Ditiragalo Tsa Lefatshe

New York City e tlhomile molao o o thibelang go goga motsoko mo losing lwa lewatle, mo diparakeng le mo mafelong a a bulegileng a batho ba ba tsamayang ka dinao. Batho ba ba tlolang molao ono ba tla tshwanelwa ke go duela R400 nako le nako fa ba tlola molao. Badiredibagolo ba solofela gore thibelo eno “ga e ne e tlhoka mapodise go tlhomamisa gore molao ono o a ikobelwa.”—THE WALL STREET JOURNAL, U.S.A.

“Go bolawa ga masea a a iseng a tsholwe a basetsana, segolobogolo fa motho a setse a na le ngwana wa ntlha wa mosetsana, go oketsegile fela thata kwa India.” Mo malapeng a a neng a setse a na le ngwana wa ntlha wa mosetsana, palo ya basetsana ba ba tsholwang fa e bapisiwa le ya basimane ba le 1 000 ba ba tsholwang e ne ya fokotsega go tloga go 906 ka 1990 go ya go 836 ka 2005.—THE LANCET, BORITANE.

Mokgatlho wa Lefatshe Lotlhe wa Boitekanelo wa re marang a electromagnetism “a a jaaka a a tswang mo didirisiweng tsa tlhaeletsano tse di sa diriseng megala” “a ka tswa a ka baka kankere mo bathong.”—INTERNATIONAL AGENCY FOR RESEARCH ON CANCER, FORA.

Lekgotla la Ditšhaba Tse di Kopaneng le ne la itumelela go fedisiwa ga bolwetse jwa rinderpest, kgotsa leroborobo la dikgomo. Jono ke jone “bolwetse jwa ntlha jwa diphologolo jo batho ba kgonneng go bo fedisa mo bo simologileng teng . . . mme ke jone jwa bobedi jwa mofuta ope fela jo bo neng jwa fedisiwa, morago ga jwa sekgwaripana mo bathong.”—FOOD AND AGRICULTURE ORGANIZATION OF THE UNITED NATIONS, ITALY.

A ba Ipaakanyeditse Masetlapelo a Magolo?

Setlhogo sa kgang nngwe ya lokwalodikgang lwa New York Times sa re: “Buka ya Kaelo ya Semolao ya go Lebana le Masetlapelo mo New York.” Se bega gore go gatisitswe buka ya kaelo ya semolao e e tla thusang baatlhodi le babueledi fa ba tshwaragane le dipotso tse di thata tse go ka diregang gore di bodiwe ka ntlha ya “tlhaselo e nngwe ya dirukhutlhi, kgotlelo e kgolo ya marang a a kotsi, kgotlelo ya dikhemikale kgotsa bolwetse bongwe jwa leroborobo jo bo anameng.” Buka eno ya kaelo e e gatisitsweng ke lephata la dikgotlatshekelo la kwa New York State le mokgatlho wa babueledi ba puso e na le lenaane le le ka tlholwang motlhofo la gore melao e e leng teng e laola jang dilo tse di jaaka go dira gore batho ba ba lwalang malwetse a a tshelanwang ba nne ba le nosi, go fudusa batho ba bantsi, go phuruphutsha ntle le tetla, go bolaya diphologolo tse di nang le malwetse le go beela molao o o rileng kwa thoko ka nakwana.

Mo Teng ga Mesamo e Megologolo

Rasaense yo mogolo wa tsa kalafi kwa St. Barts Hospital kwa Lontone e bong Art Tucker a re dilopo tse di phepa di ka tswa di “phuthetse sengwe se se maswe tota.” Lekwalodikgang la The Times la kwa Lontone le le neng le bega ka patlisiso ya gagwe le bolela gore fa mosamo o sena go dirisiwa dingwaga tse pedi, selekanyo se se fetang nngwetharong ya boima jwa one e a bo e le “ditshenekegi tse o ka se kang wa di bona ka matlho (dust mites) tse di tshelang le tse di suleng, mantle a tsone, dikarolwana tsa letlalo la motho le le suleng le dibakateria.” Mesamo ke mafelo a a siametseng go anama ga dilo tse di bakang allergy, megare le ditshenekegi tseno. Tharabololo e ka nna eng? The Times ya re: “Ditshenekegi tse o ka se kang wa di bona ka matlho . . . di omelela di bo di swa fa di le mo letsatsing, mo go kayang gore mokgwa wa bogologolo wa go isa dilwana tsa go robala kwa ntle o thusa go laola ditshenekegi tseno.” Melora ga e bolaye ditshenekegi tseo, mme go tlhatswa mesamo ka metsi a a mogote o o kwa godimo ga didikirii di le 60 go a di bolaya, mme metsi ano a tla ntshetsa bontsi jwa tsone kwa ntle ga mesamo.