‘Leina le le Molemo le Botoka Go na Le Dikhumo Tse Dintsi’

LEINA le le molemo kgotsa go itsiwe o le motho yo o siameng go botlhokwa thata mo e leng gore kwa mafelong a mangwe go sirelediwa semolao. Le ka sirelediwa gore le se ka la gogobisiwa mo seretseng kgotsa la tlhapadiwa. Seo se re gopotsa seane sa bogologolo se se reng: “Go tshwanetse ga tlhophiwa leina go na le dikhumo tse dintsi; go amogelwa go botoka go na le selefera le gouta.” (Diane 22:1) Re ka nna le leina le le molemo jang re bo re tlotliwa ke batho ba bangwe? Baebele e na le dikakantsho tse di molemo.

Ka sekai, ela tlhoko se Baebele e se buang mo Pesalema 15. Fa Mopesalema a ne a araba potso e e reng, “Ke mang yo o tla nnang molalediwa mo mogopeng wa [Modimo]?” o ne a bua jaana: “Yo o . . . dirang tshiamo e bile a bua boammaaruri mo pelong ya gagwe. Ga a a senya batho leina . . . , ga a a direla molekane wa gagwe sepe se se bosula, gape ga a a kgoba motho yo a tlwaelaneng thata le ene. Mo matlhong a gagwe ope fela yo o nyatsegang o a ganwa . . . O ikanne malebana le se se bosula, mme le fa go ntse jalo ga a fetoge . . . Gape ga a tsaya pipamolomo.” (Pesalema 15:1-5) A o ka se tlotle motho yo o tshelang melaometheo eo?

Boikokobetso ke nonofo e nngwe e e dirang gore batho ba go tlotle. Diane 15:33 ya re: “Go na le boikokobetso pele ga kgalalelo.” Akanya ka seno: Batho ba ba ikokobeditseng ba leka go bona gore ba ka tokafatsa fa kae e bile ba leka thata go dira jalo. Gape ba ikemiseditse go kopa maitshwarelo fa ba kgopisitse mongwe. (Jakobe 3:2) Batho ba ba ikgogomosang ga ba a nna jalo, bone ba itlhaganelela go kgopisega. Diane 16:18 ya re: “Boikgogomoso bo tla pele ga go thubagana, mme moya o o mabela o tla pele ga go kgotšwa.”

Jaanong o tshwanetse go dira eng fa mongwe a senya leina la gago le lentle? A o tshwanetse go nna mafega o bo o mo galefela? Ipotse jaana, ‘Fa nka leka go sireletsa leina la me, a ke tla bo ke sa anamise maaka?’ Le fa ka dinako tse dingwe go tlhokega gore o tseye kgato ya semolao, Baebele e re naya kgakololo eno e e botlhale: “O se ka wa potlakela go ya go sekaseka kgetsi ya molao,” go na le moo, “seka kgang ya gago le mongwe ka wena.” (Diane 25:8, 9)a Go rarabolola kgang ka tsela eno e e botlhale e bile o ritibetse, go ka go thusa gore o se ka wa latlhegelwa ke madi ka ntlha ya go seka.

Baebele ga e bue fela ka dikgang tsa bodumedi. Ke buka e e nang le dikgakololo tse di siameng ka botshelo. Batho ba ba dirisang botlhale jo bo mo go yone ba nna le mekgwa e e dirang gore ba tlotliwe le go nna le leina le le molemo.