Ke Eng se se Tla Fetogang?

“Setšhaba ga se kitla se tsholeletsa setšhaba se sengwe tšhaka.”

“Ga go na monni ope yo o tla reng: ‘Ke a bobola.’”

“Loso lo tla bo lo seyo.”

MAFOKO a a fa godimo a ka lebega a ka se direge. Mme re ka tlhomamisega gore ga se go ijesa dijo tsa ditoro fela. Ka ntlha yang? Ka gonne mafoko ao ga se maikano a lefela a a dirwang ke boradipolotiki ba ba se nang maatla a go fetola lefatshe. Go na le moo, ditsholofetso tse di nopotsweng fa godimo di tswa mo Baebeleng.a

Batho ba le bantsi ba akanya gore Baebele ke buka ya bogologolo e e se nang mosola mo motlheng wa rona. A ke se o se dumelang? Fa e le gore go ntse jalo, ke eng fa o sa sekaseke ka kelotlhoko se Baebele e se bolelang? E bile tota Baebele ke yone fela buka e e boitshepo e e re bolelelang ka se se diragetseng go tloga fela kwa tshimologong ya batho. E tlhalosa dilo tse di latelang:

● Kafa losika lwa batho lo tseneng mo mathateng ka teng.—Baroma 5:12.

● Kafa Modimo a ikaeletseng go baakanya dilo ka teng.—Johane 3:16.

● Lebaka la go bo dipuso di ka se kgone go fetola lefatshe la rona.—Jeremia 10:23.

● Lebaka la go bo re ka ikanya tsholofetso ya Modimo ya gore o tla dira jalo.—Joshua 23:14.

A ruri Modimo o tla fedisa tlala, ntwa, bolwetse le loso tse di diragalelang batho? Go ka se nne thata go dumela seno fa e le gore o dumela dilo tse di latelang:

1. Modimo o re bopile.

2. O amega ka rona.

3. O na le maatla a go fetola lefatshe.

4. O ikaeletse go dira jalo.

A go na le mabaka a a utlwalang a go dumela dintlha tseo tse nnè? Basupi ba ga Jehofa, ba ba gatisang makasine ono, ba go laletsa gore o iponele mabaka ao ka go ithuta Baebele.

Gongwe o na le Baebele mme o e bala sewelo kgotsa ga o e bale gotlhelele. Tota le batho ba le bantsi ba ba balang Baebele ba bolela gore e thata go e tlhaloganya. Fa e le gore le wena o ikutlwa jalo, re go laletsa gore o ikgolaganye le Basupi ba ga Jehofa gore o newe thuto ya mahala ya legae ya Baebele. Batho ba le dimilionemilione mo lefatsheng lotlhe ba solegelwa molemo ke thulaganyo eo. E bereka jang?

Beke nngwe le nngwe, Basupi ba ga Jehofa ba ka tla kwa legaeng la gago kgotsa kwa lefelong le lengwe le le go siametseng, go tla go tlotla le wena ka Baebele ba sa go duedise. Dinako tseno tsa go ithuta Baebele di tla go thusa go araba dipotso tse di jaaka, Ke ka ntlha yang fa re boga? Ke eng fa dipuso tsa batho di se na maatla a go fetola lefatshe? Bogosi jwa Modimo ke eng mme bo tla kgona jang go dira dilo tse dipuso tsa batho di sa kgoneng go di dira?b

Go bona tshedimosetso e e oketsegileng malebana le kafa o ka solegelwang molemo ka teng ke thuto ya legae ya Baebele, ikgolaganye le Basupi ba ga Jehofa ba mo lefelong la lona kgotsa o ye kwa atereseng eno ya Internet www.pr418.com. Gape o ka kwalela kwa atereseng e e tshwanetseng e e mo lenaaneng le le mo tsebe 5 ya makasine ono.

[Dintlha tse di kwa tlase]