Baebele ya Reng

Modimo o Ntse Jang?

BAEBELE e tlhalosa jaana: “Modimo ke moya, mme ba ba mo obamelang ba tshwanetse go mo obamela ka moya le ka boammaaruri.” Polelwana eno e senola boammaaruri jwa motheo jwa gore Modimo o ntse jang—ke moya! (Johane 4:19-24) Le fa go ntse jalo mo Baebeleng o tlhalosiwa e le motho. Leina la gagwe ke Jehofa.—Pesalema 83:18.

Babadi ba bangwe ba Baebele ba ne ba bontsha gore ba tlhakana tlhogo fa go tla mo kgannyeng ya gore Modimo o ntse jang. E re ka Modimo e le mowa o o sa bonaleng, mme e se motho wa mmatota, ke ka ntlha yang fa Baebele e bolela fa Modimo a na le matlho, ditsebe, nko, pelo, matsogo, diatla, menwana le dinao?a Bangwe ba ka swetsa ka gore Modimo o na le mmele o o tshwanang le wa motho ka gonne Baebele e bolela gore motho o dirilwe mo setshwanong sa Modimo. Fa re leba ka kelotlhoko se tota Baebele e neng e se bua ka seno go tla re thusa go fedisa tlhakatlhakano eo.—Genesise 1:26.

Ke ka Ntlha Yang fa Modimo a Tlhalosiwa A na Le Setshwano sa Batho?

Bakwadi ba Baebele ba ne ba tlhotlhelediwa ke moya wa Modimo gore ba dirise setshwano sa batho go tlhalosa Mothatayotlhe e le go thusa batho gore ba tlhaloganye gore Modimo o ntse jang. Seno se ne sa dirwa go bontsha gore puo ya batho ga e ne e kgona go tlhalosa sentle gore Modimo wa boammaaruri, Jehofa o ntse jang. Maikaelelo e ne e le gore go bonadiwe botho jwa Modimo ka tsela e motlhofo e motho a ka e tlhaloganyang. Mme seno ga se reye gore re tshwanetse go tsaya seo jaaka se ntse, fela jaaka re sa tshwanela go tsaya mareo a a jaaka gore Modimo ke “Lefika” “letsatsi” kgotsa “thebe” jaaka a ntse.—Duteronome 32:4; Pesalema 84:11.

Ka tsela e e tshwanang e le go bontsha gore motho ka selekanyo se se rileng o na le dinonofo tse Jehofa a nang le tsone Baebele e bolela gore motho o bopilwe ka setshwano sa Modimo. Go phepafetse gore ga go reye gore batho ke meya kgotsa gore Modimo o na le mmele wa batho.

A Modimo ke Monna Kgotsa ke Mosadi?

Fela jaaka go tlhalosa Modimo o dirisa setshwano sa batho go sa tshwanelwa go tsewa jaaka go ntse, go dirisiwa ga bong jwa monna fa go tlhalosiwa Modimo le gone ga go a tshwanelwa go tsewa jaaka go ntse. Go farologanya ka bong ke ga dibopiwa tsa nama fela mme go dirisiwa fela go bontsha ka botlalo gore Modimo Mothatayotlhe, Jehofa o ntse jang.

Baebele e tlhalosa Modimo e le “Rre” go re thusa gore re tlhaloganye gore Mmopi wa rona a ka tshwantshanngwa le rre wa motho yo o lorato, yo o sireletsang le yo o amegang. (Mathaio 6:9) Seno ga se reye gore re tshwanetse go leba Modimo kgotsa le fa e le sebopiwa sefe se se kwa legodimong e le monna kgotsa mosadi. Ba ka se tlhaolwe ka bong. Se se kgatlhang ke gore, Baebele e tlhalosa gore ba ba tla busang mmogo le Keresete kwa Bogosing jwa legodimo ba ka se nne ba ntse ba na le bong jo ba neng ba na le jone fa e setse e le barwa ba moya ba Modimo. Moaposetoloi Paulo o ne a ba gakolola gore “ga go na motho wa monna le fa e le motho wa mosadi” mo maemong a bone fa ba setse ba galaleditswe go nna barwa ba Modimo ba moya. Gape ba tlhalosiwa ka tsela ya tshwantshetso go twe ke “monyadiwa” wa Kwana, Jesu Keresete. Seno sotlhe se bontsha kafa popego ya batho e e newang Modimo—le morwawe yo o tsetsweng a le esi Jesu le dibopiwa tse dingwe tsa moya—e sa tshwanelwang go tsewa jaaka e ntse ka teng.—Bagalatia 3:26, 28; Tshenolo 21:9; 1 Johane 3:1, 2.

E re ka bakwadi ba Baebele ba ne ba tlhaloganya seabe sa monna sentle ba ne ba dirisa bong joo fa ba tlhalosa Modimo. Bakwadi ba Baebele ba ne ba bona gore monna yo o diragatsang karolo ya gagwe a ka tshwantsha sentle lorato le kamego e Jehofa a nang le yone mo baneng ba gagwe ba mo lefatsheng.—Malaki 3:17; Mathaio 5:45; Luke 11:11-13.

Nonofo ya Modimo ya Botlhokwa

Le fa Molaodimogolo e le moya, ga a kgakala, ga a sirelediwa ke masaitsiweng e bile ga a kwa re ka se kgoneng go buisana le ene gone. Popego ya gagwe ya semoya ga e dire gore a palelwe ke go atamelwa ke batho ba ba peloephepa, ba ba batlang go itse le go anaanela lorato, maatla, botlhale le tshiamiso ya gagwe tse gape di senolang gore o ntse jang le tse di bonalang mo popong ya gagwe.—Baroma 1:19-21.

Gore Modimo o ntse jang go ka sobokanngwa ka nonofo ya gagwe e e tlhageletseng thata, lorato. Lorato lwa gagwe lo tlhomologile thata jaana mo e bileng go tweng ke mothofatso wa lone. (1 Johane 4:8) Nonofo eno e akaretsa dinonofo tse dingwe tse a nang le tsone tse di jaaka go utlwela botlhoko, go itshwarela le go nna pelotelele. (Ekesodo 34:6; Pesalema 103:8-14; Isaia 55:7; Baroma 5:8) E le ruri Jehofa ke Modimo yo o lorato yo o laletsang batho gore ba atamele gaufi le ene.—Johane 4:23.

[Ntlha e e kwa tlase]

A O KILE WA IPOTSA GORE. . .

◼ Leina la Modimo ke mang?—Pesalema 83:18.

◼ Re ka kgona go bona kae dinonofo tsa Modimo?—Baroma 1:19-21.

◼ Nonofo ya Modimo e e tlhagelelang thata ke efe?—1 Johane 4:8.