Pilara mo Lewatleng

◼ A o kile wa bona lephothophotho la metsi? Go na le le le kileng la bopega mo lewatleng kwa Tahiti ka December 25, 2005. E ne e le fanele e telele ya setsuatsue le metsi mo gare ga lewatle le loapi e e ileng ya tsaya metsotso e le 30. E ne ya fetoga go nna mmala o mosweu ka bonya mme e bo e nyelela.

Ka dinako tse dingwe maphothophotho a bidiwa ditsuatsue tse di mo metsing mme gantsi di bokoa thata go na le ditsuatsue. Gantsi di tsaya metsotso e e ka nnang lesome, le fa gone tse dingwe di tswelela ka sebaka sa ura. E re ka di direga mo lewatleng, gantsi go di bona go direga ka sewelo fela. Se se dira gore go nne thata gore balepaloapi ba di tlhaloganye ka botlalo. Go ya ka dipego, di ka nna tsa dira modumo o mogolo, fela jaaka terena e e rwalang merwalo.

Fa mopesalema mongwe wa Baebele wa motlha wa bogologolo a ne a tlhalosa go tlhakatlhakana ga maikutlo a gagwe, o ne a re: ‘Bodiba jo bo boteng jwa metsi bo bitsa bodiba jo bo boteng jwa metsi fa go nna le modumo wa lephothophotho la metsi a gago.’ (Pesalema 42:7) Le fa gone re ka se ka ra re mopesalema yono wa Baebele o ne a bua ka mofuta ono wa lephothophotho la metsi, maikutlo a gagwe a ka tswa a ne a tlhalosiwa ke tiragalo eno. O ne a re moya wa gagwe “o itlhobogile” mme o ne o “fuduega” mo teng ga gagwe. Le fa go ntse jalo, o ne a gomodiwa ke Modimo. O ne a raya moya wa gagwe a re, “leta Modimo, gonne ke sa ntse ke tla mmaka jaaka poloko e kgolo ya me le jaaka Modimo wa me.”—Pesalema 42:11.

Jaaka mopesalema, le rona re ka nna ra nna le mathata a re ka a tshwantshang le setsuatsue mo godimo ga lewatle. Mme fa re leta Modimo, o tla itshupa e le poloko e kgolo ya rona.