Ditiragalo Tsa Lefatshe
Kwa Repaboliking ya Georgia kwa borwabotlhaba jwa Yuropa, “palo ya batho ba ba tlhalanang e oketsegile mo e ka nnang go menagane gabedi mo dingwageng tse di lesome tse di fetileng.” Bontsi jwa batho ba ba tlhalanang ba kafa tlase ga dingwaga di le 20.—FINANCIAL, GEORGIA.
Kwa Ireland, diperesente di le 17 tsa bana ba dingwaga tse 11 go ya go tse 16 “ba kile ba naya mongwe yo ba neng ba ise ba tsamaye ba kopane le ene maina a bone a a feletseng mo Internet.” Diperesente di le 10 gape di ne tsa naya mongwe “aterese ya email, nomoro ya mogala wa selula kgotsa senepe.”—THE IRISH SOCIETY FOR THE PREVENTION OF CRUELTY TO CHILDREN.
Ke diperesente di ka nna 4 fela tsa melelo ya naga mo lefatsheng lotlhe e e bakilweng ke dilo tsa tlholego. Mo makgetlhong a mangwe otlhe, melelo e simololwa ke motho—e ka tswa e le ka ntlha ya bofafalele kgotsa ka boomo.—PRESSEPORTAL, JEREMANE.
“Mo e batlileng e le Moamerika a le mongwe mo go ba le 10 [ba ba nang le dingwaga di le 12 kgotsa go feta] o bega gore ka metlha o dirisa diokobatsi tse di seng kafa molaong, go akaretsa matekwane, cocaine, heroin, diokobatsi tse di tsenyang motho mo maibing, tse di gogwang kgotsa tsa kalafi mme a di dirisetsa go itlosa bodutu.”—USA TODAY, U.S.A.
Boikgapo bo Thusa go Nna le Botshelo jo bo Tlhomameng
Makasine wa Time wa re: “Dipatlisiso di bontsha gore go se nne le boikgapo fa motho a sa le mosha go ka kaya gore o tla nna le mathata a botsogo, a ka se eme sentle mo go tsa madi le gore o tla bo a dirile bokebekwa fa e setse e le mogolo.” Go ne ga dirwa dipatlisiso mo bathong ba feta 1 000 go tloga ka nako ya fa ba ne ba tsholwa go fitlha ba nna dingwaga di le 32. Fa e setse e le bagolo, batho “ba [fa e ne e le bana] ba neng ba dira dilo ka go phamoga fela e bile ba betwa ke pelo ka bonako le gone ba sa kgone go emela go newa se ba se batlang kgotsa ba sa kgone go emela go dira dilo morago ga ba bangwe,” go ne go ka direga thata gore ba bolele gore ga ba na botsogo jo bo siameng, ba na le lotseno lo lo kwa tlase, ke batsadi ba ba se nang balekane kgotsa ba kile ba dira tiro nngwe ya bokebekwa. Le fa go ntse jalo, makasine ono wa re: “Motho a ka ithuta go nna boikgapo.” Mme o oketsa jaana: “Fa dikolo le ba malapa ba tsaya kgato go ruta bana ba sa le bannye gore ba nne boikgapo, seo se ka thusa gore e nne bagolo ba ba nang le botsogo jo bo botoka le ba ba tlhomameng.”
Go Ruta Bakgweetsi ba ba Botlhaswa Thuto
Balaodibagolo ba kwa India ba leka ditsela tse disha tsa go otlhaya batho ba ba tlolang melao ya tsela ka tsela e e feteletseng ka go dira gore ba dire tiro ya mapodise a pharakano. Boikaelelo jwa bone ke go thusa bakgweetsi go tlhaloganya gore go ntse jang go rarabolola mathata a ba a bakang fa ba tlola melao ya tsela. Jaanong, go na le gore mapodise a kwa Gurgaon, kwa bokonebophirima jwa India a emise fela batho ba ba tlodileng molao a bo a ba duedisa, gape a laela bakgweetsi bano gore ba dire le one sebaka sa metsotso e le 30 kgotsa go feta ba laola pharakano. Bakgweetsi bangwe ba dumela gore thuto eno e fetotse tsela e ba lebang dilo ka yone. Bharti Arora, yo e leng motlatsa mokomishinara wa mapodise mo lefelong leo, a re: “Letsatsi le letsatsi mo Gurgaon re duedisa batho ba le sekete ka ntlha ya go tlola melao ya pharakano. Re ne re ka nna le ‘mapodise’ a mangwe a le 1 000 letsatsi le letsatsi.”