Dikgatiso Tse di Dirisiwang mo Bukaneng ya Pokano ya Botshelo le Bodiredi Jwa Rona
JANUARY 4-10
MATLOTLO A A MO LEFOKONG LA MODIMO | LEFITIKO 18-19
“Tswelela O na Le Boitsholo jo bo Siameng”
Kafa re ka Itshireletsang ka Gone mo Leanong la ga Satane
Jehofa o ne a ba bolelela ka dilo tse di maswe tse ditšhaba tse di ba dikologileng di neng di di dira a bo a ba raya a re: “Tsela e lefatshe la Kanana le dirang ka yone, le ke lo tlisang mo go lone, lo se ka lwa dira ka yone. . . . Lefatshe le itshekologile, mme ke tla le tlisetsa kotlhao ya tlolo ya lone.” Lefatshe le Bakanana ba neng ba nna mo go lone le ne le itshekologile e bile le le leswe ka ntlha ya dilo tse di bosula tse ba neng ba di dira.—Lefi. 18:3, 25.
Jehofa o Kaela Batho ba Gagwe
Dikgosi tseno tse di ikanyegang di ne di farologane thata le baeteledipele ba ditšhaba tse dingwe ba ba neng ba ikaegile ka botlhale jwa batho e bile ba dira dilo go ya ka se bone ba akanyang gore se siame. Fa batho ba ne ba busiwa ke Bakanana ba ne ba dira dilo tse di makgapha tse di jaaka go tlhakaneladikobo ga ba masika, ga batho ba bong jo bo tshwanang le go tlhakaneladikobo le diphologolo, go ntsha bana ditlhabelo le kobamelo ya medingwana. (Lefi. 18:6, 21-25) Mo godimo ga moo, baeteledipele ba Babelona le ba Egepeto ba ne ba sa ikobele melao e e dumalanang le saense e e kaga bophepa e Modimo a neng a e neile Baiseraele. (Dipa. 19:13) Go farologana le bone, baeteledipele ba ba ikanyegang ba Iseraele, ba ne ba rotloetsa batho gore ba obamele Jehofa ka boikanyegi le gore ba nne phepa mo boitsholong le mo mmeleng. Eleruri Jehofa ke ene a neng a ba kaela.
Se Modimo a Tla se Dirang ka Bosula
Go tweng ka batho ba ba ditlhogo di thata ba ba ganang go fetola ditsela tsa bone e bile ba tatalalela go dira dilo tse di bosula? Akanya ka tsholofetso eno e e utlwalang: “Bathokgami ke bone ba ba tla agang mo lefatsheng, mme ba ba se nang molato ke bone ba ba tla salang mo go lone. Fa e le baikepi bone, ba tla kgaolwa mo lefatsheng; mme maferefere one, a tla kumolwa mo go lone.” (Diane 2:21, 22) Go tla bo go se na tlhotlheletso ya batho ba ba boikepo. Mo maemong ao a a nang le kagiso, batho ba ba boikobo ba tla gololwa ka bonya ka bonya mo bosaitekanelang jo ba bo ruileng.—Baroma 6:17, 18; 8:21.
Go Ribolola Matlotlo mo Dikwalong
“A bo Ke Rata Molao wa Gago Jang Ne!”
Karolo ya bobedi ya Molao wa ga Moshe e e bontshang kafa Modimo a neng a amegile ka teng ka go itekanela ga batho ba gagwe e ne e le e e nayang batho tshono ya go ronopa. Jehofa o ne a laela gore fa molemi wa Moiseraele a le mo thobong kwa tshimong ya gagwe, batlhoki ba tshwanetse go letlwa go itseela mo barobi ba go tlogelang kwa morago. Balemi ba ne ba sa tshwanela go roba sengwe le sengwe go ya go fitlha le mo dintlheng tsa masimo a bone, e bile ba ne ba sa tshwanela go sela mo go saletseng kwa morago ga morara kgotsa motlhware. Ba ne ba sa tshwanela go boa ba ye go tsaya dingata tse go diregileng gore di salele kwa morago mo masimong. Eno e ne e le thulaganyo e e molemo e e diretsweng go thusa bahumanegi, baagi ba baeng, masiela le batlholagadi. Gone ke boammaaruri gore go ronopa go ne go batla gore ba dire ka natla, le fa go ntse jalo, gape go ne go ba thusa gore ba se ka ba nna bakopi.—Lefitiko 19:9, 10; Duteronome 24:19-22; Pesalema 37:25.
JANUARY 11-17
MATLOTLO A A MO LEFOKONG LA MODIMO | LEFITIKO 20-21
“Jehofa o Tlhopha Batho ba Gagwe”
A o Na le Tsholofelo ya go Tshela Kwa Paradaiseng?
Le fa go ntse jalo, go na le sengwe se re sa tshwanelang go se tlodisa matlho. Modimo o ne a raya Baiseraele a re: “Lo boloke taelo yotlhe e ke e go laolelang gompieno, gore lo nonofe le gore ruri lo tsene lo rue lefatshe le lo kgabaganyetsang kwa go lone go ya go le rua.” (Duteronome 11:8) Yone naga eo e umakiwa mo go Lefitiko 20:22, 24: “Lo boloke melao ya me yotlhe le ditshwetso tsa me tsotlhe tsa boatlhodi lo bo lo di dire, gore lefatshe le ke lo tlisang kwa go lone gore lo nne kwa go lone le se ka la lo tlhatsetsa kwa ntle. Ka gone ke ne ka lo raya ka re: ‘Fa e le lona, lo tla rua lefatshe la bone, mme fa e le nna, ke tla le lo naya gore lo le rue, lefatshe le le elang mashi le tswina ya dinotshe.’” Ee, ba ne ba ka rua Lefatshe le le Solofeditsweng fa fela ba na le kamano e e molemo le Jehofa Modimo. E re ka Baiseraele ba ne ba sa utlwa Modimo, o ne a letla Bababelona gore ba ba fenye ba bo ba ba tlose mo lefelong le ba neng ba nna mo go lone.
it-1-E 1199
Boswa
Fa mongwe a sena go tlhokafala, sengwe le sengwe se a neng a na le sone se newa moruaboswa kgotsa yo o mo tlhatlhamang, kgotsa sepe fela se a neng a na le sone se a neng a se tsaya mo go borraagwemogolo kgotsa ba ba neng ba busa pele ga gagwe. Lefoko la Sehebera le le dirisitsweng e leng na·chalʹ le kaya go amogela kgotsa go newa boswa bongwe, gantsi ka gonne mongwe a na le maemo mangwe a a rileng. (Dip 26:55; Esek 46:18) Lefoko le lengwe la Sehebera le le a tleng le dirisiwe e leng ya·rashʹ go tlhalosa boruaboswa, gantsi le dirisiwa go tlhalosa go rua sengwe le fa motho yoo a sena maemo mangwe. (Ge 15:3; Lef 20:24) Gape lefoko leno le ka kaya fa masole a gapa kgotsa a leleka batho mo lefatsheng la bone. (Dut 2:12; 31:3) Mafoko a Segerika a a tlhalosang boswa a tsamaisana le lefoko kleʹros, le pele le neng le kaya “bola” mme moraganyana la kaya go nna le “seabe” mme kwa bofelong la kaya “boswa.”—Mat 27:35; Dit 1:17; 26:18.
it-1-E 317 ¶2
Dinonyane
Morago ga morwalela, Noa o ne a ntshetsa Modimo setlhabelo a dirisa diphologolo le “dibopiwa tse di fofang tse di phepa.” (Ge 8:18-20) Morago ga moo, Modimo o ne a re batho ba ka ja dinonyane fa fela ba sa je madi a tsone. (Ge 9:1-4; bapisa le Lef 7:26; 17:13.) Ka nako eo, dinonyane tse di neng di tsewa di le “phepa” e ne e le tse Modimo a neng a tlhalosa gore go ka ntshiwa ditlhabelo ka tsone. Moragonyana Molao wa ga Moshe o ile wa tlhalosa gore ke dinonyane dife tse di ka se jeweng ka gonne di se phepa. (Lef 11:13-19, 46, 47; 20:25; Dut 14:11-20) Baebele ga e tlhalose mabaka a go bo dinonyane dingwe di ne di tsewa di se phepa. Mme dinonyane tse dintsi tse di neng di tsewa di se phepa e ne e le tse di neng di tsoma kgotsa di ja nama ya diphologolo tse di suleng. Dinonyane tsotlhe di ne tsa tsewa di le phepa morago ga kgolagano e ntšha mme Modimo o ile a bolelela Petere seo mo ponatshegelong.—Dit 10:9-15.
Go Ribolola Matlotlo mo Dikwalong
it-1-E 563
Go Itshega
Molao wa Modimo o ne o re batho ba se ka ba itshega mebele fa ba tlhokafaletswe. (Lef 19:28; 21:5; Dut 14:1) Lebaka ke gore Iseraele e ne e le setšhaba se se boitshepo le thuo e e kgethegileng mo go Jehofa. (Dut 14:2) Ka jalo, Baiseraele ba ne ba sa tshwanela go dira sepe se se amanang le kobamelo ya medingwana. Gape, e re ka Baiseraele ba ne ba itse boemo jwa baswi e bile ba ne ba na le tsholofelo ya tsogo, go ne go sa utlwale gore ba itshegake ka boomo ka gonne ba re ba utlwile botlhoko ka ntlha ya loso la mongwe. (Dan 12:13; Bah 11:19) Ka jalo, molao o Jehofa a neng a o beile wa gore Baiseraele ba se ka ba itshega mebele o ne o ba thusa gore ba tlotle popo ya ga Jehofa e leng mebele ya bone.
JANUARY 18-24
MATLOTLO A A MO LEFOKONG LA MODIMO | LEFITIKO 22-23
“Meletlo ya Baiseraele E ne E Kaya Eng?”
it-1-E 826-827
Moletlo wa Dikuku Tse di sa Bedisiwang
Letsatsi la ntlha la Moletlo wa Dikuku Tse di sa Bedisiwang le ne le nna ka sabata. Kwa Palestina, ka letsatsi la bobedi ka Nisane 16, Baiseraele ba ne ba tshwanetse go isa ngata ya mabutswapele a thobo ya barele kwa moperesiting. Pele ga letsatsi leo, ba ne ba sa tshwanela go ja senkgwe, dijo tsa ditlhaka tse di besitsweng le fa e le dijo tse di sa tswang go rojwa. Mo letsatsing leo moperesiti o ne a isetsa Jehofa mabutswapele ao ka tsela ya tshwantshetso ka go fokisetsa ngata ya dijo tsa ditlhaka kwa le kwa. Gape ba ne ba ntshetsa Jehofa tshupelo e e fisiwang ka go isa phelefu e potlana e bile e itekanetse sentle e le mo ngwageng wa yone wa ntlha, mmogo le tshupelo ya dijo tsa ditlhaka tse di tshetsweng leokwane, ba bo ba isa le tshupelo ya senō. (Lef 23:6-14) Go ne go se na taelo ya gore dijo tsa ditlhaka kgotsa folouru (bupi) di fisiwe mo sebesong jaaka baperesiti ba ne ba simolola go dira moragonyana. Mo godimo ga gore moperesiti a ntshetse Jehofa ditshupelo tsa mabutswapele mo boemong jwa setšhaba, malapa le batho ba bangwe ba ne ba sa ntse ba ka ntshetsa Jehofa ditshupelo tsa go leboga ka nako eo.—Ek 23:19; Dut 26:1, 2.
Ke Eng Fa o Ne o Tshwanetse go Dirwa? Mo go Ekesodo 12:14-20, Jehofa o ne a laetse Moshe gore Baiseraele ba je dikuku tse di sa bedisiwang ka nako ya moletlo ono. Mme go ne go na le taelo e e gagametseng mo go temana 19 e e reng: “Go se ka ga fitlhelwa sebediso malatsi a le supa mo matlong a lona.” Duteronome 16:3 e bitsa dikuku tse di sa bedisiwang e re ke “senkgwe sa pogisego,” mme ngwaga le ngwaga di ne di gopotsa Bajuda nako ya fa ba ne ba tswa kwa Egepeto ka potlako (ka gonne ba ne ba se na nako ya go bedisa bupi [Ek 12:34]). Baiseraele ba ne ba tshwanetse go gakologelwa kafa Jehofa a neng a ba golola ka gone mo bokgobeng, e bile Jehofa o ne a re, “gore o gakologelwe letsatsi le o duleng kwa lefatsheng la Egepeto ka lone malatsi otlhe a botshelo jwa gago.” Setšhaba seno se ne se itse gore Jehofa ke ene a se goletseng mo bokgobeng, mme seo se ne se dira gore ngwaga le ngwaga ba itumelele go keteka meletlo e meraro e ba neng ba laetswe gore ba e keteke.—Dut 16:16.
it-2-E 598 ¶2
Pentekosete
Ka letsatsi la moletlo wa Pentekosete, mabutswapele a thobo ya korong a ne a ntshediwa Jehofa. Mme gone mabutswapele ano a korong a ne a sa dirisiwe ka tsela e e tshwanang le a barele. Ba ne ba tshwanetse go tsaya dilitara di le 4,4 tsa bupi jo bo boleta jwa korong ba bo ba di tsenya sebediso go dira dinkgwe tse pedi. Dinkgwe tseo di ne di tshwanetse ‘go tswa mo mafelong a bone a bonno,’ seno se raya gore dinkgwe tseo di ne di tshwanetse go tshwana le senkgwe se se jewang mo lapeng mme se se ka sa tshwana le se se dirisediwang tirelo e e boitshepo. (Lef 23:17) Mme fa ba ne ba isa tshupelo e e fisiwang, tshupelo ya boleo le tshupelo ya kabalano ba ne ba tshwanetse go di isa ka dinkgwe tseo. Gape tshupelo ya kabalano e ne e tshwanetse go ntshiwa ka dikwanyana tse pedi tse ditonanyana. Moperesiti o ne a fokisetsa dinkgwe le nama ya dikwanyana tseo kwa le kwa fa pele ga ga Jehofa. O ne a dira seno ka go tsenya diatla tsa gagwe kafa tlase ga dinkgwe le nama eo go bontsha gore di neelwa Jehofa. Fa dinkgwe tseno le dikwanyana di fetsa go ntshiwa e le tshupelo, moperesiti o ne a di itseela a bo a di ja e le tshupelo ya kabalano.—Lef 23:18-20.
A o Gatela Pele le Phuthego ya ga Jehofa?
Phuthego ya ga Jehofa e re thusa gore re solegelwe molemo fa e re rotloetsa gore re reetse kgakololo eno ya ga moaposetoloi Paulo: “A re akanyetsaneng gore re tlhotlheletsaneng mo loratong le mo ditirong tse di molemo, re sa lese go phuthega mmogo ga rona, jaaka bangwe ba na le mokgwa oo, mme re kgothatsana, mme re dira jalo le go feta e re ka lo bona letsatsi le atamela.” (Baheb. 10:24, 25) Meletlo ya ngwaga le ngwaga le dikokoano tse dingwe tsa kobamelo di ne di nonotsha Baiseraele semoyeng. Mogodimo ga moo, ditiragalo tse di jaaka Moletlo wa Diobo mo motlheng wa ga Nehemia, e ne e le dinako tse di itumedisang. (Ekes. 23:15, 16; Neh. 8:9-18) Le rona re solegelwa molemo ke dipokano tsa rona le dikopano tse dinnye le tse dikgolo. A re diriseng dithulaganyo tseno ka botlalo gore re nonofe semoyeng re bo re itumele.—Tito 2:2.
Go Ribolola Matlotlo mo Dikwalong
Tswelela o Ikanyega mo go Jehofa!
Batlhanka ba Modimo ba ka bontsha jang gore ba a ikanyega? Ka go rata Jehofa ka pelo yotlhe ba bo ba bontsha seo ka go dira dilo tse di mo itumedisang ka metlha. Akanya kafa lefoko leno le dirisiwang ka gone mo Baebeleng. Mo Baebeleng lefoko la Sehebera le le ranotsweng e le “boikanyegi” le kaya selo se se itekanetseng, se se se nang bogole le se se feletseng. Ka sekai, Baiseraele ba ne ba ntshetsa Modimo ditlhabelo ka diphologolo mme Molao o ne o re diphologolo tseo ga di a tshwanela go nna le bogole bope. (Lefi. 22:21, 22) Ba ne ba sa tshwanela go ntsha setlhabelo ka phologolo e e se nang leoto, tsebe, leitlho kgotsa e e lwalang. Jehofa o ne a batla gore ba ntshe phologolo e e itekanetseng, e e se nang bogole le e e sa lwaleng. (Mal. 1:6-9) Re a tlhaloganya gore ke eng fa Jehofa a ne a batla diphologolo tse di ntseng jalo ka gonne le rona fa re reka sengwe, e ka tswa e le leungo, buka kgotsa thulusu, ga re batle leungo le le bodileng, buka e e gagogileng kgotsa thulusu e e sa berekeng sentle. Re batla se se siameng le se se berekang sentle. Ka tsela e e tshwanang, Jehofa o batla gore re mo rate e bile re ikanyege mo go ene ka pelo yotlhe.
JANUARY 25-31
MATLOTLO A A MO LEFOKONG LA MODIMO | LEFITIKO 24-25
“Ngwaga wa Jubile le Kgololesego E e Sa Ntseng e Tla”
it-1-E 871
Kgololesego
Modimo wa Kgololesego. Jehofa ke Modimo wa kgololesego. O ne a golola setšhaba sa Iseraele mo bokgobeng kwa Egepeto. O ne a ba raya a re fa ba ikobela ditaelo tsa gagwe ba ne ba se kitla ba tlhaela sepe. (Dut 15:4, 5) Dafide o ne a re batho ba ba nnang mo Jerusalema, ba ne “ba se na matswenyego.” (Pes 122:6, 7) Molao o ne o re fa monna a humanegile, o ne a ka kgona go ithekisa go nna lekgoba go itlamela le lelapa la gagwe. Mme Molao o ne o re, monna yono wa Mohebera a ka gololwa mo bokgobeng mo ngwageng wa bosupa. (Ek 21:2) Ka ngwaga wa Jubile, (e e neng e nna gone morago ga dingwaga di le 50), go ne go nna le kgololesego mo lefatsheng lotlhe. Lekgoba lengwe le lengwe la Mohebera le ne le gololwa e bile monna mongwe le mongwe o ne a busediwa lefatshe la gaabo.—Lef 25:10-19.
it-1-E 1200 ¶2
Boswa
Lefatshe e ne e le boswa jo bo fetisiwang mo lapeng, go tswa mo kokomaneng e nngwe go ya kwa go e nngwe, ka jalo le ne le sa rekisediwe ruri. Fa lefatshe le rekisitswe, go ne go nna jaaka e kete le hirisitswe, mme tlhwatlhwa ya lone e ne e tshwanetse go tsamaisana le gore go tla robiwa go le kana kang mo go lone go fitlha ka ngwaga wa Jubile. Mme ka ngwaga oo, beng ba lefatshe ba ne ba tla le newa gape ntle le fa e le gore ba ne ba setse ba le rekolotse kgotsa ba le neetswe pele ga ngwaga oo wa Jubile. (Lef 25:13, 15, 23, 24) Molao oo o ne o akaretsa le matlo a a mo metseng e e sa agelelwang dipota. Fa motho a ne a ka rekisa ntlo ya gagwe e e mo motseng o o ageletsweng ka dipota, o ne a newa ngwaga gore a reke ntlo eo gape mme fa ngwaga o ne o ka feta a ise a e reke, ntlo eo e ne e tla nna ya motho yo o e rekileng. Mme Balefi, ke bone fela ba ba neng ba na le tshwanelo ya go rekolola matlo a bone ka nako nngwe le nngwe, ka gonne ba ne ba se na lefatshe le ba le abetsweng.—Lef 25:29-34.
it-2-E 122-123
Jubile
Fa molao wa Jubile o ne o ikobelwa sentle, o ne o sireletsa setšhaba gore se se ka sa iphitlhela se le mo maemong a a tshwanang le a a aparetseng dinaga di le dintsi gompieno, kwa go nang le batho ba ba humileng thata le ba ba humanegileng thata. Molao ono o ne o thusa batho e bile o ne o nonotsha setšhaba ka gonne go ne go se na ope yo o neng a tla humanega thata, mme mongwe le mongwe o ne a tla dirisa se a nang le sone go thusa ba bangwe mo setšhabeng. Jehofa o ne a ruta Baiseraele gore ba dire eng e bile o ne a dira gore lefatshe le ungwe mme fa Baiseraele ba ne ba ka tswelela ba le kutlo, ba ne ba tla segofala ka gonne ba ne ba tla bo ba busiwa ke Modimo.—Isa 33:22.
Go Ribolola Matlotlo mo Dikwalong
Fa o Kgopisitswe
Fa Moiseraele a ne a tlhaselwa ke Moiseraele ka ene a bo a mo ntsha leitlho, Molao o ne o letlelela gore a otlhaiwe ka tsela e e siameng. Le fa go ntse jalo, motho yo o tlhasetsweng e ne e se ene a tshwanetseng go ipusolosetsa mo motlhaseding kgotsa mo go mongwe wa lelapa la gagwe. Molao o ne o laela gore a bolelele balaodi ba ba tlhomilweng kgang eo—baatlhodi—gore ba e rarabolole sentle. Go itse gore motho yo o diretseng motho yo mongwe molato kgotsa sengwe se se sa siamang ka boomo o tla otlhaiwa, go ne go dira gore batho ba se ka ba ipusolosetsa. E ne e se sone seo fela.
FEBRUARY 1-7
MATLOTLO A A MO LEFOKONG LA MODIMO | LEFITIKO 26-27
“O ka Bona Jang Masego a ga Jehofa?”
Gana “Dilo Tse di se Nang Mosola”
“Dikhumo” di ka nna jang jaaka modimo? Ka sekai, akanya ka leje le le mo sebatleng kwa Iseraele wa bogologolo. Leje le le ntseng jalo le ne le ka dirisiwa go aga ntlo kana lebota. Mme fa le ne le ka dirwa “pilara e e boitshepo” kana “mokgabisa,” le ne le ka nna sekgopi mo bathong ba ga Jehofa. (Lefi. 26:1) Ka tsela e e tshwanang, madi a na le mosola wa one. Re tlhoka madi gore re tshele, e bile re ka a dirisa ka tsela e e molemo go direla Jehofa. (Mor. 7:12; Luke 16:9) Mme fa re baya go batla madi kwa pele ga tirelo ya rona ya Bokeresete, madi e nna modimo wa rona. (Bala 1 Timotheo 6:9, 10.) Mo lefatsheng leno le mo go lone batho ba tseetseng dikhumo kwa godimo thata, re tshwanetse go tlhomamisa gore re leba kgang eno ka tsela e e tshwanetseng.—1 Tim. 6:17-19.
it-1-E 223 ¶3
Sengwe se se Gakgamatsang
Batho ba ne ba tsaya Moshe a kgethegile ka ntlha ya tsela e e gakgamatsang e Jehofa a neng a dirisana le ene ka yone. (Dut 34:10, 12; Ek 19:9) Mme ba ba neng ba na le tumelo, ba ne ba tlotla taolo e Moshe a neng a na le yone. Ba ne ba itse gore Jehofa o dirisa ene go bua le bone. Baiseraele ba ne ba tshwanetse go tshaba kgotsa go sisimoga lefelo la ga Jehofa le le boitshepo. (Lef 19:30; 26:2) Seno se ne se raya gore ba ne ba tshwanetse go tlotla lefelo la ga Jehofa le le boitshepo, ba obamele Jehofa ka tsela e a e batlang ba bo ba itshware ka tsela e e dumalanang le melao ya gagwe.
A “Kagishō ea Modimo” e Dibele Pelo ya Gago
Jehofa o ne a bolelela morafe oo jaana: “Ha lo sepela mo melaoñ ea me, ha lo boloka ditaolō tsa me, lo di diha; Hoñ ke tla nesa dipula tsa lona mo dipakeñ tsa cōna, me lehatshe le tla ntsha totahalō ea yeōna, le ditlhare tsa lotlhagare di tla ntsha louñō loa cōna. Me ke tla lo naea kagishō mo lehatshiñ, lo tla rōbala, me ga go na opè eo o tla lo boihisañ: dibatana tse di boshula ke tla di khutlisa mo lehatshiñ, le chaka ga e ketla e ralala lehatshe ya lona. Ke tla sepela mo go lona, ke tla nna Modimo oa lona, me lo tla nna batho ba me.” (Lefitiko 26:3, 4, 6, 12) Baiseraele ba ne ba ka ipelela kagiso gonne ba ne ba sireleditswe mo babeng ba bone, ba na le letlepu la dilo tse di bonalang, le kamano e e gaufi thata le Jehofa. Mme seno se ne se tla ikaega ka gore a ba kgomarela Molao wa ga Jehofa.—Pesalema 119:165.
Go Ribolola Matlotlo mo Dikwalong
it-2-E 617
Bolwetse Jwa Leroborobo
Bo Bakwa Ke go Sa Ikobele Molao wa Modimo. Jehofa o ne a bolelela Baiseraele gore fa ba sa tlotle kgolagano ya gagwe, o ne a tla ba tlisetsa “bolwetse jwa leroborobo.” (Lef 26:14-16, 23-25; Dut 28:15, 21, 22) Mo Baebeleng, fa motho a sa lwale e bile a na le kamano e e molemo le Modimo, seo se amanngwa le go segofadiwa ke Modimo (Dut 7:12, 15; Pes 103:1-3; Dia 3:1, 2, 7, 8; 4:21, 22; Tsh 21:1-4), mme fa a lwala seo se amanngwa le boleo kgotsa go sa itekanelang. (Ek 15:26; Dut 28:58-61; Isa 53:4, 5; Mat 9:2-6, 12; Joh 5:14) Go na le dinako dingwe tse Jehofa a neng a tlisetsa batho bangwe bolwetse. Ka sekai, o ne a dira gore Miriame, Usia le Gehasi ba tshwarwe ke lepero. (Dip 12:10; 2Dit 26:16-21; 2Dik 5:25-27) Gantsi fa batho kgotsa setšhaba se tshwarwa ke bolwetse, ke ka gonne se dirile sengwe se se sa siamang. Batho ba ne ba roba se ba se jetseng ka gonne malwetse a ba neng ba nna le one, e ne e le ka ntlha ya maleo a ba a dirileng. (Bag 6:7, 8) Moaposetoloi Paulo o ne bua jaana ka batho ba ba neng ba dira boitsholo jo bo sa siamang jwa tlhakanelodikobo, gore Modimo “o ne a ba leseletsa mo boitshekologong, gore mebele ya bone e tle e tlontlologe mo go bone . . . mme ba ikamogelela tuelo e e tletseng, e e neng e tshwanela tlolo ya bone.”—Bar 1:24-27.
FEBRUARY 8-14
MATLOTLO A A MO LEFOKONG LA MODIMO | DIPALO 1-2
“Jehofa o Rulaganya Batho ba Gagwe”
Botlhokwa jwa Kobamelo ya ga Jehofa mo Matshelong a Rona
Fa o ne o kile wa bona Baiseraele ba thibeletse kwa nageng o le kwa godimo, o ka bo o bone eng? Ditante tse dintsintsi di tlhomagantswe sentle ka thulaganyo, tse go nnang batho ba ka tswa ba le dimilione tse tharo kana go feta foo mo go tsone, ba beilwe ka ditlhopha tsa ditso tse tharo kafa bokone, borwa, botlhaba, le bophirima. Fa o ntse o atamela mme o leba sentle, gape o ne o tla lemoga setlhopha se sengwe gaufi thata le bogare jwa bothibelelo. Mo ditlhopheng tse dipotlana tseno tse nne tsa ditante, go ne go nna malapa a lotso lwa Lefi. Go ne go na le kago e e sa tshwaneng le epe fa garegare ga bothibelelo, mo lefelong le le neng le ageletswe ka lobotana lwa letsela. Yone e ne e le “mogope wa bophuthegelo” kana motlaagana o Baiseraele ba ba “pelo e e tlhalefileng” ba neng ba o agile ka polane ya ga Jehofa.—Dipalo 1:52, 53; 2:3, 10, 17, 18, 25; Ekesodo 35:10.
it-1-E 397 ¶4
Bothibelelo
Batho ba ba neng ba le mo bothibelelong jwa Iseraele ba ne ba le bantsi tota. Go ne go na le banna ba ntwa ba le 603 550. Mo godimo ga moo, go ne go na le basadi, bana, batsofe le ba ba golafetseng. Go ne go na le Balefi ba le 22 000 ga mmogo le baagi ba baeng ba le bantsi mme go ka tswa go ne go na le batho ba le 3 000 000 kgotsa go feta kwa bothibelelong joo. (Ek 12:38, 44; Dip 3:21-34, 39) Ga re a tlhomamisega gore bothibelelo joo bo ne bo le kana kang, mme gone dipalo tse di fopholediwang di a farologana. Fa ba ne ba thibeletse gaufi le Jeriko kwa Mabaleng a a Sekaka a Moabe, go tlhalosiwa gore bothibelelo jwa bone bo ne bo “simolola kwa Bethe-jeshimothe go fitlha kwa Abele-shitime.”—Dip 33:49.
Go Ribolola Matlotlo mo Dikwalong
it-2-E 764
Go Kwadisiwa
Go kwadisiwa ga batho go akaretsa leina, tlhatlhamano ya losika go ya ka lotso kgotsa go ya ka gore o tswa kwa lelapeng lefe. Mo Baebeleng, go ne go sa tsewe palo ya batho fela mme go na le mabaka a go bo batho ba ne ba kwadisiwa. Mabaka mangwe ke gore go itsiwe gore go tlhokega lekgetho le le kana kang, gore ke batho ba ba kae ba ba ka isiwang kwa sesoleng kgotsa gore ke ditiro dife tse di dirwang ke Balefi kwa lefelong le le boitshepo.
FEBRUARY 15-21
MATLOTLO A A MO LEFOKONG LA MODIMO | DIPALO 3-4
“Tiro e e Dirwang ke Balefi”
it-2-E 683 ¶3
Moperesiti
Ka Nako ya Kgolagano ya Molao. Fa Baiseraele ba ne ba le mo bokgobeng kwa Egepeto, Jehofa o ne a iitshepisetsa leitibolo lengwe le lengwe la Baiseraele ka nako ya fa a ne a bolaya maitibolo a kwa Egepeto ka petso ya bolesome. (Ek 12:29; Dip 3:13) Maitibolo ano a ne a tla nna a ga Jehofa, go mo direla tirelo e e kgethegileng le e e boitshepo. Jehofa a ka bo a ile a tlhoma maitibolo otlhe a Baiseraele go nna baperesiti kgotsa go nna batlhokomedi ba lefelo le le boitshepo. Go na le moo, o ne a dirisa banna ba Balefi go dira tiro eo. Ka jalo, Jehofa o ne a laela setšhaba gore se tseye banna botlhe ba Balefi mo boemong jwa maitibolo otlhe a Baiseraele mo ditsong di le 12 (go akaretsa bana ba ga Josefa ba babedi Eferaime le Manase, ba mongwe le mongwe wa bone a neng a tsewa e le lotso lo lo ikemetseng). Fa go ne go balwa batho, go ne ga fitlhelwa gore palo ya banna ba maitibolo a a tswang mo ditsong tse di farologaneng tsa Baiseraele e ne e feta palo ya banna ba Balefi ka 273. E re ka palo ya banna ba Balefi e ne e tlhaela ka 273, Jehofa o ne a laela gore mongwe le mongwe yo o tlhaelang mo palong eo a ntshediwe moneelo wa dishekele di le tlhano (R194,88), mme madi ao a ne a tla neelwa Arone le bomorwawe. (Dip 3:11-16, 40-51) Pele ga Jehofa a dira taelo eno, o ne a setse a tlhophile banna go tswa mo ntlong ya ga Arone, mo lotsong lwa Balefi go nna baperesiti mo Iseraele.—Dip 1:1; 3:6-10.
it-2-E 241
Balefi
Ditiro Tsa Balefi. Balefi ba ne ba tswa mo baneng ba bararo ba ga Lefi e bong Gereshone (Gereshome), Kohathe le Merari. (Ge 46:11; 1Dit 6:1, 16) Malapa ano a ne a abetswe lefelo la bonno gaufi le motlaagana. Bakohathe, ba e leng ba losika lwa ga Arone ba ne ba kampile fa pele ga motlaagana kwa botlhaba. Bakohathe ba bangwe ba ne ba kampile kwa borwa. Bagereshone ba ne ba kampile kwa bophirima mme Bamerari bone ba ne ba kampile kwa bokone jwa motlaagana. (Dip 3:23, 29, 35, 38) Tiro ya Balefi e ne e le go tlhoma le go tlhatlhamolola motlaagana. Fa e ne e le nako ya go fuduga, Arone le bomorwawe ba ne ba tshwanetse go folosa sesiro se se kgaoganyang lefelo le le Boitshepo mo go la Boitshepo Jwa Maitshepo, ba bo ba dirisa sesiro seo go bipa letlole la tshupo, sebeso, fanitšhara le dilo tse dingwe tsa mo motlaaganeng tse di boitshepo. Bakohathe ke bone ba ba neng ba tshwanetse go fudusa dilo tseo. Bagereshone bone ba ne ba tsamaya ba tshotse matsela a mogope a motlaagana, sebipo, sesiro sa dikgoro, matsela a lolwapa le megala ya mogope (go bonala e ne e le megala ya motlaagana), mme Bamerari bone ba ne ba tsamaya ba tshotse dimati tsa motlaagana, mephakalego ya one, dipilara le metheo ya tsone, dimapo le megala ya mogope (megala ya lolwapa lo lo dikologileng motlaagana).—Dip 1:50, 51; 3:25, 26, 30, 31, 36, 37; 4:4-33; 7:5-9.
it-2-E 241
Balefi
Mo motlheng wa ga Moshe, Balefi ba ne ba simolola tiro ya bone ya go tsholetsa le go fudusa dilwana tsa motlaagana fa ba ne ba na le dingwaga di le 30. (Dip 4:46-49) Ba ne ba ka kgona go dira ditiro dingwe fa ba na le dingwaga di le 25 mme e seng tiro e e jaaka go fudusa motlaagana. (Dip 8:24) Ka motlha wa ga Kgosi Dafide, go ne ga nna le phetogo, Balefi ba ne ba simolola go dira tiro ya bone ba na le dingwaga di le 20. Kgosi Dafide o ne a tlhalosa gore motlaagana (o o neng o tla emisediwa ke tempele) o ne o se kitla o tlhola o tlhoka go fudusiwa. Ba ne ba tlogela go direla fa ba na le dingwaga di le 50. (Dip 8:25, 26; 1Dit 23:24-26) Balefi ba ne ba tshwanetse go itse Molao sentle, ka gonne ka dinako dingwe ba ne ba tshwanetse go o bala phatlalatsa le go o ruta batho.—1Dit 15:27; 2Dit 5:12; 17:7-9; Neh 8:7-9.
Go Ribolola Matlotlo mo Dikwalong
Nna Botlhale—Boifa Modimo!
Go bona thuso ya ga Jehofa ka nako ya mathata go ile ga nonotsha poifo Modimo ya ga Dafide le go godisa tsela e a mo ikanyang ka yone. (Pesalema 31:22-24) Le fa go ntse jalo, go ne ga nna le makgetlo a le mararo a Dafide a ileng a se ka a bontsha go boifa Modimo ka one mme seo sa felela ka matswela a a sa itumediseng. Lekgetlo la ntlha ke fa a ne a isa letlole la ga Jehofa la kgolagano kwa Jerusalema ka koloi ya dipholo go na le go dira gore Balefi ba le sikare, jaaka fa Modimo a ne a laetse. Fa Usahe yo o neng a eteletse koloi eo pele a ne a tshwara Letlole gore le se ka la wa, o ne a swa ka yone nako eo ka ntlha ya “tiro eo ya go tlhoka poifo.” Ee, Usahe o ile a dira boleo jo bo masisi, le fa go ntse jalo tiragalo eo e e sa itumediseng e bakilwe ke go bo Dafide a ile a se ka a bontsha go tlotla Molao wa Modimo. Go boifa Modimo go bolela go dira dilo ka tsela e a batlang di dirwa ka yone.—2 Samuele 6:2-9; Dipalo 4:15; 7:9.
FEBRUARY 22-28
MATLOTLO A A MO LEFOKONG LA MODIMO | DIPALO 5-6
“O ka Etsa Banasirite Jang?”
it-2-E 477
Banasirite
Batho ba ba neng ba batla go nna Banasirite ba ne ba sa tshwanela go dira dilo tseno tse tharo tsa botlhokwa: (1) Go nwa sepe se se tagang; e ka ne e le matute a morara (kgotsa diterebe), a bedisitswe kgotsa a le botšarara, gape ba ne ba sa tshwanela go ja morara o o buduleng, o o sa butswang kgotsa o o omisitsweng. (2) Go kgaola moriri mo tlhogong. (3) Go tshwara setopo sa motho yo o suleng, le fa e le wa losika tota, e ka tswa e le rraagwe, mmaagwe, morwarraagwe kgotsa kgaitsadie.—Dip 6:1-7.
Maikano a a Kgethegileng. Mongwe le mongwe yo neng a dira maikano a a kgethegileng o ne a tshwanetse “go tshela jaaka Monasirite” e leng go ineela mo go Jehofa mme a sa dire jalo gore a bonwe ke batho. Go na le moo, o ne a le boitshepo mo go Jehofa, “malatsi otlhe a Bonasirite jwa gagwe.”—Dip 6:2, 8.
Melao e e neng e beetswe Banasirite e ne e le botlhokwa mo kobamelong ya ga Jehofa. Moperesiti yo mogolo o ne a sa tshwanela go tshwara setopo ka ntlha ya tiro ya gagwe le fa e ne e le sa mongwe wa losika mme Banasirite le bone ba ne ba sa tshwanela go dira jalo. Ka ntlha ya tiro ya bone, moperesiti yo mogolo le baperesiti ba bangwe ba ne ba sa tshwanela go nwa beine kgotsa sepe se se tagang fa ba direla Jehofa tirelo e e boitshepo.—Lef 10:8-11; 21:10, 11.
Mo godimo ga moo, Monasirite (ka Sehebera ke na·zirʹ) o ne a tshwanetse go itshupa a le boitshepo ka go letla gore ‘moriri wa tlhogo ya gagwe o gole,’ seno se ne se tla thusa batho go lemoga gore o ikanne go nna Monasirite yo o boitshepo. (Dip 6:5) Gape lefoko la Sehebera na·zirʹ le ne le dirisiwa go emela merara (kgotsa diterebe) e e sa pongwang kgotsa e e sa kgetlhiwang ka nako ya Sabata le mo dingwageng tsa Jubile. (Lef 25:5, 11) Se se kgatlhang ke gore, letsela le moperesiti a neng a ithathelela tlhogo ka lone le ne le na le letshwao la gauta le le kwadilweng mafoko ano “Boitshepo ke jwa ga Jehofa,” ka jalo le ne le bidiwa go twe ke “letshwao le le boitshepo la boineelo” [ka Sehebera ke neʹzer, go tswa mo lefokong na·zirʹ].” (Ek 39:30, 31) Ka tsela e e tshwanang, serwalo sa segosi se se neng se rwalwa ke kgosi e e tloditsweng ya Iseraele le sone se ne se bidiwa neʹzer. (2Sa 1:10; 2Dik 11:12) Moaposetoloi Paulo o ne a re mo phuthegong ya Bokeresete, mosadi o newa moriri o moleele mo boemong jwa serwalo sa tlhogo. Seno e ne e le go mo gopotsa fela gore ga a lekane le monna; mme o ne a tshwanetse go latela thulaganyo e Modimo a e tlhomileng ya botlhogo. Ka jalo, dilo tse Banasirite ba neng ba tshwanetse go di dira tse di sa tlwaelegang, tse di jaaka go nna ba sa beole meriri, (sengwe se se sa tlwaelegang mo banneng) go sa nwe beine le go ipoloka ba le phepa, se ne se ba gopotsa botlhokwa jwa gore ba iitatole le gore ba ikobele Jehofa ka go dira thato ya gagwe.—1Bak 11:2-16.
Go Ribolola Matlotlo mo Dikwalong
Dipotso Tse di Tswang Kwa Babading
Le fa go le jalo, Samesone ene e ne e le Monasirite ka tsela e sele. Pele ga Samesone a tsholwa, moengele wa ga Jehofa o ne a bolelela mmaagwe jaana: “Bona! o tla ima, mme ruri o tla belega ngwana wa mosimane, mme go se ka ga tla legare lepe mo tlhogong ya gagwe, ka gonne ngwana o tla nna Monasirite wa Modimo fa a tswa mo sebopelong; mme ke ene yo o tla etelelang pele go boloka Iseraele mo seatleng sa Bafilisitia.” (Baatlhodi 13:5) Samesone ga a ka a ikana gore o tla nna Monasirite. Modimo ke ene a mo tlhomileng gore e nne Monasirite mme Bonasirite jwa gagwe e ne e le jwa botshelo jotlhe. Molao wa go thibelwa go ama setopo o ne o sa mo ame. Fa o ne o mo ama mme a bo a ama setopo a sa ikemisetsa, o ne a ka simolola jang Bonasirite jwa gagwe jwa botshelo jotlhe jo bo simolotseng fa a sena go tsholwa? Ka jalo he, go bonala dilo tse di neng di batlega mo Bonasiriteng jwa botshelo jotlhe di ne di farologana ka ditsela dingwe le dilo tse di neng di batlega mo go ba ba ithaopetseng go nna Banasirite.