Tshwanelo ya Molwetse ya go Itlhophela

KA MOKWADI WA TSOGANG! KWA ITALY

◼ Basupi ba ga Jehofa ba gana go tshelwa madi. Go gana ga bone go theilwe mo ditaelong tsa Baebele, mme taelo ya bogologolo thata mo go tsone ke e e reng: “Fela nama e e nang le moya wa yone—madi a yone—lo se ka lwa e ja.” Bakeresete ba lekgolo la ntlha la dingwaga ba ne ba bolelelwa jaana: ‘Nnang lo ithibile mo mading.’—Genesise 9:4; Ditiro 15:29; Lefitiko 17:14.

Kwa Monterenzio, kwa Italy, baithuti ba sekolo se segolwane ba ne ba kopiwa go kwala tlhamo e e buang ka botlhokwa jwa go aba madi. Gare ga baithuti bao go ne go na le Benedetta, yo e leng mongwe wa Basupi ba ga Jehofa yo o neng a kwala se se latelang:

“Go a itsege gore Basupi ba ga Jehofa ba gana go tshelwa madi ka ntlha ya go latela melaometheo ya Baebele, mme seno ga se reye gore ga ba amogele dikalafi tse dingwe. Tota e bile, Basupi ba ga Jehofa ba tsaya botsogo jwa bone bo le botlhokwa thata. Ba leka thata go bona kalafi e e molemo e e leng teng e bone le bana ba bone ba ka e amogelang. Ba iketleeleditse go dirisana le dingaka fa fela se ba se dumelang se tlotliwa.”

Go tswa foo Benedetta o ne a oketsa jaana: “Molwetse mongwe le mongwe o na le tshwanelo ya go tlhopha kalafi e a e batlang, e a dumelang gore e tla mo solegela molemo, tshwanelo ya gore a tlotliwe le tshwanelo ya go itse dikotsi le mesola ya kalafi e a tla e fiwang.”

Baithuti ba ba tlhalositseng maikutlo a bone ka tsela e e molemolemo malebana le kgang eno, ba ne ba abelwa sekgele ke Lekala la kwa Monterenzio la Mokgatlho wa AVIS (Association of Italian Blood Donors). Pego nngwe mo makasineng wa Monterenzio Vivace e ne ya bolela jaana: “Benedetta Barbi o ne a umakiwa ka tsela e e kgethegileng ka ntlha ya tlhamo ya gagwe e e tlhalosang maikutlo a a farologaneng le a batho ba le bantsi—a tlhalosa maikutlo a a farologaneng le a mokgatlho wa AVIS—mme a tlhalosa se a se dumelang a sa feteletse dilo e bile a le maitseo.”

Le fa gone se Basupi ba ga Jehofa ba se dumelang se “farologane le boikutlo jwa batho ba le bantsi,” dingaka di le dintsi gone jaanong di bona botlhokwa jwa seo. Tumelo eno ya Basupi e dirile gore go simololwe mekgwa e mentsi ya kalafi e e fokotsang go latlhegelwa ke madi ka nako ya kalafi. Seno se dirile gore balwetse ba e leng Basupi le ba e seng Basupi ba solegelwe molemo. Le fa go ntse jalo, lebaka le legolo la go bo Basupi ba ga Jehofa ba gana go tshelwa madi le theilwe thata mo Baebeleng jaaka go tlhalositswe kwa tshimologong.

Mo nakong e e tlang fa Basupi ba ga Jehofa ba go etela kwa legaeng la gago, ke eng fa o sa ba botse gore Mmopi o ikutlwa jang ka madi? Ba tla itumelela go tlotla le wena ka kgang eno, ba dira jalo ka “tlotlo e e boteng.”—1 Petere 3:15.

[Lebokoso/Setshwantsho mo go tsebe 30]

TSHEDIMOSETSO E E OKETSEGILENG

Ka thuso ya bomankge ba bantsi ba ba itsegeng, DVD ya Transfusion Alternatives e sekaseka melaometheo ya kalafi, ya semolao le ya boitsholo e e amanang le dilo tse dingwe tse di ka dirisiwang mo boemong jwa go tshelwa madi. O ka e bona mo Basuping ba ga Jehofa.