Ke ka Ntlha Yang fa re Tshwanetse go Tlotla Taolo?

1, 2. (a) Ke ka ntlha yang fa re go fitlhela go le boima thata jaana go tlotla taolo? (b) Re tla sekaseka dipotso dife?

A O KILE wa bona kafa ngwana yo monnye a itshwarang ka gone fa a kopiwa go dira sengwe se tota a sa batleng go se dira? O ka kgona go bona sentle mo sefatlhegong sa mosimanyana yoo gore tota ga a batle. O utlwa se batsadi ba se buang, mme o itse gore o tshwanetse go tlotla taolo ya bone. Mme mo boemong jono, ga a batle go ikoba. Tsela e a ikutlwang ka yone e bontsha kafa rotlhe re a tleng re ikutlwe ka gone ka dinako dingwe.

² Ga se ka metlha go leng motlhofo gore re ikobele taolo. A ka dinako dingwe o go fitlhela go le boima go tlotla ba ba nang le taolo e e rileng mo go wena? Fa go le jalo, ga se wena fela o nang le bothata jono. Re tshela mo motlheng o mo go one go tlotla taolo go bonalang go sa tlhole go tsewa tsia. Le fa go ntse jalo, Baebele ya re re tshwanetse go tlotla ba ba nang le taolo mo go rona. (Diane 24:21) Tota e bile, go dira jalo go botlhokwa thata fa re batla go tswelela re le mo loratong lwa Modimo. Ka jalo go a utlwala gore go tsoge dipotso dingwe. Ke eng se se ka dirang gore go nne boima thata jaana mo go rona go tlotla taolo? Ke ka ntlha yang fa Jehofa a batla gore re dire seno, mme ke eng se se tla re thusang go ikoba? La bofelo, re ka bontsha go tlotla taolo ka ditsela dife?

LEBAKA LA GO BO GO LE BOIMA

3, 4. Boleo le bosaitekanelang di simologile jang mme ke ka ntlha yang fa bosaitekanelang jwa rona bo dira gore re thatafalelwe ke go tlotla taolo?

³ A re sekasekeng ka bokhutshwane mabaka a mabedi a a ka dirang gore go nne boima thata gore re tlotle ba ba nang le taolo. Sa ntlha, ga re a itekanela; sa bobedi, batho ba ba nang le taolo mo go rona le bone ga ba a itekanela. Go leofa ga batho le bosaitekanelang go simolotse bogologolo kwa tshimong ya Edene, fa Adame le Efa ba ne ba tsuologela taolo ya Modimo. Ka jalo boleo bo simolotse ka go tsuologa. Fa e sa le go simolola ka nako eo, re tsalwa re na le maikutlo a go tsuologa.—Genesise 2:15-17; 3:1-7; Pesalema 51:5; Baroma 5:12.

⁴ Ka ntlha ya bosaitekanelang jwa rona, go motlhofo gore bontsi jwa rona re ikgogomose le go nna mabela, mme boikokobetso ke nonofo e e bonwang sewelo e re tshwanetseng go leka ka natla go e tlhagolela le go nna le yone. Tota le fa re setse re diretse Modimo ka dingwaga di le dintsi ka boikanyegi, re ka nna tlhogoethata le go ikgogomosa. Ka sekai, akanya ka Kora, yo o neng a itshoka le batho ba ga Jehofa mo mathateng a le mantsi. Le fa go ntse jalo, o ne a batla go nna le taolo e e oketsegileng mme o ne a ipagololela mogodu mme a etelela batho pele mo go tsuologeleng Moshe, yo e neng e le monna yo o boikokobetso thata ka nako eo. (Dipalo 12:3; 16:1-3) Akanya gape ka Kgosi Usia, yo boikgogomoso bo neng jwa dira gore a tsene mo tempeleng ya ga Jehofa le go dira tiro e e boitshepo e e neng e tshwanetse go dirwa fela ke baperesiti. (2 Ditiragalo 26:16-21) Banna bano ba ne ba otlhaiwa thata ka ntlha ya go tsuologa ga bone. Le fa go ntse jalo, re ka ithuta thuto e e molemo mo dilong tse di sa siamang tse ba di dirileng. Re tshwanetse go lwantshana le go ikgogomosa ka gonne go dira gore re thatafalelwe ke go tlotla taolo.

5. Batho ba ba sa itekanelang ba dirisitse taolo ya bone jang ka tsela e e sa tshwanelang?

⁵ Kafa letlhakoreng le lengwe, batho ba ba sa itekanelang ba ba nang le taolo ba nnile le seabe se segolo go dira gore batho ba se ka ba tlotla taolo. Ba le bantsi ba setlhogo, ba sotla batho kgotsa ba busa ka go gatelela. Tota e bile, dilo tse di diragetseng mo hisitoring di senola gore batho ba dirisa maatla a bone ka tsela e e sa tshwanelang. (Bala Moreri 8:9.) Ka sekai, Saulo e ne e le monna yo o molemo, yo o ikokobeditseng fa Jehofa a ne a mo tlhopha gore e nne kgosi. Le fa go ntse jalo, o ne a simolola go nna boikgogomoso le go nna lefufa; mme morago ga moo o ne a bogisa monna yo o ikanyegang e bong Dafide. (1 Samuele 9:20, 21; 10:20-22; 18:7-11) Moragonyana Dafide o ne a nna nngwe ya dikgosi tse di molemo thata tse Iseraele e neng e kile ya nna le tsone, mme o ne a dirisa maatla a gagwe ka tsela e e sa tshwanelang fa a ne a tsaya mosadi wa ga Uria wa Mohite a bo a romela monna yono yo o se nang molato kwa pele kwa ntweng gore a bolawe. (2 Samuele 11:1-17) Eleruri bosaitekanelang bo dira gore go nne boima gore batho ba dirise maatla a bone ka tsela e e tshwanetseng. Mme fa batho ba ba nang le taolo e le ba ba sa tlotleng Jehofa, ba dirisa maatla a bone ka tsela e e maswe le go feta. Fa radipolotiki mongwe wa kwa Boritane a sena go tlhalosa tsela e bomopapa bangwe ba Katoliki ba simolotseng pogiso mo mafelong a le mantsi ka yone, o ne a re: “Go nna le maatla go ka senya motho, mme go nna le maatla a a feletseng gone go ka senya motho ka tsela e e feteletseng.” Re ntse re akantse ka dilo tse di diragetseng mo hisitoring tse di senolang gore batho ga ba bolo go dirisa maatla a bone ka tsela e e sa tshwanelang, a re sekasekeng potso eno: Ke ka ntlha yang fa re tshwanetse go tlotla taolo?

KE KA NTLHA YANG FA RE TSHWANETSE GO TLOTLA TAOLO?

6, 7. (a) Tsela e re ratang Jehofa ka yone e re tlhotlheletsa gore re dire eng, mme ka ntlha yang? (b) Go nna kutlo go akaretsa gore re nne le boikutlo bofe, mme re ka nna kutlo jang?

⁶ Mabaka a a utlwalang thata a go bo re tlotla taolo ke ka ntlha ya lorato—tsela e re ratang Jehofa, e re ratang ba bangwe le e re ithatang ka yone. Ka gonne re rata Jehofa go gaisa sengwe le sengwe, re batla go ipedisa pelo ya gagwe. (Bala Diane 27:11; Mareko 12:29, 30.) Re itse gore bolaodi jwa gagwe, tshwanelo ya gagwe ya go busa lobopo, e ile ya gwetlhiwa mo lefatsheng fa e sa le botsuolodi bo simolola kwa Edene, le gore bontsi jwa batho ba mo letlhakoreng la ga Satane mme ba ganne puso ya ga Jehofa. Re itumelela go nna mo letlhakoreng la ga Jehofa. Fa re bala mafoko a a monate thata a a mo go Tshenolo 4:11, dipelo tsa rona di phophoma ka boitumelo. Re lemoga sentle gore Jehofa ke Mmusi yo o tshwanetseng wa lobopo! Re tshegetsa bolaodi jwa ga Jehofa, re dumela go laolwa ke ene mo botshelong jwa rona jwa letsatsi le letsatsi.

⁷ Tlotlo e e ntseng jalo ga se kgang ya gore re nne kutlo fela. Re utlwa Jehofa re sa belaele ka gonne re a mo rata. Le fa go ntse jalo, go tla nna le dinako tse ka tsone go nna kutlo go tla nnang boima thata mo go rona. Ka dinako tse di ntseng jalo, re tla tshwanelwa ke go ithuta go nna kutlo jaaka mosimanyana yo o umakilweng kwa tshimologong. Re gakologelwa gore Jesu o ne a ineela go dira thato ya ga Rraagwe tota le fa go dira jalo go ne go bonala go le boima. O ne a raya Rraagwe a re: “A go diragale thato ya gago, e seng ya me.”—Luke 22:42.

8. (a) Go ikobela taolo ya ga Jehofa gompieno gantsi go akaretsa eng, mme ke eng se se bontshang gore Jehofa o ikutlwa jang ka seno? (b) Ke eng se se ka re thusang go reetsa kgakololo le go amogela kotlhao? (Bona lebokose le le reng “Reetsa Kgakololo Mme o Amogele Kotlhao.”)

⁸ Gone mme, Jehofa ga a bue le rona ka tlhamalalo gompieno; o dirisa Lefoko la gagwe le batho mo lefatsheng. Gantsi re bontsha gore re ikobela taolo ya ga Jehofa ka go tlotla batho ba a ba tlhomileng, kgotsa ba a ba letleletseng go tswelela ba na le taolo mo go rona. Ka sekai, fa re ka tsuologela batho bao, ra gana go amogela kgakololo le kgalemo ya bone e e tswang mo Baebeleng, re tla bo re kgopisa Modimo wa rona. Fa Baiseraele ba ne ba ngongorega le go tsuologela Moshe, Jehofa o ne a tsaya gore ba tsuologela ene ka tlhamalalo.—Dipalo 14:26, 27.

9. Ke ka ntlha yang fa tsela e re ratang ba bangwe ka yone e re tlhotlheletsa go tlotla taolo? Tshwantsha.

⁹ Gape re bontsha go tlotla taolo ka gonne re rata ba bangwe. Ka tsela efe? Akanya fela o le lesole. E le gore masole a atlege le go fenya, go ikaegile ka gore lesole lengwe le lengwe le dirisane le molaodi wa masole, le mo utlwe le go mo tlotla. Fa o ne o ka se ikobele taolo, masole a mangwe a ne a tla tsena mo kotsing. Gone ke boammaaruri, masole a baka tshenyo e e seng kana ka sepe mo lefatsheng gompieno. Le fa go ntse jalo, Jehofa o na le masole a a dirang fela se se molemo. Baebele e bua ka Modimo ka makgetlo a le makgolokgolo e re ke “Jehofa wa masomosomo.” (1 Samuele 1:3) Ke Molaodi wa dibopiwa di le dintsintsi tse di maatla tsa semoya. Ka dinako tse dingwe, Jehofa o tshwantsha batlhanka ba gagwe mo lefatsheng le mophato wa sesole. (Pesalema 68:11; Esekiele 37:1-10) Fa re ka tsuologela batho ba Jehofa a ba tlhomileng gore ba re laole, a re tla bo re sa tsenye masole ka rona a semoya mo kotsing? Fa Mokeresete a tsuologela bagolwane ba ba tlhomilweng, ba bangwe mo phuthegong ba ka amega le bone. (1 Bakorintha 12:14, 25, 26) Fa ngwana a tsuologa, lelapa lotlhe le a amega. Ka jalo re bontsha gore re rata batho ba bangwe ka go nna le moya o o bontshang tlotlo le tirisanommogo.

10, 11. Go nna le keletso e e siameng ya gore re solegelwe molemo go re tlhotlheletsa jang gore re ikobele taolo?

¹⁰ Gape re tlotla taolo ka gonne fa re dira jalo go solegelwa rona molemo. Fa Jehofa a re kopa gore re tlotle taolo, gantsi o umaka melemo e re tla e bonang fa re dira jalo. Ka sekai, o bolelela bana gore ba ikobele batsadi ba bone gore ba tshele botshelo jo boleele le jo bo itumedisang. (Duteronome 5:16; Baefeso 6:2, 3) O re bolelela gore re tlotle bagolwane ba phuthego ka gonne fa re sa ba tlotle seo se tla senya kamano ya rona le ene. (Bahebera 13:7, 17) A re re ikobele balaodi ba lefatshe gore re tle re sireletsege.—Baroma 13:4.

¹¹ A ga o dumele gore go itse lebaka la go bo Jehofa a batla gore re ikobe go re thusa go tlotla taolo? Ka jalo a re sekasekeng kafa re ka tlotlang taolo ka gone mo dikarolong di le tharo tsa konokono tsa botshelo.

GO BONTSHA TLOTLO MO LELAPENG

12. Jehofa o neile monna yo o nyetseng le rre seabe sefe mo lelapeng, mme monna a ka diragatsa seabe seo jang?

¹² Jehofa ka boene o dirile thulaganyo ya lelapa. E re ka Jehofa e le Modimo wa thulaganyo, o rulagantse lelapa gore le bereke sentle. (1 Bakorintha 14:33) O neile monna yo o nyetseng le rre taolo ya go nna tlhogo ya lelapa. Monna o tlotla Tlhogo ya gagwe, Keresete Jesu, ka go etsa tsela e Jesu a dirisang botlhogo jwa gagwe ka yone mo phuthegong. (Baefeso 5:23) Ka jalo, monna ga a tshwanela go palelwa ke go rwala boikarabelo jwa gagwe mme o tshwanetse go ikemisetsa go bo dira sentle; e bile ga a tshwanela go gatelela kgotsa go tshwara ba bangwe makgwakgwa, mme go na le moo o tshwanetse go bontsha lorato, go nna tekatekano le pelonomi. O gakologelwa gore taolo e a nang le yone e lekanyeditswe—ga e fete taolo ya ga Jehofa.

13. Mosadi yo o nyetsweng le mmè a ka diragatsa maikarabelo a gagwe jang mo lelapeng ka tsela e e itumedisang Jehofa?

¹³ Mosadi yo o nyetsweng le mmè o tshwanetse go nna mothusi wa monna wa gagwe kgotsa motlatsi. Le ene o neilwe taolo mo lelapeng, ka go bo Baebele e bua ka “molao wa ga mmago.” (Diane 1:8) Gone mme, taolo e a nang le yone ga e lekane le ya monna wa gagwe. Mosadi wa Mokeresete o tlotla taolo ya monna wa gagwe ka go mo thusa go diragatsa maikarabelo a gagwe a go nna tlhogo ya lelapa. Ga a mo nyenyefatse, ga a mo laole e bile ga a tseye maemo a gagwe. Go na le moo, o tshegetsa monna wa gagwe e bile o dirisana sentle le ene. Fa a sa dumalane le ditshwetso tsa monna wa gagwe, a ka nna a ntsha maikutlo a gagwe ka tlotlo, mme o nna a ikoba. Fa monna wa gagwe e se modumedi, a ka nna a lebana le maemo a a boima, mme go ikoba ga gagwe go ka tlhotlheletsa monna go batla Jehofa.—Bala 1 Petere 3:1.

14. Bana ba ka itumedisa batsadi ba bone le Jehofa jang?

¹⁴ Bana ba itumedisa Jehofa fa ba ikobela borraabone le bommaabone. Gape ba tlotla batsadi ba bone le go ba itumedisa. (Diane 10:1) Mo malapeng a motsadi a le mongwe, bana ba dirisa molaomotheo o o tshwanang wa go ikoba, ba lemoga gore motsadi wa bone a ka tswa a tlhoka thata gore ba mo tshegetse le go dirisana sentle le ene. Mo malapeng a maloko otlhe a diragatsang maikarabelo a Modimo a ba a neileng, go nna le kagiso le boipelo jo bogolo. Seno se dira gore Mosimolodi wa malapa otlhe Jehofa Modimo a tlotlwe.—Baefeso 3:14, 15.

GO BONTSHA TLOTLO MO PHUTHEGONG

15. (a) Re ka bontsha jang mo phuthegong gore re tlotla taolo ya ga Jehofa? (b) Ke melaometheo efe e e ka re thusang go ikobela ba ba eteletseng pele mo phuthegong? (Bona lebokose le le reng “Utlwang ba ba Etelelang Pele.”)

¹⁵ Jehofa o tlhomile Morwawe go nna Molaodi mo phuthegong ya Bokeresete. (Bakolosa 1:13) Jesu le ene o neile ‘motlhanka wa gagwe yo o boikanyego le yo o botlhale’ kabelo ya go thusa batho ba Modimo mo lefatsheng go obamela Jehofa. (Mathaio 24:45-47) Setlhopha se se Laolang sa Basupi ba ga Jehofa se emela setlhopha sa motlhanka. Fela jaaka go ne go direga mo diphuthegong tsa Bokeresete tsa lekgolo la ntlha la dingwaga, bagolwane gompieno ba amogela ditaelo le kgakololo go tswa kwa Setlhopheng se se Laolang, e ka ne e le ka tlhamalalo kgotsa ka baemedi ba sone, ba ba jaaka balebedi ba ba etang. Fa mongwe le mongwe wa rona a tlotla taolo ya bagolwane ba Bakeresete, o a bo a ikobela Jehofa.—Bala 1 Bathesalonika 5:12; Bahebera 13:17.

16. Bagolwane ba tlhomiwa ke moya o o boitshepo ka tsela efe?

¹⁶ Bagolwane le batlhanka ba bodiredi ga ba a itekanela. Ba dira diphoso fela jaaka rona. Le fa go ntse jalo, bagolwane ke “dimpho tse e leng banna,” ba thusa phuthego go nna e nonofile semoyeng. (Baefeso 4:8) Bagolwane ba tlhomiwa ke moya o o boitshepo. (Ditiro 20:28) Jang? Ka gore banna bano ba tshwanetse gore pele ba fitlhelele ditshwanelego tse di mo Lefokong la Modimo le le tlhotlheleditsweng ka moya. (1 Timotheo 3:1-7, 12; Tito 1:5-9) Gape, bagolwane ba ba sekasekang gore a mokaulengwe o a tshwanelega ba rapela ka tlhoafalo gore ba kaelwe ke moya o o boitshepo wa ga Jehofa.

17. Ke ka ntlha yang fa ka dinako tse dingwe basadi ba Bakeresete ba rwala mo tlhogong fa ba dira ditiro dingwe mo phuthegong?

¹⁷ Mo phuthegong, go ka nna ga direga gore ka dinako tse dingwe bagolwane le batlhanka ba bodiredi ba bo ba seyo go dira tiro e gantsi e abelwang bone, jaaka go tshwara pokano ya tirelo ya tshimo. Mo maemong ao, bakaulengwe ba bangwe ba ba kolobeditsweng ba ka dira tiro eo. Fa ba seyo, bokgaitsadi ba ba tshwanelegang ba Bakeresete ba ka tshwara pokano eo. Le fa go ntse jalo, fa mosadi a dira tiro e gantsi e abelwang monna yo o kolobeditsweng, o tshwanetse go rwala mo tlhogong.a (1 Bakorintha 11:3-10) Seno ga se nyenyefatse basadi. Go na le moo, se ba naya sebaka sa go tlotla thulaganyo ya ga Jehofa ya botlhogo, mo lelapeng le mo phuthegong.

GO TLOTLA TAOLO YA BALAODI BA LEFATSHE

18, 19. (a) O ka tlhalosa jang melaometheo e e tlhalosiwang mo go Baroma 13:1-7? (b) Re bontsha jang gore re tlotla balaodi ba lefatshe?

¹⁸ Bakeresete ba boammaaruri ba nna kelotlhoko gore ba dire se se tlhalosiwang mo go Baroma 13:1-7. (Bala.) Fa o ntse o bala ditemana tseo, o ka kgona go bona gore “balaodi ba bagolo” ba ba umakiwang moo ke dipuso tsa lefatshe. Fa fela Jehofa a sa ntse a letlile dipuso tseno tsa batho go nna gone, di dira ditiro tse di botlhokwa, di dira gore dilo di tsamaye sentle ka selekanyo se se rileng e bile di dira ditiro tse dingwe tse di tlhokegang. Re bontsha gore re tlotla balaodi bano ka go ikobela melao. Re tlhomamisa gore re duela makgetho a re a kolotang, re tlatsa sentle diforomo kgotsa ditlankana dipe tse puso e di tlhokang, re ikobela melao epe e e amang rona, ba lelapa la rona, kgwebo le dilo tse re nang le tsone. Le fa go ntse jalo, ga re ikobele balaodi ba lefatshe fa ba batla gore re se ka ra utlwa Modimo. Go na le moo, re araba fela jaaka baaposetoloi ba bogologolo: “Re tshwanetse go utlwa Modimo e le mmusi bogolo go batho.”—Ditiro 5:28, 29; bona lebokose la setlhogo se se reng “Ke Tshwanetse go Ikobela Taolo ya ga Mang?”

¹⁹ Gape re tlotla balaodi ba lefatshe ka tsela e re dirisanang le ba bangwe ka yone. Ka dinako tse dingwe, re ka nna ra dirisana ka tlhamalalo le badiredi ba puso. Moaposetoloi Paulo o ne a dirisana le babusi ba ba jaaka Kgosi Herode Ageripa le Mmusi Feseto. Banna bano ba ne ba sa siama, mme Paulo o ne a bua le bone ka tlotlo. (Ditiro 26:2, 25) Re etsa sekao sa ga Paulo, e ka ne modiredi yo re buisanang le ene e le mmusi yo o maatla kgotsa lepodise. Kwa sekolong, basha ba Bakeresete ba leka go tlotla barutabana ba bone le badiredi le batho ba ba berekang mo sekolong. Gone mme, ga re tlotle fela batho ba ba tlotlang se re se dumelang; gape re tlotla batho ba ba ganetsang Basupi ba ga Jehofa. Tota, batho ba e seng Basupi ba tshwanetse go lemoga gore re tlotla ba bangwe.—Bala Baroma 12:17, 18; 1 Petere 3:15.

20, 21. Mengwe ya melemo e re e bonang fa re tlotla ba ba nang le taolo ke efe?

²⁰ A re bontsheng tlotlo ka dinako tsotlhe. Moaposetoloi Petere o ne a re: “Tlotlang batho ba mefuta yotlhe.” (1 Petere 2:17) Batho ba ka itumela thata fa ba lemoga gore re ba tlotla tota. Gakologelwa gore nonofo eno e bonwa ka sewelo tota gompieno. Ka jalo, fa re bontsha tlotlo re a bo re utlwa taelo eno ya ga Jesu: “A lesedi la lona le phatsime fa pele ga batho, gore ba tle ba bone ditiro tsa lona tse di molemo mme ba neye Rraalona yo o kwa magodimong kgalalelo.”—Mathaio 5:16.

²¹ Mo lefatsheng leno le le mo lefifing, batho ba ba molemo ba gogelwa kwa leseding la semoya. Ka jalo fa re bontsha tlotlo mo lelapeng, mo phuthegong le mo balaoding ba lefatshe, seo se ka kgatlha bangwe mme sa dira gore ba tle go tsamaya le rona mo leseding. A bo seno e ka nna selo se se molemo jang ne! Mme le fa go ka se nne jalo, go na le sengwe se re tlhomamisegileng ka sone. Tsela e re tlotlang batho ka yone e itumedisa Jehofa Modimo e bile e re thusa go tswelela re le mo loratong lwa gagwe. Ga go na tuelo epe e e ka gaisang eo!