Ditiragalo Tsa Lefatshe
“Pele go nna le dikhomputara, go ne go batla go sa kgonege [gore baithutadimela] ba batlisise mo dikgatisong tsotlhe tse di leng teng pele ba naya mofuta o mosha wa semela leina, ka jalo go ne ga simolola ga nna le maina a mantsi a a tshwanang.” Jaanong go lemogilwe gore mo maineng a ka nna milione a a leng teng, bobotlana a ka nna 477 601 a one ke makaelagongwe.—SCIENCE, U.S.A.
“Ke diperesente di le 6 fela tsa batho ba kwa China ba ba reng ba itumetse.” Diperesente di ka nna 39 tsa batho ba ba botsoloditsweng ka kgang eno mo patlisisong nngwe ba dumela gore “selo sa konokono se se amang boitumelo” ke “khumo.”—CHINA DAILY, CHINA.
“Patlisiso e e dirilweng . . . malebana le boammaaruri jwa dipalopalo tsa bokebekwa kwa Russia e fitlhetse gore go na le ‘dilo di le dintsi tsa maaka’ mo dipalopalong tsa naga eo yotlhe.” Mekgatlho e e tlhomamisang gore melao e a latelwa e latofadiwa ka go leka go “fetola seemo se tota se leng gone sa ditiro tsa bokebekwa” e bile e latofadiwa ka go iphaka gore e rarabolotse dikgetsi tsa bokebekwa tse dintsi go feta tse tota e di rarabolotseng.—RIA NOVOSTI, RUSSIA.
“Moithuti a le mongwe mo go ba le bararo ba yunibesithi kwa motsemoshateng wa Jeremane [Berlin] a ka dira ditiro tse di amanang le tlhakanelodikobo [tse di akaretsang go gweba ka mmele le go tansa ka tsela e e tsosang keletso ya tlhakanelodikobo] gore a bone madi a go duelela dithuto tsa gagwe.”—REUTERS NEWS SERVICE, JEREMANE.
Go Ikgabisetsa Go ya Go Belega
Metswedi ya go ikgolaganya le ba bangwe mo Internet e ama tsela e bommè ba itsiseng ka yone gore ba sa tswa go belega. Pego ya seteishene sa thelebishine sa kwa Amerika e leng ABC sa re bogologolo bommè ba ne ba romela dithelekerama mme gompieno “bommè ba ba sa tswang go belega ba itsise batho ba bangwe dikgang tse di itumedisang ka Internet.” Gantsi fa ba itsise batho ba tsenya le ditshwantsho tsa bone le masea a bone fela fa a sena go belegwa. Ka jalo basadi ba gompieno ba ba amegileng ka tsela e ba lebegang ka yone ba a ikgabisa pele ba belega, go akaretsa go intlafatsa sefatlhego le go intlafatsa menwana le dinala tsa maoto le matsogo. Pego eo ya re, “e bile bangwe ba bone ba rulaganya go tsamaya le motho yo o tla ba kgabisang moriri kwa kokelong.” Ka ntlha yang? Toni Golen, motsamaisi wa lephata la babelegisi kwa Beth Israel Deaconess Medical Center e e kwa Boston o tlhalosa gore ba dira jalo gore ba nne bantle fa ba belega.
Itshikinye Mmele Mme o Nne le Botsogo jo Bontle
Babatlisisi ba re go nna o sa itshikinye mmele kwa tirong, kwa sekolong kgotsa fa pele ga thelebishene go ka baka malwetse a a sa foleng. Lekwalodikgang la Vancouver Sun la re: “Fa o nna o ntse fa fatshe, ensaeme e e dirang gore mesifa e monye mafura a a mo mading le go a dirisa e fokotsa tsela e e dirang ka yone ka bofefo.” Go ya ka lekwalodikgang leo, “re tlhoka se se fetang go dira gore pelo e iteye ka bofefo” ka go itshidila mmele gangwe le gape, gore re nne re na le botsogo jo bontle. “Re tlhoka go nna re dira ditiro tsa go itshikinya mmele tse di seng bokete ka metlha gore mmele o kgone go tswelela o sila dijo sentle.”