Go Pholosiwa go Kaya Eng?
Karabo ya Baebele
Ka dinako tse dingwe bakwadi ba Baebele ba dirisa lefoko go ‘pholosiwa’ le go ‘bolokwa’ fa ba bua ka motho yo o ntshiwang mo kotsing. (Ekesodo 14:13, 14; Ditiro 27:20; Tswana Central) Mme gantsi mafoko ano a kaya go gololwa mo boleong. (Mathaio 1:21) E re ka loso lo bakiwa ke boleo, batho ba ba gololwang mo boleong ba nna le tsholofelo ya go tshelela ruri.—Johane 3:16, 17.a
Motho a ka dirang gore a bolokwe?
Gore o bolokwe o tshwanetse go nna le tumelo mo go Jesu le go bontsha tumelo eo ka go ikobela ditaelo tsa gagwe.—Ditiro 4:10, 12; Baroma 10:9, 10; Bahebera 5:9.
Baebele ya re re bontshe tumelo ka ditiro le ka go ikobela melao ya Modimo. (Jakobe 2:24, 26) Le fa go ntse jalo, seo ga se reye gore ditiro tsa rona ke tsone di dirang gore re bolokwe, go na le moo, Modimo ke ene a re nayang mpho eno ka ntlha ya ‘bopelonomi jwa gagwe jo bo sa re tshwanelang.’—Baefeso 2:8, 9.
A go a kgonega gore motho a se ka a bolokwa?
Ee. Go tshwana le fa motho a ne a tloga a nwela mo metsing a bo a ntshiwa mo go one, go ka direga gore a kgopiwe kgotsa a itatlhele gape mo go one. Go nna fela jalo le ka motho yo o golotsweng mo boleong a bo a felelwa ke tumelo. Ke gone ka moo Baebele e kgothaletsang Bakeresete ba Modimo a ba bolokileng gore ba ‘lwele tumelo ya bone ka thata.’ (Jude 3) Gape e tlhagisa batho ba ba bolokilweng e re: “Nnang lo direle poloko ya lona ka poifo le go roroma.”—Bafilipi 2:12.
Ke mang yo o bolokang batho—A ke Modimo kgotsa ke Jesu?
Baebele e bitsa Modimo e re ke “Mmoloki” ka gonne ke ene a bolokang batho. (1 Samuele 10:19; Isaia 43:11; Tito 2:10; Jude 25) Mo godimo ga moo, Modimo o ne a dirisa banna ba ba farologaneng go falotsa setšhaba sa Iseraele e bile Baebele e ba bitsa “baboloki.” (Nehemia 9:27; Baatlhodi 3:9, 15; 2 Dikgosi 13:5)b Ka tsela e e tshwanang, e re ka Modimo a dirisa setlhabelo sa thekololo ya ga Jesu Keresete go golola batho mo boleong, Baebele e bitsa Jesu e re ke “Mmoloki.”—Ditiro 5:31; Tito 1:4.c
A mongwe le mongwe o tla bolokwa?
Nnyaa, batho bangwe ga ba na go bolokwa. (2 Bathesalonika 1:9) Fa Jesu a bodiwa go re, “a ba ba bolokwang ba mmalwa?” o ne a re: “Itekeng ka tlhagafalo go tsena ka kgoro e tshesane, ka gonne ba le bantsi, ke a lo bolelela, ba tla batla go tsena mme ga ba na go kgona.”—Luke 13:23, 24.
Dikgopolo tse di phoso ka go bolokwa ga batho
Kgopolo e e phoso: Bakorintha wa ntlha 15:22 e ruta gore batho botlhe ba tlile go bolokwa ka gonne ya re: “Mo go Keresete botlhe ba tla tshedisiwa.”
Boammaaruri: Ditemana tse di dikologileng temana eno di bua ka tsogo ya baswi. (1 Bakorintha 15:12, 13, 20, 21, 35) Ka jalo, mafoko a a reng “mo go Keresete botlhe ba tla tshedisiwa” a kaya fela gore botlhe ba ba tsosiwang ba tla bona seno ka ntlha ya ga Jesu Keresete.—Johane 11:25.
Kgopolo e e phoso: Tito 2:11 e re ruta gore batho botlhe ba tla bolokwa ka gonne ya re Modimo o tla ‘tlisetsa batho botlhe poloko.’—Baebele e e Boitshepo.
Boammaaruri: Lefoko la Segerika le le ranotsweng e le “botlhe” mo temaneng eno, gape le ka kaya “mefuta e mentsi kgotsa e e farologaneng.”d Ka jalo, Tito 2:11 e raya gore Modimo o dira gore batho ba mefuta yotlhe ba bolokwe go akaretsa le batho ba ba ‘tswang mo merafeng yotlhe le ditso le ditšhaba le diteme.’—Tshenolo 7:9, 10.
Kgopolo e e phoso: Petere wa bobedi 3:9 e ruta gore batho botlhe ba tla bolokwa ka gonne ya re Modimo “ga a eletse gore ope a senngwe.”
Boammaaruri: Modimo o batla gore batho ba bolokwe, mme ga a ba pateletse gore ba amogele poloko ya gagwe. O tla ‘senya baikepi’ ka “letsatsi la gagwe la katlholo.”—2 Petere 3:7.
a Baebele ya re motho o bone “poloko” le fa a ise a gololwe mo boleong le mo losong.—Baefeso 2:5; Baroma 13:11.
b Mo ditemaneng tse di nopotsweng, dithanolo tse dingwe di dirisa mareo a a jaaka “mogolodi,” “mofalotsi,” “mofenyi,” “moeteledipele,” kgotsa le e leng “mongwe” go na le go dirisa “mmoloki.” Mo Baebeleng ya ntlhantlha ya Sehebera, lefoko le le dirisitsweng go tlhalosa motho e le mmoloki le tshwana le le le dirisitsweng fa go buiwa ka Jehofa Modimo e le Mmoloki.—Pesalema 7:10.
c Leina Jesu le tswa mo leineng la Sehebera Yehoh·shu′aʽ, le le kayang gore “Jehofa ke Poloko.”
d Bona kgatiso ya Vine’s Complete Expository Dictionary of Old and New Testament Words. Go dirisiwa lefoko le le tshwanang la Segerika mo go Mathaio 5:11, le le tlhalosang mafoko a ga Jesu a gore batho ba tla bua “bosula jotlhe” ka barutwa ba gagwe.—Tswana Central.