha website ya jw.org, kgotsa wa mo naya aterese ya Holo ya Bogosi e e gaufi le ene. O ka nna wa fitlhela gore go neela batho bosupi mo mafelong a botlhe ke tsela e e itumedisang ya go atolosa bodiredi jwa gago.

¹³ Le fa go ntse jalo, tiro e Bakeresete ba e abetsweng gompieno ga e akaretse fela go rera dikgang tse di molemo. Fa o batla go atlega mo tirong eno ya go thusa batho ba bangwe go amogela boammaaruri jo bo isang botshelong, o tshwanetse go nna o etela batho ba ba kgatlhegang gangwe le gape e le gore ba gatele pele go nna Bakeresete ba ba godileng sentle.

GO DIRA MAETO A GO BOELA

¹⁴ Jesu o ne a raya balatedi ba gagwe a re: “Lo tla nna basupi ba me . . . go ya karolong e e kwa kgakalakgakala ya lefatshe.” (Dit. 1:8) Mme gape o ne a ba raya a re: “Jalo tsamayang mme lo dire batho ba ditshaba tsotlhe barutwa, . . . lo ba rute go boloka dilo tsotlhe tse ke di lo laetseng.” (Math. 28:19, 20) Go dira maeto a go boela e ka nna selo se se itumedisang thata mo tirelong ya ga Jehofa. Batho ba ba ileng ba bontsha go kgatlhegela dikgang tse di molemo fa o ne o ba etetse la ntlha, ba ka nna ba itumelela go go bona o ba etela gape. Fa o tlotla le bone ka tshedimosetso e e oketsegileng ya Baebele, o ka nonotsha tumelo ya bone mo Modimong le go ba thusa go lemoga gore ba tlhoka go nna le kamano e e molemo le Modimo. (Math. 5:3) Fa o dira dithulaganyo tsa go ba etela gape ka nako e e ba tshwanetseng le go baakanyetsa loeto loo sentle, o ka nna wa kgona go simolola thuto ya legae ya Baebele. Tota seo e tshwanetse go nna jone boikaelelo jwa gago fa o dira maeto a go boela. Ga re jale peo ya boammaaruri fela mme gape re a e nosetsa.—1 Bakor. 3:6.

¹⁵ Go dira maeto a go boela e ka nna kgwetlho mo bathong bangwe. Gongwe o setse o na le bokgoni jwa go buisana le batho ka dikgang tse di molemo mme o itumelela karolo eno ya bodiredi fela thata. Mme gone, fa o akanya ka go boela kwa bathong bao go ya go tlotla gape le bone ka Baebele, o ka nna wa ikutlwa o palelwa ke go dira jalo. Fa o baakanyeditse sentle o tla kgona go bua le bone o phuthologile. O ka dirisa dikakantsho tse di dirisiwang mo dipokanong tsa mo gare ga beke. Gape o ka laletsa mmoledi yo o nang le maitemogelo gore a tsamaye le wena.

GO TSHWARA DITHUTO TSA MAGAE TSA BAEBELE

¹⁶ Fa Filipo wa moefangedi a ne a bua le monna mongwe yo o neng a sokologetse mo Sejudeng yo o neng a bala Lefoko la Modimo, o ile a mmotsa jaana: “A tota o itse se o se balang?” Monna yoo o ne a araba jaana: “Tota, nka tlhaloganya jang, fa mongwe a sa nkaele?” Pego ya Baebele e e mo go Ditiro kgaolo 8 e re bolelela gore go tswa foo Filipo o ne “a mmolelela dikgang tse di molemo kaga Jesu” a simolola ka ditemana tse di mo Lekwalong le monna yoo a neng a ntse a le bala. (Dit. 8:26-36) Ga re itse gore Filipo o ne a fetsa nako e kana kang le monna yoo, le fa go ntse jalo, o ne a mo tlhalosetsa dikgang tse di molemo mo e leng gore monna yoo o ne a nna modumedi mme a kopa gore a kolobediwe. O ne a nna morutwa wa ga Jesu Keresete.

¹⁷ Batho ba le bantsi gompieno ga ba a tlwaelana le Baebele, ka jalo, go ka nna ga tlhokega gore o ba etele makgetlonyana le go tlotla le bone ka Baebele, dibeke di le mmalwa, dikgwedi, ngwaga kgotsa go feta pele ga ba bontsha tumelo le go tshwanelegela go kolobediwa. Le fa go ntse jalo, bopelotelele jwa gago le tsela e e lorato e o thusang batho ba ba dipelo di ikanyegang ka yone go nna barutwa, e na le diphelelo tse di itumedisang fela jaaka Jesu a ile a re: “Go na le boitumelo jo bogolo mo go abeng go na le jo bo leng gone mo go amogeleng.”—Dit. 20:35.

¹⁸ Ga go pelaelo gore o tla batla go tshwara thuto ya legae ya Baebele o dirisa nngwe ya dikgatiso tse di diretsweng go tshwara thuto ya Baebele. Fa o ntse o dirisa dikakantsho tse o ithutileng tsone mo dipokanong tsa mo gare ga beke e bile o bereka le batho ba ba nang le maitemogelo, o tla kgona go tshwara dithuto tsa Baebele tse di gatelang pele, ka go dira jalo, o tla kgona go thusa batho ba bangwe go nna barutwa ba ga Jesu Keresete.

¹⁹ Fa e le gore o tlhoka go thusiwa go simolola thuto ya legae ya Baebele le go e tshwara, ikutlwe o gololesegile go bua le mongwe wa balebedi kgotsa le Mosupi yo mongwe yo o atlegang mo tirong ya go tshwara dithuto tsa Baebele. Dikakantsho tse di tlhagang mo Bukaneng ya Pokano ya Botshelo le Bodiredi le dipontsho tse di dirilweng kwa dipokanong di tla go thusa. Ikaege ka Jehofa le go mmolelela ka thapelo gore o eletsa go tshwarela mongwe thuto ya Baebele. (1 Joh. 3:22) Ka jalo, fa go kgonega, ipeele mokgele wa go tshwara bobotlana thuto e le nngwe ya legae ya Baebele ka metlha mo godimo ga thuto e o e tshwarelang ba lelapa la gago. Fa o tshwara dithuto tsa Baebele, o tla itumelela bodiredi.

GO KAELA BATHO BA BA KGATLHEGANG KWA PHUTHEGONG YA GA JEHOFA

²⁰ Fa re thusa batho go itse Jehofa Modimo le gore e nne barutwa ba ga Jesu Keresete, ba nna karolo ya phuthego. Baithuti ba Baebele ba tla gatela pele e bile tumelo ya bone e tla nonofa fa ba tlhaloganya phuthego ya ga Jehofa le go dirisana mmogo le yone. Go botlhokwa gore re ba thuse go dira jalo. Go na le dibidio le boroutšhara jo bo reng, Ke Bomang ba ba Dirang Thato ya ga Jehofa Gompieno? tse di diretsweng ka tlhamalalo boikaelelo jono. Tshedimosetso nngwe e e fitlhelwang mo Kgaolo 4 ya buka eno le yone e ka thusa.

²¹ Go tloga fela kwa tshimologong ya motlotlo wa gago wa Baebele le motho yo o mo rutang, mo thuse go bona gore Jehofa o dirisa phuthego gore tiro ya go rera e dirwe mo lefatsheng gompieno. Mo tlhalosetse botlhokwa jwa dikgatiso tse di diretsweng go ithuta Baebele mme o mo tlhalosetse kafa di dirwang ka teng le go anamisiwa mo lefatsheng lotlhe. O mo tlhalosetse le gore tiro eno e dirwa ke baithaopi ba ba ineetseng mo Modimong. Laletsa motho yo o ithutang Baebele le ene go ya le wena kwa dipokanong kwa Holong ya Bogosi. Mo tlhalosetse kafa dipokano di tshwarwang ka teng o bo o mo itsise bakaulengwe le bokgaitsadi. Gape o ka mo thusa go tlwaelana le Basupi ba bangwe kwa dikopanong tse dinnye le tse dikgolo. Ka nako ya ditiragalo tseo le tse dingwe, letla motho yono yo mosha gore a iponele kafa batlhanka ba ga Jehofa ba bontshang lorato ka teng, e leng letshwao le le tlhaolang Bakeresete ba boammaaruri. (Joh. 13:35) Fa motho yono yo o kgatlhegang a ntse a anaanela phuthego ya ga Jehofa le go feta, o tla atamalana le Jehofa.

GO DIRISA DIKGATISO TSE DI THEILWENG MO BAEBELENG

²² Bakeresete ba pele e ne ya nna baboledi ba ba tlhagafetseng ba Lefoko la Modimo. Ba ne ba itirela dikhopi tsa Dikwalo tse ba neng ba di dirisa le tse di neng di dirisiwa go ithuta mo phuthegong. Ba ne ba kgothaletsa batho ba bangwe go bala Lefoko la Modimo le le boammaaruri. Dikhopi tseno tse ba neng ba ikwaletse tsone di ne di se dintsi mme ba ne ba di anaanela fela thata. (Bakol. 4:16; 2 Tim. 2:15; 3:14-17; 4:13; 1 Pet. 1:1) Gompieno Basupi ba ga Jehofa ba dirisa mekgwa ya segompieno go gatisa Dibaebele di le dintsi le dikgatiso tsa go ithuta Baebele. Dikgatiso tseno di akaretsa dipampitshana, diboroutšhara, dibuka le dimakasine ka dipuo di le dintsi.

²³ Fa o ntse o bolelela batho ba bangwe dikgang tse di molemo, tlhomamisa gore o dirisa ka botlalo dikgatiso tsa go ithuta Baebele tse re di abelwang ke phuthego ya ga Jehofa. Go itse gore le wena o ile wa solegelwa molemo go le kana kang ke go bala le go ithuta dikgatiso tsa Basupi ba ga Jehofa, go tla go tlhotlheletsa gore o di abele ba bangwe.—Baheb. 13:15, 16.

²⁴ Batho ba le bantsi ba dirisa Internet e le motswedi wa bone wa konokono wa tshedimosetso. Ka jalo, mo godimo ga go dirisa dikgatiso tse di theilweng mo Baebeleng, website ya rona ya semolao ya jw.org ke sedirisiwa se se molemo sa go anamisa dikgang tse di molemo. Batho go ralala lefatshe ba ka dirisa dikhomputara go bala kgotsa go reetsa Baebele e e rekotilweng le dikgatiso tse di theilweng mo Baebeleng ka dipuo di le dintsi. Ba ba ikgogonang go bua le rona kgotsa ba ba nnang mo mafelong a mo go one go se nang ditshono di le dintsi tsa gore ba ka bua le Basupi ba ga Jehofa, ba kgona go bona se re se dumelang ba dirisa jw.org ba le mo magaeng a bone.

²⁵ Ka jalo, re itsise batho ka jw.org nako le nako fa re bona tshono ya go dira jalo. Fa mong wa ntlo a botsa potso ka se re se dumelang, re ka dirisa didirisiwa tsa thekenoloji tse o kgonang go tsamaya o di tshotse kgotsa khomputara go mmontsha karabo gone fela foo. Fa re kopana le motho yo o buang puo e sele, tota le puo ya diatla, re ka mo itsise ka website ya rona gore a bone Baebele le dikgatiso tse di theilweng mo Baebeleng ka puo ya gagwe. Baboledi ba le bantsi ba ile ba dirisa nngwe ya dibidio tse di mo website ya rona go simolola motlotlo wa Baebele.

GO RERA O SE MO BODIREDING

²⁶ Jesu o ile a raya batho ba ba neng ba reetsa lefoko la gagwe a re: “Lo lesedi la lefatshe. . . . A lesedi la lona le phatsime fa pele ga batho, gore ba tle ba bone ditiro tsa lona tse di molemo mme ba neye Rraalona yo o kwa magodimong kgalalelo.” (Math. 5:14-16) Barutwa bao ba ile ba bontsha ditsela tsa Modimo ka go etsa Jesu, yo o ileng a bua jaana kaga gagwe: “Ke nna lesedi la lefatshe.” Jesu o ile a tlhomela Bakeresete sekao ka go dira gore “lesedi la botshelo” le phatsime, gore botlhe ba ba neng ba tla reetsa ba solegelwe molemo.—Joh. 8:12.

²⁷ Moaposetoloi Paulo le ene o ne a re tlhomela sekao se re ka se etsang. (1 Bakor. 4:16; 11:1) Fa a ne a le kwa Athena, o ne a neela bosupi mo bathong ba a neng a kopana le bone letsatsi le letsatsi mo marekisetsong. (Dit. 17:17) Bakeresete ba kwa Filipi ba ile ba latela sekao sa gagwe. Ke gone ka moo Paulo a ileng a ba kwalela a re ba ne ba tshela “mo kokomaneng e e sokameng le e e kgopameng,” e mo gare ga yone ba neng ‘ba phatsima jaaka masedi mo lefatsheng.’ (Bafil. 2:15) Le rona gompieno re ka phatsimisa boammaaruri jwa Bogosi ka mafoko a rona le ka ditiro tsa rona nako nngwe le nngwe fa re bona tshono ya go bolelela batho ba bangwe dikgang tse di molemo. Ga go pelaelo gore sekao sa rona se se molemo sa go nna batho ba ba ikanyegang le ba ba siameng se ka dira gore batho ba bangwe ba bone gore re farologane le lefatshe. Le fa go ntse jalo, fa re tlotla le bone ka dikgang tse di molemo, ba tla itse gore goreng re farologana le batho ba bangwe.

²⁸ Bontsi jwa batho ba ga Jehofa ba tlotla ka dikgang tse di molemo le batho ba ba kopanang le bone kwa ditirong tsa boitshediso, kwa sekolong, mo dipalangweng tsa botlhe kgotsa kwa mafelong a mangwe fa ba ntse ba dira ditiro tsa bone tsa letsatsi le letsatsi. Fa re tsere mosepele, re ka nna ra nna le tshono ya go tlotla le batho ba re tsereng mosepele le bone. Mongwe le mongwe wa rona o tshwanetse go nna a ntshitse matlho dinameng gore a dirise ditshono tse di tlhagang go fetola motlotlo fela o o tlwaelegileng gore e nne wa go neela bosupi. A re nneng re ipaakanyeditse go bua le batho nako nngwe le nngwe fa tshono e tlhaga.

²⁹ Re tla tlhotlheletsega go dira jalo fa re nna re gopotse gore re a bo re galaletsa Mmopi wa rona le go tlotlomatsa leina la gagwe. Mo godimo ga moo, re ka nna ra kgona go thusa batho ba ba dipelo di ikanyegang go itse Jehofa e le gore le bone ba ka mo direla le go nna le tsholofelo ya go bona botshelo jo motho a nnang le jone ka go bontsha tumelo mo go Jesu Keresete. Jehofa o itumedisiwa ke maiteko a a ntseng jalo e bile o a tsaya e le tirelo e e boitshepo.—Baheb. 12:28; Tshen. 7:9, 10.

TSHIMO

³⁰ Ke thato ya ga Jehofa gore molaetsa wa Bogosi o rerwe mo lefatsheng lotlhe, mo ditoropong le mo metseng ya magae. Gore seno se fitlhelelwe, diphuthego le batho ka bongwe ba ba neelang bosupi mo mafelong a a kwa thoko, ba abelwa tshimo ke ofisi ya lekala. (1 Bakor. 14:40) Seno se dumalana le thulaganyo e e neng e kaelwa ke Modimo e e neng e dirisiwa mo lekgolong la ntlha la dingwaga. (2 Bakor. 10:13; Bagal. 2:9) E re ka tiro ya Bogosi e oketsega ka bonako mo malatsing ano a bofelo, go fitlhelelwa go le gontsi fa go dirwa thulaganyo e e tlhomameng ya go bereka tshimo ya phuthego.

³¹ Thulaganyo eno e okamelwa ke molebedi wa tirelo. Motlhanka wa bodiredi a ka nna a dira tiro ya go aba tshimo. Go na le mefuta e le mebedi ya tshimo, tshimo ya setlhopha le tshimo ya motho a le nosi. Fa phuthego e na le tshimo e nnye, balebedi ba ditlhopha ba tla nna le tshimo ya setlhopha e baboledi ba ditlhopha tsa bone ba ka e berekang. Le fa go ntse jalo, fa o le mo phuthegong e e nang le tshimo e kgolo, o ka nna wa ikopela go nna le tshimo ya gago o le nosi.

³² Mmoledi yo o nang le tshimo ya gagwe o tla nna le lefelo le a rerang kwa go lone ka dinako tsa fa go sa rulaganngwa dipokano tsa tirelo ya tshimo kgotsa fa a sa kgone go kopana le setlhopha. Ka sekai, baboledi bangwe ba nna le tshimo ya bone gaufi le kwa ba berekang teng mme ba rera mo go yone ka nako ya dijo tsa motshegare kgotsa morago ga tiro. Malapa mangwe a nna le tshimo ya one mo lefelong le a nnang mo go lone mme a rera mo go yone mo maitseboeng mangwe. Go nna le tshimo ya gago ka namana e e gaufi le wena go tla go thusa go dirisa nako ya gago ka tsela e e molemo mo tirelong ya tshimo. Mme gone, setlhopha se ka nna sa bereka tshimo e e abetsweng motho a le nosi. Fa o batla go nna le tshimo ya gago o le nosi, o ka e kopa mo motlhankeng wa tshimo.

³³ Go sa kgathalesege gore tshimo e abetswe molebedi wa setlhopha gore setlhopha sa gagwe se e bereke kgotsa e abetswe mmoledi mongwe, motho yo o e abetsweng, o tshwanetse go dira maiteko a gore a rerele mongwe le mongwe mo tshimong eo. Gape o tshwanetse go dirisa tshedimosetso e a e tsayang mo bathong go dumalana le melao ya naga. Molebedi ope wa setlhopha kgotsa mmoledi yo o abelwang tshimo, o tshwanetse go leka go e fetsa mo dikgweding di le nnê. Fa e setse e weditswe, o tshwanetse go itsise molebedi wa tshimo gore tshimo eo e berekilwe. Go ikaegile ka maemo, molebedi wa setlhopha kgotsa mmoledi a ka nna a tswelela a bereka tshimo eo kgotsa a ka bolelela molebedi wa tshimo gore ga a tlhole a e bereka.

³⁴ Fa botlhe mo phuthegong ba dirisana mmogo, tshimo e ka berekwa ka botlalo. Gape re ka tila gore baboledi ba le babedi kgotsa go feta ba nne ba boaboeletsa tshimo e le nngwe e leng sengwe se se ka nnang sa kgopisa beng ba matlo. Ka tsela eno, re bontsha go akanyetsa bakaulengwe ba rona le batho ba ba mo tshimong.

GO DIRISANA MMOGO GORE GO RERELWE BATHO BA DIPUO TSOTLHE

³⁵ Batho botlhe ba tshwanetse go ithuta ka Jehofa Modimo le Bogosi jwa gagwe le ka Morwawe. (Tshen. 14:6, 7) Re kgatlhegela go thusa batho ba dipuo tsotlhe gore ba bitse leina la ga Jehofa e le gore ba bone poloko le gore ba apare botho jwa Bokeresete. (Bar. 10:12, 13; Bakol. 3:10, 11) Ke dikgwetlho dife tse di nnang gone fa re rera dikgang tse di molemo mo mafelong a go buiwang dipuo tse di farologaneng? Go ka lebanwa le dikgwetlho tseno jang ka tsela e e tla nayang batho ba le bantsi tshono ya go utlwa molaetsa wa Bogosi ka puo e ba e tlhaloganyang sentle?—Bar. 10:14.

³⁶ Diphuthego di abelwa tshimo go ya ka puo ya tsone. Ka jalo, mo mafelong a go buiwang dipuo tse dintsi, baboledi ba diphuthego tseno ba rera mo tshimong e le nngwe. Mo maemong a a ntseng jalo, go molemo gore baboledi ba phuthego nngwe le nngwe ba tlhome mogopolo mo go rereleng bathong ba ba buang puo ya bone. Seno se akaretsa le ka nako ya matsholo a ngwaga le ngwaga a go laletsa batho. Le fa go ntse jalo, fa baboledi ba neela bosupi jwa phatlalatsa le fa ba rera ba se mo bodireding, ba ka bua le mongwe le mongwe ba bo ba tsamaisa dikgatiso tsa puo epe fela.

³⁷ Ka dinako tse dingwe, diphuthego dingwe ga di kgone go dira tshimo ya tsone e e kgakala. Mo maemo a a ntseng jalo, balebedi ba tirelo ba diphuthego tse di amegang ba tshwanetse go buisana gore ba dire thulaganyo e botlhe ba dumalanang ka yone ya gore ba rere mo tshimong eo. Seno se tla naya mongwe le mongwe tshono ya go utlwa molaetsa wa Bogosi e bile se tla thusa gore go se ka ga boaboelediwa tshimo eo.—Dia. 15:22.

³⁸ Re tshwanetse go dira eng fa motho yo re mo fitlhelang mo ntlong a bua puo e sele? Ga re a tshwanela go tsaya gore baboledi ba ba buang puo ya gagwe ba tla mo etela. Baboledi bangwe ba ile ba ithuta puisano e e motlhofo ya puo e gantsi ba kopanang le batho ba yone mo tshimong. Re ka bontsha motho gore a ka nna a bala kgotsa a itseela dikgatiso tsa puo ya gagwe mo website ya rona ya semolao ya jw.org kgotsa re ka ithaopela go mo tlisetsa dikgatiso tsa puo ya gagwe.

³⁹ Fa motho a bontsha gore tota o a kgatlhega, re tshwanetse go batla mongwe yo o tshwanelegang yo a ka kgonang go mo thusa ka puo e a e tlhaloganyang. Gape re ka mo itsise gore dipokano tsa puo ya gagwe tse di gaufi le ene di tshwarelwa kae. Fa e le gore o batla go etelwa ke mongwe yo o buang puo ya gagwe, re ka mmontsha gore a ka tsenya jang tshedimosetso ya gagwe mo jw.org gore go tle go ikgolaganngwe le ene. Ofisi ya lekala e tla leka go batla mmoledi, setlhopha kgotsa phuthego e e tla tswelelang e mo thusa.

⁴⁰ Re tshwanetse go tswelela re etela motho yo o bontshitseng kgatlhego go fitlha a re bolelela gore go na le mongwe yo o buang puo ya gagwe yo o ikgolagantseng le ene. Mo maemong mangwe, ofisi ya lekala e tla itsise bagolwane gore ga go a bonwa ope yo o buang puo ya motho yoo. Fa seno se direga, re tshwanetse go dira bojotlhe go tswelela pele re godisa kgatlhego ya mong wa ntlo. Fa go kgonega, re ka ithuta Baebele le ene gongwe re dirisa kgatiso nngwe ya puo ya gagwe. Fa re dirisa ditshwantsho ka botlalo re bo re kopa motho yoo gore a bale ditemana tse di umakilweng, o tla tlhaloganya dithuto dingwe tsa motheo tsa Baebele. Mongwe wa losika lwa gagwe yo o itseng puo ya gagwe sentle e bile a itse puo e e buiwang mo tikologong eo, a ka nna a rata go toloka se se buiwang.

⁴¹ E le gore re kgone go thusa motho yo o kgatlhegang go itse phuthegong ya Modimo, re tshwanetse go mo laletsa kwa dipokanong tsa rona, le fa tota a ka se kgone go tlhaloganya se se buiwang. Fa go balwa ditemana, re ka mo thusa gore a di bone ka go dirisa Baebele ya puo ya gagwe fa e le gore e teng. Go kopanela le ba bangwe mo phuthegong go ka mo aga e bile go ka mo thusa go gatela pele.

⁴² Setlhopha se se lekelediwang: Setlhopha se se lekelediwang se tshwanetse go nna le baboledi ba le mmalwa ba ba rerang ka puo e sele le fa ba se na mogolwane kgotsa motlhanka wa bodiredi yo o ka kgonang go tshwara dipokano tsa beke le beke ka puo eo. Ofisi ya lekala e tla letlelela phuthego gore e nne le setlhopha se se lekelediwang fa fela e fitlhelela dilo tseno tse di tlhokegang:

1. (1) Go na le batho ba le bantsinyana ba ba buang puo e phuthego e batlang go dira setlhopha se se lekelediwang ka yone.

2. (2) Go na le baboledi ba le mmalwa mo phuthegong ya lona ba ba ikemiseditseng go ithuta puo eo.

3. (3) Bagolwane ba ikemiseditse go etelela pele tiro ya go rera ka puo eo.

Fa setlhopha sa bagolwane se batla go simolola setlhopha se se lekelediwang ba tshwanetse go bua le molebedi wa potologo. Gongwe molebedi wa potologo a ka tswa a itse gore go na le phuthego e e batlang go rera ka puo eo, ka jalo, ke ene a ka lo neelang tshedimosetso e e tlhokegang gore ke phuthego efe e e siametseng go nna le setlhopha seo se se lekelediwang ka puo eo. Fa phuthego eo e sena go tlhophiwa bagolwane ba tla romela lekwalo kwa ofising ya lekala mme ke yone e tla ba nayang tetla ya gore ba nne le setlhopha se se lekelediwang.

⁴³ Ditlhopha: Ofisi ya lekala e tla letlelela phuthego gore e nne le setlhopha fa fela e fitlhelela dilo tseno tse di tlhokegang:

1. (1) Fa go na le palo e e lekaneng ya batho ba ba kgatlhegang e bile go bonala setlhopha sa puo eo se tla gola.

2. (2) Fa go na le baboledi ba le mmalwa ba ba buang puo eo kgotsa ba e ithuta.

3. (3) Fa go na le mogolwane kgotsa motlhanka wa bodiredi yo o tshwanelegang yo o ka kgonang go tshwara pokano ya mo gare ga beke kgotsa ya mafelobeke kgotsa a ka kgona go tshwara karolo e le nngwe mo dipokanong tse pedi tseo. Ka sekai, mo dipokanong tsa mafelobeke o tshwanetse a bo a kgona go tshwara puo ya phatlalatsa kgotsa Thuto ya Tora ya Tebelo.

Fa dilo tse di batlegang di fitlhelelwa ka selekanyo se se rileng, setlhopha sa bagolwane se tla kwalela ofisi ya lekala malebana le dintlha tsa setlhopha seo mme ba tla kopa gore ba kwadisiwe gore ba tlhokomele setlhopha seo sa puo e sele. Mogolwane kgotsa motlhanka wa bodiredi yo o eteletseng pele ke ene yo go tla tsewang gore ke molebedi wa setlhopha kgotsa motlhanka wa setlhopha yo o ikarabelang ka go tlhokomela setlhopha.

⁴⁴ Fa go setse go na le setlhopha, phuthego ya bagolwane ba ba tlhokomelang setlhopha seo e tla dira tshwetso ya gore go okediwe dikarolo dingwe tsa dipokano le gore dipokano tseo di tshwarwe ga kae mo kgweding. Gape go ka rulaganngwa gore setlhopha seo se nne le dipokano tsa tirelo ya tshimo. Botlhe mo setlhopheng ba okametswe ke setlhopha sa bagolwane se se tlhokometseng setlhopha seo. Bagolwane ba tla kaela setlhopha seo ka tsela e e tshwanetseng le go bontsha gore ba kgatlhegela thata go thusa ka dilo tse setlhopha se di tlhokang. Fa molebedi wa potologo a bereka le setlhopha mo bekeng e a etetseng phuthego e e tlhokometseng setlhopha seo, o tla romelela ofisi ya lekala pego e khutshwane a tlhalosa kgatelopele ya sone le dilo dipe fela tse se ka tswang se di tlhoka. Fa nako e ntse e ya, go ka nna ga kgonega gore setlhopha seo e nne phuthego. Fa botlhe ba ba berekang ba dirisa kaelo ya thulaganyo ya puso ya Modimo, Jehofa o tla itumela.—1 Bakor. 1:10; 3:5, 6.

GO RERA LO LE SETLHOPHA

⁴⁵ Bakeresete ba ba ineetseng ba na le boikarabelo jwa go itsise batho ba bangwe dikgang tse di molemo. Go na le ditsela di le dintsi tsa go dira seno, le fa go ntse jalo, bontsi jwa rona re itumelela go tsamaya le ba bangwe mo tirelong ya tshimo. (Luke 10:1) Ka ntlha ya lebaka leno, diphuthego di kopana mmogo go ya tirelong ya tshimo ka mafelobeke le mo gare ga beke. Malatsi a boikhutso le one a re naya tshono e e molemo ya go nna le seabe mo bodireding jwa tshimo le setlhopha, e re ka bakaulengwe ba le bantsi ba sa ye tirong. Komiti ya Tirelo ya Phuthego e rulaganya dipokano tsa tirelo ya tshimo tsa motshegare le tsa maitseboa, ka dinako tse di tshwanetseng le kwa mafelong a a tshwanelang.

⁴⁶ Go rera lo le setlhopha go thusa baboledi go bereka mmogo le gore ba itumelele ‘go kgothatsana.’ (Bar. 1:12) Baboledi ba basha ba ka bereka le baboledi ba ba nang le bokgoni le maitemogelo mme seno se tla ba thapisa. Mo mafelong mangwe, go ka nna molemo gore baboledi ba le babedi kgotsa go feta ba bereke mmogo ka ntlha ya mabaka a pabalesego. Tota le fa o rulaganyetsa go bereka o le nosi mo tshimong, go ya pokanong ya tshimo le setlhopha go ka kgothatsa botlhe ba ba gone. Go itse fela gore ba bangwe le bone ba mo bodireding mo lefelong la lona go ka dira gore motho a se ka a nna le poifo. Babulatsela le ba bangwe ga ba a tshwanela go ikutlwa ba patelesega go tshegetsa pokano nngwe le nngwe ya tirelo ya tshimo e e rulagantsweng ke phuthego, segolobogolo fa e le gore dipokano tseo di tshwarwa letsatsi le letsatsi. Le fa go ntse jalo, go ka kgonega gore ba nne gone mo dipokanong dingwe tsa tirelo ya tshimo beke le beke.

⁴⁷ E kete rotlhe re ka latela sekao se se tlhomilweng ke Jesu le baaposetoloi ba gagwe! Re ka tlhomamisega gore Jehofa o tla segofatsa maiteko a rona a go nna le seabe ka botlalo mo tirong e e botlhokwa ya go rera dikgang tse di molemo tsa Bogosi.—Luke 9:57-62.