Ditshoswane Tsa Tswina—Sejo se se Monate sa Kwa Sekakeng
YUMINIYA, tsala ya rona ya Moaborijene, o batla go re tlotlela ka sengwe sa dilo tse re sa di itseng tsa kwa sekakeng. Fa a sena go re isa kwa lefelong le le omeletseng le le nang le ditlhatsana le le kwa bokone jwa Alice Springs, e e kwa bogare jwa Australia, o tlhatlhoba mmu wa motlhaba ka kelotlhoko. Kwa lefelong leo, mo tlase ga ditlhare tsa mulga, mofuta wa ditlhare tse di golang mo lefelong le le mogote, o bona ditshedinyana tse di re isang kwa sengweng se se botshe. Ke ditshoswane tsa tswina.
O epa ka thata, a latelela mosima wa ditshoswane kwa teng ga mmu wa motlhaba. Go ise go ye kae, mosima o a o epang o boteng jo bo fetang metara mme o bulegile bophara jo motho a ka kgonang go nna mo go one. O tlhaeletsa jaana go tswa mo mosimeng: “O ka epa ditshoswane tsa tswina nako nngwe le nngwe mo ngwageng mme nako ya mariga ke yone e e molemo ka gonne ka selemo go mogote thata.” Fa re mo lebile fa a ntse a tlhatlhoba mesima e e bulegileng, go ne go bonala gore o na le maitemogelo. O tlhalosa jaana: “O tshwanetse go itse gore ke mosima ofe o o tshwanetseng go o latelela.”
Go ise go ye kae, Yuminiya o bona mosima. Mo teng go na le bobotlana ditshoswane tsa tswina di le 20 tse dimpa tsa tsone di budulogileng, di le bogolo jo bo lekanang le diterebe mme di tletse seedi se se mmala o o tshwanang le wa namune. Ditshenekegi tseno tse dinnye di akgega go tswa kwa godimo mo teng ga khuti mme di palelwa ke go tsamaya ka ntlha ya dimpa tsa tsone tse di budulogileng. Mo metsotsong e se kae, Yuminiya o phutha ditshoswane tse di fetang lekgolo go tswa mo diphaposinyaneng di le mmalwa mo teng ga mesima. A re: “Tswina ya ditshoswane tseno ke nngwe ya dijo tse di botshe thata tsa sekgwa.”
Dinkgwana Tse di Tshelang Tsa Tswina
Ditshoswane tsa tswina ke dingwe tsa ditshoswane tse di sa tlwaelegang thata mo mefuteng e le 10 000 ya ditshoswane tse di itsegeng. Go farologana le dinotshe tse di bolokang tswina ya tsone mo teng ga mamepe, ditshoswane tsa tswina tsone di boloka tswina ya tsone mo teng ga mebele e e tshelang ya ditshoswane tse e leng badiri tse di bidiwang di-replete. Ditlhopha tsa ditshoswane di dirisa “dinkgwana tsa tswina” tse di tshelang ka nako ya fa di sa kgone go bona dijo.
Fa ditshoswane tseno di tsenya kgotsa di ntsha dijo, di tla dirisa dinakana tsa tsone go kgotlha dinakana tsa replete ka tsela e e tshwanetseng. Replete eno e tla bo e bula molomo wa yone gore “nkgwana ya tswina” e bulege. Go na le belofo e e kgethegileng mo mpeng ya yone, e e nang le dikarolwana di le nnè tse di laolang go tswa le go tsena ga tswina. Mo nakong ya botshelo jwa yone jwa dikgwedi di le mmalwa, go bonala replete e ka kgona go gamiwa le go tladiwa ka tswina ka makgetlho a le mmalwa.
Gantsi di-replete di nna fela di sa dire sepe mme di babalesegile kafa tlase ga mmu, di sireletsegile mo komelelong, mo mogoteng le mo ditsheding tse dingwe tse di jang ditshenekegi. Mo lefelong leno le le lefifi le le kafa tlase ga mmu, di kgona go itshireletsa mo dibakaterieng le mo mothuthuntshwaneng ka go tshasa mebele ya tsone ka seedi sa sebolayabaketeria se se tswang mo kgelesweng nngwe e e kgethegileng.
“Tswina” eo e tswa kae? Modikologo ono wa dijo o simolola ka matute a a botshe a ditlhare tsa acacia. Go tswa foo, ditshenekegi tse dinnye tse di bidiwang di-aphid di ja matute ano a tlholego. Morago ga foo, ditshoswane tsa badiri di gama di-aphid go ntsha sukiri ya tsone e e setseng, e e bidiwang honeydew kgotsa di tsaya matute ka tlhamalalo go tswa mo ditlhareng. Kwa bofelong, ditshoswane tseno tsa badiri di fepa di-replete seedi seno. Mme gone, e re ka di-replete tseno tse di nnang fela di sa tlhoke dijo tse dintsi, bontsi jwa honeydew eno bo felela mo “bobolokelong jwa tswina”!
Mme go tweng ka di-aphid? A tsone ga di solegelwe molemo mo thulaganyong eno? Di solegelwa molemo. Sa ntlha, ditshoswane di di tlogelela matute a a lekaneng. Sa bobedi, ditshoswane di sireletsa di-aphid mo dipharasaeteng le mo ditsheding tse di jang tse dingwe. Ee, ditshoswane mmogo le di-aphid di solegelwa molemo ke tirisanommogo eno e e bidiwang mutualism (thulaganyo e mo go yone ditshedi ka bobedi di solegelwang molemo ke tirisanommogo).
Baebele ya re: ‘Tsamaya o ye kwa tshoswaneng, bona ditsela tsa yone mme o tlhalefe. Le fa e se na molaodi, modiredi kgotsa mmusi, e baakanya dijo tsa yone selemo; e phuthile dijo tsa yone ka nako ya thobo.’ (Diane 6:6-8) Abo mafoko ano a le boammaaruri jang ne, ka gonne eleruri ditshoswane di dirisana mmogo, di na le thulaganyo ya maemo a a kwa godimo e bile di dira ka natla! Mme abo go gakgamatsa jang ne gore ditshedi tseno tse di dirang ka natla tse di nnang kwa sekakeng di kgona go ntsha tswina e e botshe e e monate le fa di le mo maemong a a sa itumediseng!
[Setshwantsho mo go tsebe 11]
Mpa e e budulogileng ya tshoswane ya tswina e tletse ka matute a a botshe
[Metswedi ya Ditshwantsho mo go tsebe 11]
Pages 10, 11, top: M Gillam/photographersdirect.com; page 11: © Wayne Lynch/age fotostock