Tshiamololo e Utlwisa Botlhoko!
KA 2010, Michael o ne a gololwa kwa kgolegelong ya kwa Texas, U.S.A., morago ga go fetsa dingwaga di le 27 gone ka ntlha ya petelelo—molato o a neng a sa o dira. O ne a gololwa fa diteko tsa DNA—tse di neng di seyo ka nako ya fa a ne a atlholwa—di ne di bontsha gore ga a molato. Moragonyana mapodise a ne a kgona go bona gore ke bomang ba ba dirileng molato oo mme ba ne ba ka se sekisiwe ka gonne molao o ne o re go fetile nako e telele thata e sale molato oo o diragetse.
Dikebekwa tse dintsi di tlogelwa fela di sa atlholwe. Ka sekai, pego ya The Telegraph ya re kwa Boritane “dikgetsi tsa polao tse di sa rarabololwang di oketsegile go menagane gabedi mo dingwageng tse di lesome tse di fetileng mme seo se dira gore batho ba boife gore mapodise le dikgotlatshekelo ga di kgone go fedisa bokebekwa jwa tirisodikgoka.”
Ka August 2011, mapodise a kwa Boritane a ne a palelwa ke go laola mofuta o mongwe gape wa bokebekwa—dikhuduego tsa kwa Birmingham, Liverpool, Lontone le dikarolo tse dingwe. Digopa tse di galefileng di ne tsa tshuba melelo, tsa thuba difensetere tsa mabenkele, tsa utswa dilo mme ka go dira jalo di sa senye fela dikgwebo, magae le dikoloi mme gape di senya le se batho ba itshedisang ka sone. Ba ne ba tlhotlhelediwa ke eng? Bontsi jwa bone ba ne ba tlhotlhelediwa ke bopelotshetlha. Le fa go ntse jalo, bangwe ba bone ba ne ba lebega ba dira jalo ka ntlha ya tshiamololo e ba neng ba e bona. Bagasi bangwe ba ile ba re, batho bao ba ba neng ba baka dikhuduego e ka tswa e ne e le basha ba ba betilweng ke pelo, ba ba neng ba akanya gore puso e ba tlhokomologile, ba ba neng ba golela mo mafelong a a humanegileng mme ba se na tsholofelo ka isagwe.
Mongwe yo go buiwang ka ene mo Baebeleng e bong Jobe o ne a re: “Ke nna ke goa ke kopa thuso, mme ga go na tshiamiso.” (Jobe 19:7) Ka tsela e e tshwanang le gompieno batho ba le bantsi ba batla tshiamiso mme gantsi ga ba e bone. A tota go na le mongwe yo o nang le maatla a go fedisa tshiamololo? A kgotsa ga go utlwale go solofela gore go tla nna le tshiamiso mo isagweng? Fa re batla go bona karabo e e kgotsofatsang re tshwanetse go sekaseka dingwe tsa dilo tse di bakang tshiamololo.