Kgaolo 14
Bontle Jwa Setulo sa Bogosi sa ga Jehofa sa Kwa Legodimong
Ponatshegelo 2—Tshenolo 4:1–5:14
Setlhogo: Ditiragalo tse di boitshegang fa pele ga setulo sa bogosi sa Modimo sa katlholo
Nako ya go diragadiwa: Ponatshegelo eno e bontsha ditiragalo tse di diragetseng go simologa ka 1914 go ya bokhutlong jwa Dingwaga tse di Sekete le go di pota ka kwa, fa sebopiwa sengwe le sengwe se se mo legodimong, le se se mo lefatsheng se tla bo se baka Jehofa.—Tshenolo 5:13.
1. Ke ka ntlha yang fa re tshwanetse go kgatlhegela thata diponatshegelo tse Johane a re bolelelang tsone?
JOHANE o simolola go re tlhalosetsa diponatshegelo tse dingwe tse di kgatlhang. O sa ntse a le mo letsatsing la Morena ka tlhotlheletso. Jalo, se a se tlhalosang se botlhokwa thata mo go rona ba tota re tshelang mo letsatsing leo. Ka diponatshegelo tseno, Jehofa o senola dilo tsa selegodimo tse di sa bonaleng a ba a re bolelela pono ya gagwe ka dikatlholo tse di tla diragadiwang mo lefatsheng. Jalo he, e kane re na le tsholofelo ya go tshela kwa legodimong kana mo lefatsheng, ditshenolo tseno di re thusa go bona boemo jwa rona mo boikaelelong jwa ga Jehofa. Ka jalo, rotlhe re tshwanetse go kgatlhegela thata mafoko a ga Johane a a reng: “Go itumela yo o balelang kwa godimo le ba ba utlwang mafoko a boporofeti jono, le ba ba bolokang dilo tse di kwadilweng mo go jone.”—Tshenolo 1:3.
2. Johane jaanong o nna le tshono efe?
2 Se Johane a se bonang morago ga moo se gaisa kgakala selo le fa e ka nna sefe se motho wa segompieno a ka se bonang mo theiping ya bidio! O kwala jaana: “Morago ga dilo tseno ka leba, mme, bona! kgoro ya bo e bulegile kwa legodimong, mme lentswe la ntlha le ke neng ka le utlwa le ne e kete la terompeta, le bua le nna, le re: ‘Tlhatlogela kwano, mme ke tla go bontsha dilo tse di tla diragalang.’” (Tshenolo 4:1) Johane ka ponatshegelo o tsena mo magodimong a a sa bonaleng kwa Jehofa a leng teng, a le kgakala thata kwa godimodimo ga loapi lo lo bonalang lo basutlhalefaufau ba fitlhileng kwa go lone, ee kwa godimodimo ga masomosomo a dinaledi tsa lobopo lo lo bonalang. Jaaka e kete o tsena ka kgoro e e butsweng, Johane o lalediwa go iponela ka botlalo thitibalo e e tshwarisang kgakge ya magodimo tota a semoya koo Jehofa ka sebele a ntseng mo setulong sa bogosi gone. (Pesalema 11:4; Isaia 66:1) A tshiamelo e kgolo ruri!
3. Lentswe le e keteng la “terompeta” le re gakolola eng, mme kwantle ga pelaelo Motswedi wa lone ke mang?
3 Baebele ga e tlhalose gore ‘lentswe leno la ntlha’ ke la ga mang. Fela jaaka lentswe le legolo la ga Jesu le le utlwetseng pelenyana, le na le modumo o o tshwanang le wa terompeta o o ntshang taolo. (Tshenolo 1:10, 11) Le gakolola motho ka modumo wa lonaka o o kwa godimo thata o o neng o bolelela batho gore Jehofa o kwa Thabeng ya Sinai. (Ekesodo 19:18-20) Kwantle ga pelaelo, Jehofa ke Motswedi o mogolo wa ditaolo. (Tshenolo 1:1) O butse kgoro gore Johane, a le mo ponatshegelong, a kgone go tsena mo lefelong la boitshepo jwa maitshepo mo sebakeng se segolo sa bolaodi jwa ga Jehofa.
Go Nna Gone ga ga Jehofa ka Kgalalelo
4. (a) Ponatshegelo ya ga Johane e raya eng mo Bakereseteng ba ba tloditsweng? (b) Ponatshegelo e raya eng mo go ba tsholofelo ya bone e leng go tshelela ruri mo lefatsheng?
4 Johane o bona eng? Reetsa jaaka jaanong a re bolelela ka tshono e ntlentle e a e newang: “Morago ga dilo tseno ka nna mo maatleng a moya ka yone nako eo: mme, bona! setulo sa bogosi se ne se le mo mannong a sone kwa legodimong, mme go na le yo o ntseng mo setulong seno sa bogosi.” (Tshenolo 4:2) Ka ponyo ya leitlho, Johane o tsewa ka tsela ya semoya ke maatla a Modimo a a dirang a mo isa kwa setulong sa bogosi sa ga Jehofa. A bo seno se itumedisa Johane jang ne! Mono o bontshiwa go sa le gale pono e e tsabakelang ya magodimo a ene le Bakeresete ba bangwe ba ba tloditsweng ba boloketsweng ‘boswa jo bo sa senyegeng le jo bo sa leswafalang le jo bo sa nyeleleng’ mo go one. (1 Petere 1:3-5; Bafilipi 3:20) Batho ba tsholofelo ya bone e leng go tshelela ruri mo lefatsheng, le bone ponatshegelo ya ga Johane e ba tsholetse sengwe se se botlhokwa thata. E ba thusa go tlhaloganya kgalalelo ya go nna gone ga ga Jehofa le ya sebopego sa puso ya selegodimo e e dirisiwang ke Jehofa mo go atlholeng ditšhaba mme kwa morago mo go laoleng matshelo a batho mo lefatsheng. Ruri Jehofa ke Modimo yo o dirang dilo ka thulaganyo e e manontlhotlho thata!
5. Ke selo sefe sa mmatota se Johane a se bonang se se neng se tshwantshediwa ke senno sa letlole la kgolagano?
5 Bontsi jwa se Johane a se bonang kwa legodimong se tshwana le tsela e motlaagana o neng o ntse ka yone kwa nageng. O ne wa agiwa dingwaga di le 1 600 pelenyana e le lefelo le le boitshepo la kobamelo ya boammaaruri la Baiseraele. Mo Boitshepong jwa Maitshepo jwa motlaagana oo go ne go le letlole la kgolagano, mme Jehofa ka sebele o ne a bua a le mo godimo ga sekhurumelo sa gouta e e sa pekwang sa Letlole leo. (Ekesodo 25:17-22; Bahebera 9:5) Ka gone, sekhurumelo sa Letlole leo se ne se tshwantshetsa setulo sa bogosi sa ga Jehofa. Johane jaanong o bona se tota se neng se kaiwa ke selo sele sa tshwantshetso: Molaodi Mogolo Jehofa ka sebele a ntse mo setulong sa gagwe sa bogosi se sentle fela thata se se tlotlometseng kwa legodimong!
6. Johane o re fa tlhaloso efe kaga Jehofa, mme ke ka ntlha yang fa seno se tshwanela?
6 Ka go sa tshwane le baporofeti ba pele ba ba neng ba bona diponatshegelo tsa setulo sa bogosi sa ga Jehofa, Johane ga a tlhalose thatathata gore Moitshepi yo o dutseng mo go sone o ntse jang. (Esekiele 1:26, 27; Daniele 7:9, 10) Mme Johane o re bolelela kafa a boneng ka teng Yo o dutseng mo setulong sa bogosi ka mafoko ano: “Mme yo o ntseng, ka ponalo, o tshwana le leje la jasepere le leje la botlhokwatlhokwa la mmala o mohibidu, mme go dikologa setulo seno sa bogosi go na le motshe wa godimo o o tshwanang le emeraleda ka ponalo.” (Tshenolo 4:3) A bontle jo bo sa tshwaneng le bope! Johane o lemoga bontle jo bo phepa, jo bo tsabakelang jo bo tshwanang le jwa majana a a tlhokegang a a borethe, a a phatsimang fela thata. A bo seno se dumalana jang ne le tlhaloso ya ga morutwa Jakobe kaga Jehofa jaaka “Rara wa masedi a selegodimo”! (Jakobe 1:17) Ka bokhutshwane fela morago ga go kwala Tshenolo, Johane ka boene o ne a tlhalosa jaana: “Modimo ke lesedi mme ga go na lefifi ka gope seoposengweng le ene.” (1 Johane 1:5) A bo Jehofa e le Motho wa kgalalelo e kgolo jang ne!
7. Motshe wa godimo o o dikaganyeditseng setilo sa bogosi sa ga Jehofa o re tlhokomedisa eng?
7 Ela tlhoko gore Johane o bona motshe wa godimo mo tikologong ya setulo sa bogosi, wa mmala wa botala jwa emeraleda. Lefoko la Segerika fano le le ranotsweng ka gore motshe wa godimo (irʹis) le tlhalosa bokgolokwe jo bo feletseng. Motshe wa godimo o umakiwa la ntlha mo Baebeleng malebana le motlha wa ga Noa. Fa metsi a Morwalela a sena go tšha, Jehofa o ne a dira gore motshe wa godimo o bonale mo lerung, mme o ne a tlhalosa gore o ne o tshwantshetsa eng ka mafoko ano: “Ke baya motshe wa me wa godimo mo lerung, mme o tla nna sesupo sa kgolagano fa gare ga me le lefatshe. Mme eleruri ke tla gakologelwa kgolagano ya me e e fa gare ga me le lona le moya mongwe le mongwe o o tshelang mo gare ga nama yotlhe; e bile metsi ga a kitla a tlhola a nna morwalela gore a senye nama yotlhe.” (Genesise 9:13, 15) Ponatshegelo eo ya selegodimo e ne e tla gakolola Johane eng he? Motshe wa godimo o a neng a o bona o tshwanetse wa bo o ne wa mo gakolola kafa go tlhokegang ka gone go nna le kamano e e kagiso le Jehofa, e e tshwanang le e e ipelelwang ke ba setlhopha sa Johane gompieno. E ne e tla gatisetsa gape mo mogopolong wa gagwe tshisibalo le kagiso ya go nna gone ga ga Jehofa, tshisibalo eo e tla anamelang mo bathong botlhe ba ba kutlo fa Jehofa a tsharololela motlaagana wa gagwe mo sethong mo baaging ba lefatshe le lesha.—Pesalema 119:165; Bafilipi 4:7; Tshenolo 21:1-4.
Go Tlhaola Bagolwane ba ba 24
8. Ke bomang ba Johane a ba bonang ba dikaganyeditse setulo sa bogosi, mme ba tshwantshetsa bomang?
8 Johane o ne a itse gore go ne go tlhophiwa baperesiti go direla mo motlaaganeng wa bogologolo. Jalo o tshwanetse a bo a ne a gakgamaditswe ke go bona se se latelang se a se tlhalosang: “Mme go dikologa setulo seno sa bogosi go na le ditulo tsa bogosi di le masome a mabedi le bonè, mme mo ditulong tseno tsa bogosi ka bona go ntse bagolwane ba ba masome a mabedi le bonè ba apere diaparo tsa kafa ntle tse ditshweu, mme mo godimo ga ditlhogo tsa bone ga bo go le dirwalo tsa gouta.” (Tshenolo 4:4) Ee, mo boemong jwa baperesiti, go na le bagolwane ba le 24, ba ba dutseng mo ditulong tsa bogosi ba bile ba rwele dirwalo tsa bogosi jaaka dikgosi. Bagolwane bano ke bomang? Ga se bape fa e se batlodiwa ba phuthego ya Bokeresete, ba ba tsositsweng le go nna mo boemong jwa selegodimo jo Jehofa a bo ba solofeditseng. Re itse seo jang?
9, 10. Re itse jang gore bagolwane ba ba 24 ba tshwantshetsa phuthego ya Bakeresete ba ba tloditsweng ba le mo boemong jwa bone jo bo galalelang jwa selegodimo?
9 Sa ntlha, ba rwele dirwalo tsa bogosi. Baebele e tlhalosa gore Bakeresete ba ba tloditsweng ba amogela ‘serwalo se se sa senyegeng’ ba bile ba bona botshelo jo bo sa khutleng—e bong bosasweng. (1 Bakorintha 9:25; 15:53, 54) Mme e re ka bagolwane bano ba ba 24 ba ntse mo ditulong tsa bogosi, dirwalo tsa bogosi tsa gouta mo ditemaneng tseo di emela bolaodi jwa segosi. (Bapisa Tshenolo 6:2; 14:14.) Seno se tshegetsa tshwetso ya gore bagolwane ba ba 24 ba tshwantshetsa balatedi ba ba tloditsweng ba ba kelotlhoko ba ga Jesu ba le mo maemong a selegodimo, ka gonne Jesu o dirile kgolagano le bone ya go nna mo ditulong tsa bogosi mo Bogosing jwa gagwe. (Luke 22:28-30) Ga go na ope yo go tlhalosiwang gore o busa fa pele ga ga Jehofa kwa legodimong—le fa e le baengele tota—fa e se Jesu fela le bagolwane bano ba ba 24.
10 Seno se dumalana le tsholofetso e Jesu a e solofeditseng phuthego ya Balaodikia ya go re: “Yo o fenyang ke tla dira gore a nne le nna mo setulong sa me sa bogosi.” (Tshenolo 3:21) Mme kabelo ya selegodimo ya bagolwane ba ba 24 ga se ya go busa fela. Mo tshimologong ya buka ya Tshenolo, Johane o ne a bua jaana kaga Jesu: “O ne a dira gore re nne bogosi, baperesiti ba Modimo wa gagwe le Rara.” (Tshenolo 1:5, 6) Bano ke dikgosi gape ke baperesiti. “Ba tla nna baperesiti ba Modimo le ba ga Keresete, mme ba tla busa e le dikgosi le ene ka dingwaga di le sekete.”—Tshenolo 20:6.
11. Ke ka ntlha yang fa go tshwanela go bo palo ya bagolwane e le 24, mme palo eo e kaya eng?
11 Ke eng se se kaiwang ke palo ya 24, mo Johane a bonang bagolwane ba le 24 mo tikologong ya setulo sa bogosi? Ka ditsela di le dintsi, bano ba ne ba tshwantshediwa ke baperesiti ba ba ikanyegang ba Iseraele wa bogologolo. Moaposetoloi Petere o ne a kwalela Bakeresete ba ba tloditsweng a re: “Lo lotso lo lo tlhophilweng, boperesiti jwa segosi, setšhaba se se boitshepo, setlhopha sa batho ba ba ruilweng ka tsela e e kgethegileng.” (1 Petere 2:9) Sengwe se se kgatlhang ke gore boperesiti joo jwa Bajuda ba bogologolo bo ne jwa kgaoganngwa ka ditlhopha di le 24. Setlhopha sengwe le sengwe se ne se abetswe dibeke dingwe mo ngwageng tse ba tla direlang Jehofa mo go tsone, mo e leng gore tirelo e e boitshepo e ne e dirwa kwantle ga go kgaotsa. (1 Ditiragalo 24:5-19) Go a tshwanela, he, go bo mo ponatshegelong ya ga Johane go buiwa ka bagolwane ba ba 24 ba boperesiti jwa selegodimo ka gonne boperesiti jono bo direla Jehofa nako le nako, kwantle ga go kgaotsa. Fa ba feletse, ba tla bo ba le ditlhopha di le 24, sengwe le sengwe se na le bafenyi ba le 6 000, ka gonne Tshenolo 14:1-4 e re bolelela gore ba ba 144 000 (24 x 6 000) ba ‘rekilwe mo bathong’ go ya go ema mo Thabeng ya selegodimo ya Siona le Kwana, e bong Jesu Keresete. E re ka palo ya 12 e kaya thulaganyo e e lekalekanang e e theilweng ke Modimo, 24 e menaganya sebedi—kana e tiisa—thulaganyo ya go nna jalo.
Dikgadima, Mantswe, le Ditumo tsa Maru
12. Moragonyana Johane o bona le go utlwa eng, mme “dikgadima le mantswe le ditumo tsa maru” di re gakolola eng?
12 Morago ga moo Johane o bona le go utlwa eng? “Mme mo setulong sa bogosi go tswa dikgadima le mantswe le ditumo tsa maru.” (Tshenolo 4:5) A bo seno se gakolola jang ne ka ditiragalo tse dingwe tse di boitshegang tse di supang nonofo ya ga Jehofa ya selegodimo! Ka sekai, fa Jehofa a ne a ‘fologela’ mo Thabeng ya Sinai, Moshe o ne a bega jaana: “Mme e rile go nna moso mo letsatsing la boraro ga diragala gore go nne le ditumo tsa maru le dikgadima, le leru le le boima mo thabeng le modumo o o kwa godimo thata wa lonaka. . . . E rile modumo wa lonaka o ya o ntse o tlhatlogela kwa godimo o sa kgaotse, Moshe a simolola go bua, mme Modimo wa boammaaruri a simolola go mo araba ka lentswe.”—Ekesodo 19:16-19.
13. Ke eng se se tshwantshediwang ke dikgadima tse di tswang kwa setulong sa bogosi sa ga Jehofa?
13 Ka letsatsi la Morena, Jehofa o supa nonofo le bogone jwa gagwe ka tsela e e masisi! Nnyaa, e seng ka legadima la mmatota, ka gonne Johane o bona ditshupo. Dikgadima di emela eng, he? Ebu, go benya ga dikgadima go ka bonesa, mme gape go ka bolaya motho. Ka gone, dikgadima tseno tse di tswang kwa setulong sa bogosi sa ga Jehofa di tshwantshetsa sentle go phatsima ga tshedimosetso e a nnileng a e neela batho ba gagwe ka metlha mme, se e bileng e le sa botlhokwa go feta, melaetsa ya gagwe ya katlholo e e tshwanang le molelo.—Bapisa Pesalema 18:14; 144:5, 6; Mathaio 4:14-17; 24:27.
14. Mantswe a utlwetse jang gompieno?
14 Go tweng ka mantswe? Fa Jehofa a ne a fologela mo Thabeng ya Sinai, lentswe le ne la bua le Moshe. (Ekesodo 19:19) Mantswe a a tswang kwa legodimong a ne a ntsha bontsi jwa ditaelo le dipolelo tse di mo bukeng ya Tshenolo. (Tshenolo 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Gompieno le gone, Jehofa o neetse batho ba gagwe ditaelo le dipolelo, a ba thusa go tlhaloganya dipolelelopele tsa Baebele le melaometheo botoka. Gantsi tshedimosetso e e nayang lesedi e neetswe kwa dikopanong tsa merafe yotlhe, mme ka gone boammaaruri joo jwa Baebele bo boletswe mo lefatsheng ka bophara. Moaposetoloi Paulo o ne a bua jaana ka bareri ba ba ikanyegang ba dikgang tse di molemo: “Tota e bile, ‘modumo wa bone o tswetse mo lefatsheng lotlhe, le mafoko a bone a tswetse kwa dintlheng tsa lefatshe le le nang le banni.’”—Baroma 10:18.
15. Ke ditumo dife tsa maru tse di duleng kwa setulong sa bogosi mo karolong eno ya letsatsi la Morena?
15 Gantsi morago ga legadima go latela tumo ya maru. Dafide o ne a kaya fa tumo e e tlwaelegileng ya maru e le “lentswe la ga Jehofa” (Pesalema 29:3, 4) Fa Jehofa a ne a lwela Dafide kgatlhanong le baba ba gagwe, go ne ga bolelwa fa tumo ya maru e tswa kwa go Ene. (2 Samuele 22:14; Pesalema 18:13) Elihu o ne a raya Jobe a re lentswe la ga Jehofa le ne le utlwala jaaka tumo ya maru, jaaka A dira “dilo tse dikgolo tse re ka se di itseng.” (Jobe 37:4, 5) Mo karolong eno ya letsatsi la Morena, Jehofa o ‘dumile jaaka maru,’ a ntsha tlhagiso kaga ditiro tse dikgolo tse a tla di dirang kgatlhanong le baba ba gagwe. Medumo eno e megolo ya maru ya tshwantshetso e utlwetse ya ba ya nna ya utlwala mo lefatsheng lotlhe. Go tla bo go le sego wena fa o ile wa tlhokomela dipolelo tseno tse di dumang mme o dirisa loleme lwa gago ka botlhale go oketsa modumo wa tsone!—Isaia 50:4, 5; 61:1, 2.
Dipone Tsa Molelo le Lewatle la Sekagalase
16. Ke eng se se kaiwang ke “dipone di le supa tsa molelo”?
16 Johane o bona eng gape? O bona seno: “Mme go na le dipone di le supa tsa molelo tse di tukang fa pele ga setulo sa bogosi, mme tseno di kaya meya e le supa ya Modimo. Mme fa pele ga setulo sa bogosi go na le, jaaka e kete e ne e le lone tota, lewatle la sekagalase le tshwana le legweka.” (Tshenolo 4:5b, 6a) Johane ka boene o re bolelela se se kaiwang ke dipone tse supa ka go re: “Di kaya meya e le supa ya Modimo.” Palo bosupa e tshwantshetsa go felela ga selo mo ponong ya Modimo; ka gone, dipone tse supa di tshwanetse tsa bo di emela botlalo jwa maatla a a sedimosang a moya o o boitshepo. A bo setlhopha sa Johane se tshwanetse sa bo se leboga jang ne gompieno go bo se sikarisitswe tshedimosetso eno, le boikarabelo jwa go e fetisetsa mo bathong ba lefatshe ba ba tshwerweng ke tlala ya semoya! A bo re itumela jang ne go bo ngwaga le ngwaga dikhopi di le dimilione di le makgolokgolo tsa makasine wa Tora ya Tebelo di tswelela go phatsimisa lesedi leno ka dipuo di ka nna 150!—Pesalema 43:3.
17. ‘Lewatle la sekagalase le le tshwanang le legweka’ le tshwantshetsa eng?
17 Gape Johane o bona “lewatle la sekagalase le tshwana le legweka.” Seno se ka bo se tshwantshetsa eng mabapi le ba ba lalediwang kwa kgotlatshekelong ya selegodimo ya ga Jehofa? Paulo o ne a bua ka tsela e Jesu a itshekisitseng phuthego ka yone, “a e ntlafatsa ka metsi a a tlhatswang, ka lefoko.” (Baefeso 5:26) Pele ga loso lwa gagwe, Jesu o ne a raya barutwa ba gagwe a re: “Lo setse lo le phepa ka ntlha ya lefoko le ke le buileng le lona.” (Johane 15:3) Ka gone, ga go pelaelo gore lewatle leno le le tshwanang le legweka le lesweu le tshwanetse la bo le kaya Lefoko le le kwadilweng la Modimo, le le ntlafatsang. Baperesiti ba segosi ba ba tlang kwa go Jehofa ba tshwanetse ba bo ba ntlafaditswe ka botlalo ke Lefoko la gagwe.
Bonang—“Dibopiwa Tse Nnè Tse di Tshelang”!
18. Ke eng se Johane a bonang se le fa gare e bile se dikaganyeditse setulo sa bogosi?
18 Jaanong Johane o bona tiragalo e nngwe gape. O kwala jaana: “Mme mo gare ga setulo sa bogosi le go dikologa setulo sa bogosi go na le dibopiwa tse nnè tse di tshelang tse di tletseng matlho fa pele le kafa morago.”—Tshenolo 4:6b.
19. Ke eng se se tshwantshediwang ke dibopiwa tse nnè tse di tshelang, mme re itse seno jang?
19 Dibopiwa tseno di tshwantshetsa eng? Ponatshegelo e e kwadilweng ke moperofeti yo mongwe, e bong Esekiele, e re thusa go bona karabo. Esekiele o ne a bona Jehofa a dutse mo kareng ya selegodimo, e e neng e patilwe ke dibopiwa tse di tshelang tse di nang le dipopego tse di tshwanang le tse di tlhalosiwang ke Johane. (Esekiele 1:5-11, 22-28) Moragonyana, Esekiele o ne a bona gape kara eo ya setilo sa bogosi e patilwe ke dibopiwa dingwe tse di tshelang. Le fa go ntse jalo, ka nako eno, o bolela gore dibopiwa tseno ke ditšheruba. (Esekiele 10:9-15) Dibopiwa tse nnè tse di tshelang, tse Johane a di bonang di tshwanetse tsa bo di emela ditšheruba tse dintsintsi tsa Modimo—dibopiwa tsa maemo a a kwa godimo mo phuthegong ya Gagwe ya semoya. Johane o ne a ka se ka a go tsaya e le selo se se sa tlwaelegang go bona ditšheruba di ntse gaufiufi le Jehofa, e re ka mo thulaganyong ya bogologolo ya motlaagana, ditšheruba tse pedi tsa gouta di ne di beilwe mo godimo ga letlole la kgolagano, le le neng le emela setulo sa bogosi sa ga Jehofa. Lentswe la ga Jehofa le ne le neela setšhaba seo ditaelo, le tswa fa gare ga ditšheruba tseno.—Ekesodo 25:22; Pesalema 80:1.
20. Ke ka tsela efe go ka tweng dibopiwa tse nnè tse di tshelang di “mo gare ga setulo sa bogosi le go dikologa setulo sa bogosi”?
20 Dibopiwa tse nnè tseno di “mo gare ga setulo sa bogosi le go dikologa setulo sa bogosi.” Tota seno se rayang? Se ka tswa se kaya gore di eme go dikologa setulo sa bogosi mo sengwe le sengwe se emeng go lebagana le bogare jwa letlhakore lengwe le lengwe. Ka gone, baranodi ba Today’s English Version ba sobokanya tlhaloso ya ntlha ya Segerika ka tsela eno: “di eme go dikologa setulo sa bogosi mo matlhakoreng otlhe a sone.” Kwantle ga moo, tlhaloso eo e ka tswa e raya gore dibopiwa tse nnè tse di tshelang di mo boemong jo bo kwa godimo kwa legodimong koo setulo sa bogosi se leng gone. E bile gongwe, ke gone ka moo The Jerusalem Bible e ranolang polelwana eo ka go re: “fa gare, di phuthegile go dikologa setulo sa bogosi ka sebele.” Selo sa botlhokwa ke go nna gaufi ga ditšheruba tseo le setulo sa bogosi sa ga Jehofa, go tshwana fela le ditšheruba tse Esekiele a neng a di bona di le mo sekhutlong sengwe le sengwe sa kara ya phuthego ya ga Jehofa. (Esekiele 1:15-22) Seno sotlhe se dumalana le mafoko a Pesalema 99:1: “Jehofa e setse e le kgosi. . . . O ntse mo ditšherubeng.”
21, 22. (a) Johane o tlhalosa jang dibopiwa tse nnè tse di tshelang? (b) Ke eng se se tshwantshediwang ke ponalo ya sebopiwa sengwe le sengwe mo go tse nnè?
21 Johane o tswelela ka go re: “Mme sebopiwa sa ntlha se se tshelang se tshwana le tau, mme sebopiwa sa bobedi se se tshelang se tshwana le powana, mme sebopiwa sa boraro se se tshelang se na le sefatlhego se se tshwanang le sa motho, mme sebopiwa sa bonè se se tshelang se tshwana le ntsu e e fofang.” (Tshenolo 4:7) Ke ka ntlha yang fa dibopiwa tse nnè tseno di sa tshwane gotlhelele, sengwe le sengwe se farologane le se sengwe? Ga go pelaelo gore dibopiwa tseno tse di sa tshwaneng di tlotlomatsa dinonofo tse di farologaneng tsa Modimo. Sa ntlha, ke tau. Mo Baebeleng tau e dirisiwa go tshwantshetsa bopelokgale, bogolo jang mo go diragatseng tshiamiso le tshiamo. (2 Samuele 17:10; Diane 28:1) Ka gone, tau e emela sentle nonofo ya Modimo ya tshiamiso ya bopelokgale. (Duteronome 32:4; Pesalema 89:14) Sebopiwa sa bobedi se tshwana le powana. Poo e go akantsha nonofo efe? Mo Baiseraeleng poo e ne e le seruiwa sa botlhokwa ka ntlha ya maatla a yone. (Diane 14:4; bona le Jobe 39:9-11.) Powana he, e emela maatla, nonofo e kgolo e Jehofa a e nayang.—Pesalema 62:11; Isaia 40:26.
22 Sebopiwa sa boraro se na le sefatlhego se se tshwanang le sa motho. Seno se tshwanetse sa bo se emela lorato lwa bomodimo, e re ka mo lefatsheng motho e le ene fela yo a neng a bopiwa mo setshwanong sa Modimo, a na le nonofo e kgolo ya lorato (Genesise 1:26-28; Mathaio 22:36-40; 1 Johane 4:8, 16) Kwantle ga pelaelo, ditšheruba tseno di bontsha nonofo eno jaaka di direla go dikologa setulo sa bogosi sa ga Jehofa. Go tweng jaanong ka sebopiwa sa bonè? Sone se tshwana le ntsu e e fofang fa o se lebile. Jehofa ka boene o tlhokomedisa go nna matlho a a bogale ga ntsu ka go re: “Matlho a yone a nna a lebile kwa kgakala.” (Jobe 39:29) Ka gone he, ntsu e tshwantshetsa botlhale jo bo botengteng. Jehofa ke Motswedi wa botlhale. Ditšheruba tsa gagwe di dirisa botlhale jwa bomodimo jaaka di utlwa ditaelo tsa gagwe.—Diane 2:6; Jakobe 3:17.
Go Bolelwa ga Pako ya ga Jehofa
23. ‘Go tlala matlho’ ga dibopiwa tse nnè tse di tshelang go tshwantshetsa eng, mme go nna ga tsone le diphuka tse tharo tse di sebedi le sebedi go gatelela eng?
23 Johane o tswelela ka tlhaloso ya gagwe: “Mme malebana le dibopiwa tse nnè tse di tshelang, sengwe le sengwe sa tsone se na le diphuka di le thataro; di tletse matlho go dikologa le kafa tlase. Mme ga di na boikhutso bosigo le motshegare jaaka di ntse di re: ‘O boitshepo, o boitshepo, o boitshepo Jehofa Modimo, Mothatayotlhe, ene yo o neng a le gone le yo o gone le yo o tlang.’” (Tshenolo 4:8) Go tlala matlho mono go kaya pono e e feletseng le e e bonelang kgakala. Dibopiwa tseno tse nnè tse di tshelang di dira seno kwantle ga go kgaotsa, ka go bo go sa tlhokege gore di robale. Di etsa yo go kwadilweng ka Ene ga twe: “Gonne, fa e le Jehofa ene, matlho a gagwe a ya kwa le kwa mo lefatsheng lotlhe gore a bontshe ba pelo ya bone e feletseng mo go ene nonofo ya gagwe.” (2 Ditiragalo 16:9) Ka go bo ditšheruba tseno di na le matlho a mantsi, di kgona go bona gongwe le gongwe. Ga go na se di sa se lemogeng. Ka gone, di itekanetse sentle go direla Modimo mo tirong ya gagwe ya go atlhola. Go bolelwa jaana ka ene: “Matlho a ga Jehofa a mo lefelong lengwe le lengwe, a nna a lebeletse ba ba bosula le ba ba molemo.” (Diane 15:3) Mme ka diphuka tse tharo tse di sebedi le sebedi—palo ya tharo e dirisiwa go supa kgatelelo mo Baebeleng—ditšheruba di ka kgona go fofela gongwe le gongwe ka bofefo jo bogolo di bolela le go diragatsa dikatlholo tsa ga Jehofa.
24. Ditšheruba di baka Jehofa jang, mme seno se kaya eng?
24 Reetsa! Pina ya pako e ditšheruba di e opelelang Jehofa e monate thata, e bile e ama maikutlo: “O boitshepo, o boitshepo, o boitshepo Jehofa Modimo, Mothatayotlhe, ene yo o neng a le gone le yo o gone le yo o tlang.” Gape, boraro bo supa bogolo. Ditšheruba di tlhomamisa ka botlalo boitshepo jwa ga Jehofa Modimo. Ke Motswedi le Tekanyetso ya bofelofelo ya boitshepo. Gape ke “Kgosi ya bosakhutleng,” ka metlha yotlhe ke “Alefa le Omega, wa ntlha le wa bofelo, tshimologo le bokhutlo.” (1 Timotheo 1:17; Tshenolo 22:13) Ditšheruba ga di na nako ya boikhutso jaaka di bolelela lobopo lotlhe dinonofo tse di se nang bolekanngo tsa ga Jehofa.
25. Dibopiwa tse di tshelang le bagolwane ba ba 24 ba kopana jang mo go obameleng Jehofa?
25 Legodimo la magodimo le tletse ka modumo wa go baka Jehofa! Tlhaloso ya ga Johane e a tswelela: “Mme le fa e le leng fela fa dibopiwa tse di tshelang di naya Yo o ntseng mo setulong sa bogosi kgalalelo le tlotlo le ditebogo, Yo o tshelang ka bosaengkae le go ya go ile, bagolwane ba ba masome a mabedi le bonè ba wela fa fatshe fa pele ga Yo o ntseng mo setulong sa bogosi mme ba obamela Yo o tshelang ka bosaengkae le go ya go ile, mme ba latlhela dirwalo tsa bone fa pele ga setulo sa bogosi, ba re: ‘O a tshwanela, Jehofa, wena Modimo wa rona, go amogela kgalalelo le tlotlo le maatla, ka gonne o bopile dilo tsotlhe, mme ka ntlha ya thato ya gago di ne tsa nna gone e bile di ne tsa bopiwa.’” (Tshenolo 4:9-11) Mo Dikwalong tsotlhe, eno ke nngwe ya dipolelo tse di molemolemo tsa go ntshetsa Jehofa malebogo, Modimo wa rona le Molaodi yo Mogolo!
26. Ke ka ntlha yang fa bagolwane ba ba 24 ba rolela Jehofa dirwalo tsa bone?
26 Bagolwane ba ba 24 ba na le mogopolo o o tshwanang le wa ga Jesu, ba bile ba latlhela dirwalo tsa bone fa pele ga ga Jehofa. Go kgakala thata le megopolo ya bone go itlotlomatsa fa pele ga Modimo. Ka boikokobetso ba lemoga gore boikaelelo fela jwa go nna dikgosi ga bone ke go mo leretse tlotlo le kgalalelo, fela jaaka Jesu a dira ka metlha. (Bafilipi 2:5, 6, 9-11) Ka go ikoba, ba itemoga jaaka ba ba kwa tlase ba bile ba bolela gore puso ya bone e ikaegile ka bolaodi jwa ga Jehofa. Ka gone, ba utlwana ka pelo yotlhe le ditšheruba le dibopiwa tse dingwe tsotlhe tse di ikanyegang mo go neeleng Modimo yo o tlhodileng dilo tsotlhe pako le kgalalelo.—Pesalema 150:1-6.
27, 28. (a) Tlhaloso ya ga Johane ya ponatshegelo eno e tshwanetse go re ama jang? (b) Go tsoga dipotso dife malebana le se Johane a se bonang le go se utlwa moragonyana?
27 Ke mang yo o ka se kang a tshikhinngwa ke go bala polelo ya ga Johane kaga ponatshegelo eno? E kgatlhisa fela thata, e molemolemo! Mme bommatota jwa dilo tseno bo tshwanetse jwa bo bo ntse jang? Bogolo jwa ga Jehofa ka bobone bo tshwanetse go tlhotlheletsa mongwe le mongwe yo o nang le pelo e e anaanelang go kopanela le dibopiwa tse nnè tse di tshelang le bagolwane ba ba 24 mo go bakeng Jehofa, ka thapelo le ka go bolela leina la Gagwe phatlalatsa. Yono ke Modimo yoo Bakeresete ba nang le tshiamelo ya go nna basupi ba gagwe gompieno. (Isaia 43:10) Gakologelwa gore ponatshegelo ya ga Johane e dira mo letsatsing la Morena, le re leng mo go lone gompieno. ‘Meya e supa’ ka metlha e iketleeleditse go re kaela le go re nonotsha. (Bagalatia 5:16-18) Gompieno go na le Lefoko la Modimo le le re thusang go nna boitshepo fa re direla Modimo o o boitshepo. (1 Petere 1:14-16) Ruri, re itumelela go balela kwa godimo mafoko a polelelopele eno. (Tshenolo 1:3) A bo a re tlhotlheletsa jang ne gore re ikanyege mo go Jehofa le go se letlelele lefatshe go re itaya tsebe mo go opeleng dipako tsa gagwe ka tlhagafalo!—1 Johane 2:15-17.
28 Go tla go fitlha fano, Johane o tlhalositse se a se bonang fa a ne a lalediwa go tsena ka kgoro e e butsweng kwa legodimong. Ka tsela e e tlhomologileng, o bega gore Jehofa, a le mo bontleng jotlhe jo bogolo jwa Gagwe le tlotlomalo, o ntse mo setulong sa Gagwe sa bogosi sa selegodimo. O dikaganyeditswe ke phuthego e kgolo go di feta tsotlhe ka maatla—e e bakaselang ka bontle le boikanyego. Tsheko ya bomodimo e tsweletse. (Daniele 7:9, 10, 18) Boemo bo baakantswe sentle go letela tiragalo ya sengwe se se sa tlwaelegang. Seo ke eng, mme se re ama jang gompieno? A re eleng tlhoko jaaka fa pono e tswelela!
[Setshwantsho se se tletseng ka tsebe 75]
[Setshwantsho se se tletseng ka tsebe 78]