Nna le Mokgele

GO TSENA sekolo o se na mokgele go tshwana le go taboga lobelo mo tseleng e e se nang mola wa phenyo. Baebele ya re: “Itse kwa o yang teng.” (Diane 4:26, Contemporary English Version) Go nna le mokgele go tla go thusa gore o nne o tlhomile mogopolo e bile go tla dira gore dilo di nne motlhofo fa o simolola go bereka. O ka ipeela mokgele jang?

Ipotse, ‘Ke ikaeletse go itshedisa jang?’ O se ka wa diega go araba potso eo. Go na le moo, rulaganya go sa le gale. Ka ntlha yang? Akanya ka gone ka tsela eno: Fa o batla go tsaya loeto, sa ntlha o tshwanetse go dira tshwetso ya gore o tla ya kae. Go tswa foo o tla leba mmapa mme o dire tshwetso ya gore ke tsela efe e e molemolemo ya go fitlha koo. O ka dira se se tshwanang le ka tiro ya gago ya sekolo. Akanyetsa gore o tla batla go dira tiro ya mofuta mang, mme go tswa foo o tlhophe dikhoso tse di tla go thusang go fitlhelela mokgele oo.

Ela tlhoko: Basha ba le bantsi ba ikaeletse go dira fela tiro e ba e ratang thata—ka sekai, go nna setswerere sa mmino—mme ga ba bone ba ka dira mofuta ope fela wa tiro. Tsela e e botoka ya go dira dilo ke efe?

1. Akanya ka dilo tse o nang le bokgoni mo go tsone. Ka sekai, a o itumelela tiro e e tsamaisanang le go neela batho ditirelo kgotsa go thusa batho ba bangwe? A o kgona tiro ya bomakheneke? ya dipalo? ya madi? ya go baakanya dilo?

2. Akanya ka ditiro tse o ka di tlhophang. Ke ditiro dife tse di tsamaisanang sentle le bokgoni jwa gago? Buisana le ba bangwe ka ditiro tse dingwe tse o ka di dirang go na le go akanya fela ka tiro e o e ratang. Mme akanyetsa dilo sentle. Ka sekai, a tiro e o batlang go e dira e teng le kwa mafelong a mangwe fa go ka direga gore o fuduge? A thapiso e e batlegang e tla go tsenya mo sekolotong se segolo?

3. Akanya ka ditshono tse o nang le tsone. Fa o setse o sweditse ka gore o ka rata go dira tiro ya mofuta mang, leba gore diphatlha tsa mofuta oo wa tiro di dintsi go le kana kang mo lefelong la lona. A o itse kwa o ka bonang tiro gone? Fa go le jalo, a golo koo ba thapisa batho ba ntse ba bereka? A go na le dithulaganyo tsa go ruta batho tiro?

Ntlha e o ka e dirisang: Buisana le batsadi ba gago, barutabana ba gago le ditsala tsa gago tse di godileng. Batla tshedimosetso mo makwalodikgannyeng a lefelo la lona le mo Internet.

Sa botlhokwa: Fa o na le mokgele, seo se tla dira gore o itse kwa o yang gone ka thuto ya gago le gore e nne le bokao.

Ke eng fa o sa simolole? Gone jaanong fa o sa ntse o le kwa sekolong, akanya ka dintlha tse tharo tse go builweng ka tsone fa godimo. Kwala mekgele ya gago fa fatshe mme o tlotle le batsadi ba gago ka yone.