Ditsela Tsa go Dira Dilo ka Tshiamiso
MMOPI wa rona o batla gore re itumele, re nne le kagiso ya mogopolo le gore re dire dilo tse di ka dirang gore batho ba bangwe ba itumele. Ka jalo, o re laela gore re “dire tshiamiso le go rata bopelonomi.” (Mika 6:8) Re ka dira seo jang? Re tlhoka go lwela go nna le dinonofo tse di tla dirang gore re se ka ra nna batho ba ba tshiamololo. Ela tlhoko kafa Baebele e ka re thusang ka teng go dira jalo.
GO FENYA BOPELOTSHETLHA. Tsela e e molemolemo ya go fenya bopelotshetlha ke go rata batho ba bangwe ka lorato lwa go intsha setlhabelo—e seng maikutlo fela kgotsa lorato lwa baratani. Lokwalo lwa 1 Bakorintha 13:4, 5 lwa re, “lorato” lo lo ntseng jalo “lo pelonomi” e bile “ga lo ipatlele melemo ya lone fela.” Mo godimo ga moo, mofuta ono wa lorato ga o bontshiwe ba lelapa le ditsala fela. Jesu o ne a botsa jaana: “Fa lo rata ba ba lo ratang, lo na le maduo afe?” Mme o ne a oketsa ka go re le eleng batho ba ba sa itseng Modimo ba rata batho ba ba ba ratang.—Mathaio 5:46.
GO FENYA TLHAOLELE. Ditiro 10:34, 35 e balega jaana: “Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.” Modimo ga a atlhole batho go ya ka lotso lwa bone, maemo a bone mo setšhabeng kgotsa bong jwa bone. Mo matlhong a gagwe “ga go na Mojuda le fa e le Mogerika, ga go na motlhanka le fa e le mogololesegi, ga go na motho wa monna le fa e le motho wa mosadi.” (Bagalatia 3:28) Fa re etsa Modimo, re fenya tlhaolele. Ela tlhoko sekai sa ga Dorothy yo o neng a nna kwa United States.
Dorothy o ne a galefisiwa thata ke go tlhaolwa ga batho ka lotso mo a neng a batla go nna le seabe mo ntweng ya go tlisa diphetogo e e neng e tla golola batho ba bantsho mo kgatelelong. Le fa go ntse jalo, ka nako eo o ne a ya kwa dipokanong tsa Bokeresete tsa Basupi ba ga Jehofa mme a kgatlhiwa thata ke tsela e a neng a amogelwa ka lorato ka yone ke batho ba bantsho mmogo le ba basweu. Go ise go ye kae, o ne a lemoga gore ke Modimo fela yo o ka kgonang go fetola dipelo tsa batho. Fa a bona lorato lwa mmatota lo Basupi ba basweu ba neng ba mmontsha lone—batho ba a neng a re ‘o ne a ka se etsaetsege go ba bolaya gore a thuse go tlisa diphetogo’—o ne a “amega” mo a neng a lela a sa kgaotse.
GO FENYA MEKGWA YA BOTSUOLODI. Pele bangwe ba balatedi ba ga Jesu e nna Bakeresete, e ne e le matagwa, batho ba ba tsayang ka dikgoka, matlhapelwa le bagobolodi. Le fa go ntse jalo, ka thuso ya Modimo ba ne ba latlha mekgwa eno mme ba nna le dinonofo tse di jaaka lorato, bopelonomi le molemo. (1 Bakorintha 5:11; 6:9-11; Bagalatia 5:22) Ka tsela e e tshwanang le gompieno, batho ba le dimilionemilione ba ile ba dira diphetogo tse di siameng mo matshelong a bone ka go obamela Modimo. Mongwe wa batho bao ke Firuddin yo o nnang kwa Azerbaijan.
Firuddin o goletse kwa legaeng la dikhutsana, kwa a neng a tlwaetse go lwa le basimane ba bangwe gone. Fa a setse a godile o ne a nna mokatisi wa ntwa ya matsogo. A re: “Ke ne ke se na maitseo, ke le setlhogo e bile ke le dikgoka. Fa ka nako ya dijo mosadi wa me, Zahra, a ne a ka lebala sepe fela—le fa e le toothpick—ke ne ke mo itaya. Mme fa motho ope fela a ne a ka mo leba fa re ntse re tsamaya mmogo, le ene ke ne ke mo itaya!”
Letsatsi lengwe Firruddin o ne a amega thata fa a ne a utlwa gore Jesu o ne a kopa Modimo gore a itshwarele masole a a neng a mmapola. (Luke 23:34) O ne a ipolelela jaana, ‘Morwa Modimo ke ene fela a neng a ka dira jalo.’ Go tswa foo o ne a simolola go ithuta mo go oketsegileng ka Modimo. Fa Basupi ba ga Jehofa ba ne ba ithaopela go mo thusa, o ne a amogela thuto ya mahala ya Baebele a sa potapote. Go ise go ye kae, botho jwa gagwe bo ne jwa simolola go tokafala. Ee ruri, o ne a nna pelonomi mo go Zahra mo le ene a neng a simolola go ithuta Baebele. Gompieno boobabedi ba obamela mmogo ka kagiso mo kobamelong ya boammaaruri.
Gone ke boammaaruri gore diphetogo tse re ka di dirang di ka se fetole lefatshe lotlhe! Mme go tweng fa e le gore Modimo o ikaeletse go tlisa lefatshe le lesha le le nang le tshiamiso ya mmatota? Aitsane o na le maatla a go dira jalo! Mme akanya ka seno: Mo go 2 Timotheo 3:1-4, e e nopotsweng mo tshimologong ya setlhogo se se fetileng, re bone kafa Baebele e neng ya bolelela pele ka tsela e e utlwalang ka teng gore batho ka kakaretso ba ne ba tla nna jang mo motlheng wa rona. Polelelopele eo e diragaditswe fela jaaka e ntse—fela jaaka dipolelelopele tse dingwe tse dintsi tsa Baebele. Ka jalo, ga go reye gore ga re botlhale fa re ikanya tsholofetso ya Modimo ya gore o tla fedisa tshiamololo yotlhe. Tota e bile, Modimo o tla diragatsa boikaelelo joo. Jang?
[Lebokoso/Ditshwantsho mo go tsebe 7]
LETSHOLO LA GA HEIDE LA GO BATLA TSHIAMISO
Heide yo o nnang kwa United States o gakologelwa jaana: “Ke ne ke tenwa ke bomorafe, dintwa, khumanego le mefuta e mengwe ya tshiamololo mme ke ne ke batla tharabololo. Ke ne ka leka go dirisana le mokgatlho wa ditshwanelo tsa batho mme kgabagare ke ne ka nna leloko la mokgatlho mongwe wa dipolotiki mme go ne go lebega mekgatlho eno e sa kgone go fedisa tshiamololo.
“Ke ne ke akanya gore go tlhokega phetogo e kgolo le go feta mme mokgatlho wa mahipi o ne o lebega o ka atlega go dira seno. Mme le one o ne wa palelwa. Ke ne ka lemoga gore batho ba le bantsi ba mokgatlho wa mahipi ba ne ba kgatlhegela thata tlhakanelodikobo, diokobatsi le mmino wa rock and roll go na le go fetola dilo mme go lemoga seno go ne ga dira gore ke tshwenyege thata mo maikutlong. Go tswa foo ke ne ka kopana le mongwe wa Basupi ba ga Jehofa. O ne a mpontsha diphetogo tse Modimo a ikaeletseng go di dira go tswa mo Baebeleng. Ka sekai, o ne a mpontsha ditemana tse di jaaka Tshenolo 21:3, 4, e e reng Modimo o tla phimola dikeledi mo bathong botlhe e bile o tla fedisa khutsafalo, selelo le botlhoko—tse gantsi di bakwang ke tshiamololo. Ke ne ka ipotsa jaana: ‘A ruri ditsholofetso tseo di ka diragadiwa?’
“Ke ne ka tlhatswega pelo gore ditsholofetso tseno di tla diragadiwa fa ke ne ke bala se Dikwalo di se bolelang ka maatla le lorato lwa Modimo le fa ke ne ke iponela lorato lwa Basupi ba ga Jehofa. Gone jaanong ke letile ka tlhoafalo go diragadiwa ga ditsholofetso tsa Modimo.”
[Setshwantsho mo go tsebe 6]
Fa re etsa lorato lwa Modimo re fenya tlhaolele
[Setshwantsho mo go tsebe 6]
Firuddin le mosadi wa gagwe e bong Zahra