Baebele ya Reng

A o Tshwanetse go Boifa Baswi?

Maloko a morafe wa Ba-Annang kwa Nigeria a dumela gore fa baswi ba sa fitlhiwe sentle ka pako le tlotlo e e ba tshwanetseng, meya ya bone e tla tlisa mathata—go akaretsa le loso—mo malokong a lelapa. Ba-China bangwe le bone ba dumela gore fa go sa latelwe dingwao tsa phitlho, meya ya baswi e tla tlhasela le e leng go bolaya ba bangwe.

TUMELO ya gore fa motho a swa go na le sengwe se se tswang mo mmeleng—moya (soul le spirit), sepoko—e tlwaelegile mo ditsong tse dintsi go ralala lefatshe. Ba le bantsi ba dumela gape gore moya ono o ka tsenelela mo dilong tse di diragalelang maloko a lelapa kgotsa ditsala.

Le fa go ntse jalo, a tota go na le selo sengwe se se tshelang se se tswelelang se tshela fa motho a swa? Mme gone a “selo” seo se ka gobatsa batshedi? Baebele ya reng?

A Baswi ba a Utlwa?

Baebele e bolela gore baswi “ga ba itse sepe gotlhelele.” Gape e bolela gore baswi ga ba “na maatla mo losong.” (Moreri 9:5; Isaia 26:14) Fa Lefoko la Modimo le bolela ka motho wa ntlha e bong Adame la re: “Jehofa Modimo a bopa motho ka lorole lo lo tswang mo mmung a ba a budulela moya wa botshelo mo teng ga maroba a dinko tsa gagwe, mme motho a nna moya o o tshelang.”—Genesise 2:7.

Ela tlhoko gore Adame o ne a bopiwa e le moya, ke gore motho yo o tshelang. Go ya ka Baebele, Adame ga a fiwa moya o o ka tshelang kwa ntle ga mmele wa gagwe. Ka jalo fa Adame a leofa, o ne a swa. O ne a nna ‘moya o o suleng.’ (Dipalo 6:6) Baebele gape ya re: “Moya o o leofang—go tla swa one.” (Esekiele 18:4) Rotlhe re ruile boleo, kgotsa go sa itekanela go tswa mo mothong wa ntlha e bong Adame. Ka jalo, fa re swa, moya o a swa.—Baroma 5:12.

Fa Baebele e tlhalosa boemo jwa baswi, ga e dirise mafoko a a sa tlhaloganyesegeng mme go na le moo e dirisa mafoko a re a tlhaloganyang a a jaaka go “robala mo losong.” (Pesalema 13:3) Ka nako nngwe Jesu o ne a bolela jaana ka mosetsana mongwe wa dingwaga di le 12: “Ga aa swa mme o robetse.” Batho ba ne ba “simolola go mo tshega ka tshotlo, ka gonne ba ne ba itse gore o sule.” Le fa go ntse jalo, Baebele e tlhalosa gore Jesu o ne a mo tsosa mo borokong jwa loso.—Luke 8:51-54.

Go ne go ntse jalo le fa Lasaro a swa. Jesu o ne a bolelela barutwa ba gagwe gore o ne a ya go etela Lasaro go ya go ‘mo tsosa mo borokong.’ Barutwa ba ne ba sa tlhaloganye gore Jesu o ne a raya jang, ka jalo “Jesu a ba bolelela ka tlhamalalo a re: ‘Lasaro o sule.’” Moaposetoloi Paulo le ene o ne a bua ka bangwe ba ba neng ba ‘robetse mo losong’ mme a re ka nako e e tshwanetseng ya Modimo ba tla boa ba tshela gape.—Johane 11:11-14; 1 Bathesalonika 4:13-15.

Sa botlhokwa le go feta ke gore, ga go na gope mo Baebele e rutang gore moya o tswelela o tshela fa motho a swa. Ka jalo, ga go na mabaka a go boifa baswi. Mme ke eng se se dirang gore go bo go na le tumelo e e tlwaelegileng ya gore go na le karolo nngwe ya motho e e tswelelang e tshela morago ga loso? Mme ke eng se se dirang gore batho ba boife gore baswi ba ka gobatsa batho ba ba tshelang?

Maaka—Tsietso

Madumedi a maaka a ile a rotloetsa kgopolo ya gore tota batho ga ba swe. Mo hisitoring ya motho, thuto ya gore moya ga o swe e ile ya amogelwa go ralala lefatshe. Ka ntlha ya seo, fa babusi bangwe ba ne ba swa—jaaka Bofaro ba kwa Egepeto wa bogologolo—makgoba a bone a ne a bolawa gore a kgone go ba direla kwa botshelong jo bo tlang.

Batho ba le bantsi ba ne ba bogisiwa ke se ba neng ba bolelelwa gore ke meya ya batho ba ba suleng. Ba dumela thata gore pogo e e ntseng jalo e bakiwa ke meya e e sa itumelang ya ba masika a bone le ba bangwe ba ba suleng. Le fa go ntse jalo, jaaka Dikwalo di bontsha sentle, seo ga se boammaaruri. Meya e e sa bonaleng e e bidiwang madimona ke yone e e tlhaselang batho bano mme a itumelela go bogisa batho le go ba boifisa.—Luke 9:37-43; Baefeso 6:11, 12.

Dikwalo di tlhalosa Satane e le “ramaaka” yo o “[nnang] a iphetola moengele wa lesedi.” Ene le madimona a gagwe ba ‘tsietsa lefatshe lotlhe le le nang le banni.’ (Johane 8:44; 2 Bakorintha 11:14; Tshenolo 12:9) Boammaaruri ke gore, Satane ke ene yo o tlhotlheletsang maaka a gore moya ga o swe mme o ka gobatsa batshedi.

Le fa go ntse jalo, batho ba ba dumelang mo Baebeleng, ba sireleditswe gore ba se ka ba tsiediwa ke maaka ao. Ba ithutile boammaaruri ka maiteko a ga Satane a go tsietsa batho gore ba dumele gore baswi ba ka buisana le batshedi. Boammaaruri ke gore, jaaka Baebele e bolela: “Batshedi ba a itse gore ba tla swa; mme fa e le baswi bone, ga ba itse sepe gotlhelele.” (Moreri 9:5) Ee ruri, Lefoko la Modimo le na le boammaaruri jo bo re gololang malebana le boemo jwa baswi!—Johane 8:32.

A O KILE WA IPOTSA GORE. . .

◼ A go na le se baswi ba se utlwang?—Moreri 9:5; Isaia 26:14.

◼ Ke eng se se dirileng gore batho ba le bantsi ba dumele gore go na le karolo nngwe ya motho e e tswelelang e tshela morago ga loso?—Johane 8:44.

◼ Re ka bona kae boammaaruri ka boemo jwa baswi?—Johane 8:32; 17:17.

[Mafoko a a mo go tsebe 23]

Dibopiwa tse di bosula tsa moya, e seng batho ba ba suleng ke tsone di itumelelang go bogisa batho